Read Futuna-Aniwa Matius 21 Bible Online

Matius 21 - Futuna-Aniwa bible

Matius 21

¹Er Yesus ab Er miliramnyi nang amolbaryi ab welebanmai ani, weik atei Yerusalem dam binkwamai ci, Yerusalem dam buramwe mutuk kon si Zaitun aryi doramnyi atei Betfage dam binmai. Betfage atei dam binmai ura, Er Yesus biryi Er miliramnyi nang kankan aryi ninyi bitinyi bokeibmou.

²Bokeibmou cok, Erci sunsi ato ebmou, “Sun urasin deiboka binkwamarurum atei eisi birurum. Akatei dam wengbarurum ci, dirurumnyi uca, bisam keledai ner birikdeibmang ab er mi ukuryok kabunyi nebmar ab tonkwa kuranding asi asing eibkwandurum. Asi, loboka bobdurumnyi ura, a keledai bitinyi asi nisintum a boyarurum.

³Loboka boyangarurumnyi ba, akatei nang aryi sunsi, ‘Sunda a bisam keledai ara unatoa ati lobdongoboka bobanmarurum do?’ eboka ton asibdesingnyi ura, sunci ato ebkwandurum. ‘Nun Nai Arungdeirisurutnyi biryi a keledai ati, “Boyarurum,” ebmasir ati, boryanmanim. Tiya ati bobinabnimnyi ani, nun Nai biryi ebsici uca, nun a keledai asi tubto ola tamurboyankwanim aryok,’ ebkwandururum.” Ato eboka Yesus biryi Er miliramnyi nang kankan aryi ninyi bitinyi bokeibmou.

⁴Er Yesus biryi, “Keledai Ni dam boyarurum,” eboka arukdeibmou ara Er Imtamnyi biryi uram ebdeibmaca bobaramunyi tentoknyi aryi minob kerek sekdeiamwe to kunubkwamwe ati arukdeibmou.

⁵Ara, anyi biryi minob ura ato eboka kerek sekdeiamwe, “Sun Sion atei nang asi ato ebkwandum, ‘Sun asing dibdendarur. Sunsi arukdeibkwansir Weik Sienyi sun dam yanganmar anune. Erda luknubdob kanya borutnyi bira bisam keledai deici bukdiryok yankwamasir. Ara, keledai mi kabunyi ukuryok nebmar deici asi bukmararyi yanganmar.’” (Zakharia 9:9) Ato eboka Er Imtamnyi Uram ebdeibmaca bobaramunyi tentoknyi biryi minob eboka kerek sekdeiamwe to, Yesus biryi kunubmou.

⁶Ura, a bitinyi nang bindoka Er Yesus biryi sunsi ebmou to kunubmarei.

⁷Ara, binmarei ani, a bisam keledai ab er mi ab boyanmarei. Ura, Er miliramnyi nang sun alib ongon aling asi kwiribloboka keledai deici yangabdeibmai ura, Er Yesus bira a bisam keledai deici burwelebinmou.

⁸Ba, Er Yesus bira a bisam keledai deici bukoka banmou ura, ninyi yubwa-yubwa ilinto bulubmai ura, sunci Er Yesus biti, “Nun Nai Weik Sienyi bisi kibdobkwayeb,” tenen sun ongoramnyi alib ongon aling asi kwiribloboka Er Yesus binkwamwe bisik ai deibde binmai. Tonda, yuk nang ababyi, “Nun Nai bisi kibdobkwayeb,” tenen co te sektaleboka Er Yesus biryi binkwamwe bisik ai deibde binmai.

⁹Ura, Er Yesus bira keledai deici bukoka banmou ba, ninyi ilinto menekoka banmai nang ab aminda tam yanganmai nang ab aryi uram weik doboka ato ebde banmai, “Hosana! Weik sienyi Daud deibdobanyi Er si weik ebkwayeb. Er Imtamnyi bira nun arungdeirisurutnyi biryi bokdonokmou uca, weik sienyi Daud deibdobanyi bira nun dam yanganmar. Ati, nunci nun dam yanganmaranyi bisi kisal dakwayeb. Hosana! Er Imtamnyi bibabyi Anyi bisi kisal dakte,” (Mazmur 118:25-26) Ato ebde banmai cok, sun bulubmai nang aryi Er Yesus bisi kibdobmai.

