Read Futuna-Aniwa Matius 14 Bible Online

Matius 14 - Futuna-Aniwa bible

Matius 14

¹A talak ara Galilea mutuk nang kalingnamwe weik sienyi si Herodes biryi kekebmou uca, ninyi aryi, “Er Yesus bira ato-ato kuboka ukurande,” ebmai asi kekebmou.

²Ura, Herodes biryi kekebmou uca, erci er amwetam bun nang asi ato ebmou, “Anyi Yesus enungnyi bira ilil tenen dinyi kiknibde barandinyi bira Yohanes ninyi me dongoramunyi a kunum ati tenebman. Yohanes bisi obmoubwe asi kam tubto bukokmou ati tenebman. Ara, kam bukokmou deyok aryi, erci mikib weik dobdobmou uca, ilil tenen dinyi yuk-yuk asi kiknibde barande ati tenebman,” ebmou.

³Ara, Yohanes kam tuba kuramwe ba, Herodes biryi er yin doun nang asi arukdeiamuryi, “Yohanes ninyi me dongoramunyi taleboka ninyi wenen ai dongobdarur,” eamwe uca, sunci ersi taleboka dongoamnyi. Ara, Herodes biryi er weit Filipus ner si Herodias ukula dobdamwe deyok aryi, Yohanes biryi Herodes bisi, “Kan weit Filipus ner ukula dobdamumwe ara malyito kubumwe,” eamwe deyok aryi, Herodes biryi Yohanes bisi ninyi wenen ai dongoamwe.

⁵Ara, Herodes biryi Yohanes biti, “Obtinyi,” teneramwe bok, ninyi ilinto aryi, “Yohanes bira Er Imtamnyi Uram ebdeibmaca bobananyi kurur,” teneramnyi deyok aryi, erci, “Yohanes bisi ona ati ni ilil,” teneramuryi, kum obmou.

⁶Bok, Herodes biryi ukula dobdamwe ner si Herodias bira, “Yohanes bisi obtibyi,” tenen tuba kuramwe. Ura, Herodes deibmou uki tum kubmou ura, erci, “Kwalina weik kwalibkwayeb,” eboka ninyi ilinto nabmou uca, tonkwa yinmai bok, Herodias nebnyi aryi bobatikde mot semou uca, Herodes er kanya iya teleb kubmou.

⁷Er kanya iya teleb kubmou ci, Herodes biryi a nebnyi asi ato ebmou, “Kanci molobdobniminyi tok kunuboka karebkwamakin,” ebmou. Enmou cok, erci, “Tola kuma, diboka karebkwamakin,” eboka erkatan uram ebmou.

⁸Ura, er kwin Herodias biryi, “Ato-ato eboka molobdum,” ebmou tok a nebnyi aryi molobdobmou. Ati, erci, “‘Yohanes ninyi me dongonanyi bisi ya ngang dakoka obokdarur,’ ebmin ci, er kisok kwaning yangabde suwa deici deibdongoboka karebnurum,” eboka molobmou.

⁹Uca, weik sienyi Herodes biryi, “Se, ni talyi enmanuryi,” tenen mambul kanya bobmou. Mambul kanya bobmou cok, erci erkatana uram eboka, “Tola kuma. Kanci molobdobniminyi tok diboka karebkwamakin,” ebmou deyok aryi, erci a nebnyi aryi molobmou tok kunubmou. Tonda, Herodes biryi, “Sun yiryanmang nang ara niti, ‘Tola enanyi,’ ebningnyei,” tenebmou deyok aryi, erci er ebdeiamwe tok kunubmou.

¹⁰Kunubmou cok, erda weik sienyi biryi er yin doun nang asi arukdeibmou ci, “Yohanes ninyi wenen ai aryi kurande asi bindoka er ngang ya dakoka obmun ci, er kisok boyandarur!” ebmou.

¹¹Uca, sunci bindoka Yohanes er ngang ya dakoka obmai ci, er kisok asi kwaning yangabde suwa deibdongoboka boyanmai. Ura, sunci Yohanes er kisok boyanmai asi a nebnyi asi karebmai ura, a nebnyi aryi er kwin bisi bobinmou.

