Read Uab Meto 1 SAMUEL 8 Bible Online

1 SAMUEL 8 - Uab Meto bible

1 SAMUEL 8

¹Leka Nai Samuel in namnasi, in naiti in anhenu anfani alef lasi anbi Israel.

²In anmone anaet kanan Nai Yoel ma le natuin anteni kanan Nai Abia. Sin anfani alef lasi anbi Bersyeba.

³Mes sin ka natuin fa sin Amaf in amonin, mes sin nami lasi mnisat neu sin aon kun. Ma sin ansimo noni mate ma anlefi lasi ka nok fa amneot.

⁴Es nane te mnasi-mnasi Israel nabua ok-oke, nalali te sin anao neu Nai Samuel anbi Rama,

⁵ma sin nak neune nak, “Ama amnen kai fa, Ama ho mumnasien ma Ama ho anhenu ke natuin fa Ama ho monim. So leko Ama maiti neu kai kesel mese he nati' hai mu'i kesel amsa onle uf-uf bian.”

⁶Mes Nai Samuel in kan malin fa nok lasi nane. Oke te in onen toti neu UISNENO,

⁷ma UISNENO nakua a'an nak, “Amnen ale lasi le to nane antoti neu ko. Natuin sin kan tite ko fa, mes sin antite Kau. Sin kan lomi anteni Kau fa he fani on sin kesel.

⁸Na'ko neno Au eki sin anpoi na'ko Mesir, sin nasaitan Kau ma naluli nabes neu uisneno teta, ma sa' le sin anmoe neu Kau anbi neno i, nane amsa le sin anmoe nalali neu Kau.

⁹Es nane te amsimo sin lasi totis nane nai; mes mumnauba sin nok namneo-namneo, ma mutonan sin neu onme of kesel antao ma anmoe sin.”

¹⁰Ale a'an UISNENO nane Nai Samuel naton nani neu atoni-atoni le antoti kesel mese na'kone, ma in nak,

¹¹“Onle i of hi kesel nane antao ma anmoe ki,” onle nane Nai Samuel natonan sin. “In of naseke hi anhenu antam to meo makenat; bian to meo amakenat le ansae aklet, bian to meo amakenat ansae bikase, ma bian to meo amakenat le anao hae.

¹²Bian of naiti sin anfani to meo nakaf neu atoni nifun mese, ma bian anfani nakaf neu atoni bo'nim. Kesel nane of naseke hi anhenu anmepu on afoi lene, bian anlefi in ane kase, bian antao ma anmoe aikan ma bale manuat neu in aklet makenat.

¹³Ma anbife sin of anlenu sin hen moe mina fomeni neune, ma anmepu on ahanat neune ma antunu utunu' neune.

¹⁴In of naiti hi lene meto, hi lene tua min kase, ma hi lene bub fua mina le leok le'uf ma anfe nani neu in ameput sin.

¹⁵Hi lene meto ma hi lene tua min kase sin of him baen noni poni bati bo' na'ko in afan, oke te in anfe nani sin neu ale to meo nakaf ma neu ale in ameput sin.

¹⁶In of naiti hi ate sin, hi mu'it alekot sin ma hi bikase luke mnanu ma in anpake neu in mepu.

¹⁷Bati bo' na'ko hi bibi ma hi bibi kase sin of in naiti sin. Ma hi of amfani in ate.

¹⁸Leka neno nane nem antia, hi of amsakoi natuin kesel le him beti le nane, mes UISNENO of In ka lomi fa he nen hi sakoit nane.”

¹⁹Mes nonot nane sin kan sian fa Nai Samuel in uab molok nane, mes anesi na'ko nane sin nak, “Ka sa'-sa' fa! Maski onme amsa haim lomi he mepeni kesel.

²⁰Haim lomi he mimnes mok uf-uf bian, hai kesel mes he naplenat kai ma anfani atomatas neu kai anbi makenat.

²¹Leka Nai Samuel in anen ale sin uab ma sin molok nane, oke te in natiaba lasi nane neu UISNENO.

²²UISNENO natae Nai Samuel nak, “Mutuin sin a'lomin nai, ma maiti kesel mese nai neu sin.” Nalali te Nai Samuel anlenu atoni-atoni Israel anfani neu sin ume mese-mese.