Read Futuna-Aniwa Matius 26 Bible Online

Matius 26 - Futuna-Aniwa bible

Matius 26

¹Er Yesus biryi eterenmou ani, a uram nirya sirya eterebmou ura, Erci Er miliramnyi nang amolbaryi asi ato ebmou.

²“Uki bitinyi kunmabyi ani, uki winiryi tum berekci ura, nun Yahudi yala nang weik kwalina si Paskah kubkwamar ati sun bikmarum. Paskah uki tum aryi berekci ura, ninyi aryi Ni Ninyi Dasinyi bisi taleboka, ‘Bing dakoka co lase deib aryi labdarur,’ eboka ninyi taruk dam dobkarebkwamaning,” ebmou.

³A talak ara Er Imtamnyi kan ninyi kan noutam kuboka antanirdeirin deyok nang ab, sun Yahudi yala nang sien nang ab ara, “Uram sisikwayeb,” tenen Er Imtamnyi kan ninyi kan noutam kuboka antanirdeirin sienyi si Kayafas ai dam buluboka wekmai.

⁴Buluboka wekmai ura, sunci, “Er Yesus bisi taleboka obkwayeb,” tenen, “Tola uram eboka tatabdongobkwamibyi ba, Ersi obkwamai,” tenen marmun yibmai.

⁵Ato ebde sisingmai cok, sunci ato ebdanmai, “Er Yesus bisi taleboka obtibyi bok, weik kwalina Paskah tum tuba kubde ba, nunci Ersi talebibyei. Ara, ‘Paskah tum ninyi ilinto buluraming ati, sunci, “Yesus bisi milibkwayeb,” tenen buluboka uram lilim ebingiryi, nunsi dalubsinibibyi ba, kwebdangnyei,’ tenen taklobmabyi ani, yuk tum aryi taleboka obkwayeb,” ebmai.

⁶Ura, Er Yesus atei Betania bindoka kunmou ci, minob susa taleamwe kweteamunyi si Simon ai bukmou.

⁷Ura, Er Yesus ab yuk nang ab ara co lamna dam bukoka yinmai ba, ner tentok ara Er Yesus dam yanmou. Ara, keil aryi kikniamnyi moyok asi tong teleb co yung dengna weik me asi kibdeiamwe ani, doubdakoka Er Yesus dam yanmou. Ura, a ner ara a tong teleb co yung asi Er Yesus kisok dub ai dikeibmou.

⁸A ner ara co yung dengna weik dinyi dikeibmou ba, Er miliramnyi nang aryi asing eibmai ci, sunci, “A ner ara dengna weik dinyi talyi ati dikdongobmar ati malyito kunmar,” tenen yu kanya bobmai. Ura, sunci sun mamun asi ato ebdanmai, “Unatoa ati dengna weik me bok, talyi ati dikdongobmar do?

⁹A co yung ara dengna weiktoto dekeibte uca, co bok ilinto dobdobte uca, sun utotoa kum nang asi karebte,” ebdanmai.

¹⁰Ato ebdanmai asi, Er Yesus biryi sun tenebmai kanya bikmou ci, sunsi ato ebmou, “Sunda unatoa ati, a ner asi mambul kanya borsininmarum do? A ner aryi co yung dikdongobmanir ara iya teleb dinyi kubmanir aryok.

¹¹Sun utotoa kum nang ara aminda ababyi sun ab tonkwa tuba kundarur ati, sunci aminda ababyi a nang asi co bok karebdate. Bok, Ni dibkwaman ati, sun ab tonkwa iya kum kunkwayeb. Ati, a ner ara Nisi tong teleb co yung doboka dikeibmanir ara Ni dibkwaman kum bok, Ni tukwi keil umbura dam deibkwamaning dinyi kiknibdeibmanir.

¹²

¹³Niryi sunsi dib en uram ebkwinsin ati sunci diboka kekebdarur. Ninyi aryi Niti Teleb Uram eterebde bingiryok, sunci im dangna tukwe dangna mutuk nang nirya asi ati ebkwaming, ‘A ner ara tong teleb co yung doboka nun Du Yesus bisi dikeibmou ati tuba-tuba teneibdarur,’ eboka nukde yibinkwaming.” Er Yesus biryi Er miliramnyi nang amolbaryi asi ato ebmou.

