Read Futuna-Aniwa Matius 23 Bible Online

Matius 23 - Futuna-Aniwa bible

Matius 23

¹Ura, Er Yesus biryi sun bulubmai nang ilinto ab Er miliramnyi nang amolbaryi ab asi ato ebmou.

²“Sun Musa kerek sengna etereraming nang ab sun Farisi nang ara Musa kerek sengna dirliliraming nang ab ara Musa er amwetam kun nang ato kuramingiryok, sunci mikib dobdobmai uca, ‘Ato-ato kubdarur,’ eboka eterermiliraming.

³Ati, sun Musa Uram eteren nang ab sun Farisi nang ab ara Musa Uram eterena ati mikib dobdobmai deyok aryi, sunci a nang aryi etereransingnyi uram nirya asi diboka kekeboka kunubkwandarur. Bok, a nang ara yuk nang asi, ‘Ato-ato kubdarur,’ eboka etereransingiryok, sun yuk aryi Musa Uram diboka kum kunubde baraming. A deyok aryi, sunci a nang aryi kunubde baramingnyi dinyi asi milina mem.

⁴Sun Musa Uram eteren nang ab sun Farisi nang ara, ‘Ato-ato kubdarur,’ eramingiryok, yuk nang asi ikin dinyi takurdeiriraming cok, sun yuk aryi, ‘A erdeirin uram ara bisibkaboka ikin uram kurur,’ tenen bingnamingiryok, sunci taruk mungkurukoka ikin dinyi takurdeiriraming nang ikin dinyi bormilina kum kuraming.

⁵A nang aryi kubde baraming dinyi nirya ara, ‘Ninyi aryi nun kubde baramibyi to asing eiboka kisal daksiting,’ tenen kunubde baraming. Ati, sunci, ‘Ninyi aryi nunti, “Er Imtamnyi bisi diboka teneiriramingiryi, miliraming,” tenebsiting,’ tenen yibaraming. Yuk nang ababyi, ‘Er Imtamnyi bisi molona ara luba kibibyei,’ tenen Er Imtamnyi Uram kerek sengna dinyi kotak mitik dinyi kibdongoboka asoktam lilirdongoraming. Bok, sun Farisi nang ab Musa Uram eteren nang ara, ‘Ninyi aryi kisal daksiting,’ tenen Er Imtamnyi Uram kimdongon kotak weik dinyi kikniboka asoktam lilirdongoraming. Tonda, yuk nang ara, ‘Er Imtamnyi biryi ebdeibsou uram kununa ati luba kibibyei,’ tenen alib ongon aling kubkub aryi tabwe yankwa yuk-yuk mitik dinyi deneboka boraming. Bok, sun Farisi nang ab Musa Uram eteren nang ab ara, ‘Ninyi aryi kisal daksiting,’ tenen tabwe yankwa cang dinyi deneboka boraming.

⁶Kwalina weik kwaliraming ba, ninyi ilinto bulubmangnyi ba, sun Farisi nang ab Musa Uram eteren nang ababyi yandoka erebdob nang bun sokon buramingnyi uca, a nang sun kanya teleb kurande. Tonda, Musa Uram eteren ai wengbindoka erebdob nang bun sokon buramingnyi uca, a nang sun kanya teleb kurande.

⁷Tonda, dengdana ai yibaramingnyi ba, ninyi ilinto aryi sunsi, ‘Nun nai eteresurumnyi, teleb,’ eboka kimnaming uca, a nang sun kanya teleb kurande.

⁸Sun Farisi nang ab Musa Uram eteren nang ab ara, ‘Ninyi aryi nunsi, “Nun naiyabwe eteresina nang,” eboka kibdobsiting,’ teneraming bok, sunda Nisi miliranurum nang ara, ‘Ninyi aryi nunsi erebdeiboka, “Nun naiyabwe eteresina nang,” ebsingnyei,’ tenebdarur. Nira Er Imtamnyi biryi Bokwetebnounyi bitikwa ara sun Nai Eteresununyi kunun ba, sunda Nisi miliranurum nang ara neik kikib nang kundarur cok, Ni eteresunun uram keken nang kundarur. A deyok aryi, yuk nang aryi sunsi erebdeiboka, ‘Nun naiyabwe eteresina nang,’ ebsingnyei.

