Read Futuna-Aniwa Matius 24 Bible Online

Matius 24 - Futuna-Aniwa bible

Matius 24

¹Ura, Er Yesus bira Bait Allah ai ara Er Imtamnyi biti ninyi dama deirirban ai dam aryi anaboka yibanmou ba, Er miliramnyi nang amolbaryi aryi Er dam yanmai. Ara, sunci Er Imtamnyi ai keil ila aryi dukeiboka doamnyi ai asi asing eibmai cok, sunci, “Naie, akai Bait Allah ai ab aknaboka doamnyi ai yuk-yuk ab ara teleb ai ilila ai kurur,” tenen te ukdongoboka Er Yesus bisi nukarebmai.

²Ura, Yesus biryi sunsi ato ebmou, “Sunci, ‘Naie,’ tenen asing dinmarum ai teleb ai ati Niryi sunsi dib en uram ton ebkwinsin ati sunci diboka kekebdarur. Uki tentok berekwande tum ara ninyi yandoka akai Bait Allah ai ab aknaboka dongoamnyi ai ab nirya asi daksekwetebkwaming. Uca, akai doboka dukeibyi keil weik keil nirya asi kum daneibkwaming,” ebmou.

³Ura, Er Yesus bira mutuk kon si Zaitun welebindoka bukmou ura, Er miliramnyi nang aryi Er dam yanmai ci, yuk nang sun ab tonkwa kum kubmai bok, sunci Ersi ato eboka asibdenmai, “Nun eteresurumnyi, Kanci nunsi Er Imtamnyi ai ati, ‘Ninyi aryi yandoka dakwetebkwaming,’ ebmasirim ati a dinyi ara una talak aryi kunubkwaming do? Tonda, nunci Kan tamuryankwandim talak ati, ‘Dam kubmar,’ tenen una kuboka biktibyi do? Tonda, nunci sirya kobdob talak ati, ‘Dam kubmar,’ tenen una kuboka biktibyi do?” Ato eboka asibdenmai.

⁴Uca, Er Yesus biryi sunsi ato ebmou, “Sunci sirya kobdob dinyi dibde buramun cok, ‘Ninyi tentok ababyi nunsi boboka walwalabsinibsingnyei,’ tenen diboka kalikdandobkwandarur!

⁵Sirya kobdob uki tum kum berekde bok, ninyi ilinto ara sun dam yandoka tola ati, ‘Nira Er Imtamnyi biryi bokwetebkwamwe ninyi lebdeiboka Weik Sienyi a kunum yanman,’ ebingiryok, ninyi mitik kum boboka walwalabsinibkwaming.

⁶Sirya kobdob uki tum kum berekde bok, sunci kekebmun ba, ‘Akatei nang okatei nang ara mar ordanmang,’ en uram kekebkwandum. Tonda, sunci kekebmun ba, ‘Yuk atei-yuk atei ababyi mar obdankwaming,’ en uram kekebkwandum. Ato en uram ilinto kekebmun bok, sun kanya kankana kusina mem. Sirya kobdob uki tum kum berekde bok, atoto dinyi nirya ara bisik sekman kum kuboka kunubkwande.

⁷Ton mutuk nang ara yuk mutuk nang asi mar bobdankwaming deyok aryi ato ebmasin. Tonda, ton weik sienyi bisi milin nang ara yuk weik sienyi bisi milin nang mar bobdankwaming. Ba, im dangna tukwe dangna mutuk dantam-dantam nirya ara kwaning atana li dobde bok, mutuk eimna ababyi mitik kum dobkwande.

⁸A kunubkwande dinyi nirya ara deyok kouboka mambul kurdeirin dinyi kubkwande bok, aminda kunubkwande dinyi ara tabakdongoboka mambul kurdeirin dinyi kubkwande. Ara, mi deibkwamar ner asi mi deyok aryi u weik yirande to, sunbabyi mambul weik kubkwansir.

⁹Sirya kobdob uki tum kum berekde bok, ninyi aryi sunda Nisi miliranurum nang ati, ‘Obtibyi,’ tenen domkirikwansing. Tonda, diba obkwansing. Ati, sunda Ni miliranurum nang kurandum deyok aryi, im dangna tukwe dangna mutuk nang nirya aryi sunti bimsa yaribkwansing.

