Read kumam Markus 12 Bible Online

Markus 12 - kumam bible

Markus 12

¹Oti toe Yesus mpololitai pangkeni to Yahudi toera hante lolita rapa', na'uli': ”Ria hadua tauna to mpohu'ai bonea-na hante anggur. Nawala ntololikia-na, nakae tana' mpobabehi torobo' pompeaa' anggur, pai' natunya' pongko pompodooa. Oti toe, napewai' bonea-na rapobago hi ba hangkuja dua tauna, pai' hilou-imi hi ngata to molaa.

²Rata-mi tempo pohopua' wua' anggur, napahawa' hadua batua-na hilou mperapi' bagia-na hi to mpodoo bonea-na toera.

³Tapi' to mpodoo bonea toera mpohoko' batua-na, rapao' pai' rapopalai mara.

⁴Oti toe, pue' bonea mpahawa' tena hadua batua-na. Rata ria, rapao' wo'o-i-wadi-hawo, weho woo'-na, ralibui' ntarurua' pai'-i rapopalai.

⁵Ngkai ree, nahubui tena hadua batua-na. Rata ria, rapatehi lau-imi. Bate hewa toe-mi kehi-ra hi butu dua batua to napahawa': ria to raweba', ria to rapatehi.

⁶”Uma-pi hema to napahawa' pue' bonea toei, metoro hadua ana' woto-na to nape'ahi'-damo. Ka'omea-na napahawa' ana'-na toe hilou hi to mpodoo bonea-na, na'uli': ’Bate rapengkorui-ile mpai'.’

⁷”Ntaa' we'i, to mpodoo bonea toera, mohawa'-ramo ra'uli': ’Etu-mi tumai ana'-na, hi'a mpai' to jadi' pue' bonea toi-e. Kita tapatehi-i, bona bonea-na toi kita'-mi pue'-na.’

⁸Karahoko'-nami ana' toei, rapatehi pai' ratadi hi mali bonea.”

⁹Ngkai ree, Yesus mpo'uli'-raka pangkeni to Yahudi: ”Jadi', napa-mi to nababehi pue' bonea toei? Bate tumai-ile mpopatehi-ra to mpodoo bonea-na, pai' bonea-na nawai'-raka tau ntani'-na.

¹⁰Tantu nibasa-mi lolita Buku Tomoroli' to mpolowa pesapuaka-ni hi Aku', hewa toi moni-na: ’Watu to ratadi topowangu tomi, watu toe lau-mi to jadi' poko parawatu.

¹¹Tohe'e majadi' ntuku' konoa Pue' Ala, uma mowo kalompe'-na hi poncilo-ta.’ ”

¹²Kara'epe-na pangkeni to Yahudi lolita-na Yesus tohe'e, doko' rahoko'-i apa' ra'inca kahira'-na to natoa' hante lolita rapa' toe. Aga uma-ra daho' mpohoko'-i, apa' mpoka'eka'-ra ntodea. Jadi', malai-ramo mpalahii-i.

¹³Ngkai ree, pangkeni to Yahudi mpohubui ba hangkuja dua to Parisi pai' tauna to tono' hi Magau' Herodes hilou hi Yesus. Patuju-ra doko' mpahala'nawu'-i hante pompekunea'-ra.

¹⁴Karata-ra hi Yesus, ra'uli'-ki: ”Guru, ki'inca Guru tau monoa'. Metudui'-ko hante kalonto' — lonto'-na mpo'uli' napa konoa Alata'ala hi manusia'. Uma nupengkorui ba hema — hema, apa' uma-ko mpelence tauna. Toe pai' kipekune'-ko: ntuku' atura agama-ta, ba ma'ala moto-ta mpobayari paja' hi Kaisar, ba uma-di? Kana tabayari, ba uma mingki' tabayari?”

¹⁵Na'inca Yesus patuju nono-ra to tewunii'. Toe pai' na'uli'-raka: ”Napa pai' nipali' kahala'kedoa' pololita-kue? Keni pe' tumai doi to biasa nibayari-ki paja', doko' kuhilo.”