¹⁰Banmai ani, Er Yesus weik atei Yerusalem dam wengbinmou ba, akatei nang nirya luluklabmai ci, uram ara ato eboka dobmai. “Anyi bira unanyi yanganmar ati, Er si weik eboka ato ebde yanganmang do?” eboka asibdenmai.

¹¹Uca, a banmai nang ninyi yubwa aryi ato ebmai, “A yanganmaranyi bira Yesus a kunum. Erda, Galilea mutuk atei si Nazaretnyi kurur. Anyi bira Er Imtamnyi Uram ebdeibmaca bobananyi yanganmar ati ato ebde yanganmab,” ebmai.

¹²Ura, Er Yesus Yerusalem atei dam binmou ura, Bait Allah ai ara Er Imtamnyi biti ninyi dama deirin ai dam wengbinmou ci, sun adikum aryi kuboka dengdaramnyi nang nirya asi yakdonokmou. Yakdonokmou cok, Erci co bok tamurkarerdan co lamna nirya dangublobmou ci, sun maka emnanyi dengdeiriramnyi nang bun sokon ababyi dangublobmou.

¹³Yakdonokmou cok, Erci sun dengdaramnyi nang asi ato ebmou. “Er Imtamnyi Uram aryi ato eboka sekdeiamnyi, ‘Er Imtamnyi biryi ato ebmou, “Niti ninyi dama deirin ai ati ninyi aryi ato ebkwaming, ‘Akai ara Er Imtamnyi urasintam yandoka Ersi molon ai kurur,’ ebkwaming,”’ ebmou. (Yesaya 56:7) Er Imtamnyi Uram umbura aryi ato eboka kerek sekdeiamnyi bok, sunda dengdana nang aryi, ‘Co bok dengna weik dinyi tabakoka dobdobtibyi,’ tenen dengdarandum. Ato kubde barandum deyok aryi, sunda yuk nang bona co bok arabdob nang ato kurandum ci, Er Imtamnyi ai asi yuk nang bona co bok arabdob nang ai ato kibdeibmarum se!” Ato eboka erekdobmou ci, Yesus biryi sunsi yakdonokmou.

¹⁴Ura, Er Yesus bira Bait Allah ai tuba kunmou bok, sun asing kuramwe nang ab yan tingkwaniramwe nang ab aryi Er dam yandobmai ba, Erci sunsi kwetebmou.

¹⁵Tonda, Er Yesus biryi ninyi kwetebdeibmou ara ilil tenen dinyi kiknibmou ba, sun mabwe nermabwe ara Bait Allah ai dam kubmai cok, sunci uram weik doboka Er Yesus biti ato ebmai, “Hosana, Weik sienyi Daud deibdobanyi Er si weik ebkwayeb,” ebmai. Uca, Er Imtamnyi kan ninyi kan noutam kuboka antanirdeirin deyok nang ab, Musa kerek sengna etereramnyi nang ab aryi mabwe nermabwe aryi uram doboka Er Yesus deyok ati ebmai uram asi kekebmai ba, sun kanya yu wekmou.

¹⁶Uca, sunci Er Yesus bisi ato ebmai, “Se, a mitik mabwe nermabwe aryi ato-ato enmaking uram ara kekebmarim do?” ebmai. Uca, Er Yesus biryi sunsi ato ebmou, “Nibabyi sirya kekebman cok, Niryi sunsi, ‘Uram kilikdarur,’ kum ebkwan. A mabwe nermabwe ara ato-ato enmaning ara Er Imtamnyi Uram umbura aryi kerek sekamwe to kunubmang. Ara, Er Imtamnyi Uram aryi ato eboka kerek sekamwe, ‘Er Imtamnyi biryi karerande uca, sun alok mabwe nermabwe ab sun mum tuba yinmangnyi mabwe nermabwe ab ara Er Imtamnyi si weik ereraming.’ (Mazmur 8:2) Er Imtamnyi Uram umbura aryi ato eboka kerek sekdeiamwe ara sunci ton kum nukmarum do?” Ato eboka Yesus biryi sunsi uram dekeibmou.