¹⁰A talak ara ninyi ilinto aryi Nisi dib teneraningnyi ani, Nisi dokdonokoka taklobkwaning. Ninyi ilinto aryi bimsa yaribdandoka, ‘Ninyi aryi obting,’ tenen sun mamun ninyi taruk dam dobkarebdankwaming.

¹¹Tonda, a talak ara sirya kobdob uki tum kum berekde ba, tola uram en nang ilinto ara yandoka ninyi ilinto asi boboka walwalabsinibkwaming.

¹²Tonda, ninyi ilinto ara yu kanya bobdandoka malyi dinyi tabakoka kibdeibdankwaming deyok aryi, sunci boukwe weik tuba kum kibdankwaming.

¹³Ninyi ilinto ato kubkwaming bok, unanyi-unaner ara, ‘Dib tenena kum taklobkwan,’ tenen katabdongobmangnyi ura, a nang ara lemna dinyi dobdobkwaming.

¹⁴Ura, Teleb Uram ara, ‘Er Imtamnyi biryi weik sienyi kuboka ninyi ilinto Er amwetam kibdeibkwande,’ en uram ara im dangna tukwe dangna mutuk nirya bobindoka lak eterebkwaming. Ara, ‘Sun im dangna tukwe dangna mutuk nang nirya aryi dib en uram kekeboka bikting,’ tenen Teleb Uram eterebkwaming. Sirya bobindoka eterebingnyi ura, sirya kobdob uki tum berekwande,” ebmou.

¹⁵Ura, Er Yesus biryi eterenmou cok, ato ebmou, “Er Imtamnyi Uram ebdeibmaca bobaramunyi si Daniel bira aminda kunubkwamwe dinyi bikmou ci, ‘Kwemdina dinyi ara iya ina ngilikmanto dinyi asi boyandoka Er Imtamnyi biti ninyi dama deirin ai deibkwamingiryok, ninyi ilinto asi obkwaming,’ eboka kerek sekeibmou. Sun a uram kerek sekeiamwe asi nungdamingnyi nang ara a dinyi teneiboka bikdobting. Ati, sunci, ‘A dinyi sirya kunubmar,’ tenen asing eibmun cok, sunci, ‘Nun ordana nang aryi nunsi obsingnyei,’ tenen lemdarbindobdarur.

¹⁶A talak ara sun Yudea mutuk aryi kuramingnyi nang aryi, ‘Lebdandobkwayeb,’ tenen mutuk kon ai cung dorbinkwanung.

¹⁷Tonda, sun, ‘Kumwe ton ebsute ba, taruk loubkwayeb,’ tenen ai aruma dub weleboka bukmangnyi nang ara, ‘Nun ordana nang obsingnyei,’ tenen ukurlona kum uca dorbinkwanung. Ara, sunci, ‘Nun yurbindoka ai umbura wengbindoka bona bon dinyi dorbitibiryok,’ tenen dorbana mem.

¹⁸Tonda, sun bai mutuk ai kunmangnyi nang ara, ‘Atei tamurbindoka ni ongon aling dorbitibiryok,’ tenen dorbana mem. Erda, sunci ukurlona kum uca lemdarbinkwanung.

¹⁹A talak ara iya mambul dinyi dobkwaming talak kubkwande. Ati, sun mi mundu boamingnyi nerabwe ab mi mum dininmangnyi nerabwe ab minola lemdorbinman kum kubkwaming ati, mambul mitik kum dobkwaming.

²⁰Ati, sunci Er Imtamnyi bisi moloramun cok, ‘Muryi li ara cung dorbanman kum li kurande,’ tenen, ‘Muryi li kubde ba, a mambul dinyi don tum berekcei,’ eboka molobdarur. Tonda, ‘Wa in kum uki tum si Sabat tum ara cung dorbanman kum tum kurande,’ tenen, ‘Wa in kum uki tum kubde ba, a mambul dinyi don tum berekcei,’ eboka molobdarur.

²¹A kubkwande talak ara mambul iya weik dinyi dobkwaming ati ato ebman. Minob kuramnyi talak ababyi mambul dinyi doramnyi talak kuramwe bok, a kubkwande talak ara bisibkaboka iya mambul dinyi dobkwaming. Ara, Er Imtamnyi biryi yuma kobdob aryi im ton tukwe ton kikniamwe talak aryi kuboka ukuryok talak ababyi ato mambul weik dinyi kum doramnyi. Tonda, aminda ababyi ato kuboka mambul weik dinyi kum dobkwaming.

