Read Uab Meto 1 SAMUEL 7 Bible Online

1 SAMUEL 7 - Uab Meto bible

1 SAMUEL 7

¹Oke te Kiryat-Yearim tuaken sin nem ma neki Peti Fef Bela UISNENO nane ma natam neu Nai Abinadab ume; ume nane anbi tubu tunan. Nalali te sin naki'at Nai Eleazar Nai Abinadab anmone, hen pao Peti Fef Bela nane.

²Fun a'lo amsa Peti Fef Bela UISNENO nane anbi Kiryat-Yearim, oni ton bo'nua. Anbi tabu nane in nanan nonot Israel ok-oke an anbai neu UISNENO antoti hen bab sin.

³Oke te Nai Samuel nak neu nonot Israel nak, “Leka hi mite'un hi nekam neu UISNENO ma miluli mibes neu In nok hi nekam ok-oke, mes so him polin ale uisneno teta ma le'u mahuma uisneno teta fenai Asytoret. Mina'at hi monim ok-oke neu UISNENO ma miluli mibes al neu In kun, ma onane te UISNENO of In nafetin ki na'ko atoni Filistin.”

⁴Es nane te atoni Israel anpolin ale le'u mahuma Uisneno teta Baal ma le'u mahuma uisneno teta fenai Asytoret, oke te sin aetnom neu UISNENO anmes.

⁵Oke onane te Nai Samuel nak, “Amnibun mibuab to Israel ok-oke nem anbi Mizpa, ma of au onen toti neu UISNENO antom ki.”

⁶Oke te sin nabua ok-oke anbi Mizpa. Ma sin ansote oe ma an'op nani on fua tulu neu UISNENO, ma sin nanahok anbi neno nane in nanan. Oke te sin nak, “Hai misanab milali neu UISNENO.” (Ma Nai Samuel in anfatan lasi lef lasi neu to Israel anbi Mizpa.)

⁷Leka atoni Filistin sin nen nak atoni Israel nabua anbi Mizpa, nalali te Kesel Filistin nim sin anfen ma anao neu bale nane oke te sin anmaken nok atoni Israel. Atoni Israel sin nen lasi nane te sin namtau.

⁸Ma sin nak neu Nai Samuel nak, “Kaisa ho musnas na'ko onen totis neu UISNENO hit Uisneno he nati' In nafetin kit na'ko atoni Filistin.”

⁹Natuin lasi nane Nai Samuel anlolo bibi kase tipu mese, oke te natulu nani on fua tulu mnotu neu UISNENO. Oke te in onen toti he nati' UISNENO anbab atoni Israel, ma in onen totis nane masimo.

¹⁰Leka Nai Samuel fe natulu fua tulu mnotu nane, atoni Filistin sin anao mat nem hen makenan; mes anmatom nok tabu nane UISNENO anfe lotos na'punu na'ko neno tnanan nok hanan anae le'uf neu sin. Sin kan tainine fa oke te sin naen nok nek amtaus.

¹¹To meo Israel anpoi na'ko Mizpa oke te anli'u atoni Filistin nane talantia Bet-Kar, ma nale'un naskuku sin.

¹²Oke te Nai Samuel nahakeb fatu mese, anbi nakat Mizpa nok Sen. Ma fatu nane in nakanab nak Eben-Haezer “Fatu Ababat” fun in nak, “UISNENO anbab nalali kit nok alekot.”

¹³Onle nane UISNENO nis ma anbe'u atoni Filistin ma ka nafetin fa sin hen tam anteni neu pah Israel, fe leka Nai Samuel anmoni.

¹⁴Ale kot Israel le atoni Filistin nis ma anbe'u nan sin, na'ko Ekron talantia Gat, anfe nafani sin neu atoni Israel. Atoni Israel napeni nafani sin pah ok-oke. Atoni Israel ma atoni Amori amsa sin anmoni nok lasi halan.

¹⁵Nai Samuel naplenat Israel in anfani alef lasi anbi in monin ok-oke.

¹⁶Ma ton neu ton Nai Samuel anao anfun natef Betel, Gilgal, ma Mizpa. Ma anbi bale-bale nane in anlefi lasi neu ale lasi.

¹⁷Oke te in anfani neu in ume anbi Rama. Anbi bale nane in anfani alef lasi neu atoni Israel ma in amsa nahakeb baki tulu mese neu UISNENO.