Read Uab Meto 1 SAMUEL 5 Bible Online

1 SAMUEL 5 - Uab Meto bible

1 SAMUEL 5

¹Leka atoni Filistin sin antet nan Peti Fef Bela Uisneno, sin neki na'ko Eben-Haezer anao neu Asdod, sin kot.

²Anbi nane sin naiti Peti nane ma sin natam neu sin ume le'u, ma antao anbi sin le'u mahuma Dagon aon bian.

³Leka nok-nok ana' Asdod tuaken sin nem neu ume le'u nane, sin nit nak le'u mahuma Dagon anbel anbenton anbi nain anbi Peti Fef Bela UISNENO in human in matan. Sin naiti le'u mahuma nane ma nahakeb nafani anbi in balan.

⁴Mes noka fa, fe nok-nok ana, sin nit neu le'u mahuma nane anbel anteni anbi Peti Fef Bela in human in matan. Haefes le i le'u mahuma nane in anakan ma in niman nua sin nat'ipun ma nabel'ok anbi ni teli nane; al le'u mahuma nane aon es fe nabalah. (

⁵Es nane te, ale ana' fuat uisneno teta Dagon ma ale naluli abesa anbi Asdod sin antanhai ni teli ume le'u Dagon enon ma kan teli fa talantia neno i.)

⁶Nalali te UISNENO ankas Asdod tuaken ma tuafen le anhaumak bale nane sin napeni bius ai anbi sin aoken.

⁷Leka sin nit sa' le anbol neu sin onane te sin nak, “Israel sin Uisneno ankas kit nok hit uisneno teta Dagon. Ka nabe'i fa Peti Fef Bela Uisneno Israel hit tatau nabalah anbi i.”

⁸Es nane te sin anhone Kesel Filistin sin nim sin he nati' sin nabua, oke te natoti sin nak, “Peti Fef Bela Uisneno Israel nane mes hit het moe sa' neune ka?” Kesel sin le nane natae nak, “Mitnanib neu kot Gat.” Es nane te, Peti nane natnanib neu kot Gad, kot mese anbi Filistin.

⁹Mes leka Peti nane antia bale nane, UISNENO ankas kot nane amsa ma napoitan slutuf anae le'uf anbi kot nane. Kot nane tuaken, he munif ai he mnasi ankas sin neki bius ai le anpoi anbi sin aoken ok-oke.

¹⁰Oke te neki Peti Fef Bela nane neu Ekron, kot Filistin bian anteni. Leka Peti nane antia anbi bale nane, tuafen kot nane an anbai nak, “Peti Fef Bela Uisneno Israel neki nem neu i he namate kit ok-oke.”

¹¹Es nane te sin no'en Kesel Filistin ok-oke he nati' sin nabua, oke te sin nak, “Amsonu mifani Peti Fef Bela Uisneno Israel nane neu afi in balan he nati' kais in namate kit ma hit ume nanan sin.” Slutuf anbol anbi kot nane ok-oke natuin Uisneno ankas tuafen kot nane nok mafen le'uf.

¹²Atoni-atoni le kan mate fa, le bius ai antoman sin, ma kot nane in tuaf sin an anbai neu sin uisneno teta, antoti hen bab sin.