²²Er Imtamnyi biryi, ‘A mambul dobkwaming talak ara tiya akwe kubdur,’ tenerur ati, tiya akwe kubkwande. Ati, Erci, ‘Niryi wibdeibse nang obsekingnyei,’ tenen, ‘Lebdeibkwan,’ tenerur deyok aryi, a mambul dobkwaming talak ara tiya akwe kubkwande. Tiya kum kubte ura, ninyi nirya ara tuba kum danmating.

²³A talak ara ninyi aryi sunsi ato ebkwansing, ‘Dibdendarur e! Kristus ninyi lemna Weik Sienyi bira a yandoka kunmar,’ ebkwansing. Ba, yuk nang aryi, ‘Kristus ninyi lemna Weik Sienyi bira o yandoka kunmar,’ ebkwansing. Ato ebkwansing bok, sunci, ‘A uram ara tola uram aca,’ tenen dib tenebmunyei.

²⁴A talak ara tola ati, ‘Nira Kristus ninyi lemna weik sienyi kunun,’ eboka erdana nang yankwaming ati ato ebman. Tonda, tola uram bobindoka eteren nang yuk nang ababyi yankwaming. A nang ara, ‘Ninyi dib tenebsiting,’ tenen ilil tenen dinyi ab yuk nang aryi kiknibman kum dinyi ab kiknibkwaming. Ati, sunci, ‘Er Imtamnyi biryi wianci nang ababyi boboka walwalabsinibtibyi,’ tenen kunubde binkwaming. Ato tenen kunubde binkwaming bok, Er Imtamnyi biryi Er wibdeibmou nang asi kalikde uca, walwalabsinibman kum kubkwaming.

²⁵Sunci asing dindarur. A dinyi nirya asi kunubkwande ba, kununa kum kubde bok, Niryi sunsi sirya ebdeibmasin.

²⁶Ati, ninyi aryi sunsi, ‘Dibdendarur e! Kristus ninyi lebdeiboka Weik Sienyi bira ninyi kun kum mutuk yandoka kunmar,’ ebsingnyi bok, sunci, ‘Tola uram aca,’ tenen dirbana mem. Tonda, yuk nang aryi, ‘Dibdendarur e! Kristus bira inibdob ai yandoka kunmar,’ ebsingnyi bok, sunci a uram asi dib tenena mem.

²⁷Bebe ara yaletam aryi kuboka lingim ebci uca, sun yaletam mutuk kuraming nang ab kitingbantam mutuk kuraming nang ababyi lukdandoka asing eiriraming. Ni Ninyi Dasinyi tamuryuryankwan uki tum ababyi neiktoto kubkwande. Ninyi aryi bingna kum uca Nira lukdandoka tamuryanyi uca, sunci, ‘Er Imtamnyi biryi Bokdonokmunyi sirya yanmar,’ tenen bikwaming. Ati, Ni tamuryankwan uki tum kum berekde bok, ninyi aryi sunsi, ‘Kristus sirya yanganmar,’ ebsingnyi asi sunci a uram asi dib tenebmunyei.

²⁸Dei bum ilinto buluboka bunmaci asi asing eibibyi uca, nunci kankana kum uca, ‘Ninyi tukwi kum yuk dinyi tukwi kum adikum mabmar,’ tenen bingnamib. Ura, Ni Ninyi Dasinyi tamuryuryankunyi tum ababyi neiktoto kubkwande. Niryi ebmasin dinyi yuk-yuk ati kunubkwande asi asing eibmun cok, sunci kankana kum uca, ‘Nun Du tamuryankwande uki tum dam kubmar,’ tenen bikwandum.” Ato eboka Yesus biryi eterebmou.

