Read Futuna-Aniwa Matius 25 Bible Online

Matius 25 - Futuna-Aniwa bible

Matius 25

¹Er Yesus biryi eterenmou ci, ton ato ebmou, “Nira Er Imtamnyi biryi Bokwetebnounyi tamuryankwan ara, ‘Er Imtamnyi Weik Sienyi Er amwetam kun nang asi bulubdeibkwan,’ tenen tamuryankwan tum kiklibdeibkwansin. A dinyi ara kam nerabwe takubaryi aryi, ‘Ner dobkwandanyi yankwande ati kibdobkwayeb,’ tenen dibde bukmai ato kubkwande. A kam nerabwe takubaryi ara yuk-yuk minyak me aryi milil angdeirin dinyi doubtalebmai ci, anaboka dirbinmai.

²Ura, kam nerabwe kankan aryi ton amubaryi kam nerabwe ara angkalung kanya bon nerabwe kuramnyi. Ba, ton amubaryi kam nerabwe ara bikdob kanya bon nerabwe kuramnyi.

³Ura, angkalung kanya bon kam nerabwe amubaryi ara minyak me aryi milil angdeirin dinyi asi bobdobmai cok, minyak me ara kum bobdobmai.

⁴Bok, bikdob kanya bon kam nerabwe amubaryi ara minyak me aryi milil angdeirin dinyi bobdobmai ci, minyak me ababyi kibdeiamnyi asi moyok dikdongoboka bobdobmai.

⁵Ura, dibde bunmai bok, ner dobkwamunyi ola yangana kum uca, uki weik kubmou deyok aryi, a kam nerabwe takubaryi sun nirya ara wi talebmou ba, mabsekmai.

⁶Ura, mabmai talak lukunda dukduk en aryi lukdandoka kekenmai uca, ninyi aryi uram doboka ara ato enmai, ‘Ner dobkwandanyi sirya yanganmar ati, sunci, “Er ab ebdankwayeb,” tenen yandarur!’ Ato enmai asi kekebmai.

⁷Kekebmai uca, a kam nerabwe sun nirya ara ola bukokmai ci, sun yuk-yuk aryi sun minyak me aryi angdeirin dinyi kiknibdobmai.

⁸Ura, sun angkalung kanya bon kam nerabwe amubaryi ara minyak me kum bobdobmai ati, sun minyak me aryi angdeirin dinyi milil tangabmanto kibmou. Ura, sunci sun ka nerabwe bikdob kanya bon kam nerabwe amubaryi asi ato ebmai, ‘Nun kayabwe se. Nun minyak me cebmar aryi milil tangabdobkwamasir ati, sunci minyak me ton dikeiboksindarur se!’ eboka molobdobmai.

⁹Molobmai bok, sun bikdob kanya bon kam nerabwe amubaryi aryi ato ebmai, ‘Se kum e. Nunci sun minyak me ton dikeibsitibyi uca, nun minyak me ababyi kum dasicei. Ati, sunci minyak me dengna nang asi bindoka o dengdorbindarur,’ ebmai.

¹⁰Uca, angkalung kanya bon nerabwe amubaryi aryi anaboka minyak me dengbinmai. Anaboka dengbinmai bok, ner dobkwamunyi sirya yanmou. Yanmou ba, sun bikdob kanya bon kam nerabwe amubaryi ara sirya kiknibdeiboka minyak me angdeirin dinyi milil abkarabmou asi doubtaleboka ner dobkwamunyi ab ebdandoka kibdobmai. Ura, sunci ersi miliboka ner kamdeirdan ai weik kwalina kwalibkwamai ai wengdorbinmai. Sirya wengdorbinmai ura, ner dobkwamunyi er milin nang aryi akai bublan tirikdongobmai.

¹¹Ura, sun angkalung kanya bon kam nerabwe amubaryi ara minyak me dengbinmai ani, sunbabyi weik kwalina kwalibkwamai ai dam yandoka bublan dam tikokmai ci, ato ebmai, ‘Nun nai se, nun nai se. Nunbabyi wengyankwayeb ati, kanci bublan kukdeibsurum!’ ebmai.

