Read Uab Meto 1 SAMUEL 6 Bible Online

1 SAMUEL 6 - Uab Meto bible

1 SAMUEL 6

¹Leka Peti Fef Bela UISNENO anbi Filistin funan hitu,

²atoni Israel no'en ale ana' fuat ma ale amnane, oke te natoti sin nak, “Peti Fef Bela UISNENO nane mes hit het moe sa' neune ka? Leka hit atsonu tafani neu in balan, mes hit het moe onme ka?”

³Oke te sin natae nak, “Peti Fef Bela Uisneno Israel nane kais him sonu mifani nok luman, so mes him sonu mifani meki tulu nekaf hen soi hi sanat. Nok nane te of naleko ki, ma of hi mihin nansa' talantia Uisneno Israel nane ankas ki piut-piut.”

⁴Ma sin natoti anteni nak, “Hai hem fe tulu nekaf sa' neune ka?” Ale ana' fuat nane sin natae nak, “Bisul mnatu nim ma ifo mnatu nim, anmatom nok Kesel Filistin sin amfauken. Ait amle'ut nane ka namasbon fa on bisu ai ma ifo le nale'un ki oke he to ma he kesel ka?

⁵Es nane te, hi mes amoe bius ai mnatu le namasbon on bius ai ma ifo mnatu le namasbon on ifo le fe nale'un hi pah. Nok nane te hi minaeba Uisneno Israel. Oni nok nane te In of nasnas ma kan kas kit fa, ma hit uisneno teta nok hit pah.

⁶Maota sa' ka he hi mi'nakfatu piut on afi Kesel Mesir nok in to sin anbi neno ahunut? Kais amnikan neu afi Uisneno namaeba sin, talantia sin namle'u ma oke te sin nafetin atoni Israel ma nasaitan pah Mesir.

⁷Es nane, te miloitan ma mibalab aklet fe'u mese nok bijae nua le fe nasusu ana' ma le fe kan pake fa hen hel aklet. Amfutu bijae nua en nane neu aklet, ma ampo'o bijae ana' nua en nane anfani neu o'of nanan.

⁸Nalali te, maiti Peti Fef Bela UISNENO, misaeb neu aklet nane, ma amtao anbi in aon bian peti ana' mese le hi mitua mani nok bale-bale mnatu le mes hi mitulu neune In on ansoi hi sanat. Oke aklet ma bijae te mifetin he in anao kun.

⁹Ampanat nai in anaon; leka Peti Fef Bela nane neki anao neu in pah es kot Bet-Semes, nane in otan nak Uisneno Israel es anfe snama ma sletu nane neu kit. Mes leka aklet nane ka nao an ali fa bale nane, hit of tahin nak snama ma sletu nane ka na'ko fa Uisneno Israel, mes nane in anbolkun onane.”

¹⁰Nalali te sin anmoe natuin; sin anhelnan bijae nua le fe nasusu ana', oke te anfutun sin neu aklet, ma bijae ana' sin nane an ek sin anbi o'of nanan.

¹¹Oke te nasaeb Peti Fef Bela neu aklet in tunan, onane amsa peti ana' matua ifo mnatu ma bius ai mnatu le namas onle bius ai-bius ai nane.

¹²Bijae nane sin anao natuin lanan piut neu Bet-Semes; mu'it nane anhomae mes anao piut, ma kan beo fa neu li ai neu ne'u na'ko lanan nane. Kesel Filistin nim sin natuin piut talantia nakat Bet-Semes.

¹³Anbi tabu nane Bet-Semes tuaken fe sin anlefi ane kase anbi nonof. Leka sin nit Peti Fef Bela nane, sin ansenu nok malinat anaek.

¹⁴Aklet nane nasnas anhaumak fatu naek mese anbi Nai Yosua in lene, atoni Bet-Semes. Kot nane tuaken sin anpolo hau aklet nane ma oke te anlolo bijae nua en nane on fua tulu mnotu neu UISNENO.

¹⁵Nalali te atoni-atoni Lewi nasanut Peti Fef Bela UISNENO ma peti ana' le matua nok bale mnatu nane, ma nasaeb neu fatu naek nane fafon. Nalali te Bet-Semes tuaken sin natulu fua tulu ma fua tulu bian anteni neu UISNENO.

¹⁶Leka Kesel Filistin nim sin nit lasi nane sin anfani neu Ekron anbi neno nane amsa.

¹⁷Nok lasi nane te atoni Filistin sin ansonu nalali fua tulu sako sanat neu UISNENO na'ko kot nim sin tuaken le Kesel Filistin nim naplenat sin. Kot-kot nane esle': Asdod, Gaza, Askelon, Gad ma Ekron. Kot-kot nane bian mabaki lape ma bian kahaf. Kot mese-mese ansonu bius ai mnatu mese ma ifo mnatu mese. Ataka na'ko lasi nane esle' fatu naek bale sin nasaeb Peti Fef Bela UISNENO neune. Talantia neno i fatu nane fe esan anbi Nai Yosua lene, atoni Bet-Semes nane.

¹⁹Mes natuin atoni-atoni Bet-Semes nane sin natnu' neu Peti Fef Bela UISNENO nanan nane, es nane te UISNENO namate atoni bo'hitu anbi sin. Oke te to ankae ma ankul natuin UISNENO nasanut nem neu sin snama ma sletu anae le'uf.

²⁰Oke te Bet-Semes tuakenu nak, “Sekau ka es anhake nabe'i anbi UISNENO, Uisneno Le Knino nane ka? Peti nane mes hit he teki anao neu me ka he nati' na'lo na'ko kit?”

²¹Oke te sin ansonu haef neu Kiryat-Yearim tuaken neki a'at on i, “Atoni Filistin sin ansonu nafani Peti Fef Bela UISNENO. Aim nai ma meki peti nane neu hi balam.”