²⁹Eterenmou cok, Er Yesus biryi ton ato ebmou, “Ninyi aryi mambul weik dinyi dobkwaming talak sirya bisibci ura, kiting ara ukurlona kum uca, kunuk dakwande ba, wala ababyi milil kum dankwande. Tonda, kurya ara imtam aryi kuboka daksakwande uca, milil kum dankwande. Ba, im dub kurande dinyi mikib dinyi nirya lulukwande. (Yesaya 13:10)

³⁰A dinyi nirya kunubde ba, asing dinmangnyi bok, imtam aryi kuboka ilil tenen dinyi ton anabkwande. Uca, ninyi aryi a ilil tenen dinyi asing eibingiryok, sunci, ‘Er Ninyi Damounyi tamuryankwamar,’ tenen bikwaming. Ato tenen bikwaming uca, sun im dangna tukwe dangna nang nirya aryi engebkwaming. Ura, asing dinmangnyi ba, Ni Ninyi Dasinyi bira duwa deici aryi bukoka tamuryankwan. Ara, mikib weik kuboka Iya Erebdobnyi kunun cok, tamuryankwan ati asing eibkwaming. [5]

³¹Ura, Nira Er Imtamnyi biryi Bokwetebnounyi biryi ebdeibnyi uca, bu lilim ilinto dinyi sangkakala dobkwaming. Sangkakala dobingnyi uca, Er Imtamnyi Uram eryuryangan nang aryi anaboka im dangna tukwe dangna mutuk nirya yibindoka Niryi wianse nang nirya bulubdeiboka boyankwaming.

³²Ura, sunci, ‘Nun Du bira una talak aryi tamuryankwande ati una kuboka biktibyi do?’ tenen kankana kubsicei. Co kwarang kabwe silikoka lingmaci asi asing eibmun cok, sunci kankana kum uca, ‘Ei, co keta sirya dobmar,’ tenen bingnandum.

³³Ura, Ni tamuryankwan talak ababyi neiktoto kubkwande. Niryi sunsi, ‘Ato-ato kubkwande,’ ebmasin dinyi nirya kunubde bangnyi asi asing eibmunyi ura, sunci kankana kum uca, ‘Ei, sirya kobdob uki tum dam kubmar,’ tenen bikwandum. Tonda, sunci kankana kum uca, ‘Nun Du bira bisik bublan dam tikmaranyi bitonyi kurur cok, minola yankwamar,’ tenen bikwandum.

³⁴Niryi sunsi dib en uram ton ebkwinsin ati sunci diboka kekebdarur. Sunda ukuryok kunmarum nang ara nirya kum dibsekmamunyi bok, Niryi ebmasin to mambul weik dobkwaming dinyi nirya kunubkwande.

³⁵A dinyi nirya ara diboka kunubkwande ati ebman. Im ab tukwe ab ara kum dankwande bok, Ni en uram ara iya ton kum dakbisibkwande.” Er Yesus biryi ato eboka eterebmou.

³⁶Er Yesus biryi eterenmou cok, ato ebmou, “Ura, Nira Er Imtamnyi bokdonoknounyi tamuryankwan ara una uki tum tamuryankwan ati ninyi tentok ababyi ton kum bingnung. Tonda, sun Er Imtamnyi Uram eryuryangan nang ababyi a talak asi kum bingnung. Tonda, Nira Er Imtamnyi Mi ababyi, ‘Ato-ato uki tum tamuryankwan,’ tenen kum bingnun. Erda, Ni Nai Imtamnyi tentok asi a uki tum minob bingdur.

³⁷Ni Ninyi Dasinyi kum tamuryankwan bok, ninyi ara mangkau kuboka, ‘Sirya kobdob uki tum dam kubmar,’ tenen kum kubkwaming ati ato ebman. Ara, Ni tamuryankwaman talak ara minob talak nun aibwe Nuh minob kuramwe talak ato kubkwande.

³⁸Nuh kuramwe talak ara ilila me oboka kum yibmou ba, sun a talak kuramnyi nang ara, ‘Ilila me oboka siklibkwansir,’ tenen kum bingnamiryok, sunci kwaning yiboka me yiboka ner kabdeibdandoka akwe kuramnyi deyok aryi Niryi, ‘Nuh kuramwe talak ato kunkwande,’ ebmasin. Ani, Nuh mabwe silib ara weik co ngun-ngun umbura wengdorbinmai ura, ilila me oboka ninyi nirya siklibmou ba, isin daksekmai.

³⁹Ara, a nang ara a kunubkwamwe dinyi ati mangkau kuramnyi ba, ilila me oboka sunsi lukdandoka siklibmou ba, isin daksekmai. Ura, Ni Ninyi Dasinyi tamuryuryankwan tum ababyi neiktoto kubkwande. Ninyi aryi, ‘Ukuryok yankwamar,’ tenen kum bikwaning bok, Ni lukdandoka tamuryankwan.

