Read Futuna-Aniwa Matius 15 Bible Online

Matius 15 - Futuna-Aniwa bible

Matius 15

¹Ura, Yesus Galilea mutuk tuba kuramwe ba, ninyi ton nang ara weik aryi Yerusalem aryi kuboka Er dam yanganmai. A nang ara Musa kerek sengna dirniliramnyi nang Farisi nang ab Musa kerek sengna bita bikoka etereramnyi nang ab aryi Er Yesus bisi yanmai ci, ato eboka asibdenmai,

²“Sun minob kuramnyi nang ara Musa Uram lak kimnamnyi nang aryi, ‘Ato-ato kuna mem,’ eransei. Ato eboka arungdeiriransei bok, Kan miliranking nang ara a uram asi yan yaniraming ara unatoa ati yan yaniraming do? Ati, Musa Uram lak kimnamnyi nang ara, ‘Yina kum yibmun cok, sun taruk me ilikdarur,’ eboka arungdeiriramnyi. Ara, ‘Nining dinyi mundu weksute ura, Er Imtamnyi biryi nunti kum dobdobsute,’ tenen ato eboka arungdeiriramnyi. Bok, Kan miliranking nang ara sun taruk me ilingna kum uca yina yiraming se!” eboka asibdenmai.

³Bok, Er Yesus biryi sunsi ato ebmou, “Sunda Farisi nang ara sun Musa Uram lak kimdeiriramnyi nang aryi eramnyi uram ati, ‘Nunukeibkwayeb,’ tenen kunubde baramun cok, Er Imtamnyi biryi arungdeirisurur uram asi yan yanirandum se. Ati, sunci unato ati Er Imtamnyi Uram yan yanirandum do?

⁴Ara, Er Imtamnyi biryi minob ura arungdeiansou ara, ‘Sun nai sun kwin ab ati, “Nun nai, nun kwin,” tenen teleb kubdeibdarur’, eansou. (Keluaran 20:12) Tonda, ‘Unanyi-unaner ara sun nai sun kwin asi suboka uram malyi karebdinyi bisi weneboka obdarur,’ eboka arungdeiansou. (Keluaran 21:17)

⁵Er Imtamnyi biryi ato eboka arungdeiansou bok, sunci, ‘Sun nai sun kwin ab asi teleb kubdeibdarur,’ ena kum kurandum. Ara, ninyi aryi sun nai sun kwin ab asi karebnung dinyi asi kum karebmangnyi asi sunci, ‘Ato kuna mem,’ kum erandum. Ara, ton nang aryi sun nai sun kwin ab asi ato eraming, ‘Nun taruk dam kubmasir dinyi ara sunda nun nai nun kwin ab ati karebtibiryok, nunci, “Er Imtamnyi bisi nunukeiboka a dinyi asi doboka Erti ninyi dama deibkwayeb,” tenebmoubwe ati sunsi kum karebkwayeb,’ eraming.

⁶Ton nang ara ato kuboka sun nai sun kwin ab asi dirnilina kum kuraming bok, sunda Farisi nang aryi, ‘Ato kuna mem,’ kum erandum. Ati, sunci, ‘Musa Uram lak kimnamnyi nang aryi eransei uram nunukeibkwayeb,’ tenen, ‘Er Imtamnyi biti ninyi dama deibkwayeb erandum dinyi asi sun nai sun kwin karena mem,’ erandum. Ato kuboka sunci Er Imtamnyi biryi, ‘Sun nai sun kwin teleb kubdeibdarur,’ en uram asi outam kibdeiboka barwetam kimdeirirandum.

⁷Sunda kanya tam ara malyi kanya borandum cok, Er Imtamnyi Uram diboka kunun nang ato kimdandarur nang se! Er Imtamnyi Uram ebdeibmaca bobaramunyi si Yesaya biryi minob kerek sekdeiamwe to ara erci sunda Farisi nang aryi kurandum to lak kimdeiamwe. Ara, Yesaya biryi sunti ato eboka kerek sekdeiamwe,

⁸‘A nang ara sun silalum deici aryok Nira Er Imtamnyi biti, “Er si weik ebkwayeb,” eraming. Ato eramingiryok, sunci sun kanya tam aryi Nitam diboka kum deiriraning.