⁹Tonda, sunci tukwetam nang kankan aryi ninyi tentok ababyi, ‘Nun nai Erebdobnyi,’ ena mem. Sun nai Erebdobnyi tentok a kurur ati ato ebmasin. Ara, Er Imtam Kurutnyi bitikwa sun Nai Erebdobnyi kurur.

¹⁰Tonda, ninyi aryi sunsi, ‘Nun naiyabwe bomenengbasina nang,’ ebsingnyei. Sun bomenengbasurutnyi bira tentok a kunum. Ara, Nira ninyi lemdeirin Weik Sienyi bitikwa sun bomenengbasununyi kunun ati ato ebmasin.

¹¹Ura, unanyi biryi dub erebdandoka wingdan kanya boranci ura, aminda ara Er Imtamnyi biryi luknubdeibkwande. Ba, unanyi biryi luknubdob kanya boranci ura, aminda ara erebdeibkwande. A deyok aryi, sun kankan aryi, ‘Erebdobnyi kibtinyi,’ tenebdinyi bira erdamnyi luknubdongoboka sun nirya ati wa irmilinanyi kibte,” ebmou.

¹²

¹³Ura, Er Yesus biryi Er miliramnyi nang ab sun bulubmai nang yuk nang ab asi ato eboka yan memebmou ura, Erci sun Musa kerek sengna etereramnyi nang ab sun Farisi nang ab asi ato eboka kerebmou. “Bok, sunda Musa kerek sengna eterendarur nang ab sun Farisi nang ab asi Er Imtamnyi biryi wenebkwansir. Sunci sibambol dem deib aryi kiknibdeiboka Er Imtamnyi bisi milirandum cok, sun kanya dam aryi Er Imtamnyi bisi diboka kum milirandum. Sunci yuk nang asi, ‘Er Imtamnyi Weik Sienyi amwetam nang kibdarur,’ ena kum kurandum. Erda, sunci Er Imtamnyi bisi diboka kum milirandum deyok aryi, sunci yuk nang asi bisik sekoka bublan tiringdongondarur ba, a nang ababyi Er Imtamnyi amwetam kun nang kum kimnaming. Ati, sunci sundamnyi ati, ‘Er Imtamnyi Weik Sienyi amwetam nang kibtibyi,’ tenerdana kum kundarur cok, yuk nang ababyi Er Imtamnyi amwetam nang kum kimnaming se. A deyok aryi, Er Imtamnyi biryi sunsi wenebkwansir.

¹⁴Sunda Musa kerek sengna eterendarur nang ab sun Farisi nang ab asi Er Imtamnyi biryi wenebkwansir. Sunci sibambol dem deib aryi kiknibdeiboka Er Imtamnyi bisi milirandum cok, sun kanya dam aryi Er Imtamnyi bisi diboka kum milirandum. Ati, sunci sulyi nerabwe bona nirya asi akaboka dorandum se. Tonda, sunci, ‘Ninyi aryi nunti, “Er Imtamnyi bisi diboka moloraming nang kunung,” tenebsiting,’ tenen sunci molona cang weik eboka molorandum. Sunci ato kubde barandum deyok aryi, Er Imtamnyi biryi sunsi tabakoka wenebkwansir.

¹⁵Sunda Musa kerek sengna eterendarur nang ab sun Farisi nang ab asi Er Imtamnyi biryi wenebkwansir. Sunci sibambol dem deib aryi kiknibdeiboka Er Imtamnyi bisi milirandum cok, sun kanya dam aryi Er Imtamnyi bisi diboka kum milirandum. Ati, sunci, ‘Dam kuna kum atei kun nang kankan aryi ton nang aryi Musa Uram kekeboka milibting,’ teneramun cok, sunci tukwe kib bis bindoka ilila mekwan bis bindoka Musa Uram eterebde barandum. Uca, sunda Farisi nang aryi a nang asi etereramunyi ura, a nang aryi sun malyi kurandum dinyi asi miliramingiryi, sunda Farisi nang asi bisibkaboka iya malyi kun nang kimnaming. A deyok aryi, Er Imtamnyi biryi sunsi wenebkwansir.