⁴⁰Ni tamuryankwan talak ara ninyi bitinyi wa in dam wa ibde kunmaringnyi bok, Niryi tonyi bisi, ‘Ni mi,’ tenen dobdobnyi ura, yuknyi bisi taklobkwan.

⁴¹Tonda, nerabwe bitinyi ara gandum du tain dinyi asi taleboka gandum du taingmaringnyi bok, Niryi ton ner asi, ‘Ni nebnyi,’ tenen dobdobnyi ura, yuk ner ara taklobkwan.

⁴²Ati, Nira sun Arungdeirisununyi bira lukdandoka tamuryankwan ba, sunci, ‘A uki tum tamuryankwan,’ tenen kum bingnandum deyok aryi, sunda Nisi miliranurum ara diboka kalikdandobkwandarur.

⁴³Ba, sunci diboka kalikmun ci, a dinyi diboka bikdobdarur. Ai deyoknyi bira, ‘Ei, ukula donanyi ara a lukunda ato-ato kiting kubde ba, ni ai wekoka yankwande,’ tenen bikte ura, erci tanglona kum uca kalikmate, ukula donanyi bisi bisik sekmate. Ba, erci, ‘Ukula donanyi yandoka ukula dobkwande,’ tenen kum bikte ura, erci, ‘Malyi,’ tenebtiryok, kum kalikmate ba, ukula donanyi bira er ai wengyandoka er bona bon dinyi ukula dobte.

⁴⁴Ati, Ni Ninyi Dasinyi tamuryuryankwan ara sun kum bikmamunyi tum aryi yankwan deyok aryi, sunci kalikoka kiknibdeiboka bunkwandarur.” Ato eboka Er Yesus biryi Er miliramnyi nang asi eterebmou.

⁴⁵Ura, Er Yesus biryi tuba eterenmou ci, ato ebmou, “Ati, sunci busul kuboka wa diboka wa irmilin nang ato kubdarur. A dinyi ara ato kurur. Wa in damnyi tentok aryi, ‘Dam kuna kum mutuk binkwan,’ tenen er wa irmilinanyi tentoknyi bisi tikeibmou ci, ato ebmou, ‘Yuk wa irmilin nang asi sun kwaning dorkaren uki kubci ura, kanci sunsi kwaning dorkarenkwandim,’ ebmou.

⁴⁶Ura, er nai wa in damnyi bira ninyi atei bina kunmou ani, yandoka diramwe uca, erci tikeiamwe wa irmilinanyi bira erci kareamwe wa asi diboka irante asi bikte ura, er nai biryi a wa irmilinanyi bisi uram kisal dakdobte.

⁴⁷Niryi sunsi dib en uram ton ebkwinsin ati sunci diboka kekebdarur. Er nai biryi a wa irmilinanyi bisi tabakoka tikeibdiryok, ‘Kanci busul kuboka ni ebdeibmakin wa kunubmarim ati, kanci ni ai kurande bona bon dinyi nirya asi kalikdum,’ ebkwande.

⁴⁸Bok, ato wa irmilinanyi bira yu kanya boranturyi erci er kanya tam aryi, ‘Ni nai bira iya biua, kum tamuryankwande,’ tenebtiryok, erci deyok kouboka wa irmilin nang kulabtiryok, walina talen me yin nang ab tonkwa yiboka kimdanting.

⁴⁹

⁵⁰Ato wa irmilinanyi bira, ‘Ni nai arub kum tamuryankwande,’ tenen, ‘A kiting yakna asi kum tamuryankwande,’ tenen mangkau kurante bok, er nai lukdandoka tamuryate.

⁵¹Ura, er nai biryi anyi biryi malyi kurante dinyi bikte ura, erci a wa irmilinanyi bisi oboka ya kalibte. Ba, er nai biryi a wa irmilinanyi busul kanya kum borandanyi bisi iya weiktoto wenebkwande to kuboka wenebte. Tonda, er nai biryi erti, ‘Sibambol dem deib aryi nisi wa irmiliranou ati, sibambol dem deib aryi wa irmilin nang iya kubkwaming dam birur,’ eboka iya wenen ai dongobkwande. A wenen dam ara engena weik engeraming dam kurur ci, mambul weik aryi si darab-darab en dam kurur.” Ato eboka Yesus biryi Er miliramnyi nang amolbaryi asi eterebmou.