¹⁴A sirya ura, Er Yesus miliramnyi nang amolbaryi nang kankan aryi ninyi tentok si Yudas Iskariot biryi, “Yesus bisi kikibkwan,” tenen anabdobmou ci, Er Imtamnyi kan ninyi kan noutam kuboka antanirdeirin deyok nang dam binmou.

¹⁵Ura, erci sunsi ato ebmou, “Sunci nisi unatoa karebkwamarum ba, Er Yesus sun taruk dam dobkarebkwamasin do?” Ato eboka asibmou uca, sunci ersi keil uang perak dinyi tiga puluh baryi karebmai.

¹⁶Ura, a talak aryi kuboka deyok kounmou ci, Yudas biryi, “Er Yesus bisi una tum aryi kuboka sun taruk dam dobkarebkwan do?” tenen bisik ingkiringmou.

¹⁷Ura, sun Yahudi yala nang aryi bung-bung eboka welena kum roti yiramnyi tum yuma uki tum berekmou. Ura, Er miliramnyi nang aryi Er Yesus dam yandoka ato eboka asibdenmai, “Nai, Kan tenebmarim ara dan ai asi weik kwalina si Paskah yina kiknibminikniting tenebmasirim do?” eboka asibdenmai. A tum ara sun Israel yala nang Mesir mutuk aryi anaboka Kanaan mutuk binamnyi tum kanya teneibdeboka ninyi nirya aryi Paskah domba oramnyi tum kubmou.

¹⁸Uca, Er Yesus biryi ato ebmou, “Banmamunyi ani, weik atei Yerusalem bimunyi ura, abilanyi bisi ato ebkwandarur, ‘Nun eteresurutnyi biryi ato ebmar, “Ni dibkwaman uki tum ara Er Imtamnyi biryi teneibnou ara sirya dam kubmar. Ati, Ni ab Ni miliraning nang ab kan ai yandoka nun tonkwa weik kwalina si Paskah kwalina yibkwamab,” ebmar,’ ebkwandarur,” ebmou.

¹⁹Ura, Er Yesus biryi sunsi wa karebmou to kuboka Er miliramnyi nang aryi kunubmai ci, sunci bindoka weik kwalina si Paskah yina kiknibminikmai.

²⁰Kiknirminingmai ani, sirya inibmou ura, Er Yesus ab Er miliramnyi nang amolbaryi nang ab tonkwa bukoka yina yinmai.

²¹Ura, sun nirya tonkwa bukoka yinmai ba, Erci sunsi ato ebmou, “Niryi sunsi din en uram ton ebkwinsin ati diboka kekebdarur. Ninyi tentok ara sun amolbaryi nang kankan akiryi Nisi kikiboka yuk nang taruk dam dobkarebkwamanir,” ebmou.

²²Uca, Er miliramnyi nang ara sun boukwe daksakdobmou ba, sun ninyi yuk-yuk aryi Ersi asibdenmai, “Nai Arungdeirisurutnyi, niryi Kansi kum kikibkitinyi. Kanci niti ato ebmanirim do?” eboka asibmai.

²³Uca, Er Yesus biryi sunsi ato ebmou, “Anyi bira Ni ab tonkwa neik buna yangana suwa deici asi taruk dongoboka yinmanimnyi biryi Nisi yuk nang taruk dam dobkarebkwamanir.

²⁴Ba, Ni Ninyi Dasinyi bira Er Imtamyi biryi ebdeibnou to kuboka dibkwaman bok, Ni Ninyi Dasinyi bisi yuk nang taruk dam dobkarebkwamaniranyi bira aminda iya weiktoto wenen dinyi dobdobkwande. Weiktoto wenen dinyi dobdobkwande deyok aryi, anyi bira deirina takanting ura, teleb,” ebmou.

²⁵Ura, Yudas Er kikibkwamunyi biryi Ersi uram dekeibmou ci, ato ebmou, “Nai, nun eteresurumnyi. Niryi Kansi kum kikibtinyi bok, Niti ebmanirim do?” eboka asibdenmou. Uca, Er Yesus biryi ersi ato ebmou, “Dib. Nisi kikibkwaniranyi bira kantiba ati ebmakin,” ebmou.

²⁶Er Yesus ab Er miliramnyi nang ab tonkwa yina yinmai cok, yina deirin co lamna arubdongoboka tuba bunmai ci, Er Yesus biryi roti dobtaleboka Er miliramnyi nang asi karebmou. Ati, Erci Er Nai Imtamnyi bisi, “Ei, Ni Nai,” eboka kibdobmou ura, toboka-toboka Er miliramnyi nang asi karebmou ci, ato ebmou, “A roti ara Ni nong tub a kunum. Ni tub ara sunti lebkwansin deyok ati karebkwamasin ati, sunci a roti asi ur doboka yibdarur,” ebmou.

