Read Uab Meto 1 SAMUEL 4 Bible Online

1 SAMUEL 4 - Uab Meto bible

1 SAMUEL 4

¹Anbi tabu nane atoni Filistin neki sin to meo ok-oke he nale'un naskuku Israel; es nane te to meo Israel an nao mat neu bale makenat; sin natua anbi um-ume anhaumak Eben-Haezer, ma to meo Filistin sin um-ume anbi Afek.

²To meo Filistin sin anao mat ma anmaken nok Israel ma leka makenat nanaobon nok matani, onane te sin nis ma anbe'u to meo Israel ma oni atoni Israel nifun ha anmate anbi makenat nane.

³Ma leka to meo le fe nabalah anfani neu sin um-ume, ale nakaf Israel sin nak, “Nansa' talantia UISNENO nafetin kit ma atoni Filistin sin nis ma anbe'u kit anbi neno i? Aim hit taiti teki Peti Fef Bela UISNENO na'ko Silo, ma hit teki nem neu i, he nati' UISNENO anbab kit ma nafetin kit na'ko musu.”

⁴Oke te sin ansonu atoni anao neu Silo he naiti Peti Fef Bela UISNENO le anfani on bale UISNENO Akuasat Afin-finit antunon anbine. Nai Eli in anmone nua sin, Nai Hofni ma Nai Pinehas sin anao natuin Peti Fef Bela UISNENO nane.

⁵Leka sin neki Peti Fef Bela UISNENO nem antia um-ume Israel, onane te atoni Israel sin naba' hanan na'aik matain le'uf, talantia pah antainun.

⁶Atoni Filistin amsa sin anen a'baf nane oke te sin nak, “Nansa' atoni Ibrani nane sin ankoa ma naba'?” Mes leka sin anen nak Peti Fef Bela UISNENO nem antia um-ume Ibrani,

⁷onane te sin namtau ma nak, “Anmu'i UISNENO nem neu sin um-ume! Amle'ut neu kit! Fe hit ka ta eku tok fa lasi onle i!

⁸Amle'ut neu kit teb-teb! Sekau nabe'i ka he nafetin kit na'ko UISNENO abe'it nane? Ait ka UISNENO nane fa amsa esle' namate atoni Mesir anbi mnela snaen anbi neno ahunut?

⁹Amhatani hi nekam nai, hoi atoni Filistin! Amaken nai on atoni mone, kalu kahaf, hi of amfani ate atoni-atoni Ibrani nane, on afi sin anfani ate neu ki. Es nane te amaken nai nok matani lek-leko!”

¹⁰Nalali te atoni Filistin sin anmaken nok matain le'uf ma sin nis ma anbe'u to meo Israel. Atoni Israel sin naen neu sin um-ume mese-mese. Namneo-namneo nis ma anbe'u Israel lo nae le'uf kun: to meo 30.000 esle' anbel anbi makenat neno nane.

¹¹Ma musu Israel sin antet nan Peti Fef Bela UISNENO, ma Nai Eli in anmone nua sin Nai Hofni ma Nai Pinehas, anmate amsa.

¹²Atoni mese na'ko uf Benyamin naen na'ko bale makenat anao neu Silo, in nem antia nani amsa anbi neno nane. On ataka susal nukat, in anpisu in bale pake ma antao afu neu in fufun.

¹³Nai Eli le in nekan na'unu anae le'uf natenab Peti Fef Bela UISNENO, in fe antoko anbi in atoko anbi lanan ninen, nok nek susal. Leka atoni nane in naton lasi neu musu nis ma anbe'u Israel, kot nane sin tuaken ok-oke an anbai nok han kaet anae le'uf.

¹⁴Nai Eli in nen han anbait nane, oke te in natoti nak, “Slutuf sa' ka es nane?” Atoni nane in naen nem neu Nai Eli; ma leka in nem antia, in naton lasi amle'ut nane.

¹⁵Nai Eli in ton bo'sio am fanu ma in matan afoloen.

¹⁶Atoni nane nak neu Nai Eli nak, “Neno i au aen u'ko bale makenat ma au fe aum a'tia esle' i.” Nai Eli natoti neune nak, “Anmone, lasi anbi nane onme ka?”

¹⁷Amneki haef nane natae nak, “Israel naen na'ko atoni Filistin. Nis ma anbe'u kit anae le'uf. Atoni namfau le anmate, Ama ho anmone nua sin Nai Hofni ma Nai Pinehas sin anmate amsa. Ma Peti Fef Bela UISNENO musu antet nan amsa!”

¹⁸Leka atoni nane in naton neu Peti Fef Bela nane, Nai Eli anmofu natnen na'ko in atoko anbi eno ninen. Fun in namnasi ma anpok talantia leka in anmofu in to'an nat'ipu, ma in anmate. In naplenat Israel on alef lasi ton bo'ha.

¹⁹Anbi tabu nane, Nai Eli nanef, Nai Pinehas in fenai, fe naapu, anhaumak he nahoni. Leka in anen nak Peti Fef Bela UISNENO musu antet nan, ma in babaf nok in mone anmate nalali, nok askeken in anaben men-mahonit ma ka lo fa te in nahoni.

²⁰Leka in asnasan he natfek, ale bife le anbab in sin nak, “Muhelan ho nekam nai! Ho muhoni an-atoni!” Mes in ka natae fa ma kan kiso fa sin.

²¹Anah nane nakanab Nai Ikabod, fun in nak, “UISNENO In Atoko Apinat namneku nalali na'ko Israel,” Le in natenab esle' nak Peti Fef Bela antet nan nalali ma in babaf nok in mone anmate nalali. Es nane te in nak, “UISNENO In Atoko Apinat namneku nalali na'ko Israel, natuin Peti Fef Bela UISNENO antet nan nalali.”