Read kumam Yohanes 9 Bible Online

Yohanes 9 - kumam bible

Yohanes 9

¹Bula-na Yesus momako', mpohilo-i hadua tauna to wero ngkai lomo' kaputu-na.

²Ana'guru-na mpekune'-i: ”Guru, napa pai' wero ami'-i ngkai kaputu-nae? Ba jeko'-na moto-di, ba jeko' totu'a-nadi?”

³Na'uli' Yesus: ”Bela jeko'-na moto, pai' bela wo'o jeko' totu'a-na. Toi jadi' bona tauna mpohilo baraka' Alata'ala to madupa' hi woto-na.

⁴Bula-na mobaja-pidi, kana tapobago bago-na Alata'ala to mposuro-a. Apa' neo' rata-mi bengi-na, pai' uma-pi hema to mobago.

⁵Bula-ku hi dunia'-pidi, Aku' toi-mi baja to mpobajahi nono manusia'.”

⁶Ka'oti-na mololita hewa toe, na'uelikui-mi tana', nagalo hante tana' hangkedi' bona morege', nagelai'-ki mata-na towero toei,

⁷pai' na'uli'-ki: ”Hilou-ko monoku hi wuhu' Siloam.” (Hanga' ”Siloam” toe, batua-na ”Rasuro.”) Kahilou-nami monoku. Ponculii'-na, pehilo-imi-hawo.

⁸Ngkai ree, tongki-na pai' tauna to biasa mpohilo-i kakarapi' — rapi', momepekune'-ramo ra'uli': ”Hema-idi toe-e mai? Ha bela hi'a-mi towero to biasa mohura kakarapi' — rapi'-e?”

⁹Ria to mpo'uli': ”Hi'a-midi!” Aga ria wo'o mpo'uli': ”Bela-e'. Kahibalia lence-ra-wadi-hawo.” Hiaa' hi'a moto-mi-hawo mpo'uli': ”Aku'-midi!”

¹⁰Jadi', rapekune'-i: ”Ha beiwa pai' alaa-na pehilo-ko?”

¹¹Na'uli'-raka: ”Tauna to rahanga' Yesus mpobabehi rege', nagelai'-ki mata-ku, na'uli'-ka: ’Hilou-ko monoku hi wuhu' Siloam.’ Hilou mpu'u-ama monoku, ngkai ree pehilo-ama-kuwo!”

¹²Rapekune'-i: ”Hiaa' hiapa-imi we'i?” Na'uli'-raka: ”Uma-kuwo ku'incai.”

¹³Yesus mpogalo ueliku-na hante tana' pai' mpaka'uri' towero toe we'i nto'u Eo Sabat, eo pepuea'-ra to Yahudi. Jadi', towero to pehilo-mi toei rakeni hilou hi to Parisi.

¹⁵To Parisi wo'o-mi-rawo mpekune'-i, ra'uli': ”Beiwa pai' alaa-na pehilo-koe?” Na'uli'-raka: ”Nagelai' mata-ku hante rege', pai' kamonoku-ku, pehilo-ama.”

¹⁶Ba hangkuja dua ngkai to Parisi toera mpo'uli': ”Tauna to mpobabehi tetu, uma-i ngkai Alata'ala, bo uma-i mpotuku' palia-ta hi Eo Sabat.” Tapi' to hantongo' mpo'uli': ”Hiaa' ane topojeko'-i, ngkaiapa-di baraka'-na mpobabehi wori' tanda mekoncehi hewa tohe'i-e?” Alaa-na, ria lau-mi pomehonoa' hi himpau hira'.

¹⁷Ngkai ree, mepekune' tena-ra to Parisi hi towero toei, ra'uli': ”Beiwa-kowo iko, napa to nu'uli', apa' napaka'uri'-koko mata-nue.” Na'uli' towero toei: ”Tantu Hi'a hadua nabi.”

¹⁸Tapi' topoparenta to Yahudi, uma-ra mparasaya kahi'a-na mpu'u-mi towero-e ngone, pai' muu — mule' pehilo-imi. Toe pai' rakio' tina pai' tuama-na bona mpohirua'-raka,

¹⁹pai' rapompekunei': ”Ha makono mpu'u tauna toii ana'-ni, to ni'uli' wero ngkai lomo' kaputu-nae? Hiaa' beiwa pai' alaa-na pehilo-i?”