¹²Ato eboka molobmai bok, er ner dobkwamunyi biryi ato ebmou, ‘Kum. Niryi sunsi dib en uram ebkwinsin ati sunci diboka kekebdarur. Sunda ni dam kun nang kum kurandum ati, sun ni ab tonkwa kum kubkwayeb,’ ebmou.”

¹³Er Yesus biryi a kiklina uram sirya eterebmou ci, Erci er miliramnyi nang asi ato ebmou, “Ati, sunbabyi neiktoto Ni tamuryankwan uki tum kum bikwandum cok, sunbabyi, ‘Imtam ai bublan tirikeibsicei,’ tenen kalikdandoka dibde bunkwandarur,” eboka eterebmou.

¹⁴Er Yesus biryi eterenmou ci, ato ebmou, “Er Imtamnyi bira Weik Sienyi kuboka ninyi ilinto lebdeiboka Er amwetam nang kibkwande ati tubto kiklibkwansin. Ati, a dinyi ara ato kurur. Bona bonanyi tentok ara dam kum bukamwe atei yuk-yuk binkwamou ci, erci er wa irmiliramnyi nang nabmou ci, sun yuk-yuk asi er taleramwe co bok ilinto asi tiya karebmou. Ara, ‘A co bok deib aryi co bok dengtabangna dinyi ingkirikting,’ tenen erci sun yuk-yuk asi co bok tiya karebmou.

¹⁵Ura, Er wa irmiliramnyi nang kankan aryi ton nang ara bikdobmai uca, keil uang dengtabangna dinyi ilinto ingkirikoka dororamnyi. A nang asi erci tabakoka dengna weik keil uang tiya karebmou. Ati, tonyi bisi erci dengna weik keil amubaryi tiya karebmou. Ba, yuk nang ara dengna weik keil uang dengtabangna dinyi mitikto dororamnyi. A nang asi erci dengna weik keil tentok-tentok karebmou. Ati, tonyi bisi dengna weik keil uang bitinyi tiya karebmou. Ba, tonyi bisi dengna weik keil uang tentok kuboka tiya karebmou. Sirya karebmou ura, erda bona bonanyi bira yuk atei dam kum atei binmou.

¹⁶Ura, dengna weik keil uang amubaryi tiya dobdobmunyi bira ukurlona kum uca, ‘A dengna weik keil uang deib aryi dengbinmanyi uca, dengna weik keil uang tabakoka dobdobkwan,’ tenen anaboka dengbinmou. Dengbinmou uca, a keil uang amubaryi deib aryi erci keil uang amubaryi tabakoka dobdobmou ci, dengna keil uang takubaryi bobmou.

¹⁷Ba, keil uang bitinyi dobdobmunyi bibabyi neiktoto a keil uang bitinyi deib aryi dengbinmou ura, keil uang bitinyi tabakoka dobdobmou ura, uang keil dumbaryi bobmou.

¹⁸Bok, keil uang tentok dobdobmunyi bira dengbina kum uca, ‘Tiya dobdobman keil uang asi diboka kalikwan,’ tenen tukwe ungmou ani, er nai wa takurdeiriramunyi biryi tiya karebmou keil uang tentok asi doboka tukwe umbura dongobdeiboka siklibdeibmou.

¹⁹Ura, kuramnyi ani, uki weik kuramnyi ura, a wa irmiliramnyi nang sun nai tubto tamuryanmou ura, ‘Niryi sunsi keil uang dengna weik dinyi tiya kareanse deib aryi dengna weik keil uang tabakoka dobdobmang do kum do?’ tenen sun ab tonkwa ebdanmai.

²⁰Ura, keil uang amubaryi doamunyi biryi a keil uang amubaryi ab keil uang amubaryi dengtabang dinyi ab boyanmou ci, ato ebmou, ‘Nai, kan keil uang amubaryi nisi tiya kareanumumwe ura, niryi tubto amubaryi ton dektabakdeibkise ati kan dibderum,’ ebmou.