¹²Ura, Yohanes ninyi me dongoramunyi miliramnyi nang yandoka sunci Yohanes er tukwi boboka tukwe dongorbinmai. Sirya dongobmai ura, sunci Er Yesus bisi bindoka, “Yohanes bisi sirya obmang,” eboka nukmai.

¹³Er Yesus biryi Yohanes bisi weik sienyi Herodes biryi obmou deyok kekebmou ura, a mutuk deibloboka bindobmou ci, Er miliramnyi nang ab tonkwa co ngun-ngun dub bukoka ninyi kum dikum ai binmai. Bok, ninyi ilinto bulubmai ci, Er Yesus bindobmou ati bikmai ura, sun atei yuk-yuk aryi anaboka mutuk kib bisik kuboka Ersi milibmai.

¹⁴Ba, Er Yesus ab Er miliramnyi nang co ngun-ngun dub bukoka banmai ani, me katum dam dararbinmai. Dararbinmai cok, Er Yesus biryi diramwe uca, ninyi yubwa-yubwa ilinto buluboka wekmai asi eibmou. Ura, Er boukwe sunti sangkuruk-sangkuruk ebmou ba, Erci a nang aryi boyanmai nang u yiramwe nang asi kwetenmou.

¹⁵Ani, sirya iniburyi kiting wekou ura, Er Yesus miliramnyi nang aryi Er dam yandoka ato ebmai, “A kunmab mutuk ara ninyi kun kum ai asi kunmab bok sirya inibmar. Ati, kanci a bulubmang nang ninyi yubwa-yubwa asi, ‘Sunci anabkaboka atei bindarur,’ ebminyi uca, a nang aryi atei bindoka yina dekoka yibde mabdobkwaming,” ebmai.

¹⁶Ebmai bok, Er Yesus biryi sunsi ato ebmou, “Kum, sun kum binkwamang. Erda, sunci a ninyi yubwa asi yina yibkarebkwandarur!” ebmou.

¹⁷Uca, sunci ato ebmai, “Nunda roti ara sirik amubaryok bobmab ba, mekinaiya ara sirik bitinyok bobmab,” ebmai.

¹⁸Ura, Er Yesus biryi sunsi ato ebmou, “A roti sirik ab mekinaiya sirik ab ara Nisi a boyandarur,” ebmou.

¹⁹Ebmou cok, Erci a bulubmai nang ninyi yubwa-yubwa ilinto asi, “Sungsunga deici bukdarur,” ebmou. Ba, sirya bukmai ba, Erci a roti amubaryi ab a mekinaiya bitinyi ab dobtaleboka imtam dibwelebmou ci, Er Imtamnyi bisi kisal dakoka, “E, Ni Nai,” eboka kibdobmou. Ura, Erci a roti ab mekinaiya ab asi toboka-toboka Er miliramnyi nang asi karebmou ba, sunci a ninyi yubwa-yubwa asi bokeibde yibinmai.

²⁰Ba, sun nirya yinmai ani, sirya boubmou ura, sun Er Yesus bisi miliramnyi nang aryi yina kablobmai dinyi bulubdeibmai ci, tower aling amolbaryi kiboka deibmai ba, langkarikmou.

²¹Ura, a buluboka wekmai ci, yina yibmai nang ara sal yoka dem ninyi lima ribu baryi atoa yibmai. Tonda, nerabwe ab mabwe nermabwe ababyi buluboka wekmai ci, yibmai bok, kum nukmai.

²²Er Yesus biryi a bulubmai nang nirya asi yina sirya yibkarebmou ura, Erci Er miliramnyi nang amolbaryi asi ato ebmou, “Sunci ola anabdobmun ci, co ngun-ngun dub bukoka mekwan koubkaboka otam minob binmandarur,” ebmou. Ura, Yesus er miliramnyi nang aryi anabdobmai bok, Er Yesus biryi sun bulubmai nang ninyi yubwa-yubwa ab tonkwa tuba kunmou ci, “Sun atei yuk-yuk da bindarur,” ebmou ci, bokdanmai.

