Read Futuna-Aniwa Matius 10 Bible Online

Matius 10 - Futuna-Aniwa bible

Matius 10

¹Ura, Er Yesus biryi Er miliramnyi nang amolbaryi asi Er dam nabmou ci, Erci sunti Er mikib karebmou. Ara, Erci, “Sunci bindoka Ni mikib deici aryi isa kanya yakdonokmun ci, sun yuk u-yuk u yiranci nang ab mitang kuranci nang ab asi kwetebdarur,” ebmou ci, sunsi Er mikib karebmou.

²A bokdonokmou nang amolbaryi si yuk-yuk ara ato: Yuma kobdob ebkun ara Petrus er si uruma si ara Simon ab, er weit Andreas ab, Zebedeus mi Yakobus ab, Yakobus er weit Yohanes ab asi bokdonokmou.

³Tonda, Filipus ab, Bartolomeus ab, Tomas ab, Matius ab asi bokdonokmou. Anyi Matius bira, “Kaisar bisi pajak dengna karebdarur,” eboka molormiliramunyi kuamwe asi Yesus biryi bokdonokmou. Tonda, Alfeus mi Yakobus ab, Tadeus ab asi bokdonokmou.

⁴Tonda, Simon Zelotnyi ab Yudas Iskariot ababyi Erci bokdonokmou. Simon Zelotnyi bira, “Roma nang nun atei kuna nun li,” eramnyi nang tam kuramunyi kuamwe ani, Er Yesus bisi miliramwe. Ba, Yudas Iskariot bira Er Yesus bisi miliramwe ani, aminda aryi Er Yesus kikibkwamunyi kuramwe. A nang amolbaryi nirya asi Er Yesus biryi ukuboka bokdonokmou ci, “Teleb Uram eterebmun ci, sun u yin nang kwetebmun ci, isa yakdonokdarur,” eboka Er mikib karebmou.

⁵Er Yesus biryi Er miliramnyi nang amolbaryi nang asi bokdonokmou ci, Erci ato ebmou, “Sunda bisik kirikoka Yahudi yala kum nang atei bana mem. Tonda, Samaria nang atei ababyi bana mem.

⁶Erda, sun Israel yala nang kankan aryi tangna domba ato kunung nang dam akwe bimunyi ura, Teleb Uram eterebkwandarur.

⁷Ati, sunci sun Israel yala nang bindoka ato ebkwandarur, ‘Er Imtamnyi bira Weik Sienyi kurur ci, ninyi ilinto Er amwetam kun nang kibdeibkwamar talak dam kubmar,’ eboka eterebkwandarur.

⁸Tonda, sunci sun u yiranci nang asi kwetebkwandarur. Ba, sun dibmangnyi nang asi kam bukeibkwandarur. Tonda, sun susa taleranci nang asi susa akabdeibkwandarur. Tonda, isa kanya wengdaranci nang ara isa kanya yakdonokwandarur. Niryi sunsi ninyi kweten mikib asi dengna kum-kum ur dem karebmasirim ati, sunci neiktoto yuk nang asi dengna kum-kum ur dem kwetebkwandarur.

⁹Sunci Teleb Uram eterebde baramun cok, sunci, ‘Yina dekoka yibkwayeb,’ tenen co bok taleboka bobmunyei. Ati, sunci, ‘Sun Teleb Uram keken nang ara nunsi yina karebkwansing,’ teneramun ci, dengna weik keil si emas ton perak ton aling kibde bona mem. Tonda, dengna mitik keil si tembaga ababyi aling kibde bona mem.

¹⁰Tonda, sunci Teleb Uram eterebde baramun cok, ‘Bisik ai yibkwayeb,’ tenen bisik kona aling bona mem. Tonda, sunci ongon aling tentok akwe ongoboka bobdarur. Ara, ongon aling yuk aling asi kiboka bona mem. Tonda, sunci yan kala kibdongobmun cok, sunci yan kala unuboka kibdongobkwandate dinyi asi bona mem. Tonda, sunci bisik yiban kama talebmun cok, bisik yiban kama bitinyi dinyi bobmunyei. Ati, sunci Er Imtamnyi wa irmilirandum nang kurandum deyok aryi, Er Imtamnyi biryi kaliksici ba, ninyi aryi sunsi yina kikiman karebkwansing ati ato ebmasin,” ebmou.