⁹A nang ara Nira Imtamnyi si weik ererdeiriraningiryok, talyi ati ererdeiriraning. A nang aryi eterena ton etereramingiryok, tukwetam nang aryi eteren dinyi akwe etereraming,’ sekdeiamwe. (Yesaya 29:13) Yesaya biryi minob ura ato eboka kerek sekdeiamwe ara sunda Farisi nang aryi kurandum to lak kimdeiamwe,” Yesus biryi ebmou.

¹⁰Ato ebmou ura, Er Yesus biryi sun bulubmai nang ilinto asi, “Ni dam yandarur,” eboka nabmou ura, Erci sunsi ato eboka eterebmou, “Niryi sunsi eterebkwinsin uram asi sunci diboka kekebmun ci, bikdobdarur.

¹¹Ninyi si bisik wekoka mundu weksici dinyi ara ninyi kanya malyi kum kurdongoransir. Ati, Er Imtamnyi biryi ato dinyi deib aryi, ‘Malyi kun nang kunung,’ tenen kum kusurur. Erda, ninyi si bisik anaranci dinyi deib aryi Er Imtamnyi biryi sunti, ‘Malyi kun nang,’ tenesurur,” ebmou.

¹²Ura, sun Farisi nang aryi a uram kekebmai ci, sunci, “Malyito eboka lukeibmasir se,” tenen yu kanya bobmai. Ura, Yesus Er miliramnyi nang aryi Er dam yandoka ato eboka asibmai, “Nai, Kan eterebmarima ara sun Farisi nang aryi kekebmangiryok, ‘Malyito eboka lukeibmasir se,’ tenen yu kanya bobmaking ati bikmarim do kum do?” eboka asibdenmai.

¹³Ato eboka asibdenmai uca, Er Yesus biryi sunsi ato ebmou, “A Farisi nang asi Ni Nai Imtamnyi biryi, ‘Ni uram eterebdarur,’ eboka kum tikeibmou ati Erci a nang asi wenebkwande. Ara, Ni Nai Imtamnyi biryi kum kouanci dinyi nirya ati Erci doboka, ‘Kum daneibkwan,’ tenen yating ababyi kwinibdeibkwande.

¹⁴A Farisi nang ara dib en uram kum bingnamingiryok, yuk nang asi etereraming asi sunci a nang aryi eterena uram tuba kekebmunyei. A nang ara asing kuanci nang ato kuramingiryok, yuk nang asi, ‘A bisik asi bindarur ati eterebkwayeb,’ eboka taruk taleboka bobaraming. Ura, asing kuanci nang aryi asing kuanci nang yuk nang asi bobating ura, sun nisintum tukwe ungdona bisik minola wekting ati ebman. Ati, sunci sun Farisi nang aryi etereraming uram tuba kekebmunyei ati ebman,” Er Yesus biryi ebmou.

¹⁵Ura, Petrus biryi Ersi ato ebmou, “Kanci kebdeiboka, ‘Ninyi si bisik aryi anaranci dinyi ara ninyi malyi kimdongorur,’ ebmarim deyok ara nun kum bikmab ati Kanci lak eterebsurum,” ebmou.

¹⁶Uca, Er Yesus biryi ato ebmou, “Sunda Ni miliranurum nang aryi a kemdeirina uram deyok sirya bikdobdate bok, sunbabyi a kemdeirina uram deyok tuba kum bikdobmarum darib?

¹⁷Ninyi ara yina yiramingiryok, a yina ara si bisik wekoka mundu umbura maryurbinmaci ani, dei yarkaraming. Ara, nining tenen dinyi ababyi ninyi si bisik wekoka mundu umbura maryurbinmaci ani, dei yarkaraming. Ati, ninyi si bisik wekmaci dinyi deib aryi Er Imtamnyi biryi ninyi ati, ‘Malyi dinyi kubmang se,’ tenen kum kurur. Sunci a dinyi bikdobmarum do kum do?

¹⁸Bok, ninyi si bisik anamyangarande dinyi deib aryi Er Imtamnyi biryi ninyi ati, ‘Malyi dinyi kubmang se,’ tenerur ati ebman. Ara, silalum deib aryi sun kanya tam aryi malyi teneibmunyi tok lak erandum deib aryi Er Imtamnyi biryi ninyi ati, ‘Malyi kun nang kunung,’ tenerur.