¹⁶Sunda Musa kerek sengna eterendarur nang ab sun Farisi nang ab asi Er Imtamnyi biryi wenebkwansir. Ara, sunda dib en uram kum bingnandum ci, asing kubsou nang kurandum cok, yuk nang asi bomenengbindoka, ‘Ato-ato kubdarur,’ eboka etererandum se. Ati, sunci yuk nang asi ato eboka etererandum, sunci, ‘Niryi ebdeibman uram ati yuk nang aryi dib tenebniting,’ tenen katabum erdeirin uram ebmun ci, ‘Bait Allah ai dib kurur to niryi ni ebdeibman uram diboka kunubkwan,’ ebmun cok, sunci ato ebmunyi uram ati, ‘Talyi uram aca,’ tenen ur eblobdarur. Ba, sunci, ‘Bait Allah ai mil dangding keil si emas dib kurur to, niryi ni ebman uram asi diboka kunubkwan,’ ebmunyi ura, sunci, ‘Er Imtamnyi wenebnicei,’ tenen ato ebmunyi tok erlona kum uca kunubdarur. Sunci talyi ati, ‘Sun ebdeibmunyi uram ur eblobdarur,’ eboka etererandum ati Er Imtamnyi biryi sunsi wenebkwansir ati ebman.

¹⁷Sunda Farisi nang ab Musa Uram eteren nang ab ara luba kanya bon nang kurandum ci, dib en uram bita kum bingnandum ati asing kubsou nang ato kurandum. Bait Allah ai ara Er Imtamnyi kurur ai kurur deyok aryi erebkaboka ererdeirin dinyi kurur. Ba, Bait Allah ai aryi kuboka emas dinyi ara outam kimdongon dinyi kurur ati sun kum bikmarum do? Emas dinyi yuk ara Er Imtamnyi dam kun dinyi kum kurur. Erda, Bait Allah ai ara Er Imtamnyi dam kobdob tenen dinyi kurur. Uca, emas dinyi ton Bait Allah ai umbura kuranci dinyi ara miliboka, ‘Er Imtamnyi dam kurur,’ tenen dinyi kibwe, sunci a dinyi kum bikmarum do?

¹⁸Tonda, sunci talyi uram etereramun ci, ato eboka etererandum, sunci, ‘Er Imtamnyi biti ninyi dama deirin co lamna dib kurur to, ni ebdeibman uram diboka kunubkwan,’ ebmunyi bok, sunci ato en uram ati, ‘Talyi uram aca,’ tenen sun ebdeibmunyi uram ur eblobdarur. Ba, sunci, ‘Er Imtamnyi biti ninyi dama deirin dinyi dib kurur to, ni ebdeibman uram diboka kunubkwan,’ ebmunyi ura, sunci, ‘Er Imtamnyi biryi wenebnicei,’ tenen ato en uram erlona kum uca kunubdarur. Sunci talyi ati, ‘Sun ebdeibmunyi uram ur eblobdarur,’ eboka etererandum ati Er Imtamnyi biryi sunsi wenebkwansir ati ebman.

¹⁹Sunda dib en uram kum bingdarur ati, asing kubsou nang kundarur se. Er Imtamnyi biti ninyi dama deirin co lamna ara Er Imtamnyi dam kun dinyi kobdob kurur cok, Er Imtamnyi biti dama deirin dinyi yuk-yuk ara miliboka Er Imtamnyi dam kibmou dinyi kurande ati sun kum bikmarum do?

²⁰A deyok aryi, Niryi sunsi ato ebkwinsin, Er Imtamnyi bisi ninyi dama deirin co lamna ab Er Imtamnyi bisi dama deirin dinyi ab ara taklobman kum kurur. Ati, unanyi-unaner ara, ‘Yuk nang aryi ni ebman uram ati, “Diba ati ebmar,” tenen biksiting,’ tenebingiryi, Er Imtamnyi bisi ninyi dama deirin co lamna si deici aryi uram katabum ebdeibmangnyi ura, a nang ara nisintum co lamna dub kurande ninyi dama si deici ababyi sirya ebmangiryi.

²¹Tonda, Bait Allah ai ab Er Imtamnyi ab ara taklobman kum kurur. Ati, unanyi-unaner aryi Bait Allah ai si deici aryi uram katabum ebdeibmangnyi ura, a nang ara nisintum Er Imtamnyi akai umbura kurutnyi si deici ababyi sirya ebmangiryi.