²⁷A sirya karebmou ba, sirya yibmai ura, Erci anggur me dikdongobmai moyok dobtalebmou ci, Er Nai Imtamnyi bisi, “Ei, Ni Nai,” eboka kibdobmou ura, Er miliramnyi nang asi karebmou ci, ato ebmou. “A moyok ara ur dobdobmunyi ura, sun nirya ur yibdarur!

²⁸A anggur me ara Ni ining a kunum. Er Imtamnyi biryi, ‘Ninyi ab tonkwa antanirdeibkwayeb,’ tenen Ni ining deib aryi ukuryok mururdeirin dinyi tikeiboka lak kibmasir. Ara, ‘Ni ining deib aryi Er Imtamnyi biryi ninyi ilinto sun malyi kun dinyi kilibkwande ati bikting,’ tenen lak kibmasin ati a anggur me ara sunti dikeibsin,” ebmou.

²⁹Ato ebmou cok, ton ato ebmou, “Niryi sunsi dib en uram ton ebkwinsin ati diboka kekebdarur. Nun ukuryok aryi anggur me yibmab ani, Nira anggur me tubto yibkwan cok, minola kum yibkwan. Aminda aryi sirya kobdob uki tum berekde kum bok, Ni anggur me ton kum yibkwan ati ebman. Ani, sirya kobdob uki tum berekci ura, Er Imtamnyi Weik Sienyi kurur ci, ninyi ilinto Er amwetam kun nang kibdeibkwande ura, Ni sun ab tonkwa kubibiryok, anggur me ukuryok dinyi sun ab tonkwa tubto yibkwayeb,” ebmou.

³⁰Ura, Er Yesus ab Er miliramnyi nang ab yina sirya yibmai ci, sunci Er Imtamnyi si weik en mot sebmai ani, sirya sebmai ura, sunci Yerusalem atei aryi anaboka mutuk kon si Zaitun dam welebinmai.

³¹Zaitun mutuk kon dam sirya binmai ura, Er Yesus biryi Er miliramnyi nang koklombaryi asi ato ebmou, “Arub lukunda ara sun nirya aryi, ‘Nundamnyi lebdandobkwayeb,’ tenen Nisi taklobkwanurum. Ara, Er Imtamnyi minob erdeiriramwe uram umbura aryi ebdeiamwe to kunubkwamar. Ati, Er Imtamnyi Uram umbura ato eboka kerek sekeiamnyi, ‘Er Imtamnyi biryi ato erur, Nira Imtamnyi biryi er domba kalingnanyi bisi obnyi ba, domba mer ara dantam-dantam bindoka bokwalwalabdankwaming.’ (Zakharia 13:7) Ato eboka kerek sekdeiamnyi to kunubkwamar.

³²Ani, Ni Nai Imtamnyi biryi Nisi kam bukeibnici ura, Niryi sunsi menengbisirbindoka absiniryi, Galilea mutuk minob binmanyi ura, tubto ebdankwayeb,” ebmou.

³³Uca, Petrus biryi Yesus bisi ato ebmou, “Nai, sun yuk nang nirya aryi Kansi taklobmakitingnyi ababyi, niryi Kansi kum taklobkitinyi,” ebmou.

³⁴Uca, Er Yesus biryi ersi ato ebmou, “Niryi kansi dib en uram ton ebkwinkin ati kanci diboka kekebdum. A lukunda aryok kanci Nisi takloboka, ‘Nira Yesus milinanyi kum kunun,’ ebkwandim. Ara, maka kirim uram kum ngalukabde bok, kanci ninyi urasintam aryi, ‘Nira Yesus milinanyi kuma,’ ebkwandim ara liki winiryi ebkwandim,” ebmou.

³⁵Uca, Petrus biryi Er Yesus bisi ato ebmou, “Nai, ninyi aryi Kansi obkitingnyi ababyi, niryi, ‘Nibabyi obniting ababyi teleb,’ tenen Kansi kum taklobmakin cok, ‘Nira Yesus milinanyi kuma,’ kum ebkwan,” ebmou. Tonda, Er Yesus miliramnyi nang koklombaryi nang yuk nang ababyi neik uram akwe ebmai.

