Read Futuna-Aniwa Matius 11 Bible Online

Matius 11 - Futuna-Aniwa bible

Matius 11

¹Er Yesus biryi Er kwityabwe miliramnyi nang amolbaryi nang asi eterenmou ani, sirya eterebmou ura, adikum aryi anaboka binmou ci, dam-dam kuramnyi atei nang ara Yahudi yala nang ati Teleb Uram eterebde yibaramwe.

²Ura, a talak ara ninyi aryi Yohanes ninyi me dongoramunyi bisi taleboka ninyi wenen ai umbura asi dongobmai. Dongobmai bok, Yohanes bibabyi, “Ninyi Lemsinanyi biryi yandoka ilil tenen dinyi yuk-yuk kiknibde barur,” en uram kekebmou. Sirya kekebmou ura, Yohanes biryi er miliramnyi nang asi nabmou ci, “Er Yesus dam bindoka ato-ato eboka asibdendarur,” eboka bokdeibmou.

³Ara, Yohanes er miliramnyi nang asi ebdeibmou to, sunci Er Yesus dam bindoka ato eboka asibdenmai, “Kanda Er Imtamnyi biryi bokdonokwansou Ninyi Lebkwandanyi kurum do? Nun dibde bunubnyi bira yuknyi kuboka aminda yankwande do?” eboka asibdenmai.

⁴Asibdenmai ba, Er Yesus biryi sunsi ato ebmou, “Ni eterenun uram sunci kekenmarum ab, Ni ilil tenen dinyi kiknibde banun asi asing eibmarum ati sunci Yohanes dam tamurbindoka nukde bindarur. Nukde bimunyi ura, Yohanes biti Niti, ‘Anyi bira ato-ato kurutnyi,’ tenen bikdobnute.

⁵Sun asing kuanci nang asi elengdeirinman uca, asing eibkatabmang. Sun yan deneanci nang asi niningdeiriran uca, tikoka yibaronmang. Sun bol susa taleanci nang ara akarsangdonmar. Sun amol kinikanci nang ara amol kungdeirinman uca, ninyi uram kekenmang. Sun din nang ara kam burdeirinman. Tonda, sun tukwetam bukoka bona utotoa kum boraming nang ara, ‘Er Imtamnyi biryi lebdeibkwansir,’ en uram Teleb Uram kekeraming. Ati, sunci Yohanes dam tamurbindoka a asing eibmarum to ab, sun amol aryi kekebmarum to nukde bindarur.

⁶Tonda, unanyi-unaner ara Niti kankana kanya bona kum uca Nisi tuba miliraningnyi nang ara Er Imtamnyi biryi kisal dangsurur nang kuramunci ebdarur,” ebmou.

⁷Yohanes biryi bokdonokmou nang aryi anaboka tamurbinmai ba, Er Yesus biryi sun bulubmai nang ninyi ilinto asi Yohanes deyok ati ato eboka uram ton eterebkalibmou, “Sunci minob ura, ‘Yohanes uram kekebtibyi,’ tenen ninyi kun kum mutuk binmandau ara unatoa anyi bisi asing dirbinmandau do? Sunci, ‘Yohanes bira kankana kanya borandiryok, kumwe aryi lulungdeirirande co bok atonyi bisi dirbinkwayeb,’ tenen dirbinmandau do? Ato tenen kum.

⁸Ato tenen kum dirbinmandau cok, sunci, ‘Yohanes bira Erebdobnyi, teleb ongon aling ongorandanyi bisi dirbinkwayeb,’ tenen dirbinkwandau do? Ato tenen kum. Sun tukwetam kuboka erebdob nang ara teleb ongon aling ongoramingiryok, ninyi kun kum mutuk kum kuraming. Erda, sun teleb ongon aling nang ara weik sien ai umbura kuraming ati ebman.

