Read Futuna-Aniwa Matius 20 Bible Online

Matius 20 - Futuna-Aniwa bible

Matius 20

¹Er Yesus biryi Er miliramnyi nang amolbaryi asi eterenmou ci, ton ato eterebmou. “Niryi sunsi, ‘Sun erebdob nang ara tukwetam bun nang kibkwaming ba, sun tukwetam bun nang ara erebdob nang kibkwaming,’ ebmasin deyok aryi, kiklina uram ton ebkwinsin. Ara, ‘Er Imtamnyi bira ato-ato kuboka iya Weik Sienyi kurur ci, ninyi ilinto Er amwetam kun nang kimdeirirur,’ tenen kiklina uram ton ebkwinsin. Wa in damnyi tentok ara, ‘Ni anggur co wa ibmilibkwaming ati tiya wa irmilin nang ingkirikwan,’ tenen belekuna kobdob bukoka anabdobmou ci, er wa irmilikwanting nang asi ingkirikde binmou.

²Ingkirikde binmou ura, ninyi ton nang aryi, ‘Kan wa irmilibkwayeb,’ ebmai ba, erci sunsi, ‘Uki tentok wa irmilibmunyi ba, keil uang si dinar tentok ara kikiman dengna dinyi sun yuk-yuk asi dekoka karebkwansin,’ ebmou. Uca, sunci, ‘Teleb,’ ebmai ura, er wa in damnyi biryi a nang asi, ‘Ni wa in dam bindoka wa ibmilibdarur,’ eboka bokdonokmou. Uca, sunci bindoka wa irmilibmai.

³Ura, belekuna kiting yakna toubnibaryi kibmou ba, a wa damnyi biryi, ‘Wa irmilin nang yuk nang asi tabakwan,’ tenen erci anaboka yibanmou ci, dinmou uca, yuk nang ton dengdan ai dam asi talyi ur dem kuronmai asi eibmou.

⁴Ura, erci sunsi ato ebmou, ‘Sunbabyi ni anggur co wa in dam bindoka wa irmilibmunyi ura, niryi sunsi dengna kikiman dinyi karebkwansin,’ ebmou.

⁵Uca, sunbabyi bindoka wa irmilibmai. Ani, kiting dukduk en kiting kibmou ba, er wa in damnyi biryi tamuboka bindoka talyi ur dem kuronmai nang asi ton tabakoka nabmou uca, sunbabyi wa in dam bindoka wa irmilibmai. Tonda, kiting yalingdein kiting kibmou ababyi, erci neiktoto talyi ur dem kuronmai nang yuk nang asi tabakoka nabmou ba, sunbabyi wa irmilibmai.

⁶Ani, sintam ara kiting deibkatabkwamwe talak ababyi kibmou ba, er wa in damnyi biryi, ‘Ni wa irmilin nang tabakwan,’ tenen anaboka talyi ur dem kuronmai nang yuk nang ab ebdanmai ura, erci sunsi ato eboka asibdenmou. ‘Sunda arub berekmar uki talak aryi kuboka ukuryok ababyi talyi ur dem kuronmarum ara unato ati talyi ur dem kuronmarum do?’ ebmou.

⁷Uca, sunci ersi ato ebmai, ‘Ninyi tentok ababyi nunsi, ‘Ni wa ibdeibnumunyi ura, dengna karebkwansin,’ kum ebmasir ati nunda talyi ur dem kuronmab,’ ebmai. Ura, er wa in damnyi biryi sunsi ato ebmou, ‘Sunbabyi ni anggur wa in dam asi irbindarur,’ ebmou. Uca, sunbabyi bindoka wa irmilibmai.

⁸Ani, kunuk dakmou ura, er wa in damnyi biryi er wa irmiliramnyi nang kalingnanyi bisi ato ebmou, ‘A wa irmilinmang nang nabminyi ura, niryi sunsi dekwan dengna karebdum. Dengna karebkwimin ci, aminda yandoka sintam aryi kuboka wa irmilibmabungwe nang asi deyok kouboka dekde birum. Ani, sirya kobdob ara sun yuma kobdob yandoka belekuna aryi kuboka wa irmilinmongwe nang asi dekde binkwandum!’ ebmou.

⁹Ura, sintam kiting deibkatabkwamwe talak aryi kuboka wa irmilibmai nang asi nabmou ba, yanmai ura, erci sun yuk-yuk asi keil uang si dinar tentok karebde binmou.

¹⁰Ura, sun wa irmiliramnyi nang yuk nang ababyi nabmou ba, yanmai ura, erci sun yuk-yuk asi neiktoto dinar tentok karebde banmou. Ani, sun yuma kobdob yandoka belerukna aryi kuboka wa irmiliramnyi nang asi nabmou ba, yanmai ci, sunci, ‘Nunda uki weikanun wa ibmilibmab ati, nunda dengna dinyi tabangna dinyi asi dobdobkwamab,’ tenebmai. Tenebmai bok, sunbabyi ninyi yuk-yuk aryi keil uang si dinar tentok akwe dobdoro yibinmai.

