Read Uab Meto 1 SAMUEL 3 Bible Online

1 SAMUEL 3 - Uab Meto bible

1 SAMUEL 3

¹Fun onane te, Nai Samuel le in fe in an-ana' nane antuthae UISNENO anbi Nai Eli in matan. Anbi batan nane UISNENO In a'an anbol no mese-mese ma katit fa mnitas na'ko UISNENO.

²Anbi fai mese Nai Eli le in namnasi nae le'uf nane ma matan nakakau nane, in antup anbi in ke'an,

³ma Nai Samuel antup anhaumak Peti Fef bela UISNENO, anbi Um-ume knino nanan. Leka fe kan meusab fe ma paku fe anpin,

⁴UISNENO no'en nai Samuel, oke te Nai Samuel natae nak, “Au, es kau i, Ama!”

⁵Nalali te in naen anao neu Nai Eli ma in nak, “Sa' ka au Ama? Ho mo'en kau neu sa' ka?” Mes Nai Eli natae nak, “Au ka o'en ko fa, amfani hem tup nai.” Oke te Nai Samuel in anao ma antup anteni.

⁶Nalali te UISNENO In no'en anteni Nai Samuel, mes Nai Samuel in ka nahin fa neu amno'en nane UISNENO, natuin UISNENO fe ka namolok nok nit fa in. Es nane te in anfen, ma in anao neu Nai Eli ma natoti nak, “Sa' ka au Ama? Nansa' Ama ho mo'en kau? Nai Eli natae nak, “Au ka o'en ko fa, au anah; amfani nai hem tup.”

⁸UISNENO no'en Nai Samuel anbi hae tenu; oke te Nai Samuel anfen ma anao neu Nai Eli ma nak, “Sa' ka au Ama? Ho moen kau neu sa' ka Ama?” Ma anbi tabu nane Nai Eli in nahin nak UISNENO In es no'en anah nane.

⁹Es nane te in nak neu Nai Samuel nak, “Amfani nai hem tup, ma leka no'en anteni ko ho mutae mak, ‘Mukua a'am, koi UISNENO, Ho ate kau au anen.’ ” Oke te Nai Samuel anfani neu in balan anteni ma antup.

¹⁰Nalali te UISNENO nem, ma anhake anbi bale nane ma no'en anteni nak, “Samuel! Samuel!” Ma Nai Samuel natae nak, “Mukua a'am, koi UISNENO, Ho ate kau au anen.”

¹¹Oke te UISNENO nakua a'an nak, “Au of he moe lasi matani mese neu to Israel, talantia sekau am sekau le in anen lasi nane te of in nekan namneku.

¹²Anbi neno nane, of Au moe ani ale sa' le Au sali ani neu Nai Eli in ume nanan na'ko ahunut talantia amunit.

¹³Au uton ulali neune neu of Au kas in ume nanan sin piut natuin in anhenu sin nasi'u nalali Kau. Nai Eli in nahin in anhenu sin sanat-sanat sin, mes in ka nakain fa sin.

¹⁴Es nane te Au sup neu Nai Eli in ume nanan sin, nak sin sanat le anae le'uf nane of kan kub nani fa natuin fua tulu ai tulu tnatas sa' amsa talantia nabal-bal.”

¹⁵Nalali onane te Nai Samuel antup anfani anteni, ma noka fa onane in anfen ma anfai ale eno Ume UISNENO. Nai Samuel in namtau he naton lasi mnitas nane neu Nai Eli,

¹⁶mes Nai Eli no'en in, ma nak neune nak, “Samuel, au anah.” Nai Samuel natae nak, “Au es kau i, Ama.”

¹⁷Ma Nai Eli natoti Nai Samuel nak, “UISNENO naton lasi sa' neu ko ka? Muton mani lasi nane ok-oke neu kau. Leka fefa mese na'ko lasi nane ho mutolo' mani neu kau, namneo-namneo Uisneno mes ankas ko.”

¹⁸Oke te Nai Samuel naton nani lasi nane ok-oke neu Nai Eli. Katit fa lasi fefa mese amsa le in he natolo' nani. Nalali te Nai Eli nak, “In UISNENO kun, so In anmoe lasi sa' le leko kun anbi In human In matan.”

¹⁹Nai Samuel in anfonat ma nanae piut. UISNENO nok in ma anmoe ale sa' le Nai Samuel na'uab ma namolok namneo-namneo anbol.

²⁰Es nane te to Israel ok-oke na'ko pah nane ok-oke sin antebes nak Nai Samuel lo UISNENO In Mafefa knino kun. Leka Nai Samuel in namolok, to Israel ok-oke sin anen. Ma natuin UISNENO fe nalil'on piut anbi Silo, ma anbi hae ahunut In nalil'on neu Nai Samuel ma namolok nok in.