¹⁷Ato ebmou ura, Er Yesus biryi sunsi takloboka weik atei Yerusalem aryi anabdobmou ci, mitik atei si Betania bindoka mabmou.

¹⁸Er Yesus mitik atei Betania mabmou ani, berekwe ura, belekuna kobdob tuba kubmou ba, Erda weik atei Yerusalem tamuboka banmou ba, kwaning atanmou.

¹⁹Ura, bisik noutam aryi banmou ba, diramwe uca, co kwarang tikamwe ton asi asing eibmou ci, Erci, “Co du dakoka yibkwan,” tenen a co kwarang dam tingbindoka ketengnamwe uca, du ton kum mouramwe, erda bok dem boramwe asi asing eibmou. Uca, Er Yesus biryi a co kwarang asi ato ebmou, “A co, kanda du ton kum borandim ati, iya du ton kum moubkwandim,” ebmou. Uca, a talak aryok a co kwarang koula dandobmou.

²⁰Uca, Er Yesus miliramnyi nang amolbaryi aryi asing eibmai ura, sunci sun kanya dam aryi, “Naie,” tenen ato ebmai. “A co kwarang koula asing kublabum en to aryok koula dandobmar ara una kuboka koula dandobmar do?” eboka asibdenmai.

²¹Uca, Er Yesus biryi sunsi ato ebmou, “Niryi sunsi dib en uram ton ebkwinsin ati sunci diboka kekebdarur. Sunci sun kanya dam kankana kusina kum uca, Er Imtamnyi biti, ‘Ilil tenen dinyi kiknina ati Mikibnyi kurur,’ teneramunyi ura, sunbabyi ilil tenen dinyi kiknibdate. Ati, Niryi a co kwarang asi, ‘Koula dandobdum,’ ebman uca, koula dandobmar to, sunbabyi neiktoto kunubdate. Tonda, sunci Er Imtamnyi biti, ‘Ilil tenen dinyi kiknina ati Mikibnyi kurur,’ tenebdatiryok, sunci a mutuk kon asi, ‘Tobkakoka weik mekwan umbura wengbirum!’ ebdate ababyi sun ebmamunyi tok kunubkwamote.

²²Ati, sunci, ‘Er Imtamnyi biryi nun molobdobmabyi dinyi diboka kunubdeibkwansir,’ tenen molobmunyi ura, Er Imtamnyi biryi a dinyi nirya asi kunubdeibkwansir,” ebmou.

²³Ura, Er Yesus banmou ani, Bait Allah ai ara Er Imtamnyi biti ninyi dama deirin ai dam wengbindoka sun bulubmai nang asi Teleb Uram eterenmou. Eterenmou ba, Er Imtamnyi kan ninyi kan noutam kuboka antanirdeirin deyok nang ab sun Yahudi nang sien nang ab Er Yesus eterenmoua dam yanmai. Ura, sunci Ersi ato eboka asibdenmai, “Una mikib deib aryi Kanci a dinyi nirya kurandim do? Unanyi biryi, ‘Ato-ato kubdum,’ eboka mikib karebkou uca, Kanci sun akai dam dengdaraming nang asi yakdonokoka sun u yin nang kweterandim do?” Ato eboka asibdenmai.

²⁴Uca, Er Yesus biryi sunsi ato eboka uram dekeibmou, “Nibabyi asirdena ton asibdenkwamasin ati, sunci Nisi uram dekeibnindarur. Uram dengna sirya dekeibnumunyi uca, Niryi sunsi, ‘Nira ato-ato anyi mikib deib aryi a dinyi nirya asi ukubde banun,’ ebkwaman,” ebmou.