¹⁶Ngkai ree, ratonu-miki hampepa' doi pera'. Na'uli': ”Lence hema pai' hanga' hema to hi doi toi?” Ra'uli': ”Lence pai' hanga' Kaisar.”

¹⁷Na'uli': ”Ane wae-di, wai'-ki Kaisar napa to masipato' rawai'-ki Kaisar. Pai' wai'-ki Alata'ala napa to masipato' rawai'-ki Alata'ala.” Konce-ramo mpo'epe tompoi'-na toe.

¹⁸Oti toe, ba hangkuja dua to Saduki rata hi Yesus. To Saduki toera, pangkeni agama Yahudi to mposapuaka tauna to mate tuwu' nculii' hi eo mpeno. Karata to Saduki toera, ra'uli'-ki Yesus:

¹⁹”Guru, nabi Musa mpo'uki' hi rala buku atura hewa toi: ane hadua tomane mate hiaa' uma-ki ria ana'-na, pudupuhe-na kana mpotobine balu-na bona ria-ki-hawo muli-na.

²⁰Jadi', ria pitu to ntali ompi' paka' tomane. To ulumua' motobinei, mate-i uma ria ana'-na.

²¹Tu'ai-na mpotobine balu-na. Mate wo'o-i-wadi-hawo, hiaa' ko'ia-i mo'anai'. Wae wo'o to majadi' hi katolu-na,

²²duu' rata hi kapitu-na. Mate omea-ramo hante uma ria ana'-ra. Ka'omea-na, mate wo'o-imi-hawo tobine toei.

²³Jadi', hi eo mpeno, ane tuwu' nculii' mpu'u-di hawe'ea tomate-e, hema-ramo mpai' pue' tobine toei, apa' pitu-ramo to mpotobine-i.”

²⁴Na'uli' Yesus: ”Sala' mpu'u pekiri-ni tetu-e, apa' uma nipaha ihi' Buku Tomoroli', uma wo'o ni'incai baraka'-na Alata'ala.

²⁵Apa' ane tuwu' nculii'-ramo tauna to mate, katuwu'-ra hewa katuwu' mala'eka hi rala suruga, uma-rapa motobinei ba motomanei.

²⁶Ha ko'ia ria nibasa lolita Buku Tomoroli' to mpakanoto katuwu'-ra nculii' tomate-e? Hi rala buku Atura Musa, tabasa tutura-na beiwa Alata'ala mpololitai nabi Musa ngkai rala julumpu to jela'. Nto'u toe, Abraham, Ishak pai' Yakub mahae-ramo mate. Aga nau' wae, Alata'ala mpo'uli'-ki Musa hewa toi: ’Aku' toi-mi Alata'ala to napue' Abraham, Alata'ala to napue' Ishak, Alata'ala to napue' Yakub.’

²⁷Jadi', ngkai lolita-na Alata'ala toe, monoto-mi ta'inca katuwu'-ra moto Abraham, Ishak pai' Yakub. Apa' bela tauna to mate to mepue' hi Alata'ala, tauna to tuwu'-hana to mpopue'-i. Sala' rahi-koina pekiri-ni tetu-e.”

²⁸Nto'u toe, hadua guru agama Yahudi rata hi Yesus. Na'epe pomehono'-ra to Saduki hante Yesus we'i, pai' na'uli' hi rala nono-na: ”Lompe' mpu'u tompoi'-na Yesus tetui!” Toe pai' mepekune' wo'o-imi-hawo hi Yesus, na'uli': ”Parenta to'uma to poko-na ngkai hawe'ea parenta?”

²⁹Na'uli' Yesus: ”Toi-mi parenta to poko-na: ’Pe'epei-koi to Israel! Pue'-ta Pue' Alata'ala hadua-na-wadi.

³⁰Kana tapoka'ahi'-i hante nono-ta mpu'u, tatonu hawe'ea katuwu'-ta hi Hi'a, tapoka'ahi'-i hudu inca-ta pai' hudu pakulea'-ta.’ Toe parenta to lomo'-na.