²¹Ura, er nai wa takurdeirinanyi biryi anyi bisi ato ebmou, ‘Ni kwit, kan ukubumwe to ara telebto kubumwe. Kanda ni wa irmilinanyi kurum cok, tanglona kum uca wa diboka irmiliranurum. Niryi kansi takubdeibmakise uca, kanci kan kanya deiboka mitikto dinyi asi busul kuboka irum. A deyok aryi, niryi kansi erebdeiboka, ‘Ni bona bon dinyi iya ilinto talenun dinyi kalikmin ci, wa ur ibdum,’ eboka takubdeibkwan. Nira kan nai wa karekununyi biryi kilkil kanya bonun ati, kanci ni dam yandoka, ni ab tonkwa kilkil kanya bobmilibkwanirim ati, ur wengyarum!’ ebmou.

²²Ura, keil uang bitinyi doamunyi yandoka ato ebmou, ‘Nai, kan keil uang bitinyi tiya kareanumumwe ura, niryi tubto keil uang bitinyi dektabakdeibkise a dibderum,’ ebmou.

²³Ura, er nai wa arungdeirinanyi biryi anyi bisi ato ebmou, ‘Ni kwit teleb. Kan ukubumwe to ara telebto kubumwe. Kanda ni wa irmilinanyi kurum cok, tanglona kum uca wa diboka irmiliranurum. Niryi kansi takubdeibmakise uca, kanci kan kanya deiboka mitikto dinyi asi busul kuboka irum. A deyok aryi, niryi kansi erebdeiboka, “Ni bona bon dinyi iya ilinto talenun dinyi kalikmin ci, wa ur ibdum,” eboka takubdeibkwan. Nira kan nai wa karekununyi biryi kilkil kanya bonun ati, kanci ni dam yandoka, ni ab tonkwa kilkil kanya bobmilibkwanirim ati, ur wengyarum!’ ebmou.

²⁴Ura, sirya kobdob ara keil uang tentok doamunyi bibabyi yanmou ci, ato ebmou, ‘Nai, kanda yu kanya akwe borumnyi kurum tenebmakin. Kanci gandum du kum kwengnandim ani, kanci, “Gandum du eng kubmar asi sunci bulubdeiboka karebdeibnindarur,” erandimnyi kurum. Kanci bona mitikanun dinyi karerandim ani, “Bona tabakoka ilinto dinyi asi tamurkarebnurum,” eboka molorandimnyi kurum.

²⁵Kanda ninyi boukwe tenen kumnyi kurum deyok aryi, niryi ilil kanya boboka, “Ni nai biryi karebnou keil uang tentok asi wanikminiknyei,” teneranse. Ato teneransiryok, niryi bindoka tukwe kurukoka a keil uang asi inibdeibkise. Sirya inibdeibkise ani, niryi a keil uang tentok asi tubto doboka kansi boyanankin ake. Ati, kanci kan dinyi tamuboka dobdobdum,’ ebmou.

²⁶Ura, er nai wa karenanyi biryi anyi bisi ato ebmou, ‘Se, yu kasak biribdob wa irmilinanyi. Kan nong bol aryi wa kum irorumnyi. Kanci niti, “Kat kanya borutnyi,” teneranirim cok, kanci busul kuboka kum wa irandim se. Tonda, kanci niti, “Gandum du kum kwengnande ani, ‘Gandum du engmar asi bulubdeiboka karebdeibnindarur,’ erandanyi kurur,” teneranirim cok, niryi wa kareankise wa asi diboka kum irum se.

²⁷Ati, kanci, “Ni nai biryi co bok mitikto kareanou ani, co bok ton tabakoka tamuboka molobkwande,” tenen bingnurum. A deyok aryi, kanci a keil uang tentok asi doboka co bok minikoka dengtabangnanunyi bisik karerbinantum ba, weikto dektabakdeianute uca, niryi tamuryandoka co bok tabakoka dobdanmatinyi,’ ebmou.

