Read Futuna-Aniwa Matius 22 Bible Online

Matius 22 - Futuna-Aniwa bible

Matius 22

¹Ura, Er Yesus biryi sun Yahudi nang sien nang asi tamuboka kemdeirina ton ebkarebmou.

²Ati, Erci sunsi ato ebmou, “Er Imtamnyi bira Weik Sienyi kurur ci, ninyi ilinto lebdeiboka Er amwetam kun nang kimdeirirur ara, ‘Ato-ato kurur,’ tenen kemdeirin uram ebkwinsin. Tukwetam aryi kuramwe weik sienyi tentok aryi, ‘Ni mi ner te murumna tum sirya yanmar ati weik kalina kwalibkwayeb,’ tenen weik kwalina kiknibminikmou.

³Ura, er nai weik sienyi biryi er wa irmiliramnyi nang asi bokdonokmou ci, ato ebmou, ‘Sunci sun du dongobmase nang dam bimun cok, sunci, “Nun nai weik sienyi biryi ato ebmasir, ‘Ni mi ner te murumna tum sirya yanmar ati weik kwalina sirya kiknibman ati sun yankwandarur,’ ebmou,” eboka nambindarur,’ ebmou. Uca, ato eboka nambinmai bok, a nabmou nang nirya ara, ‘Nun li,’ tenen kum yanmai.

⁴Ura, er weik sienyi biryi er wa irmiliramnyi nang yuk nang asi bokeibmou ci, ato ebdeibmou. ‘Sunci sun minob naanse nang asi bimunyi ura, ato ebdarur, “Nun nai biryi sunsi ato ebmasir, ‘Ni mi ner te murumna tum sirya yanmar ati, sunci yandoka weik kwalina kwalibkwayeb. Sapi yim mikbaryi sirya obman aryi, tub ilinto sapi mikbaryi ababyi nirya oboka yubman ci, tonda ur yina ababyi nirya sirya kiknibminikmasin ati, ni mi ner te murumna kwalina yiryandarur,’ ebmar,” erbindarur,’ eboka bokdonokmou.

⁵Ato eboka erbinmai bok, a du dongobmai nang ara, ‘Nun li,’ tenen kum kekebmai ci, kum yanmai. Erda, sunci sun yuk-yuk wa iramnyi tok irbinmai. Ara, ton nang aryi sun wa in dam bindoka wa irbinmai. Ba, yuk nang ara bon dinyi dengdana nang kuramiryi, bon dinyi dengbinmai.

⁶Ba, sun du dongobmai nang kankan aryi yuk nang ara er weik sienyi er wa irmiliramnyi nang asi taruk talebdongobmou ci, malyi kubdeiboka obmai.

⁷Ura, er weik sienyi bira a dinyi kekebmou ba, er yu weik wekmou. Uca, erci er yin doun nang yubwa weik bokdonokmou uca, sunci bindoka a ninyi on nang nirya asi obkabokmai ci, sun atei nirya asi uk dongobmai.

⁸A sirya ura, er weik sienyi biryi er wa irmiliramnyi nang asi ato ebmou, ‘Ner te murumna kwalina ara sirya kiknibminikman bok, sun du dongobmase nang ara niti, ‘Nun li,’ teneraning ati, ni ab tonkwa kwalina kwalibkwayeb ati kikib kum kubmang.

⁹Ura, sunci olong anabdobmunyi ura, min kum du dongobmase nang asi du dongobdarur. Ara, akatei aryi kuboka weik bisik nirya yibinkirikoka bisik dandanya nirya yibindoka sun ab ebdanmamunyi nang nirya asi inibmun ci, ‘ “Ner te murumna kwalina dam a yandarur!” ebdarur.’ Ato eboka er weik sienyi biryi er wa irmiliramnyi nang asi bokdonokmou.

¹⁰Uca, a wa irmiliramnyi nang aryi weik bisik yibindoka, sun ab bisik ai ebdanmai nang nirya asi du dongobmai. Uca, teleb dinyi kunubde ban nang ilinto ab malyi dinyi kunubde ban nang ilinto ababyi buluboka yanmai uca, a ner te murumna ai ara nirya libmou.

¹¹Ura, a weik sienyi biryi, ‘Ni du dongobman nang ab ebdankwayeb,’ tenen yandoka dinmou uca, sun erci du dongobmou nang nirya ara ner te murumna tum ongon aling ongobmai bok, ninyi tentok ara ner te murumna tum ongon aling kum ongobmou ati asing eibmou.