²⁰Ra'uli'-rawo tina pai' tuama-na: ”To ki'inca-le, bate ana'-kai mpu'u-i-hawo, pai' wero mpu'u-i ngkai lomo' kaputu-na.

²¹Aga beiwa pai' alaa-na pehilo-i, uma-kaiwo ki'incai. Pai' hema to mpaka'uri'-i, uma wo'o-kaiwo ki'incai. Kama-imi-hawo, pekune'-ki hi'a moto-mi-koiwo. Ma'ala-imi metompoi' moto.”

²²Tina pai' tuama-na mpo'uli' hewa toe, apa' me'eka'-ra hi topoparenta to Yahudi. Apa' hibalia-mi pohawa'-ra: hema — hema to mpo'uli' kaYesus-na Magau' Topetolo' rapopalai ngkai tomi posampayaa.

²³Toe pai' totu'a-na mpo'uli': ”Kama-imi-hawo, pekune'-ki hi'a moto-mi-koiwo.”

²⁴Oti toe, rakio' tena-i tauna to wero toei we'i, pai' ra'uli'-ki: ”Alata'ala mpotiroi-ta! Jadi', uli' mpu'u-e' napa to makono! Ki'inca moto-i Yesus tetui tauna topojeko'.”

²⁵Na'uli'-raka: ”Aku'-le, uma ku'incai ba topojeko'-i ba uma. Sampale to ku'inca, wero-a wengi, tempo toi pehilo-ama.”

²⁶Ngkai ree, rapekune' tena-i: ”Napa to nababehi-koko? Beiwa-i mpaka'uri'-ko?”

²⁷Natompoi'-ra: ”Oti-mi kututura-kokoi we'i, ha uma ni'epei? Napa pai' nipengeei oa'-e? Ba doko' jadi' ana'guru-na lau-dakoie?”

²⁸Ngkai ree, ralibui'-imi pai' ra'uli'-ki: ”Iko-le ana'guru-na tau tetu-e! Kai' ana'guru-na nabi Musa-ka-kaina!

²⁹Monoa' ki'inca Alata'ala mpoparata lolita-na hi Musa owi. Tapi' Yesus tetui, uma ki'incai kangkaiapa-na.”

³⁰Mehono'-i towero toei: ”Me'ingui' lia-koi! Ni'uli' uma ni'incai kangkaiapa-na, hiaa' napaka'uri' mata-ku!

³¹Ta'inca moto Alata'ala uma mpotompoi' pomperapia' tauna topojeko'. Sampale-di mpobini'-i tilinga-na hi hema — hema to mengkoru hi Hi'a pai' to mpotuku' hawa'-na.

³²Ngkai lomo' kajadi' dunia', ko'ia ria ta'epei tutura-na tauna towero ngkai lomo' kaputu-na ma'ala rapaka'uri'.

³³Ane Yesus uma-i ngkai Alata'ala, tantu uma-i bisa mpobabehi napa — napa.”

³⁴Hampetompoi'-ra: ”Iko tetu to ponu' jeko' ngkai kaputu-nu, nta'ena' metudui'!” Ngkai ree, rapopalai-imi ngkai tomi posampayaa.

³⁵Yesus mpo'epe karapopalai-na ngkai tomi posampayaa. Jadi' hilou-imi mpohirua'-ki, pai' na'uli'-ki: ”Ha mepangala'-ko hi Ana' Manusia'-e?”

³⁶Na'uli' tauna toei: ”Uli'-ka-kuwo kahema-nai, bona kupangala'-i.”

³⁷Na'uli' Yesus: ”Nuhilo-imile! Hi'a-mile to mpololitai-koe.”

³⁸Na'uli' tauna toei: ”Kupangala', Pue'!” pai' mowilingkudu-imi mponyompa-i.

³⁹Na'uli' Yesus: ”Katumai-ku hi dunia' toi, tumai mpobotuhi kara — kara manusia', bona tauna to wero ma'ala pehilo, pai' tauna to mpo'uli' pehilo moto-ra, wero lau-ra.”

⁴⁰Ba hangkuja dua to Parisi to hi ree mpo'epe lolita-na Yesus. Ra'uli' mpo'uli'-ki Yesus: ”Ha nu'uli'-kona wero wo'o-kai kai'-e?”

⁴¹Na'uli' Yesus: ”Ane rapa'-na hewa towero mpu'u-koi apa' uma ni'incai napa to makono, ke uma-koi masala'. Tapi', apa' ni'uli'-koina pehilo moto-koie, bate masala'-koi-hawo.”