¹⁹Ninyi kanya tam aryi kuboka malyi dinyi yuk-yuk asi anamyangarande ati ato ebmasin. Ara, ninyi kanya aryi kuboka, ‘Malyi dinyi kubtinyi,’ tenen dinyi anamyangarande. Tonda, ‘Ninyi obkwan,’ tenen dinyi anarande. Tonda, ‘Yuk nang ner yobkwan,’ tenen dinyi anarande. Tonda, ‘Ner talyi yobkwan,’ tenen dinyi anarande. Tonda, ‘Yuk nang dinyi ukula dobkwan,’ tenen dinyi anarande. Tonda, ‘Sun deyok kum kuranci nang asi tatab-tatab ebkwan,’ tenen dinyi anarande. Tonda, ‘Er Imtamnyi kum ninyi kum ina ngilikwan,’ tenen dinyi anarande.

²⁰Ato kuboka malyi tenen dinyi yuk-yuk ara ninyi kanya dam aryi anarur deib aryi Er Imtamnyi biryi ninyi ati, ‘Malyi dinyi kubmang se,’ tenerur. Bok, ninyi aryi sun taruk me ilingna kum uca yiraming deib aryi Er Imtamnyi biryi sunti, ‘Malyi dinyi kubmang se,’ tenen kum kurur.” Ato eboka Yesus biryi Er miliramnyi nang asi eterebmou.

²¹Ura, Er Yesus biryi Galilea mutuk aryi anabdoboka kisibdobmou ci, me utam kuboka doramnyi atei si Tirus ab Sidon ab mutuk dam binmou. A mutuk ara sun Yahudi yala kum nang kuramnyi mutuk kuramwe.

²²Banmou ani, Kanaan yala ner tentok ara Yahudi kum ner kuramuryok, Er Yesus dam yandoka ato ebmou, “Nai Arungdeirisurumnyi, Kanda weik sienyi Daud deibdobanyi kurum. Ati, Kanci boukwe kibdobsimin ci, ni nebnyi isa kanya wekwe ba, u mitik kum dororur asi Kanci kwetebdeibnurum se.” Ato eboka a ner aryi Er Yesus bisi molobdobmou.

²³Ato eboka molobdobmou bok, Er Yesus biryi a ner asi uram ton kum ebmou. Uca, Er miliramnyi nang aryi Ersi yandoka molobmai, “Nai, a ner ara uram ngwelek-ngwelek eboka tuba dobde nun dam yanganmar ati, Kanci ersi, ‘Bindobdum,’ ebdum,” ebmai.

²⁴Uca, Er Yesus biryi sunsi ato ebmou, “Er Imtamnyi biryi Nisi tukwetam bokwetebnou ara, ‘Sun Israel yala nang kankan aryi kuboka waningnaming domba asi ingkirikoka lebdeibdum,’ eboka bokwetebnou. ‘Yuk yala nang asi lebdeibdum,’ eboka kum bokwetebmou,” ebmou.

²⁵Ebmou bok, a ner ara Er Yesus dam yandoka er kutam ikdongoboka buryanmou ci, ato eboka molobmou, “Nai, Kanci boukwe kiboka ni nebnyi asi kwetebdeibnurum,” eboka molobmou.

²⁶Bok, Er Yesus biryi ato ebmou, “Sun nai sun kwin ab aryi sun mabwe nermabwe ati roti kiknibdeibmangnyi asi kam aryi yibingnyei. Ati, sun mabwe nermabwe yibting yina asi kam karebtibyi ara kikib kum kubte. A ner ab er nebnyi ab ara Yahudi yala ner kum kururung ati, Niryi a ner aryi molobmanir to kunubdeibtinyi uca, Niryi kikib kum dinyi kunubdeibtinyi,” ebmou.

²⁷Ato ebmou uca, a ner aryi ato ebmou, “Nai, dib ebmanirim bok, kam ababyi roti yiraming. Ara, kam damnyi biryi roti yirande ba, er taranci kam ara co lamna amwetam bukdiryok, oubdoba sangmaci dinyi mitik-mitik asi dobde yirorande. Ati, Nai, Kanci ni nebnyi asi kwetebdeibnurum ati molobmakin,” ebmou.