³⁶Ura, banmai ani, Er Yesus ab Er miliramnyi nang koklombaryi ab tonkwa mutuk si tentok Getsemani dam binmai. Ura, Er miliramnyi nang asi ato ebmou. “Nira tiya otam bindoka Er Imtamnyi bisi molorbinan ati, sunda atam burandarur,” ebmou.

³⁷Ura, Erci Petrus ab Zebedeus mabwe bitinyi ab inibdobmou ura, sun tonkwa binmai. Ura, Er Yesus Er kanya dam mambul weik kubmou ci, engen kanya bobmou.

³⁸Uca, Erci sun winiryi nang asi ato ebmou, “Ni kanya ara mambul mitik kum kunmanir ci, bobmana kum to kubmar ati Ni dibmanto kunman,” ebmou. “Nira otam bindoka Er Imtamnyi bisi molorbinan ati, sunda atam burandarur. Ara, sunbabyi kalikmun cok, Er Imtamnyi bisi molobdarur,” ebmou.

³⁹Ura, Erda ototo bindoka kutam ikdongoboka ngang dakdongoboka Er Imtamnyi bisi molonmou. Ara, Erci ato eboka molobmou, “Ni Nai, Kanci teleb tenebniminyi ura, a mambul weik dobkwaman dinyi ati Kanci bisik sekeibnurum. Bok, Ni teneibmanyi to ara kunubcei ati tenebman. Erda, Kanci teleb tenebmaniminyi tok asi kunubnurur,” eboka molobmou.

⁴⁰Ato eboka sirya molobmou ura, Erci tamuryandoka dinmou uca, Er miliramnyi nang winiryi nang ara mablalabmai asi asing eibmou. Ura, Erci Petrus bisi ato ebmou, “Sunda Nisi miliboka kiting yakna tentok ababyi kalikmana mikib kum kurandum do?

⁴¹Sunci, ‘Mambul dinyi yasici ba, nun dib tenen dinyi taklobibyei,’ tenen bukoka kalikdobmun ci, Er Imtamnyi bisi molorondarur. Sunci sun kanya dam aryi, ‘Malyi kun dinyi bisik sektibyi,’ tenerandum bok, sun nong ab sun dib tenena mitang kusurur uca, sunci malyi kun dinyi minola dobdobmunyei,” ebmou.

⁴²Ura, Er Yesus biryi tubto tamuboka liki bitinyi dinyi binmou ura, Erci ato eboka molobmou, “Nai, Ni mambul dobkwaman dinyi ati Kanci, ‘Bisik kum sekwan,’ tenebtenimyi uca, Nai, Kan tenebmaniminyi to da kunubnurur uca, a mambul dinyi nirya bobdobkwan,” eboka molobmou.

⁴³Sirya molobdobmou ura, Erci yandoka diramwe uca, Er miliramnyi nang winiryi ara wi aryi asing elekoka buna ara ikin mitik kum kunmou ba, tubto mablalabmai asi eibmou.

⁴⁴Uca, Er Yesus biryi sunsi takloboka tubto liki winiryi dinyi Er Imtamnyi bisi molorbinmou ci, Erci molonmou to, neik uram akwe eboka molobmou.

⁴⁵Sirya molobmou ura, Er Yesus biryi Er miliramnyi nang dam yanmou ci, sunsi ato ebmou, “Sunda dikdik seboka tuba mabde kuronmarum do? Sunci bukoka ton dibdendarur. Ni Ninyi Dasinyi bisi taleboka malyi kun nang taruk dam dobkarebkwining kiting yakna dam kuabde.

⁴⁶Ni dobkarebkwiniranyi sirya dam yangar ati, sunci bukokmunyi ura, nun anaboka bankwayeb ati tikokdarur,” ebmou.

⁴⁷Er Yesus biryi Er miliramnyi nang asi uram tuba enmou ba, Er miliramnyi nang amolbaryi kankan aryi ninyi tentoknyi si Yudas bira sun ab tonkwa tuba kum kunmai ura, sun dam yanmou. Tonda, Yudas ab tonkwa yanmai nang ara ninyi yubwa tentok aryi ninyi on ya ab co balala ab doubmai ci, Er Yesus dam yanmai. A yanmai nang ara Er Imtamnyi kan ninyi kan noutam kuboka antanirdeirin deyok nang ab sun Yahudi nang sien nang ab aryi, “Yesus bisi taleboka boyandarur,” bokeibmai uca, yanmai.