¹¹Ato ebmou cok, Yesus biryi tonda ato ebmou, “Sunci Teleb Uram eterebde baramun cok, sunci weik atei kum mitik atei kum asi wengbimunyi ura, sunci akatei kankan aryi ai damnyi telebnyi bira ninyi du dongonanyi bisi ingkirikdarur. Anyi biryi sunsi du dongobsici ura, sunci er ai kuboka mabdarur. Ara, yuk ai-yuk ai yibarkiringna mem. Erda, ai tentok akwe kuboka mabmunyi ani, sunci, ‘Yuk atei binkwayeb,’ tenen anaboka binkwandarur.

¹²Tonda, sunci sun kubkwandum ai asi wengbimun cok, sunci akai umbura kubkwaming nang asi, ‘Er Imtamnyi biryi sunsi teleb kubdeibsute,’ eboka kisal dakdarur.

¹³Ura, sunsi du dongobkwansing nang asi Er Imtamnyi biryi a nang asi teleb kubdeibkwande. Ba, a nang aryi sunti, ‘Nun li,’ tenebsingnyi asi Er Imtamnyi biryi teleb kum kubdeibkwande,” ebmou.

¹⁴“Ba, unanyi-unaner aryi sun ebkwamunyi uram ton kum kekebsingiryi sunsi du kum dongobdobsingnyi ura, sunci a nang asi deiblobdarur. Ati, sunci a nang ati, ‘ “Teleb Uram kum dobdobmab ati, Er Imtamnyi biryi nunsi wenebkwansir,” tenen bikting,’ tenebdarur. Ato tenebmun cok, sunci mintal sun yan deici dubmasici asi kilibkaboka akai kum akatei kum deibloboka anabkaboka yibarondarur.

¹⁵Niryi sunsi dib en uram ton ebkwinsin ati sunci diboka kekebdarur. Minob kuramnyi nang Sodom atei nang ara iya malyi kun dinyi kuramnyi deyok aryi, Er Imtamnyi biryi a nang asi diba ati wenebmou ci, sun atei nirya asi dangubdeibmou ci, akatei nang nirya asi obsekminikmou. Bok, Niryi bokeibmasinyi nang asi, ‘Nun li,’ eboka dokdonokwansing atei nang ara tabakoka iya malyi kun dinyi kubkwaming deyok aryi, iya wenen dinyi dobdobkwaming ati ebman. Ara, sirya kobdob uki tum berekci ura, Er Imtamnyi biryi sunsi dokdonokwansingnyi nang asi tabakoka wenen dinyi iya ikin dinyi takubdeibkwande,” ebmou.

¹⁶Er Yesus biryi Er miliramnyi nang amolbaryi asi bokdonokmou ci, Erci sunsi ton ati ato ebmou, “Niryi sunsi bokdonokwinsin ara sunti yu kanya bon nang kankan asi bokdonokwinsin. Bokdonoksinyi uca, sunda domba ato kurandum nang ara yu kam kankan aryi kubkwandum. Ati, sunci, ‘Obsingnyei,’ tenen kalikmun ci, kwatima borande kanya murkim kanya bobdarur. Tonda, sunci, ‘Malyi dinyi kubibyei,’ tenen lek kanya bobdarur.

¹⁷Sunci, ‘Ninyi aryi nunsi mambul kibdeibkwansing,’ tenen bikmun cok, kalikdarur. Ara, ninyi aryi sunda Nisi milinin nang ati, ‘Nun li,’ tenen tatab-tatab ebsingiryok, sun malyi deyok lilin nang dam taruk dobkarebkwansing. Tonda, ninyi aryi sunsi Musa Uram eteren ai dam bobindoka litukna aryi kulaboka obkwansing ati ebman.