¹¹Ura, sunci a dengna asi sirya dobdobmai ura, sunci, ‘Co bok tabakoka deksute,’ tenen er wa in damnyi bisi ato eboka uram talebmai ci, ato ebmai,

¹²‘Yuk nang a tikmang ara ukuryok yandoka kiting tentok akwe irmilibmang asi dekmarim ci, dinar tentok karebmarim. Ba, nunda belerukna aryi kuboka wa irmilibmakib nang ara wa il weik aryi mambul kunmabiryok, kiting u yiransir dinyi bonmab ababyi tabangna kum uca neik dengna dinyi akwe karebmasirim se. A dinyi ara malyito kubmasirim,’ ebmai.

¹³Ebmai bok, er wa in damnyi biryi a wa irmiliramnyi nang kankan aryi ninyi tentoknyi bisi bindoka ersi ato ebmou, ‘Ni kwit e, niryi kansi kikiman dinyi akwe karebmakin. Niryi kansi, “Ni wa irmilibniminyi ura, dinar tentok dekoka karebkwankin,” ebmakonwe uca, kanci niti, “Teleb,” ebnumwe to sirya karebmakin.

¹⁴Ati, kanci a dekmakin dinyi asi dobdobmin ci, da birum. Niryi, “Aminda wa irmiliryanmanungwe nang ababyi neik dinyi akwe kareboka dekwaman,” tenebmanto sirya dekman.

¹⁵A karebde banman keil uang ara ni dinyi akwe kunurur ati, niryi teleb tenebnici tok ninyi yuk-yuk asi karebde bitinyi ara mem kuma. Nira teleb kanya bobniryok, langdeiboka karebde banunyi kunun deyok aryi, kanci kan kanya dam aryi yu kubmarim do?’ eboka asibdenmou.”

¹⁶Ato enmou cok, Er Yesus biryi Er miliramnyi nang asi ato ebmou, “Ato kuboka aminda aryi yandoka wa irmilin nang ilinto ara erebdob nang ato kibkwaming. Ba, sun yuma kobdob yandoka wa irmilin nang ilinto ara tukwetam bun nang ato kibkwaming,” ebmou.

¹⁷Ura, Er Yesus biryi, “Eikatei Yerusalem binkwayeb,” tenen bisik noutam aryi banmou ba, Erci Er miliramnyi nang amolbaryi asi sun yuk nabmou ci, sunsi ato ebmou,

¹⁸“Nunda Yerusalem atei banmab ani, binmabyi ura, ninyi aryi Ni Ninyi Dasinyi bisi dobtaleboka Er Imtamnyi kan ninyi kan noutam kuboka antanirdeirin deyok nang ab sun Musa kerek sengna eteren nang sun taruk dam ab dobkarebkwaning. Ura, a nang aryi Niti uram sekwetebningiryok, ‘Obkwanung,’ ebkwamaning.

¹⁹Ura, a nang aryi kuboka Nisi bobindoka sun Er Imtamnyi Uram kum bingnung nang dam dobkarebkwaning. Ara, ‘Sun Er Imtamnyi Uram walwal nang aryi Anyi bisi ina ngilikoka tabwe aryi kulaboka co lase deib aryi laboka bing dakting,’ tenen dobkarebkwaning. Ura, Ni dibmanyi ani, uki winiryi tum berekci ura, Er Imtamnyi biryi Nisi kam bukeibkwanir.” Ato eboka Yesus biryi sun dam lak ebmou.

²⁰Ura, Zebedeus ner ab er mabwe Yakobus ab Yohanes ab ara Er Yesus dam yanmai. Ura, sun kwin biryi, “Ni molobkwan tok Yesus biryi kunubdeibnute,” tenen er kutam ikdongobmou.

²¹Ura, Er Yesus biryi ato ebmou, “Kanda unato ati tenebmarim ci, yanmarim do?” ebmou. Uca, a ner aryi Ersi ato ebmou, “Kanci karebminyi uca, ni mabwe bitinyi atam tikmaring ara Kan bukwandim erebdob sokon dinatam-dinatam buktiring ati molobmakin. Ati, Kanda Weik Sienyi kuboka ninyi ilinto asi Kan amwetam bun nang asi kibdeibmaminyi ura, ni mi tonyi bisi, ‘Ni siriktam buryarum,’ ebmin ci, ni mi yuknyi bisi, ‘Ni kwanimtam buryarum,’ ebdum,” ebmou.