²²Tonda, imtam ai im bila ai ab Er Imtamnyi ab ara taklobman kum kurur. Ati, unanyi-unaner aryi im si deici aryi uram katabum ebdeibmangnyi ura, a nang ara nisintum Er Imtamnyi si deici ababyi sirya ebmangiryi. Imtam ai ara Er Imtamnyi burur bun sokon kurur ati ato ebman.

²³Sun Musa kerek sengna eteren nang ab Farisi nang ab asi Er Imtamnyi biryi wenebkwansir. Sunci sibambol dem deib aryi kiknibdeiboka Er Imtamnyi bisi milirandum cok, sun kanya dam aryi Er Imtamnyi bisi diboka kum milirandum. Musa Uram umbura aryi kerek sekamwe ara, ‘Sun kwaning yongobmarum dinyi ab co du dakmarum dinyi ab nirya bokeibmun ci, bongna toubnibaryi asi ur yirandum cok, bongna tentok asi Er Imtamnyi bisi karebdarur,’ eboka kerek sekamwe asi sunci diboka kunurandum. Tonda, sunci, ‘Er Imtamnyi bisi tabakoka karebkwayeb,’ tenen yina to en dinyi si selasih ab, adas manis ab, jintan ab asi bokeiboka, bongna toubnibaryi tuba talerandum cok, bongna tentok asi Er Imtamnyi bisi karerandum. Sunci ato kuboka Er Imtamnyi bisi tabakoka karerandum cok, sunci, Er Imtamnyi biryi, ‘Ukubdarur-Ukuna mem,’ en uram umbura aryi iya bikdob dinyi asi kum kunubde barandum. Ara, ‘Ninyi urasin meimna kum uca, yuk nang asi teleb kubdarur,’ en uram kum kunurandum. Tonda, ‘Yuk nang bico tenen dibnilibdarur,’ en uram kum kunu(...)

²⁴Sun Musa kerek sengna eteren nang ab Farisi nang ab ara dib en uram kum bingdarur ati, asing kubsou nang kurandum. Ato kurandum cok, sunci yuk nang asi bomenekoka, ‘Ato-ato kubdarur,’ eboka etererandum se. Sunci, ‘Mem yina mitik dinyi ababyi yibibyei,’ tenen me yina nirya asi dirlilirandum ci, yina umbura wekmaci unamnya mitik to keica asi wibkaboka dorkarongnandum. Ura, sunci Musa Uram kankan aryi mitikto bikdob uram akwe busul kuboka dirnilirandum cok, Er Imtamnyi urasintam aryi iya bikdob uram asi yan yanirandum se.

²⁵Sun Musa kerek sengna eteren nang ab Farisi nang ab asi Er Imtamnyi biryi wenebkwansir. Sunci sibambol dem deib aryi kiknibdeiboka Er Imtamnyi bisi milirandum cok, sun kanya dam aryi Er Imtamnyi bisi diboka kum milirandum ati ato ebman. Sunci, ‘Yuk nang dinyi arabdobtibyi,’ tenen, ‘Nun kanya teleb tenebibyi tok kunubtibyi,’ tenen malyi kanya borandum cok, sunci sibambol dem deib aryi kikniboka teleb dinyi kurandum. Ati, sunda me yin moyok asi diboka kum me ilingnaming nang ato kurandum. Sunci moyok ai umbura kurande dinyi me kum ilingnandum cok, baitam kurande dinyi asi diboka me ilingnandum. Tonda, buna yangan suwa deirin tam asi me kum ilingnandum cok, suwa talen tam akwe me ilingnandum. A deyok aryi, Er Imtamnyi biryi sunsi wenebkwansir.

²⁶Sunda Farisi nang ara dib en uram kum bingdarur ati, asing kubsou nang kurandum. Sunci sun kanya tam aryi malyi tenen dinyi taklobdate uca, sun tenen dinyi ababyi sun kunubde ban dinyi ababyi teleb kubsute. Ato kubdate uca, sunci me yin moyok diboka me ilingnaming nang ato kurandatiryok, moyok aitam dinyi ababyi baitam dinyi ababyi me ilikdate.