¹⁸Sunda Nisi miliranurum deyok aryi, ninyi aryi sunti, ‘Nun li,’ tenen taruk taleboka weik sienyi Kaisar amwetam bun nang urasintam bobinkwansing. Tonda, weik sien nang yuk nang urasintam bobinkwansing. Sirya bobinkwansingnyi ura, sunci a erebdob nang urasintam ab Er Imtamnyi Uram walwal nang yuk nang urasintam aryi tikmun cok, sunci Niti Teleb Uram lak ebkwandarur.

¹⁹Ninyi aryi sunsi dobtaleboka weik nang taruk dam karerbisingnyi talak ababyi sunci mambul kanya bona mem. Ati, sunci, ‘Unato dinyi lak ebkwan do?’ tenen, ‘Una kuboka Teleb Uram lak ebkwan do?’ tenen mambul kanya bona mem. Er Imtamnyi Kanya Roh Kudus aryi sunsi, ‘Ato-ato ebkwandum,’ eboka eterebkwansir ati, sunci Er ebkwamasici tok ebmilibdarur.

²⁰Ati, sunci sun mining kanya umbura aryi tenebmunyi tok kum ebkwandum. Erda, sun Nai Imtamnyi karebsou Kanya Roh Kudus aryi eterebsici uca, sunci Er Uram asi ebmilibkwandum,” ebmou.

²¹Er Yesus biryi ato ebmou cok, tonda ato ebmou, “Aminda kubkwande talak ara Nisi dib tenenina kum nang aryi sun mining duweityabwe Nisi dib tenebkwaning nang ati, ‘Obnung,’ tenen dobkarebkwaming. Tonda, sun naiyabwe ara sun mabwe nermabwe ati, ‘Obnung,’ tenen kikibkwaming. Tonda, sun mabwe nermabwe ara sun nai nong ab sun kwin nong ab ati, ‘Nun li,’ tenen, ‘Obnung,’ tenen dobkarebkwaming.

²²Sunda Nisi miliranurum deyok aryi, ninyi nirya aryi sunti, ‘Nun li,’ tenen bimsa yaribkwansing. Bok, unanyi-unaner aryi katabdongoboka dib tenebningiryi, tanglona kum uca Nisi milibningnyi nang ara Er Imtamnyi biryi lemsin dinyi dobdobkwaming.

²³Ura, ton atei nang aryi sunti, ‘Obtibyi,’ tenen domkiringnansingnyi ba, sunci anabkaboka yuk atei cung dorbinkiringkwandarur. Niryi sunsi dib kobdob en uram ebkwinsin ati sunci diboka kekebdarur. Sunci ton atei aryi kuboka anabde baramun cok, yuk atei cung dorbinkirikde tuba bamun cok, sun Israel yala nang atei nirya asi wengbana kum bok, Ni Ninyi Dasinyi minob tamuryankwan.

²⁴Nira sun eteresinanyi kunun asi ninyi aryi mambul kibdeibkwaning to, sunda Nisi miliransing nang ababyi mambul kibdeibkwansing. Tonda, ninyi aryi Nira sun arungdeirisurumnyi bisi domkirikwaningiryok, sunda Ni wa irmiliranurum nang asi domkiringna kum kubkwansing do? Ato tenen kum.

²⁵Erda, ninyi eterenanyi bira mambul dinyi borande to, er miliraming nang neiktoto, ‘Nunbabyi mambul dinyi boramibyi ara nunti teleb,’ tenen mambul dinyi ur boranting. Tonda, er wa karesurutnyi bisi domkiringnaming to, er wa irmilin nang neiktoto, ‘Nunbabyi domkiringnansing ara nunti teleb,’ tenen domkiringna dinyi ur boranting. Ninyi aryi Nira sun Nai biti, ‘Isa sienyi Beelzebul,’ eboka ina ngilikmanei cok, sunda Ni amwetam bun nang asi, ‘Isa mabwe nermabwe,’ eboka tabakoka ina ngilikwansing.