²⁸Ebmou cok, er nai wa karenanyi biryi er miliramnyi nang asi ato ebmou, ‘Anyi biryi tamurboyanmar keil uang tentok asi dobtaleboka er kwit keil uang takubaryi talebmaranyi bisi karebdarur.

²⁹Unanyi-unaner ara busul kuboka wa iramingnyi uca, bona bon dinyi kum yuk dinyi kum tabakoka dobdobmangnyi ura, nibabyi tabakoka karebnyi ura, langdeiboka talebkwaming. Bok, unanyi-unaner ara busul kum kuboka, bona bon dinyi kum yuk dinyi kum dobdobmangnyi ura, niryi sunsi tiya kareanse dinyi ababyi dobdobkwanun. A deyok aryi, sunci er dinyi dobtaleboka er kwit bisi karebdarur.

³⁰Ura, a wa diboka kum irutnyi bisi sunci taleboka baitam yakdonokoka iya kunuktam dongorbindarur. A weik wenen dam ara engena weik dam kurur ci, mambul weik aryi si darab-darab en dam kurur,’ ebmou,” Er Yesus biryi ato eboka eterebmou.

³¹Eterenmou cok, Er Yesus biryi ato ebmou, “Ni Ninyi Dasinyi aminda aryi tamuryankwan ara Iya Erebdobnyi kuboka tamuryankwan. Tamuryankwan ba, sun Er Imtamnyi Uram eryuryangan nang nirya aryi miliboka yankwaming. A talak ara Nira imtam aryi kuboka Erebdobnyi biryi iya erebdob bun sokon burbinkwan.

³²Ura, sun Er Imtamnyi Uram eryuryangan nang aryi ninyi nirya asi bulubdeibingnyi ura, sun im dangna tukwe dangna nang nirya ara Ni urasin dam yankwaming. Sirya yankwaming asi Niryi sunsi wibdeibniryok, sun Nisi milinin nang yuk tam deibniryok, sun Nisi milinin kum nang asi yuk tam kibkwan. Ara, sun domba kalingna nang aryi domba yuk kambing yuk wimdeiraming to, Nibabyi neiktoto wibdeiboka ninyi nirya asi yuk tam-yuk tam kibkwan.

³³Ati, Nira domba kalingnanyi bitonyi kuboka sun Nisi miliraning nang ara domba ato kun nang asi, ‘Ni siriktam tingyandarur,’ ebniryok, sun Nisi miliraning kum nang ara kambing ato kun nang asi, ‘Ni kwanimtam tingbindarur,’ ebkwan.

³⁴Ato kuboka wibdeibnyi ura, Nira Weik Sienyi biryi Ni siriktam tikmangnyi nang asi ato ebkwan, ‘Sunda Ni Nai Imtamnyi biryi kisal dangsurur nang kurandum ati, ur yandarur. Er Imtamnyi biryi im ton tukwe ton kum kikniamuryok, Erci sunti minob bikoka, “Nira Weik Sienyi amwetam kun nang kibdeibkwan,” tenen minob kiknibdeibsou to, sunci Er Imtamnyi Weik Sienyi kurur dam wengyandoka a ererdeirin dinyi dobdobdarur,’ ebkwan.

³⁵‘Ara, sunci Niti teleb kurdeiriranurum deyok aryi, sunda Er Imtamnyi amwetam kubkwandum. Ni kwaning atanmanin ura, sunci Nisi yina kareranindau. Ba, Ni me atanmanin ura, sunci me kareranindau. Ba, Nira dam kum atei aryi kuboka yanganmaranyi kuboka yananse ura, sunci sun ai du dongoranindau.

³⁶Ba, Ni nong baning kuranse ura, sunci ongon aling ongordeiranindau. Ba, Ni u yiranou ura, sunci kalingdoranindau. Ba, Ni ninyi wenen ai dongoranei ura, sunci diroryanindau. Sunci ato kuboka Nisi teleb kurdeiriranindau deyok aryi, sunci Er Imtamnyi Weik Sienyi kurur dam ur wengyandarur,’ ebkwan.