²⁵Enmou cok, Er Yesus biryi sunsi ato eboka asibdenmou, “Yohanes ninyi me dongoramwe ara unanyi mikib deib aryi me dongoramwe do? Er Imtamnyi mikib deib aryi ninyi me dongoramwe do? Tukwetam nang taleraming mikib deib aryi ninyi me dongoramwe do?” Ato eboka asibdenmou. Uca, sun Yahudi yala nang sien nang ab sun Er Imtamnyi ai wa in sien nang ab ara sun mamun aryi ato ebdongobdanin yibinmai. “Nunci, ‘Yohanes Er Imtamnyi mikib deib aryi ninyi me dongoramwe,’ ebibyei. Nunci ato ebtibyi uca, Erci nunsi ato ebsicei, ‘Ato ebmarum ati, sunda unatoa ati er Yohanes biryi lak eramwe uram asi diba kum tenendarur do?’ ebsicei.

²⁶Ba, nunci, ‘Yohanes bira tukwetam nang taleraming mikib deib aryi ninyi me dongoramwe,’ ebibyi ura, ninyi aryi nunti, ‘Nun li,’ tenebsingnyei. Ninyi ilinto ara, ‘Yohanes bira Er Imtamnyi biryi uram ebdeibmaca bobananyi kurur,’ tenenung ati, nunci ilil kanya boboka, ‘Tukwetam nang mikib deib aryi ninyi me dongoramwe,’ ebibyei,” ebdanmai.

²⁷Ato ebdanmai ura, sunci Er Yesus bisi ato ebmai, “Yohanes ninyi me dongoramwe ara, ‘Unanyi mikib deib aryi me dongoramwe do?’ tenen nun walwal,” ebmai. Ebmai ba, Er Yesus biryi sunsi ato ebmou, “Ato ebmarum ati, Nibabyi sun dam asi, ‘Nira ato-ato anyi mikib deib aryi a dinyi nirya ukubde banun,’ kum ebkwamasin,” ebmou.

²⁸Ura, Er Yesus biryi sun Israel yala nang kalingnamnyi sien nang asi ton ato ebmou, “Ura, Niryi sunsi kiklina uram ton ebkwinsin ati sunci unato dinyi tenebmarum do? Ninyi tentok a kuramwe ara mabwe bitinyi deibmou ura, nebdobmarei ura, erci er mi dunyi bisi bindoka ato ebmou, ‘A mi, arub ara anggur wa in dam bindoka wa irbirum,’ ebmou.

²⁹Ebmou uca, a mi aryi ato ebmou, ‘Wa ina ni li,’ ebmou ura, kum irbinmou. Ani, aminda aryi a mi aryi tenen dinyi dangubmou ci, ‘Ni nai biryi takubdeibmanir to wa ibkwan,’ tenen wa irbinmou.

³⁰Ura, er nai biryi er mi weitnyi bisi binmou ci, er dunyi dam ebmou to ebmou. Ara, ‘A mi, arub ara anggur wa in dam bindoka wa ibdum,’ ebmou. Ebmou uca, a mi aryi, ‘Ni nai, kanci ebniminyi tok ukubkwan,’ ebmou. ‘Ukubkwan,’ ebmou cok, erci, ‘Wa ina ni li,’ tenen kum irbinmou.

³¹Ura, sunci tenebmarum to ara a bitinyi mabwe ati unanyi bisi sun nai biryi takubdeibmou to kunubmou do?” Yesus biryi ato eboka asibdenmou uca, sunci ato ebmai, “Er mi yuma kobdob takubdeibmou mi bisi sun nai ebmou to kunubmou,” ebmai. Uca, Er Yesus biryi sunsi ato ebmou, “Dib ebmarum. Ura, Niryi sunsi dib en uram ton ebkwinsin ati sunci diboka kekebdarur. Sun, ‘Roma weik sienyi Kaisar biti pajak dengna karebdarur,’ eboka molormilinung nang ab sun talyi yortamne nerabwe ab ara, ‘Er Imtamnyi Uram kununa nun li,’ tenen kuramnyi ani, a nang ara sun kanya dam aryi danguboka Er Imtamnyi Uram kunubde baraming. Ba, sunci, ‘Er Imtamnyi Uram kunubde binkwayeb,’ eramun cok, Er Imtamnyi Uram kunubde kum barandum. Ati, sun pajak dengna milirmoloraming nang ab sun talyi yortamwe nerabwe ab ara sunsi menengbisirbindoka Er Imtamnyi Weik Sienyi bisi amwetam kun nang kibkwaming.