²⁶Ati, ninyi aryi sunsi mambul kibdeibkwansing ababyi, sunci ilil kanya bona mem. Teleb Uram ara, ‘Er Imtamnyi bira iya Weik Sienyi kurur ci, Er amwetam kun nang asi leboka kalikwansir,’ en uram ara ninyi urasintam lak kum kurande asi sunci lak eterebkwandum. Lak kum kuanci dinyi nirya asi lak kubkwande ati ato ebman. Tonda, ninyi aryi minob kum bikamingnyi dinyi nirya asi aminda aryi bikwaming.

²⁷Ati, Ni ab sun ab yuk kuramaburyi, etereransise tok, sunci ninyi urasintam aryi lak ebkarebdarur. Ni ab sun ab yuk kuramaburyi, kekerandau tok, sunci uram doboka ninyi kekentam lak ebkwandarur.

²⁸Sunci tukwetam nang ati ilil kanya bona mem. Ninyi aryi sunti diboka obkwamasingnyi ababyi, sun nong bol akikwe obsiting. Sun kanya ababyi obmana kum kubkwaming ati ebman. Ba, sunci Er Imtamnyi bitikwa ilil kanya bobdarur. Er Imtamnyi bira iya mikibnyi kuboka wenebsutiryok, Erci sunsi uk buk ilinto angmaca dam dongobsutiryok, sun nong ab sun kanya ababyi obsute.

²⁹Er Imtamnyi biryi sunsi kalingsurur ati, sunci ilil kanya bona mem. Mitik maka Ninienyi ara ninyi aryi, ‘Bikdob dinyi kuma,’ teneramingiryok, ato maka bitinyi doboka dekingiryok mitik keil uang tentok akwe dororaming. Ninyi aryi a maka ati, ‘Bikdob dinyi kuma,’ teneraming bok, Er Imtamnyi biryi ato maka ababyi diboka kalingdur. Ara, Sun Nai Imtamnyi biryi a maka kalikdiryok, Erci, ‘Dibte ura, tukwetam sakdur,’ kum tenebte ura, a maka ara kum dibte.

³⁰Er Imtamnyi biryi sunsi diboka kalingsurur ati, sunci ilil kanya bona mem. Maka Ninienyi ara Er Imtamnyi urasintam aryi bikdob dinyi kurur bok, sunda Nisi miliranurum nang ara bisibkaboka Er Imtamnyi urasin dam aryi iya bikdob dinyi kundarur. Sunda maka Ninienyi mer asi bisibkaboka Er Imtamnyi mabwe kurandum ati, Er Imtamnyi biryi sunsi tabakoka kalingsurur. Ati, Er Imtamnyi biryi sunsi diboka dibniliboka kalingsurur cok, sun kisok otong nirya ababyi nukoka bingsurur. Ati, sunci, ‘Ninyi aryi obsingnyei,’ tenen ilil kanya bona mem!

³¹

³²Ati, unanyi-unaner aryi ninyi urasin dam aryi Niti, ‘Anyi bira diba Er Imtamnyi biryi Bokwetebunyi,’ eboka lak eramingnyi nang ati Niryi neiktoto Ni Nai Imtamnyi urasin dam aryi, ‘Anyi a ner ara Ni dam kun nang kunung,’ eboka lak ebkwan.

³³Bok, unanyi-unaner aryi ninyi urasin dam aryi Niti, ‘Anyi biti nun li,’ eboka lak eramingnyi nang ati Niryi neiktoto Ni Nai Imtamnyi urasin dam aryi, ‘Anyi a ner ara Ni li,’ eboka lak ebkwan.” Ato eboka Er Yesus biryi Er miliramnyi nang amolbaryi asi ebkarebmou.