²³Ba, a ninyi yubwa sirya bokeibmou ba, bindobmai ura, Er Yesus bira Er yuk kubmou ci, Erci, “Er Imtamnyi bisi molonkwaman,” tenen mutuk kon welebinmou. Ara, sirya kunuk dakmou ura, Er yuk adikum kunmou.

²⁴Ba, Er miliramnyi nang ara co ngun-ngun bukoka tuba banmai cok, me katum dam otam kum binmai ci, erda mekwan dub noutamtoto banmai. Banmai bok, kumwe weik donmou deyok aryi, me kwatib-kwatib enmou uca, sun bukmai co ngun-ngun ara dangublobmanto kunmou.

²⁵Ura, berekwindiryi im ki dangnande ob ara Er Yesus mutuk kon aryi yuryandoka mekwan deici aryi banmou ci, Er miliramnyi nang co ngun-ngun dub aryi bukmai asi yanganmou.

²⁶Ura, Er miliramnyi nang aryi dinmai uca, Er Yesus mekwan deici yanganmou asi asing eibmai. Uca, sun lukdanmai ba, ilil kubmou ba, ato ebmai, “Din nang kanya o yanganmar onune,” eboka ngalukde kwemai.

²⁷Bok, Er Yesus biryi anmalakoka sunsi ato ebmou, “Sun ilil kusina mem! Ara, Ni sun Nai yanganman anune!” ebmou.

²⁸Ura, Petrus biryi Ersi ato ebmou, “Nai Arungdeirisurumnyi, Kanda Yesus a kunum yanganmaminyi ura, Kanci nisi, ‘Mekwan deici aryi yandoka ur yarum,’ ebdenimin ci, ni mekwan me deici aryi yandoka Kan dam yankun,” ebmou.

²⁹Uca, Er Yesus biryi, “Ur, a yarum!” ebmou. Uca, Petrus bira co ngun-ngun dub aryi yuryibindoka mekwan deici banmou ci, Er Yesus dam binmou.

³⁰Barabwe bok, Petrus biryi kumwe lingna ton bikmou ura, er kanya ilil kuramwe ba, er wekdoro yurbau. Wekdoro yurbau ba, erci uram doboka ato ebmou, “Se Nai, ni lemdoryanurum se!” ebmou.

³¹Ura, Er Yesus biryi ola taruk donokoka ersi talebokmou ci, ato ebmou, “Se Petrus, kanda Nisi dib tenenurum cok, mikib kuboka dib kum tenenurum se. Kan kanya kankana kubmakir ara unatoa ati kankana kubmakir do?” ebmou.

³²Ura, co ngun-ngun dub burwelebinmarei ba, kumwe donmou ara kum dandobmou.

³³Uca, Er miliramnyi nang co ngun-ngun dub bukamnyi nang ara Er Yesus biti, “Kanda dib kobdob ati Er Imtamnyi Mi kurum,” eboka kisal dakmai.

³⁴Ura, mekwan koubkaboka otam kuboka doramnyi atei si Genesaret atei dararbinmai.

³⁵Ba, akatei nang aryi diramnyi uca, “Er Yesus sirya yanmar,” eiboka bikmai ura, sunci a mutuk dam doramnyi atei nang dam nirya ebde yibinmai. Uca, a mutuk dam doramnyi atei yuk-yuk aryi anaboka ninyi ilinto yandoka sun u yiramwe nang nirya asi boboka Er Yesus dam boyanmai.

³⁶Ura, sunci Ersi ato eboka molobdobmai, “Nai, sun u yin nang ara, ‘Kwetebsute,’ tenen Kan alib ongon aling kubkub asi bol libdenkwanking ati ur ebdum,” eboka molobmai. Ura, Er Yesus ongoramwe alib ongon aling kubkub asi bol limdenmai nang nirya ara sun u yiramwe dinyi kwetenmou.