³²Ara, Yohanes biryi yandoka sunsi, ‘Er Imtamnyi urasintam aryi ato-ato kuboka teleb dinyi kunubde bindarur,’ eboka etereransou bok, sunci dib kum tenerandau ci, Er Imtamnyi biryi ebdeibsou to kum kunurandau. Bok, sun pajak dengna molormilinung nang ab sun talyi yortamne nerabwe ab ara Yohanes biryi lak eramwe uram asi diba teneramiryok, sunci danguboka Er Imtamnyi biryi ebdeibsou uram kunubde baraming. Ura, a nang aryi Er Imtamnyi Uram kum kunubde baramnyi ani, danguboka Er Imtamnyi Uram kunubde baraming ati asing eibmandau cok, sunda sun kanya dam kum dangubmandau ci, Yohanes biryi lak eramwe uram dib kum tenerandau se. A deyok aryi, a nang aryi sunsi menengbisirbinkwansingiryok, Er Imtamnyi amwetam kun nang kibkwaming ati ebman.” Ato eboka Yesus biryi sun Israel yala nang kalingnamnyi sien nang asi uram dekeibmou.

³³Ura, Er Yesus tuba eterenmou cok, Erci ato ebmou, “Kemdeirin uram yuk uram asi eterebkwinsin ati kekendarur! Ninyi tentok wa in damnyi biryi wa iboka anggur yala koubmou. Ara, erci anggur wa aknabdongon lika doboka, anggur du yung urun ai tukwe ukoka, a wa kalingna ai erebdob ai doboka, anggur yala koubmou. Ura, a wa indamnyi biryi anaboka dam kum atei bina kubkwamwe ati, erci anggur wa iboka tiya in nang ton nang asi naboka, ‘Ni anggur wa asi tiya kalikoka wa iramunyi ura, dengna karebkwansin,’ ebmou ura, erda dam kum atei bina kuramwe.

³⁴Bindoka kuramwe ani, anggur du eng obmou asi dakwamnyi talak dam kubmou ba, er wa in damnyi dam kum atei tuba kuramuryok, er miliramnyi nang ton nang asi bokeibmou. Ara, ‘Ni anggur wa in dam bindoka sirya dakmangnyi anggur du asi bulubdeiboka Ni dam boyandarur,’ eboka bokdonokmou.

³⁵Uca, er wa in damnyi er miliramnyi nang banmai ani, sun anggur wa iboka tiya in nang dam binmai ura, a anggur wa iboka tiya in nang aryi wa in damnyi er miliramnyi nang asi malyi kubdeibmai. Ara, tonyi bisi kulablobmai ba, yuknyi bisi diba obmai ci, winirinyi bisi keil aryi yongobmai.

³⁶Ura, er wa in damnyi biryi er miliramnyi nang yuk nang asi bokdonokmou. Ara, liki yuma kobdob aryok ninyi mitikanun bokdonokamwe ani, ukuryok ara ninyi tabakdongoboka sun anggur wa iboka tiya in nang dam bokdonokmou. Ura, sun anggur wa iboka tiya in nang aryi neik dinyi akwe kubmai cok, sun bokdonokmou nang kankan aryi ton nang asi kulabmai ci, yuk nang asi diboka obmai.

³⁷Ato akwe kuramnyi ura, sirya kobdob ara er anggur wa in damnyi biryi ato ebmou. ‘Ni mi nong asi bokdeibnyi ba, sun ilil aryi, “Nun nai mi,” tenen er ebkwande uram kekebkwaming,’ ebmou ura, er mi nong asi bokdeibmou.