⁴⁸Ura, er kikibmounyi biryi sun Yesus bisi talebkwamai nang asi minob ato eboka nukdongobmou, “Niryi iribdoboka u kunkunukdobninyi bira Yesus a kunum. Ati, sunci anyi bisi talebkwandarur,” eboka nukdongobmou.

⁴⁹Ura, Yudas bira ukurlona kum uca Er Yesus dam tingbindoka ato ebmou, “Nun eteresururumnyi, teleb,” ebmou ci, Er Yesus bisi iribdoboka u kunkunukmou.

⁵⁰Iribdonmou bok, Er Yesus biryi ersi ato ebmou, “Ni kwit e, kanci Nisi kikibkwanirim ati yanmarim do?” Ura, a ninyi yubwa aryi Yesus dam tingbindoka Ersi taruk talebdongobmai.

⁵¹Talebdongobmai bok, Er Yesus miliramnyi nang koklombaryi kankan aryi ninyi tentok aryi, “Bisik sekwan,” tenen taruk lakoka ninyi on ya touna asi dobdobmou ci, donokokmou. Dokdonokmou uca, erci Er Imtamnyi kan ninyi kan noutam kuboka antanirdeirin sienyi er wa irmilinanyi a tikmou asi amol dinatam ya sekwetebmou.

⁵²Uca, Er Yesus biryi a ya talenanyi bisi ato ebmou, “Ya touna dongdonongnaming nang sunbabyi ara yuk nang aryi ya touna aryi obkwaming ba, dibkwaming. Ati, kanci a ya touna asi limna umbura tubto kibdongobdum.

⁵³Niryi Ni Nai Imtamnyi bisi, ‘Milibnurum,’ ebmatinyi uca, Erci Er uram eryuryangan nang weik yubwa amolbaryi bisibkaboka bokeibmate ura, a mikib nang nirya yuryating uca, Nisi miliboka lebdobmaniting. Kanci a dinyi kum bikmarim do?

⁵⁴Bok, Niryi Er Imtamnyi bisi, ‘Kan mikib nang yubwa-yubwa nirya bokeibnurum,’ eboka kum molobkwan. Niryi ato eboka molobmatinyi uca, Er Imtamnyi Uram umbura aryi Niti kerek sengdeiamnyi tok, kum kunubmate. Ara, ‘Ninyi aryi Ersi taleboka obkwaming,’ eboka sengdeiamnyi tok, kum kunubmate,” ebmou.

⁵⁵Ura, a talak aryok Yesus biryi sun Ersi taleryanmai nang ilinto asi ato ebmou, “Sunci Niti, ‘Roma nang asi oboka bai kun nang menengbisinanyi kurur,’ teneranurum do? Ara, ninyi on ya touna ab co balala ab douboka taleryanmarum ati ato eboka asibdenmasin. Nira bai kun nang menengbisinanyi kum kunun. Nira uki weikanun kuransiryok, Bait Allah ai dam bukmaniryi ninyi eterenun. Ninyi eterenun talak aryi sunci Nisi kum talebnindau.

⁵⁶Bok, a dinyi nirya kubkwamanir ara Er Imtamnyi Uram ebdeibmaci to lak etereramnyi nang aryi kerek sengdeiramnyi to kunubkwamanir,” ebmou. Ura, Er miliramnyi nang koklombaryi nirya aryi Er Yesus deibloboka binsekdobmai.

⁵⁷Ura, Er Yesus bisi taruk talebmai nang ara Yesus bisi boboka Er Imtamnyi kan ninyi kan noutam kuboka antanirdeirin sienyi si Kayafas dam bobinmai. Akai dam ara Musa kerek sengna etereramnyi nang ab, sun Yahudi nang sien nang ab buluboka wekmai asi bobinmai.

⁵⁸Akai dam bobanmai bok, Petrus bira aminda dongtam kuboka milibdongobmou. Ani, Er Imtamnyi kan ninyi kan noutam kuboka antanirdeirin sienyi ai dam keta wengbinmou. Akai dam keta wengbinmou ura, erda sun bisik bublan dam kalingna nang kankan dam bindoka bukmou ci, “Er Yesus bisi una kubkwaming do?” tenen dibde bukmou.