²⁷Sun Musa kerek sengna eteren nang ab Farisi nang ab asi Er Imtamnyi biryi wenebkwansir. Sunci sibambol dem deib aryi kiknibdeiboka Er Imtamnyi bisi milirandum cok, sun kanya dam aryi Er Imtamnyi bisi diboka kum milirandum. Sunci sun kanya dam aryi malyi dinyi akwe tenerandum cok, sunci kiknibdeiboka ninyi urasintam aryi teleb dinyi kunubde barandum. Sunda ato kurandum ati, ninyi tukwe dongon dam ato kurandum. Ara, ninyi tukwe dongon ai umbura aryi, ‘Ninyi talebibyei,’ tenen dinyi ninyi yok ab lun dinyi ab langdeiboka kurande bok, alib tam asi kait dinyi doboka lurdeiraming.

²⁸Sun kunubde barandum dinyi ababyi neiktoto kurur. Ara, sunci kikniboka teleb dinyi kurandum. Uca, ninyi aryi asing eiboka, ‘A nang ara Er Imtamnyi urasintam aryi teleb dinyi akwe kunuraming,’ teneransing. Ato teneransing bok, sun kanya dam ara, ‘Sibambol deib aryi Er Imtamnyi bisi milinub cok, nunci Ersi diboka kum milibkwayeb,’ tenena akwe kurandum. Tonda, malyi dinyi akwe tenerandum.

²⁹Sun Musa kerek sengna eteren nang ab Farisi nang ab asi Er Imtamnyi biryi wenebkwansir. Sunci sibambol dem deib aryi kiknibdeiboka Er Imtamnyi bisi milirandum cok, sun kanya dam aryi Er Imtamnyi bisi diboka kum milirandum ati ato ebman. Sunci sun minob Er Imtamnyi Uram ebdeibmaci to lak etereramnyi nang uram asi kum kunubde baramun cok, sunci, ‘Er Imtamnyi Uram ebdeibmaci to lak etereramnyi nang asi tuba-tuba teneibkwayeb,’ eboka a nang tukwe dongon ai deici aryi teleb keil lika dobdeiboka kalingnandum. Tonda, sunci sun minob Er Imtamnyi urasintam aryi teleb dinyi kunubde baramnyi nang aryi kunubde baramnyi asi kum milibde baramun cok, sunci, ‘Er Imtamnyi urasintam aryi teleb dinyi kunubde baramnyi nang asi luba kibibyei,’ eboka a nang tukwe dongon ai deici aryi teleb keil lika dobdeiboka kalingnandum.

³⁰Tonda, sunci ato erandum, ‘Nun aibweyabwe aryi Er Imtamnyi Uram ebdeibmaci to lak etereramnyi nang asi obde baramnyi bok, nunda sun deibdoba nang ara yu kanya kum boramib. Ati, nunbabyi minob talak kurantibyi ura, nun aibweyabwe aryi Er Imtamnyi Uram ebdeibmaci to lak etereramnyi nang oramnyi asi nunda miliboka kum orantibyi,’ erandum.

³¹Ato erandum cok, sunbabyi ara yu kanya bon nang kurandum. Sunci sun aibweyabwe ati, ‘Er Imtamnyi biryi ebdeibmaci uram bobaramnyi nang asi obde baramnyi,’ lak erandum cok, sunci sundamnyi ati nisintum, ‘Nunda Er Imtamnyi Uram boban nang asi obde baramnyi nang aryi deibdoba nang kunub,’ eboka lak erandumci.

³²Ati, sun aibweyabwe ara yu kanya boramiryok, deyok kouboka Er Imtamnyi biryi bongdonongnamwe nang asi obde baramnyi to, sunbabyi neiktoto yu kanya borandum cok, sunci a ninyi on wa asi langdeiboka kunubsekmun cok, Er Imtamnyi biryi bongdonongdur nang obde binkwandum se.

³³Sunda Musa Uram eteren nang ab Farisi nang ab ara yu kanya borandum ati, kwatima mabwe ato kurandum. Er Imtamnyi biryi sunsi ikin dinyi kareboka wenebkwansir. Ara, Er Imtamnyi biryi sunsi uk buk weik angna dam asi iya dongobkwansir ba, sunci sundamnyi lebdobdanman kum kurandum.