³⁸Bok, sun anggur wa iboka tiya in nang aryi er wa in damnyi mi nong yanmou asi eibmai ci, sunci sun mamun asi ato ebdongobdanin yibinmai. ‘Anyi bira a wa talebkwandanyi kurur cok, yanmar ati, nunci ersi obkwayeb. Sirya obibyi ura, a anggur wa in dam ara nun dinyi iya kibkwande,’ eboka uram sisikmai.

³⁹Uca, er wa in damnyi mi aryi anggur wa in dam yanmou asi sunci taruk talebdongoboka baitam donokmai ci, kulabmai ci, diboka obmai.

⁴⁰Uca, er nai anggur wa damnyi biryi er anggur wa in dam yaci ura, unato dinyi kubkwande tenebmarum do?” Ato eboka Yesus biryi asibdenmou.

⁴¹Uca, sun Yesus eterena asi kekebmai nang aryi Ersi ato ebmai, “Er nai wa in damnyi biryi yandoka a yu biribdob nang nirya asi obkabokdiryok, er wa in dam yuk nang ara teleb nang asi tiya karebkwande. Ara, ninyi teleb nang asi erci, ‘Ni wa iboka tiya ur ibdarur,’ ebkwande uca, a nang ara anggur du dangna talak aryi sun nai wa in damnyi anggur du kikiman dobdobte to karebkwaming,” ebmai.

⁴²Ura, Er Yesus biryi sunsi ato ebmou, “Dib ebmarum. Bok, Er Imtamnyi Uram umbura aryi a deyok ati erur to kum nungnandum do? Er Imtamnyi Uram umbura aryi a deyok ati ato erur, ‘Ai don keil ton ati sun ai don nang aryi, “Bai donokman keil aca,” tenebmai bok, Er Imtamnyi biryi, “Iya teleb keil,” tenen a keil asi erebdeiboka kibdeibmou. Ato kuboka Er Imtamnyi biryi ilil tenen dinyi kibmou ati, nunci asing dinmabiryok, “Naie,” tenenub.’ (Mazmur 118:22-23) Er Imtamnyi Uram umbura aryi ato eboka sekdeiamwe dinyi ara sunda ton kum nungdendarur do?

⁴³Ati, Niryi sunsi dib en uram ebkwinsin ati sunci diboka kekebdarur. Er Imtamnyi bira Weik Sienyi kurur ci ninyi ilinto Er amwetam kimdeirirur cok, Erda sunda Yahudi yala nang kankan aryi du moun kum nang asi taklobdiryok, yuk yala nang asi Er amwetam kibdeibkwande. Ara, ‘Du mouna nang asi Ni amwetam nang kibdeibkwan,’ tenen Er Imtamnyi biryi yuk yala nang asi Er amwetam nang kibdeibkwande ati ebman.

⁴⁴Ba, unanyi-unaner ara Nira Er Imtamnyi biryi wibdeibnounyi biti, ‘Nun li,’ tenebningnyi nang ara wenen dinyi dobdobkwaming. Ara, Er Imtamnyi biryi wibdeibmou keil deici asi sakoka maryurbingnyi nang ara kalibukwaming. Tonda, a keil aryi sakoka siklibci nang ara nyaboka oubkwaming,” ebmou.

⁴⁵Ato eboka kemdeirin uram yuk-yuk enmou asi sun Er Imtamnyi kan ninyi kan noutam kuboka antanirdeirin deyok nang ab, Musa kerek sengna etereramnyi nang ab aryi kekebmai ci, sunci ato tenen bikmai, “A kemdeirin uram yuk-yuk ara nunti enmasir,” tenen bikmai.

⁴⁶Tonda, sunci, “Er Yesus bisi taleboka obtibyi,” tenen bisik ingkiringmai bok, ninyi ilinto aryi, “Er Yesus bira Er Imtamnyi Uram ebdeibmaca bobananyi kurur,” teneramnyi deyok aryi, sun ilil kubmou ba, Er Yesus bisi anmalakoka kum talebmai.