²²Ato eboka molobmou bok, Er Yesus biryi sunsi ato eboka dekeibmou, “Sun molobmanurum dinyi ara bita kum bikmarum cok, molobmarum. Ni yibkwan moyok aryi kuboka sunda yibtururum do?” ebmou. Uca, sunci, “Er mambul dinyi ilinto dobdobkwande ati kiklibmar,” tenen kum bikmarei ci, sunci ato ebmarei, “Malyi. Nunbabyi kan yibkwandim moyok aryi kuboka yibkwantinimnya,” ebmarei.

²³Ebmarei ba, Er Yesus biryi sunsi ato ebmou, “Ni yibkwaman moyok aryi kuboka sunbabyi yibkwandurum ara sunbabyi mambul dinyi dobdobkwandurum. Bok, sunci Nisi molobmanurum to Niryi kunubdeibman kum. Ara, Niryi, ‘Ni siriktam buryarum, Ni kwanimtam buryarum,’ ena ati mikib kum bonun. Erda, Ni Nai Imtamnyi biryi teleb tenebci tok nang ara Ni siriktam ab kwanimtam ab bukwaming,” ebmou.

²⁴Ura, Er Yesus miliramnyi nang ton yuk takubaryi nang aryi Yakobus ab Yohanes ab aryi molobmarei to deyok ati kekebmai ura, sunci a nang susuk asi yu kanya bobmai.

²⁵Ura, Er Yesus biryi Er miliramnyi nang amolbaryi nirya asi nabmou ura, Erci sunsi ato ebmou. “Sun im dangna tukwe dangna aryi kuboka weik sien nang ab erebdob nang ab ara sun amwetam kun nang ati bisibkaboka mikib deib aryi arung-arungdeiriraming. Sunci a dinyi bikmarum.

²⁶Bok, sunda Nisi miliranurum nang ara ato kubmunyei. Erda, sun kankan aryi, ‘Nira Erebdobnyi kibtinyi,’ tenebdinyi bira erdamnyi luknubdongoboka er kwityabwe dibnilibkwandur.

²⁷Ba, sun kankan aryi, ‘Nira sienyi bitonyi kibtinyi,’ tenebdinyi bira erdamnyi luknubdongoboka er kwityabwe aryi arukdeibmangnyi uram kunubde bananyi kibkwandur.

²⁸Ni Ninyi Dasinyi bira tukwetam yuryase ara, ‘Ninyi aryi Nisi dibnilibniting,’ tenen kum yuryase. Erda, Niryi, ‘Ninyi dibnilibniryok lebde binkwan,’ tenen yuryase. Ara, ‘Ninyi ilinto lebdeibkwan ati ninyi ur obniting,’ tenen Nidamnyi karebde banun to, sunbabyi neiktoto yuk nang asi dibnilibde bana teleb,” ebmou.

²⁹Ura, Er Yesus ab Er miliramnyi nang ab aryi atei Yerikho aryi anabdobmai ci, banmai ura, ninyi ilinto atei yukdongo-yukdongo Ersi milibmai.

³⁰Ura, bisik noutam banmou ba, ninyi bitinyi asing kuamwe nang ara bisik iririkna dam bukmarei ci, kekenmarei uca, “Er Yesus yibankwamar aryok,” ena uram kekebmarei. Ura, sunci uram doboka ato ebmarei, “Se Nai Arungdeirisurumnyi. Weik sienyi Daud deibdobanyi se. Kanci nunsi boukwe kibdobsimin ci, kwetebdeibsurum,” eboka uram dobmarei.

³¹Ato eboka uram weik dobmarei bok, sun bulubmai nang aryi a bitinyi nang asi, “Uram kilikdurum,” eboka erekdobmai. Erekdobmai bok, a bitinyi nang aryi uram weik dobtabakmarei ci, ato ebmarei, “Se Nai Arungdeirisurumnyi. Weik sienyi Daud deibdobanyi. Kanci nunsi boukwe kibdobsimin ci, kwetebdeibsurum,” ebmarei.

³²Uram weik dobmarei asi Er Yesus biryi kekebmou ci, Erci tikloboka sunsi nabmou ba, Er dam binmarei ura, Erci sunsi ato eboka asibdenmou, “Sunci Nisi, ‘Ato-ato kibdeibsute,’ teneranurum ara una tenebmanurum?” eboka asibdenmou.

³³Uca, sunci Ersi ato ebmarei, “Nai Arungdeirisurumnyi. Nun asing kubsou ati Kanci erekdeibsutum ba, asing eibkatabtinimnyi,” ebmarei.

³⁴Uca, Er Yesus biryi a bitinyi nang asi boukwe daksakdobmou ba, Erci sun asing asi bol libdenmou ba, sun asing eibkatabmarei. Ura, sun asing eibkatabmarei ura, a bitinyi nang aryi Er Yesus bisi milibmarei.