³⁴Er Yesus biryi enmou cok, Er kwityabwe asi ton ato eboka eterebmou, “Ni tukwetam yuryase ara, ‘Ninyi nirya antanibdeibkwan,’ tenen kum yuryase. Sunci ato tenebnumunyei. Erda, Niryi tukwetam yuryase ara, ‘Sun dib tenen nang ab dib tenen kum nang ab ara antanirdeirirdana kum uca mar ibdating,’ tenen yuryase.

³⁵Ni yuryase uca, sun mining ai ninyi kankan aryi ton nang ara Nisi dib tenebningnyi ba, yuk nang aryi Nisi dib kum tenebningnyi uca, mar ibdankwaming. Ara, er mi aryi er nai nong asi mar ibkwande. Er nebnyi bira er kwin nong asi mar ibkwande. Er mi kaibwe ner ara er yamalner asi mar ibkwande.

³⁶Sun mining ai nang nirya ara mar ibdankwaming.” Ato eboka Yesus biryi eterebmou. [2]

³⁷Ura, Er Yesus biryi eterenmou cok, Erci Er miliramnyi nang asi ton ato ebmou, “Unanyi-unaner aryi er nai kum er kwin kum asi boukwe kimdorandiryi Ni malyi kimnarinyi bira Ni dam kunanyi kum kurandiryi. Tonda, unanyi-unaner aryi er mi kum er nebnyi kum asi boukwe kimdorandiryi Ni malyi kimnarinyi bira Ni amwetam bunanyi kum kurandiryi.

³⁸Unanyi-unaner aryi, ‘Ninyi aryi mambul kibdeiboka obsitingnyi ababyi, Niryi nun Du Yesus bisi milibkwan,’ kum tenebdiryok, Nisi diboka kum miliraniriryi, anyi a ner ara Ni amwetam bun nang diboka kum kunung.

³⁹Unanyi-unaner aryi, ‘Ninyi aryi nisi obningnyei,’ tenebingnyi nang ara iya kam kun dinyi kum dobdobkwaming. Ba, unanyi-unaner aryi, ‘Nira nun Du Yesus bisi milinun deyok aryi, ninyi aryi nisi obningnyi ababyi niti teleb,’ tenebingnyi nang ara iya kam kun dinyi dobdobkwaming.

⁴⁰Ura, unanyi-unaner aryi sunda Nisi miliranurum nang asi du dongobdobsingiryok, a nang ara Nira sun Du bibabyi nisintum du dongobdobsingiryi. Tonda, unanyi-unaner aryi Nisi du dongobdobningiryok, a nang ara Ni bokwetebnounyi Er Imtamnyi bibabyi nisintum du dongobdobingiryi.

⁴¹Tonda, unanyi-unaner aryi Er Imtamnyi Uram ebdeibmaca bobananyi biti, ‘Anyi bira Er Imtamnyi Uram bobananyi kurur,’ tenen dobdobingnyi ura, a nang asi Er Imtamnyi biryi kisal dakwande. Ara, Er Imtamnyi biryi Er uram ebdeibmaci to lak etereramnyi nang asi kisal dangdur to, Erci a nang asi dobdobingnyi nang ababyi kisal dakwande. Tonda, unanyi-unaner aryi Er Imtamnyi urasintam aryi teleb dinyi kuramingnyi nang ati, ‘A nang ara teleb kun nang,’ tenen dobdobingnyi ura, a nang asi Er Imtamnyi biryi kisal dakwande. Ara, Er Imtamnyi biryi Er urasintam aryi teleb kuramingnyi nang asi kisal dangdur to, Erci a nang asi dobdobingnyi nang ababyi neiktoto kisal dakwande.

⁴²Niryi sunsi dib kobdob en uram ebkwinsin ati sunci diboka kekebdarur. Unanyi-unaner aryi Ni miliranin nang kankan aryi tukwetam bunanyi tentok ababyi, ‘Anyi bibabyi nun Du Yesus bisi milinanyi kurur,’ tenen ikib me kweboka karebingnyi ura, Er Imtamnyi biryi a me kweboka karebingnyi nang asi diboka kisal dakwande,” eboka eterebmou.