⁹Ati, sunci minob ura Yohanes bisi dirbinmandau ara, ‘Unato anyi bisi dirbinkwayeb,’ tenen dirbinkwandau do? ‘Er Imtamnyi Uram ebdeibmaca bobananyi bisi dirbinkwayeb,’ tenen dirbinkwandau do? Diba. Yohanes bira Er Imtamnyi Uram ebdeibmaca bobananyi kurur ati ebman. Ato ebman bok, sun Er Imtamnyi Uram ebdeibmaci to lak etereramnyi nang nirya ara erebdob wa iramiryok, Yohanes bira a nang nirya asi bisibkaboka iya erebdob wa inanyi kurur ati ebman.

¹⁰Ati, Yohanes er deyok ati Er Imtamnyi biryi minob uca ebdeiamwe to, Er uram ebdeibmaca bobaramunyi biryi ato eboka sirya kerek sekdeiamwe, ‘Dirandarur, Nira Imtamnyi biryi Kanda Ni bokwetebkwankin Ninyi Lebkwansirimnyi bisi kum bokwetebkwankin cok, Niryi ninyi tentok Ni uram ebmurubkwandanyi bisi minob bokdonokwan. Anyi minob bokdonokwananyi bira Kanda Ninyi Lebkwansirimnyi biti, “Ninyi nirya aryi Ersi dobdobting,” tenen bisik yabkwankir.’ (Maleakhi 3:1) Er Imtamnyi biryi Yohanes biti ato eboka ebdeiamwe ba, Er Imtamnyi Uram ebdeibmaca bobaramunyi biryi kerek sekdeiamwe,” Yesus biryi ebmou.

¹¹Ebmou ura, Er Yesus biryi ton ato ebtabakmou. “Niryi sunsi dib en uram kobdob ton ebkwinsin ati sunci diboka kekebdarur. Sun tukwetam kun nang kankan aryi ton nang ara erebdob nang kunung bok, Yohanes bira a erebdob nang asi bisibkaboka iya erebdob wa inanyi kurur. Bok, Er Imtamnyi Weik Sienyi kurur amwetam wekmangnyi nang nirya ara Yohanes bisi bisibkaboka iya erebdob nang kunung. A nang kankan aryi outam bukmangnyi nang ababyi ara Yohanes bisi bisibkaboka erebdob nang kunung ati ebman.

¹²Musa kerek sengna sekdeiamwe ara, ‘Ato-ato kuboka kunubde binkwande,’ eboka kerek sekdeiamwe to ara Er Imtamnyi biryi sirya kunubkalibmar. Tonda, sun Er Imtamnyi Uram ebdeibmaci to lak etereramnyi nang ara, ‘Ato-ato kuboka kunubde binkwande,’ eboka kerek sekdeiamnyi to ara sirya kunubkalibmar. Ara, Yohanes ninyi me dongonanyi lak eterebkalibmou talak aryi kuboka ukuryok ababyi Er Imtamnyi biryi minob ebdeiamwe to kunubde barur. Er Imtamnyi biryi mikib kuboka Er uram minob ebdeiamwe uram asi kunubde barur deyok aryi, ninyi ilinto aryi yandoka Er Imtamnyi Iya Weik Sienyi Er amwetam kibmang. Er Imtamnyi biryi mikib kuboka ninyi ilinto Er amwetam nang kimdeirirur bok, yu kanya bon nang ara, ‘Er Imtamnyi Weik Sienyi kurur asi bisik sektibyi,’ tenen ukurderaming.

¹³

¹⁴Er Imtamnyi Uram umbura aryi kerek sekdeiamnyi to ara, ‘Aminda aryi nabi Elia bitonyi kuboka Ni uram ebmurubkwandanyi yankwande,’ ara Yohanes deyok ati eboka kerek sekdeiamnyi. Ati, sunci a ebmasin uram ati dib tenebdate kum, dib kum tenebdate ababyi, Yohanes bira nabi Elia bitonyi kurur ati dib ebmasin.

¹⁵Unanyi-unaner ara amol borandum nang aryi a ebmasin uram diboka teneibmun cok, kekebdobkwandur!” Er Yesus biryi ebmou.