¹²Ura, weik sienyi biryi anyi bisi ato eboka asibdenmou, ‘Se ni kwit e, kanda unato ati ner te murumna tum ongon aling kum ongobmarim cok, atam yandoka bukmarim do?’ ebmou. Uca, anyi, ‘Ato-ato eboka uram dekeibkwan,’ tenen kum bikmou ci, erci uram kilikoka bukmou.

¹³Uca, a weik sienyi biryi er wa irmiliramnyi nang asi ato ebmou, ‘Sunci anyi er yan ab taruk ab tabwe debmunyi ura, kunuk ilinto kurur ai asi donongbindarur. A kunuk ilinto kurur ai ara engena weik ai kurur cok, mambul weik aryi si darab-darab en ai kurur,’ ebmou.”

¹⁴Er Yesus biryi ato eboka eterenmou cok, ato ebmou, “Er Imtamnyi biryi ninyi ilinto namdeirirur bok, Erci wibdeibmou nang ara Er amwetam bukwaming nang ara ninyi mitik nun to kunung. Sunci a dinyi tenen bikwandum ati, a kemdeirin uram asi ebmasin,” ebmou.

¹⁵Ura, sun Musa kerek sengna dirniliramnyi nang Farisi nang aryi, “Er Yesus bisi asirdena ton asibdetibyi uca, erci malyi uram eboka uram dekeibsute ura, nunci Ersi tatab-tatab ebtibyi,” tenen ukubdenmai.

¹⁶Ura, sun Farisi nang aryi sun miliramnyi nang ab weik sienyi Herodes miliramnyi nang ab asi, “Er Yesus bisi asirbindarur,” eboka bokdonokmai. Uca, sunci bindoka ato eboka asibmai, “Ninyi eteresurumnyi, Kanda dib en uram akwe erumnyi kurum ati nun bingkunub. Tonda, Kanci, ‘Ato-ato kuboka Er Imtamnyi urasintam aryi teleb dinyi kunubde bindarur,’ eboka etererandim ara diboka etererandim ati nun bingkunub. Tonda, Kanci, ‘Ninyi aryi Niti, “Nun li,”’ tenen ilil kanya kum borandim ati nun bingnub. Tonda, Kanci, ‘Sun tukwetam bun nang asi erekdobkwan ba, sun erebdob nang kanya teleb kubdeibkwan,’ tenen ninyi urasin ton kum mimdum ati nun bingkunub.

¹⁷Ati, pajak dengna deyok ati Kanci Kan tenen dinyi asi nun dam lak ebsurum. Roma atei weik sienyi Kaisar biryi nunda Yahudi yala nang asi, ‘Pajak dengna dekeibsindarur!’ eboka moloransir ati, ur karebkwayeb do mem do?” Ato eboka asibdenmai.

¹⁸Ato eboka asibmai bok, Er Yesus biryi, “‘Sakeibtibyi,’ tenen ato eboka asibdenmaning,” tenen bikmou ci, Erci sunsi ato ebmou. “Sunci Nisi uram teleb-teleb akwe enmanurum cok, sun kanya dam aryi malyi dinyi akwe tenebmaning nang se. Sunci Niti unatoa ati, ‘Sakeibtibyi,’ tenen asibdenmanurum do?

¹⁹Ura, Kaisar biti pajak dengnaming keil uang ton boyandoka Nisi amubdendarur,” ebmou. Ebmou uca, sunci keil uang si dinar Ersi boyanmai.

²⁰Ura, Erci sunsi ato eboka asibdenmou, “A keil uang deici ara ninyi urasin kikniboka kerek sekyi ara unanyi bisi kikniboka kerek sekyi do? Ba, a keil uang deici aryi si kerek sekyi ara unanyi si eboka kerek sekyi do?” eboka asibdenmou.

²¹Uca, sunci Ersi ato ebmai, “A keil uang deici kerek sekamnyi ninyi urasin ab ninyi si ab ara Roma atei weik sienyi Kaisar kikniboka kerek sekeiamnyi,” ebmai. Ura, Er Yesus biryi sunsi ato ebmou, “Ato kubmar ati, sunci Kaisar biti karebman dinyi Kaisar biti karebdarur. Ba, Er Imtamnyi biti karebman dinyi Er Imtamnyi bisi karebdarur,” ebmou.

²²Ato eboka uram dekeibmou asi kekebmai ci, sun Farisi nang miliramnyi nang ab sun weik sienyi Herodes miliramnyi nang ab sun kanya dam aryi, “Nai kobe, nun talya asibdenmab aryi,” tenebmai ci, Er Yesus takloboka bindobmai.