³¹Pai' tohe'i-mi parenta karonyala-na: ’Kana tapoka'ahi' doo-ta hewa pompoka'ahi'-ta woto-ta moto.’ Uma ria parenta ntani'-na to meliu kabohe-na ngkai to ronyala tohe'i.”

³²Na'uli'-mi guru agama toei hi Yesus: ”Makono mpu'u-di Guru! Makono lia to nu'uli' tetu-e. Pue' Ala bate hadua-na-wadi, uma ria ntani'-na.

³³Pai' kana tapoka'ahi'-i hante nono-ta mpu'u, hante hawe'ea pekiri-ta pai' hudu pakulea'-ta. Pai' kana tapoka'ahi' doo-ta hewa woto-ta moto. Toe to meliu kalompe'-na ngkai hawe'ea porewua pai' rewa ntani'-na to tapopepue' hi Alata'ala.”

³⁴Na'epe Yesus kamonoto tompoi'-na tauna toei. Toe pai' na'uli'-ki: ”Neo' jadi' ntodea hi rala Kamagaua' Alata'ala mpu'u-moko!” Ngkai ree, uma-pi hema to daho' mpekune' ba napa — napa hi Yesus.

³⁵Nto'u-na Yesus metudui' hi Tomi Alata'ala, na'uli': ”Napa pai' guru agama mpo'uli' Magau' Topetolo' muli-na Magau' Daud?

³⁶Hiaa' bo Daud moto mpokahangai'-i Pue'-na. Hante petete' Inoha' Tomoroli' Daud mpotompo'wiwi Magau' Topetolo' hewa toi: Pue' Ala mpo'uli'-ki Pue'-ku: ’Mohura-moko hi mali ngka'ana-ku duu'-na kupopengkoru hawe'ea bali'-nu hi Iko.’ Jadi', ane muli Daud mpu'u-idi Magau' Topetolo'-e, napa pai' Daud mpokahangai'-i Pue'-na?” Wori' lia tauna to morumpu hi Tomi Alata'ala nto'u toe, pai' goe'-ra mpo'epe tudui'-na.

³⁸Nto'u-na Yesus mpotudui' ntodea, na'uli'-raka: ”Pelompehi-koi, neo'-koi mpenau' kehi-ra guru agama. Goe'-ra modao' mpopake' baju to moloe, pai' goe'-ra ane tauna hi wiwi' karajaa motingkua' mpotabe-ra.

³⁹Goe'-ra rapopohura hi pohuraa karabilaa' hi tomi posampayaa. Goe'-ra ane rapopohura-ra hi pohuraa to lompe' hi posusaa'.

⁴⁰Mpobagiu-ra tobine tobalu, pai'-ra mpohagoi tomi-ra. Rawunii' kadada'a gau'-ra tohe'e hante mosampaya rapomoloe — loe. Motomo lia mpai' huku'-ra.”

⁴¹Yesus mohura mohu' peti' pompunaa' doi pepue', pai'-i mponaa tauna to mpopuna' doi pepue'-ra hi rala-na. Wori' tauna to mo'ua' mpopuna' doi uma hangke — ngkedi'.

⁴²Nto'u toe, rata wo'o-hawo hadua tobine tobalu to mpe'ahii' tuwu'-na, napuna' wo'o-hawo doi pepue'-na. To napuna' tohe'e, rompepa' doi ngkala, hangkedi' lia oli-na.

⁴³Yesus mpokio' ana'guru-na pai' na'uli'-raka: ”Mpu'u ku'uli'-kokoi: tobalu to mpe'ahii' tuwu'-na tohe'e mai, meliu pewai'-na ngkai pewai' to rapuna' hawe'ea tau ntani'-na.

⁴⁴Apa' hira' mewai' ngkai labi ka'uaa'-ra. Tapi' tobine toei, nau' hewa apa-mi kampe'ahii'-na, napewai' omea-mi to ria hi hi'a, nau' kakono-na to naparaluu-hawo hi katuwu'-na eo — eo-na.”