Read Uab Meto 1 SAMUEL 30 Bible Online

1 SAMUEL 30 - Uab Meto bible

1 SAMUEL 30

¹Neno nua namuni te, Nai Daud nok in amnokten sin anfani neu Ziklag. Leka sin nem antia anbi nane, sin napeni nak atoni Amalek sin nateku nalali pah Yehuda aon bian a'ne'u ma sin nem ma nape' Ziklag. Sin ka namate fa es amsa. Mes sin notu nani kot nane ok-oke ma sin anao anfini ma sin neki ale bife, ale li'ana ma Ziklag tuaken bian. Sin amsa anheke nan Nai Daud in ume nanan sin ma in amnokten sin ume nanan sin, ma Nai Daud in fenainu nua sin bi Ahinoam ma bi Abigail. Nai Daud nok in amnokten sin nekan antu' anae le'uf, sin ankae ka nas-nas fa, talantia kan kae nabe'i anteni fa.

⁶Nai Daud in amnokten sin nekan antu anae le'uf natuin sin fenai ma sin anah sin namneku ok-oke. Es nane te sin hen poli Nai Daud neki fatu. Ma nok nane te Nai Daud in anbi mafena anae le'uf, mes In UISNENO namepan in nekan.

⁷Oke te Nai Daud nak neu Ana' Fuat Knino Nai Abyatar Nai Ahimelekh anmone nak, “Meki Efod nane nem neu kau!” Ma Nai Abyatar in neki Efod nane neu Nai Daud.

⁸Nalali te Nai Daud natoti UISNENO nak, “Nabe'i ka au li'u utuin pukan asikat nane ka? Nabe'i ka au he upeni sin ka?” UISNENO natae nak, “Neu nai, hom li'u mutuin sin nai; ho of mupeni sin ma mufetin sin ok-oke.”

⁹Oke te Nai Daud nok in amnokten natun ne sin anfen ma anao ma anli'u natuin sin. Leka sin nem antia Noel Besor, Nai Daud nok in amnokten 400 sin anao anfini, mes amnokten bian 200 sin nabalah anbi nane. Natuin sin anhae anmate ma kan lak nabe'i fa Noel Besor anteni.

¹¹Anbi sin lanan nane Nai Daud in amnokten sin naeku nok li'anmone atoni Mesir mese anbi mnela, oke te sin neki in nem neu Nai Daud. Anfe neune in nah ma ninu,

¹²ma anfe neune amsa bubu fua laka, ma tua min kase fuan ametos tlae nua. Leka in nah nalali, oke te in nabe'i anfani; natuin neno tenu in ka nah ma ka ninu fa!

¹³Nalali te Nai Daud natoti in nak, “Ho Usif nane sekau ka, ma ho mu'ko me ka?” Li'ana nane natae nak, “Au atoni Mesir kau; ate na'ko atoni Amalek mese. Au Usif anpolin kau anbi neno tenu afinit natuin au upeni menas.

¹⁴Hai mipe' milali atoni Kreti sin pah anbi Yehuda aon bian a'ne'u ma pah Nai Kaleb ini, ma hai motu milali kot Ziklag ok-oke.”

¹⁵Oke te Nai Daud natoti anteni nak, “Hom lomi ka hem hel kai lanan neu atoni pukan asikat nane?” In natae nak, “Au lomi, mes Usif ho manba'an mok kau anbi Uisneno In kanan nak of ho ka mumate kau fa Usif, ai ho ka muna'at kau fa neu au Usif atoni Amalek nane.”

¹⁶Oke te in anhelan sin lanan neu bale atoni pukan asikat nane. Mes anbi tabu nane atoni pukan asikat nane sin nasitbok anbi bale nane ok-oke, ma sin nah ma ninu ma sin anmoe fesat anaek natuin osan anaek le sin nasik ale sa'-sa' le sin neki na'ko pah Filistin ma Yehuda.

¹⁷Anbi neno noka fa fe anmeusab, Nai Daud nape' sin ma anken sin, fun sin anmakenan ma anmanua talantia anfai. Naik na'ko atoni munif natun ha le sin naen natuin ansae neki bikase paha snaen, katit fa es anteni na'ko musu le naen he nafetnon.

¹⁸Nai Daud in nis ma anbe'u ma nafetin ale sa'-sa' le atoni Amalek nasik neki sin, fun in fenainu nua sin amsa;

¹⁹katit fa sa'-sa' le he namneku amsa. Ale li'anmone ma li'anfeto ma ale bale le atoni Amalek nasik nalali sin, Nai Daud nasik nan nafani sin.

²⁰Ma Nai Daud amsa in nasik nan ale bibi kase ma mu'it bian anteni. Ale mu'it-mu'it nane Nai Daud in amnokten anpo' sin nahunu, anbeti naikan sin na'ko ale bale bian le sin nasik nan sin, ma sin nak, “I pa' ma nama' neu Nai Daud!”

²¹Nalali onane te Nai Daud in neki anfani neu in amnokten natun nua le sin anhae anmate he natuin in, ma le in nasaitan sin anbi Noel Besor ninen. Sin nem na ansenu Nai Daud nok in amnokten, ma Nai Daud anfe tetus ma aomina neu sin.

²²Mes anbi Nai Daud in amnokten nane, anmu'i nek amle'ut, apalu' ma akomat. Sin na'uab nak, “Atoni-atoni le afi sin ka nokan fa; es nane te ka nabe'i fa he nati' sin napeni sa'-sa' na'ko ale sa' le hit tasik tan sin le nane. Sin al nabe'i ansimo nafani sin anah sin ma sin fenai sin, ma oke te sin anao nai.”

²³Mes Nai Daud natae sin nak, “Au bia ki al-al ki, kaisa hi moe onane nok sa' le UISNENO anfe nalali neu kit! Ai UISNENO In ka naneo ma nahafo nalali kit fa ma anfe nalali kit lasi mnisat neu atoni pukan asikat nane?

²⁴Es nane te ka nabe'i fa he es amsa ansimo han totis nane! Mes es-es te napeni pa' ma nama' ok-oke, ambati namnes-namnes; sin le namaika ma anpanat ale bale mes napeni pa' ma nama' papmese onle sin le anao ma antam anbi makenat.”

²⁵Oke te lasi nane anmoe anfani lasi lekat lulut mese na'ko Nai Daud, ma lekat lulut nane sin natuin nani anbi Israel talantia neno i.

²⁶Leka Nai Daud anfani neu Zilag, in ansonu bale bian le sin nasik nan anbi makenat neu ale nakaf anbi kot-kot Yehuda le anbab in, ma in nak, “Le i tnatas neu ki na'ko bale le hai misik man sin na'ko UISNENO In musu sin.”

²⁷Kot-kot nane esle': Betel ma Rama anbi Yehuda bian a'ne'u, Yatir, Aroër, Sifmot, Estemoa, Rakhal, ma kot-kot atoni Yerahmeel, kot-kot atoni Keni, Horma, Bor-Asan, Atakh ma Hebron. Ale kot le afi Nai Daud nok in amnokten sin naoinsok anbine, ansonu atnatas nane neu sin.