²³Neik uki tum aryok, Saduki nang ara, “Sun din nang kam kum bukwaming,” eramnyi nang ton aryi Er Yesus dam yanmai ura, ato eboka asibmai.

²⁴“Ninyi eterenanyi, Musa kerek sengna deici aryi nunsi, ‘Ato-ato kubdarur,’ ebdeibsou ci, ner don deyok ati ato eboka ebdeibsou, ‘Ninyi tentok ara er ner doanci bok, mi ton kum deibdandiryok, sirya dibmaci ura, anyi er weit ton kuranci ura, a ner ara er weit youak dakwandur. Ara, er weit biryi, “Ni du ara mi kumnyi kuboka dibmou ati, niryi er doamwe ner dobnyi ura, mi deibtinimnyi ura, niryi a mi ati, ‘Ni du dibmounyi biti mi sirya deibmanim,’ eboka lak ebkwan,” tenen er weit youak dakwandur!’ (Ulangan 25:5) Ato eboka Musa biryi nunsi ebdeibsou.

²⁵Ura, nun kankan aryi sun duweityabwe ara ninyi tabaryi kuramiryi, dunyi biryi ner doamwe bok, mi ton kum deibdamwe ba, dibmou. Mi kumnyi kuboka dibmou deyok er weit aramnyi biryi, ‘Youak dakwan,’ tenen er du doamwe ner asi dobmou.

²⁶Ura, er weit aramnyi bibabyi mi ton kum deibdamuryok dibmou ura, er weit aramnyi biryi, ‘Youak dakwan,’ tenen er duyabwe bitinyi doandei ner asi dobmou. Ura, erbabyi neiktoto mi ton kum deibdamuryi, dibmou ura, er weit nabyi noutamnyi biryi er duyabwe winiryi doamnyi ner asi dobmou. Ato kuboka a duweityabwe tabaryi aryi neik ner dobde baramiryi, mi ton deirona kum kuramnyi bok, dibmai. Ura, sirya kobdob ara a ner ababyi dibmou.

²⁷

²⁸Ura, nunci Kansi a deyok ati asirdena ton asibdekitibyi. Aminda aryi sun din nang kam bukokwaming tum berekci ura, a ner ara unanyi ner kubkwande do? A duweityabwe tabaryi nirya ara a tentok ner atikwe dobde baramnyi deyok aryi, nunci, ‘Unanyi bisi er ner kibdeibkwande do?’ eboka asibdekitibyi,” eboka asibdenmai.

²⁹Uca, Er Yesus biryi sunsi ato eboka uram dekeibmou, “Sunda Er Imtamnyi Uram minob sekdeiamnyi uram kum bingdarur cok, Er Imtamnyi biryi sun din nang asi kam bukeibkwande mikib ababyi diboka kum bingdarur. A deyok aryi, sunci sundamnyi waningminingdarandum nang kundarur ati ebman.

³⁰Er Imtamnyi biryi aminda aryi sun din nang asi kam bukeibkwande tum berekci ura, sun kam bukokwaming nang ara ner kabdeibdandoka dordana kum kubkwaming. Erda, a nang ara Er Imtamnyi Uram eryuryangan nang ato kubkwamingiryok, ner don kum nang kubkwaming.

³¹Ba, Er Imtamnyi biryi sun din nang kam bukeibwande deyok ati Er Imtamnyi biryi sunsi eansou to sunci kum nukmandau do? Ara, Er Imtamnyi biryi Musa bisi ato eamwe,

³²‘Ni Imtamnyi bira Abraham molonurutnyi ton, Ishak molonurutnyi ton, Yakub molonurutnyi kunun.’ Ati, nun aibweyabwe sirya diamnyi talak aryi ato eamuryok, Er Imtamnyi biryi Musa bisi, ‘Nira sun aibweyabwe aryi molonunungnyi kunun,’ eamwe. (Keluaran 3:6,15) Ati, a nang aryi sirya diamnyi ani, iya kam kun dinyi dobdobmai ati, Er Imtamnyi bira din nang aryi molorutnyi kum kurur. Erda, Erda sun iya kam kuraming nang aryi molorutnyi kurur.” Ato eboka Yesus biryi sun Saduki nang asi eterebmou.

³³Ato ebmou asi sun bulubmai nang aryi kekebmai ura, sunci Er eterena ati, “Naie,” tenebmai.

³⁴Ura, “Er Yesus biryi sun Saduki nang asi uram dekeibsou uca, sun Saduki nang aryi uram tamuboka dekeibman kubmai cok, uram kilikmai,” en uram asi sun Farisi nang aryi kekenmai ci, sunci, “Uram sisikwayeb,” tenen tonkwa bulubmai.