³⁴Ura, Niryi ebmasin to sunci kunubde binkwandum ati ebman. Ati, Niryi bokdonoknyi uca, Er Imtamnyi Uram ebdeibmaci to lak etereramnyi nang ton sun dam yankwaming. Tonda, bikdob dinyi bingna nang ton ara sun dam yankwaming. Tonda, Er Imtamnyi Uram eteren nang ton ara sun dam yankwaming. A nang nirya asi Niryi bokdonokwan asi sunci malyi kubdeiboka ton nang asi obkwandum. Ba, yuk nang asi sunci bing dakoka co lase deib aryi labkwandum. Ba, yuk nang asi sunci Musa Uram eteren ai bobindoka tabwe aryi lituk-lituk ebkwandum. Ba, yuk nang asi sunci akatei bina okatei bina domkirikde barandum. Ato kuboka, sunci Niryi bokdonokwansin nang asi malyi kubdeibkwandum.

³⁵Sun aibweyabwe minob kuramnyi nang ab sunda Musa Uram eteren nang ab Farisi nang ab ara yu kanya boboka Er Imtamnyi urasintam aryi teleb kun nang asi obde barandarur nang kundarur. Ara, minob im ton tukwe ton kiknibmou ura, Adam mi Habel Er Imtamnyi urasintam aryi teleb kuramunyi bisi sunda yu kanya bon nang aryi deyok kouboka sirya obmandau. Ani, sunci Er Imtamnyi urasintam aryi teleb kuramnyi nang yuk nang ilinto asi obde barandau ani, sirya kobdob ara Berekhya mi Zakharia bisi obmandau. Anyi Zakharia bira Er Imtamnyi biti ninyi dama deirin ai dam wengbinmou bok, sunda yu kanya bon nang aryi ersi obmandau. Ara, Er Imtamnyi biti ninyi dama deirin co lamna kan Bait Allah ai ara Er Imtamnyi ai kobdob kan tikmou bok, sunci ersi obmandau. A deyok aryi, Er Imtamnyi biryi sunsi diba ati wenebkwansir.

³⁶Niryi sunsi dib en uram ebkwinsin ati diboka kekebdarur. Er Imtamnyi biryi sunda yu kanya bon nang asi wenebkwansir tum dam kubmar. Ara, sunda ukuryok kurandum nang kam tuba kubkwandum ba, Er Imtamnyi biryi a wenen dinyi boyankwansir.” Ato eboka Er Yesus biryi sun Musa Uram eteren nang ab sun Farisi nang ab asi erekdobmou.

³⁷Ura, Er Yesus biryi engen kanya bobmou ci, sun atei Yerusalem nang ati ato ebmou, “Se sunda Yerusalem atei nang. Yerusalem atei nang se. Er Imtamnyi biryi bokdonokmou uca, Er Imtamnyi Uram ebdeibmaci to lak etereramnyi nang ab yuk nang ab sun dam yanganung bok, sunci a nang asi orkarongdarur se. Niryi sunda Yerusalem atei nang ati, ‘Ni mabwe nermabwe,’ tenen, ‘Bulubdeiboka lebdeibtinyi,’ tenen uki ilinto tum asi namnansise bok, sunci, ‘Nun li,’ tenerandum. Ara, kirim ner aryi er mabwe bulubdeiboka ol amwetam dongobdeiboka irirande to Nibabyi sunti, ‘Bulubdeiboka iribkwan,’ tenen kuranse bok, sunci, ‘Nun li,’ tenerum.

³⁸Ati, sunci dinmamunyi ba, sun atei Yerusalem ara taklobmunyi ba, atei olong dem kubkwande asi asing eibkwandum.

³⁹Ati, Niryi sunsi ato ebkwinsin, Nira sun atei aryi anaboka binkun ati sunci Nisi asing kum eibkwanurum. Ura, Niryi sun dam tamuboka yankwan ba, sunci Niti, ‘Er Imtamnyi biryi bokdonokmounyi bisi kisal dakwayeb,’ eboka kibdobkwanurum.” (Mazmur 118:26) Ato eboka Yesus biryi sun Yerusalem atei nang asi ebmou.