Read Uab Meto 1 SAMUEL 9 Bible Online

1 SAMUEL 9 - Uab Meto bible

1 SAMUEL 9

¹Anmu'i atoni amu'it mese ma le anmu'i kuasat na'ko uf Benyamin, in kanan Nai Kish. In na'ko ume Nai Bekhorat, na'ko Nai Afiah. Nai Kish amaf es Nai Abiel, Nai Zeror anmone.

²Nai Kish anmu'i anmone mese, kanan Nai Saul, atoni munif mese le namas, nabe'i ma anmatani nok. Katit fa es anbi Israel ok-oke le namas anesin in. In aon amsa anaek ma in hae mnanu kun; atoni Israel sin amnaunken al antia in hanun.

³Anbi neno mese Nai Kish in bikase luke mnanu fauk-fauk namneku. Es nane te Nai Kish nak neu Saul nak, “Ho mok ameput mese, him nao nai ma mami ale bikase luke mnanu nane.”

⁴Oke te Nai Saul ma in ameput nane sin anao ma anfun natef pah neten Efraim pah Salisa, mes sin ka napeni fa mu'it-mu'it nane. Nalali te sin anao piut neu pah Sahalim, mes ale bikase luke mnanu nane katit fa sin anbi nane. Sin nami amsa anbi pah Benyamin, mes luman kun.

⁵Leka sin nem antia pah Zuf, Nai Saul nak neu in ameput nak, “Aum he hit atfani nai, kais-kaisa au ama nekan na'unu natenab kit nesi na'ko ale bikase luke mnanu nane.”

⁶Ameput nane natae nak, “Maut fe Ama! Anmu'i ate Uisneno mese anbi kot le i. Ale atoni antola in natuin sa' le in naton namneo-namneo anbol. Aum he hit atnao teune, oni nabe'i in naton neu kit antom ale bikase luke mnanu nane neu sin eseun me ka.”

⁷Nai Saul nak, “Leka hit atnao ma tatef tok in, of hit het fe sa' neune ka? Bukae le hit teki nane katit fa anteni, ma hit kat mu'i fa sa'-sa' neu hit het fe neu ate Uisneno nane, ai ka?”

⁸Ameput nane natae nak, “Au fe mu'i noni muti pisa mese es i. Noni muti nane of au fe ani neu ate Uisneno nane he nati' in anlomi he naton neu kit antom ale bikase luke mnanu nane sin es me ke?”

⁹“Leko!” Nai Saul natae onane. “Aum he hit atnao.” Oke te sin anao neu kot, bale ate Uisneno nane anbine. Leka sin ansae tubu le an ali neu kot nane, sin natef nok bife munif fauk-fauk le sin hen sote oe. Oke te sin natoti bife muinfeun nane nak, “Atoni mamata nane in es kot ka?” (Anbi tabu nane Mafefa knino antek nak mamata, es nane leka es anlomi he natoti sa'-sa' neu Uisneno, in na'uab nak on i, “Aim he hit atnao teu atoni mamata.”)

¹²“In esan,” bife muinfeun nane sin natae onane, “in fe anao nahunun ki. Leka hi amnao amanap, oni of mipeni in. In fe nem neu kot natuin neno i anbi tubu tunan anbi baki tulu fafon anmu'i fua tulu neu to. Le anhone sin le nane of sin fe kan bukae fa leka in fe ka nem antia fa, natuin in mes hen fe tetus nahun fe neu fua tulu nane. Leka hi amnao esle' i, of hi mipeni in leka in fe kan sae fa neu tubu hen bukae.”

¹⁴Es nane te Nai Saul nok in ameput anao neu kot, ma leka sin antam eno naek sin natef nok Nai Samuel le fe he nao an ali tubu tunan bale luli besa.

¹⁵Fun neno mese nahunu na'ko nane UISNENO nakua a'an neu Nai Samuel nak on i,

¹⁶“Noka fa oni onle i, of Au lenu atoni mese na'ko uf Benyamin he naeku nok ko. Am'op mina fomeni neu in, he nati' anfani kesel neu Au nonot Israel. In of nafetin Au nonot na'ko atoni Filistin. Au it ulali susal mafena na'ko Au nonot ma Au nen sin kaet kulut antoti he Au bab sin.”

¹⁷Leka Nai Samuel in nit Nai Saul, UISNENO nakua a'an neune nak, “I atoni le Au uton ulali neu ko nane. In of naplenat Au to.”

¹⁸Fe Nai Saul anhaumak Nai Samuel anhaumak eno naek, ma natoti nak, “Kais musesu kau, Ama, atoni mamata nane in ume esme ka?”

¹⁹Nai Samuel natae nak, “Au atoni mamata nane kau. Amnao muhunun kau nai neu bale luli besa anbi tubu tunan, natuin anbi neno le i hi of ambukae mok kau. Noka fa nok-nok ana ale ho han totis nane of au utae sin, oke onane te nabe'i hi amfani.

²⁰Neu ale ho bikase luke mnanu sin le namneku anbi neno tenu afinit nane, kais mumtau, natuin napeni nalali sin. Ma anesi na'ko nane te, sa' le maupa anae le'uf anbi Israel ok-oke of au fe ani neu ko ma neu ho Ama ume nanan sin.”

²¹Nai Saul natae nak, “Au le i u'ko uf Benyamin, uf le nabau nis anbi Israel, ma oke te au ume nanan sin ka maota fa anbi uf nane. Nansa' es Ama ho mu'uab neu kau onane?”

²²Nalali te Nai Samuel anhone Nai Saul nok in ameput nane antam neu ke'an anaek mese ma anfe neu sin bale matola anbi ale anhone sin le sin amfauken oni atoni bo'tenu.

²³Oke te Nai Samuel nak neu ahanat nak, “Mubalab sisi le fe au fe neu ko nane.”

²⁴Nalali te ahanat nane naiti sisi pa' mabeti na'ko pusun, oke te in nabalab nani anbi Nai Saul matan. Nai Samuel nak, “I pa' le au ubalab ani neu ko he nati' ho ambukae anbi neno i nok ale bian sin le anhone sin nane. Ambukae nai.” Oke te Nai Saul in anbukae. Neno nane Nai Saul in anbukae natnoe nok Nai Samuel.

²⁵Oke onane te sin ansanu na'ko bale luli besa nane ma sin antam neu kot. Anfe neu Nai Saul bale tupa le anbi ke'an ume fafon,

²⁶oke te Nai Saul antup. Leka neno fe anmeusab, Nai Samuel anhaman Nai Saul le fe antup anbi ke'an fafon nane nak, “Amfen nai, aum he au usain ko he hom nao.” Oke te Nai Saul anfen ma in anao nok Nai Samuel.

²⁷Leka sin nem antia kot ninen, Nai Samuel nak neu Nai Saul nak, “Amlelu ameput nane he in anao nahunun kit.” Oke te ameput nane anao nahunun sin, ma Nai Samuel nak anteni nak, “Musnas nai anbi i akle'o fe, au of uton neu ko Uisneno In a'an.”