¹⁶Er Yesus biryi ebmou cok, Erci ton ato ebtabakmou, “Sunda ukuryok talak kundarur nang ara Er Imtamnyi biryi bokdonoksou nang uram asi dib kum tenerandum. Ati, Niryi sunti kiklina uram ebsitiniryok, ‘Sunda mitik mabwe sulbalyi kanya bon mabwe ato kurandum,’ ebsitinyi. Ara, mitik mabwe buluboka dengdana ai dam bukoka arikal donmangiryi, ton mabwe ara, ‘Arikal dobkwayeb,’ eboka namnaming ababyi sun kwityabwe yuk mabwe ara, ‘Nun li,’ tenen arikal kum doraming. Uca, sun kwityabwe arikal don mabwe ara sun kwityabwe sulbalyi kanya bon mabwe ati ato eboka kereraming,

¹⁷‘Ba, nunci sunti, “Mot sebmilibdobsiting,” tenen ninyi kanya kilkil kimdeirin mot semab bok, sunci mot ton kum sebmilibdobmasurum se. Nunci sunti, “Eimna tanyi ebmilibdobsiting,” tenen ninyi boukwe eimni tanyi enmab bok, sunci eimna tanya ena ababyi kum ebmilibdobmasurum se,’ eraming.

¹⁸Sunda ukuryok kurandum nang ara sulbalyi kanya bon mabwe ato kurandum ati ebman. Ara, Yohanes ninyi me dongonanyi a yandoka kuramuryok, erda si teboka kwaning ton me ton kum yiramwe deyok aryi, sunci erti, ‘Anyi biryi erande uram ara nun li,’ tenerandau ci, ‘Anyi bira isa kanya wekunyi,’ erandau.

¹⁹Ani, ukuryok ara, Ni Ninyi Dasinyi yandoka kunun ci, Niryi si temna kum uca kwaning ab anggur me ab yibde kunun. Ura, sunci Ni esunun uram ababyi, ‘Nun li,’ teneramun cok, ato enindarur, ‘Dibdendarur e! Anyi Yesus bira kwaning yin louranyi ab anggur du yung walina talen me yinanyi kurur se. Anyi bira, “Roma weik sienyi Kaisar biti pajak dengna karebdarur,” eboka molormilin nang ab tonkwa kunungnyi kurur.’ Tonda, ‘Malyi kun dinyi kunung nang yuk nang ab asi uruboka sun kwit kibdoburyi tonkwa kuronung,’ enindarur. Bok, Niryi bikdob uram eboka eterenunyi kunun ara teleb dinyi akwe kunubde banun ati, ninyi aryi Niti, ‘Teleb dinyi akwe kunubde barur,’ tenen bikwaning,” ebmou.

²⁰A sirya ura, Er Yesus biryi sun malyi dinyi kum tangloramnyi nang asi kerebkalibmou. Ara, Erci atei winiryi asi bindoka ilil tenen dinyi mitik kum kikniramwe bok, akatei nang ara sun malyi tenen dinyi kum tangloramnyi deyok aryi, Erci sunsi ato eboka kerenmou.

²¹“Se, sun Korazim atei kundarur nang ab, sun Betsaida atei kundarur nang ab. Er Imtamnyi biryi sunsi wenebkwansir ati ebman. Nira sun kankan dam aryi yandoka iya ilil tenen dinyi kiknibde baranse bok, sunci sun malyi kun dinyi kum tanglorandum se. A deyok aryi, Er Imtamnyi biryi sunsi wenebkwansir. Niryi sunda Israel yala nang kobdob kankan aryi yandoka ilil tenen kiknibde baransiryok, sun Tirus atei nang ab Sidon atei nang bindoka ato ilil tenen dinyi ton kum kikniranse. Niryi a nang ara Israel yala kum nang bindoka ato ilil tenen dinyi kiknirantinyi ura, a nang ara sun malyi kun dinyi takloboka engen kanya boranting. Bok, Niryi sun urasintam aryi iya ilil tenen dinyi kiknibde baranse bok, sunci sun malyi kun dinyi kum tanglorandum.

²²Bok, Niryi sunsi dib en uram ebkwinsin ati sunci diboka kekebdarur. Sirya kobdob uki tum berekci ura, Er Imtamnyi biryi sun Tirus atei nang ab Sidon atei nang ab aryi malyi kuamnyi tok wenebdiryok, Erci sunda Korazim atei nang ab Betsaida atei nang ab ati, ‘Bisibkaboka malyi dinyi kun nang,’ tenen wenen dinyi karebtabakoka wenebkwansir.