²⁸Uca, Er Yesus biryi a ner asi ato ebmou, “Ni kwin, Kanci Niti, ‘Ni nebnyi asi lebdeibte,’ tenebmanirim ara mikib kuboka dib tenebmanirim. Ati, Kanci Nisi molobmanirim to, kunubdeibkwinkin,” ebmou. Uca, a erdongou talak aryok a ner er nebnyi isa kanya bindobmou ba, a nebnyi teleb akwe kubmou.

²⁹Ura, Er Yesus biryi Tirus ab Sidon mutuk ab takdongobmou ura, me Galilea mekwan duman dombinmou. Barabwe ani, mutuk kon dam weleboka a bina bunmou.

³⁰Ura, ninyi ilinto aryi Er dam bulubmai ci, yun yuk-yuk taleranci nang asi Er dam boyanganmai. Ara, yan deneamwe nang ton, asing kuamwe nang ton, camding-camding en nang ton, uram kum eramnyi nang ton, yuk u-yuk u yiramwe nang ilinto ab boboka Er Yesus yan dam deiriryanmai. Deiriryanmai ba, Er Yesus biryi a nang nirya asi kwetebmou.

³¹Ara, Er Yesus biryi kwetebmou uca, sun uram kum eramnyi nang ara uram ebkalibmai. Tonda, sun camding-camding en nang ara mikib kuboka yibanmai. Tonda, sun yan deneamwe nang ababyi mikib kuboka yibanmai. Ba, sun asing kuamwe nang ara asing eibkatabmai. Uca, a yandoka wekmai nang ilinto aryi a ilil tenen dinyi nirya dinmai uca, sunci, “Naie,” tenen Er Imtamnyi sun Israel yala nang aryi molonungnyi kisal dakmai.

³²Ura, Yesus biryi Er miliramnyi nang asi nabmou ura, Erci sunsi ato ebmou, “A bulubmang nang ati Ni boukwe weik kunun. Uki winiryi nirya ara Ni ab tonkwa kunmab ani, sun kwaning kum danmar. Ati, a nang ara kwaning atanmar asi Niryi, ‘Da Bindarur,’ kum ebkwan. Ara, ‘Bisik noutam aryi banmangiryi diblalakingnyei,’ tenen Niryi sunti boukwe weik kunun,” ebmou.

³³Ura, Er miliramnyi nang aryi ato ebmai, “A kunmab ai ara ninyi kun kum ai aryi kunmab ati nunci, ‘A bulubmang nang nirya asi yina karebtibyi,’ tenen yina kikiman kum dorbitibyi,” ebmai.

³⁴Ura, Er Yesus biryi sunsi asibdenmou, “Sunda roti bobmarum ara tokol bobmarum do?” eboka asibdenmou. Uca, sunci ato ebmai, “Roti tokol ara sirik tabaryi bobmab ba, mekinaiya ara mitik-mitik mekinaiya asi mikbaryok bobmab,” ebmai.

³⁵Ura, Er Yesus biryi sun bulubmai nang ilinto asi, “Tukwe ai bukdarur!” ebmou.

³⁶Ura, sirya bukmai ura, Er Yesus biryi a roti tokol tabaryi ab a mitik-mitik mekinaiya ab dobtalebmou ura, Er Imtamnyi bisi, “Ei Ni Nai, Kanci nun yina karebmasirim,” eboka kibdobmou. Ura, Erci a yina asi toboka-toboka Er miliramnyi nang asi karebmou ba, sunci kuboka a ninyi yubwa ilinto asi bokeibde yibinmai.

³⁷Ba, sun nirya yinmai uca, boubmou ba, kablobmai. Ura, kablobmai tobdoba ara tower aryi wiamnyi aling tabaryi asi buluboka kibdongobmai ba, langkarikmou.

³⁸A buluboka wekmai ci, yibmai nang ara sal yoka dem aryi ninyi empat ribu baryi yibmai. Ba, nerabwe ab mabwe ababyi yibmai bok, kum nukmai.

³⁹Ura, Er Yesus biryi a ninyi yubwa asi, “Da bindobdarur,” eboka bokeibmou ura, Erda co ngun-ngun dub burwelebindoka me koubkaboka Magadan mutuk binmou.