³⁷Ato ebnyi uca, a nang ara Er Imtamnyi urasintam aryi teleb dinyi kunubde ban nang aryi Nisi ato eboka asibdenkwaming, ‘Nai, dan talak aryi dinmakoubwe ba, kwaning me atanmakou asi yibkarebmakoubwe do?

³⁸Ba, dan talak aryi dibmakoubwe ba, Kanda dam kum atei aryi yangananyi kunmumwe asi nun ai du dongobmakoubwe do? Ba, dan talak aryi Kanda nong baning kunmumwe asi ongon aling ongobdeibmakoubwe do?

³⁹Ba, u ara dan talak yinmakou asi nunci diryanmakoubwe do? Ba, dan talak aryi ninyi wenen ai dongorbinmakei asi diryanmakoubwe do?’ Ato eboka asibdenkwaning.

⁴⁰Uca, Nira Weik Sienyi biryi sunsi ato ebkwan, ‘Niryi sunsi dib en uram ebkwinsin ati sunci diboka kekebdarur. Sunci Ni kwityabwe Nisi miliranin nang kankan aryi tukwetam bun nang asi boukwe kimnandau cok, kwaning me kareboka dirbinmandau ati ato ebmasin. Sunci a nang asi boukwe kimnandau ati, Nira sun Du biryi sunti, “Niti boukwe weik kimnamiryi,” tenesunun,’ ebkwan.

⁴¹Ura, Ni kwanimtam tikmangnyi nang asi ato ebkwan, ‘Sunda Er Imtamnyi biryi subsou nang kurandum ati, Ni urasin dam aryi anabkaboka bindobdarur. Bindobmunyi ura, isa sienyi Iblis ab er wa irmilin nang ab ati wibdeibwe mutuk ara iya tangana kum uk angdur ai osi bindabdarur.

⁴²Ara, sunci Niti teleb kum kurdeiriranurum deyok aryi, Niryi sunsi yakdonokmasin. Ni kwaning ataranou ba, sunci Nisi yina ton kum kareranindau. Ba, Ni me ataranou ba, sunci Nisi me ton kum kareranindau.

⁴³Ba, Nira dam kun atei aryi kuboka sun dam yangananse ba, sunci Nisi sun ai ton kum du dongoranindau. Ba, Ni nong baning kuranse ura, ongon aling ton kum ongordeiranindau. Ba, ninyi wenen ai dongoranei ura, sunci Nisi ton kum dirderyanindau,’ ebkwan.

⁴⁴Uca, a nang aryi Nisi ato eboka asibdenkwaning, ‘Nai Arungdeirisurumnyi. Dan talak aryi dinmakoubwe bok, kwaning me atanmakou do? Ba, dam kum atei aryi yanganmumwe ara dan talak aryi yana kuramumwe do? Ba, Kanda nong baning ara dan talak aryi ato kuramumwe do? Ba, u ara dan talak aryi yirankou do? Ba, ninyi wenen ai ara dan talak aryi dongorbinmakei asi nunci asing eiboka taklobmakoubwe do?’ eboka asibdenkwaning.

⁴⁵Uca, Niryi sunsi ato ebkwan. Niryi sunsi dib en uram ebkwinsin ati sunci diboka kekebdarur. Ni kwityabwe Nisi miliranurum nang kankan aryi iya tukwe bun nang asi sunci boukwe kum kimnandau cok, kwaning me kum karerandau deyok aryi, ato ebmasin. Sunci Nisi milinin nang asi boukwe kum teneirirandau deyok aryi, Niryi sunti, ‘Nibabyi boukwe kum teneiriramiryi,’ tenesunun.

⁴⁶Ato sirya ebmanyi ura, a malyi kubde kuroramingnyi nang ara boukwe kum kimdamingnyi nang ara iya mambul mitik kum dobkwaming ai wengbinkwaming. Bok, sun Er Imtamnyi urasintam aryi teleb dinyi kunubde ban nang ara boukwe kimdamingnyi nang ara iya kam kun ai wengbinkwaming.” Ato eboka Er Yesus biryi Er miliramnyi nang amolbaryi asi eterebmou.