²³Ura, ukuryok ara sun Kapernaum atei kurandum nang ati uram ton ebkwinsin. Sunda Kapernaum atei aryi kurandum nang kankan aryi yandoka iya ilil tenen dinyi kiknibde baranse deyok aryi, sunci sundamnyi erebdeibdandoka, ‘Er Imtamnyi biryi bisibkaboka kisal dakwansir,’ tenerdarandum. Ato tenerdarandum bok, Er Imtamnyi biryi sunsi bisibkaboka wenen dinyi kareboka ilil kot mutuk amwetam dobkwetebkwansir. Niryi minob kuramnyi nang Sodom atei kuramnyi nang kankan bindoka ato ilil tenen dinyi ton kiknirante ura, akatei nang ara sun malyi kun dinyi taklobmaite uca, Er Imtamnyi biryi sunsi kum wenebmote uca, sun atei arub ababyi tuba kurante.

²⁴Bok, Niryi sunsi dib en uram ebkwinsin ati sunci diboka kekebdarur. Sirya kobdob uki tum berekci ura, Er Imtamnyi biryi sun Sodom atei kuramnyi nang ababyi sun malyi kuamnyi tok wenebdiryok, Erci sunda Kapernaum nang asi bisibkaboka ikin dinyi kareboka wenebkwansir,” ebmou.

²⁵A talak akiryok, Er Yesus biryi Er Nai Imtamnyi biti, “Ei, Ni Nai,” tenen ato ebmou, “Ni Nai Imtamnyi, Niryi Kanda im ton tukwe ton taleboka arungdeirisumnyi biti, ‘Ei, Ni Nai’ eboka kisal dakmakin. Kanda iya Weik Sienyi kuboka ninyi lebdeiboka arungdeirirum ara sundamnyi erebdeibdandoka, ‘Nunda bingna nang kunub,’ tenen nang urasintam aryi lak kum kimnandum. Erda, sun mitik mabwe ato kun nang ara luknubdob kanya bon nang asi lak kibdeibmumwe.

²⁶Ni Nai, diba, Kanci teleb teneamumwe tok, Kanci sun luknubdob kanya bon nang asi Kandamnyi lak kimdarandim. A deyok aryi, Niryi Kansi, ‘Ei ni Nai,’ eboka kisal dakmakin.

²⁷Ni Nai, Kanci Kan mikib ab utotoa nirya ab ara Ni taruk dam karebnumwe. Kanda Ni Nai kurum aryok, Kan kikwe Nisi diboka bingnanurum. Tonda, Nira Kan Mi nong kunun aryok, Ni kikwe Kansi diboka bingkunun. Tonda, Ni Kan Mi aryi teleb tenenun to, Niryi ninyi ton nang wibdeiboka lak kimdeirinun uca, a nang ababyi Kanda Imtamnyi bisi bingkunung,” ebmou.

²⁸Ato ebmou cok, Er Yesus biryi ato eboka nabmasou, “Sunda mambul kanya boramunyi nang nirya ara Ni dam yandobmunyi ura, Niryi sun kanya asi teleb kibdeibkwan.

²⁹Ati, sunci yandoka Ni milinin nang kibdobmunyi ura, Niryi etereransin uram kunubde bindarur. Sunci Ni uram asi diboka kekeramunyi uca, sunci Niti, ‘Anyi bira kanya naminyi ton luknubdob kanya borutnyi kurur,’ tenen bikdobkwandarur. Sunci Ni dam yandobmunyi ura, Niryi karebsinyi uca, sun kanya eleleng ebkwansir.

³⁰Niryi eteresunun uram ton, ‘Ato-ato kunubde bindarur,’ eboka arungdeirisunun ara ikin uram kuma. A deyok aryi, sunci Ni dam yandobmunyi ura, Niryi karebsinyi uca, sun kanya ara eleleng ebkwansir ati ebman.” Ato eboka Yesus biryi ninyi nabmou.