³⁵Ura, sun Farisi nang kankan aryi Musa kerek sengna etereramunyi tentok aryi Er Yesus dam yandoka asirdena ton asibdenmou. Ara, “Asirdena asibdenmanyi ba, Yesus biryi malyi uram ebte uca, nunci Ersi tatab-tatab ebtibyi,” tenen Erci Yesus bisi ato eboka asibdenmou,

³⁶“Ninyi eterenanyi, Er Imtamnyi biryi, ‘Ukubdarur-Ukuna mem,’ en uram yuk-yuk asi karebsou bok, a uram yuk-yuk kankan aryi una uram ara iya nunukeiboka kunubde batibyi do?” Ato eboka asibdenmou.

³⁷Uca, Er Yesus biryi anyi bisi ato ebmou, “Er Imtamnyi biryi ato eboka ebdeibsou, ‘Sunci sun Nai Imtamnyi bisi diboka boukwe weik kibdarur. Tonda, sunci sun Nai Arungdeirisurutnyi bisi tuba-tuba teneiramun ci, Er teleb tenesurur to tanglona kum uca kunubde bindarur,’ (Ulangan 6:5) Er Imtamnyi biryi ato eboka ebdeibsou uram ara yuma kobdob ebdeibsou uram kurur cok, iya nunukeiboka kunubde ban uram kurur.

³⁸

³⁹Ura, uram bitinyi dinyi ebdeibsou ara ato ebdeibsou, ‘Sunci sundamnyi boukwe weik kimdarandum to, sun yuk nang ababyi neiktoto boukwe weik kibdarur!’ ebdeibsou. (Imamat 19:18)

⁴⁰Er Imtamnyi biryi, ‘Ukubdarur-Ukuna mem,’ en uram nirya kankan aryi a ebdeibsou uram bitinyi ara iya nunukeiboka kunubde ban uram kurur. A uram bitinyi ara Musa biryi kerek sekeiamwe uram nirya kankan aryi iya deyok tenen dinyi akwe kurur. Tonda, sun Er Imtamnyi Uram ebdeibmaci to lak etereramnyi nang kerek sekeiamnyi uram nirya kankan ababyi a uram bitinyi ara iya deyok tenen dinyi akwe kurur,” ebmou.

⁴¹Musa kerek sengna dirniliramnyi nang Farisi nang tuba bulunmai ba, Er Yesus biryi sunsi ato eboka asibdenmou,

⁴²“Sunda Er Imtamnyi biryi bokwetebkwande ninyi lemna Weik Sienyi biti unato dinyi tenebmarum do? Erda unanyi biryi deibmou Mi kurur ati tenebmarum do?” Ato eboka asibdenmou. Uca, sun Farisi nang aryi Ersi ato ebmai, “Erda Daud deibdobanyi kurur,” ebmai.

⁴³Ura, Yesus biryi sunsi ato ebmou, “Dib ebmarum bok, Daud biryi er deibdobkwamwe ninyi lemna Weik Sienyi biti, ‘Ni Nai Erebdobnyi,’ ebmou ara unato ati ato ebmou do? Ara, Er Imtamnyi Kanya Roh Kudus aryi Daud bisi ebkarebmou to aryi, erci ninyi lemna Weik Sienyi biti, ‘Ni Nai Erebdobnyi,’ ebmou.

⁴⁴Ara, Daud biryi ninyi lemna Weik Sienyi biti minob ura ato eamwe, ‘Er Imtamnyi bira ni Nai Arungdeirinurutnyi bisi ato ebmou, Kanci Nira Imtamnyi siriktam buryarum. Burum ba, Niryi Kan mar ordana nang asi muna kibdongobnyi uca, Kanci yanisitabkwandim nang kibdeibkwan,’ ebmou. (Mazmur 110:1)

⁴⁵Ati, Daud biryi ninyi lemna Weik Sienyi biti, ‘Ni Nai Arungdeirinurutnyi,’ ebmou ati, erda una kuboka Daud er deibdobanyi kubte do?” Ato eboka Yesus biryi sunsi asibdenmou.

⁴⁶Ato eboka asibdenmou uca, ninyi tentok ababyi uram doboka Ersi dekeibman kum kubmou. Ura, a uki tum aryi kuboka kubde baramiryok, ninyi tentok ababyi ilil kum asa aryi doboka, “Yesus bisi sakeibtinyi ati asirdena ton asibdenkwan,” tenen tuba kum kuramnyi.