⁵⁹Ura, sun Er Imtamnyi kan ninyi kan noutam kuboka antanirdeirin deyok nang ab sun Yahudi yala nang asi uram sengkwetena nang ab aryi, “Er Yesus obibyi ba, dibkwande,” tenebmai. Ara, Yesus Er deyok kum kubmou cok, sunci, “Ninyi aryi tola ati eboka Er Yesus bisi tatabdongobting,” tenen ingkirikmai.

⁶⁰Ato kuboka ninyi ilinto aryi sun Yahudi yala nang uram sengkweten nang urasin dam yandoka Er Yesus deyok ati tola-tola uram eboka eryanganmai. Bok, a nang aryi eryanganmai uram deib aryi sunci Yesus bisi weneboka obmana kum kubmai. Ani, sirya kobdob ara ninyi bitinyi yandoka sunbabyi Er Yesus deyok ati tola ati tatab-tatab ebdongoboka ato ebmarei.

⁶¹“Nun kekebmanumwe ba, Anyi biryi ato ebmou, ‘Nira mikibnyi kunun ati Nira Er Imtamnyi biti ninyi dama deirin ai asi dakeibnyi ura, uki winiryi aryok kuboka tubto dobkwan ati mikib kunun,’ ebmou,” ebmarei.

⁶²Ura, Er Imtamnyi kan ninyi kan noutam kuboka antanirdeirin sienyi si Kayafas biryi tikoka Er Yesus bisi ato ebmou, “A nang aryi Kan kurum to ab Kan uram erum to ab asi asing eiboka kekebmarei ani, lak ebmakiring bok, Kanci uram ton kum dekeibkwamarim do?” ebmou.

⁶³Ato ebmou bok, Er Yesus biryi uram ton kum dekeibmou ci, uram kilingna akwe kubmou. Ura, Er Imtamnyi kan ninyi kan noutam kuboka antanirdeirin sienyi biryi Ersi tubto ato ebmou. “Er Imtamnyi iya kam kurutnyi si deib aryi molobmakin ati dib en uram eboka nun dam lak ebsurum. Kanda Er Imtamnyi Mi ara ninyi lemna Weik Sienyi Kristus kurum do?” eboka asibdenmou.

⁶⁴Ato ebmou uca, Er Yesus biryi ato ebmou, “Kanci ebmanirim to, Nira Anyi a kunum. Bok, Niryi sun nirya asi dib en uram ebkwinsin ati diboka kekebdarur. Ni Ninyi Dasinyi bira Er Imtamnyi Iya Erebdobnyi siriktam bukwan asi asing eibkwanurum. Tonda, Nira duwa deici aryi bukoka yuryankwan asi asing eibkwanurum,” ebmou. [6]

⁶⁵Ato ebmou uca, Er Imtamnyi kan ninyi kan noutam kuboka antanirdeirin sienyi biryi, “Er Imtamnyi si yan yanibmar se,” tenen yu yaboka er mining alib ongon aling kwiliklobmou ci, ato ebmou. “Erci Er Imtamnyi si malyi kiboka co kwemtangninto uram ebmar ati nun nirya kekebmab ati, nunci Ersi tatab-tatab ebkwaming nang tuba kum ingkiringmatibyi.

⁶⁶Ati, sunda una tenebmarum do?” eboka asibdenmou. Uca, sun bulubmai sien nang aryi uram dekeiboka ato ebmai, “Anyi bira oboka wenebmanto kubmar ati, Ersi obting,” ebmai.

⁶⁷Ura, sunci Er urasin asi si maka tulubdeibmai ci, taruk inin aryi molong-molong ebokmai ura, yuk nang ara Ersi taruk aryi kulab-kulab eboka obmai.

⁶⁸Onmai cok, sunci Ersi ato ebmai, “Kanda, ‘Nira Kristus ninyi lemna weik sienyi kunun,’ erdarandimyi biryi, ‘Nisi kulabmaniranyi bira anyi biryi, onyi biryi kulabmanir,’ eboka er si sibderum!” ebmai.

⁶⁹Ura, a talak ara Petrus bira baitam kuboka akai dam keta dam aryi bukmou. Asi, wa irmilin ner tentok aryi yandoka Petrus bisi ato ebmou, “Kanbabyi Er Yesus Galilea mutuknyi ab tonkwa yibarurumnyi bukmarim,” ebmou.

⁷⁰Ato ebmou ara ai keta dam wekoka bukmai nang aryi kekebmai uca, Petrus biryi a kekebmai nang nirya sun urasintam aryi tola ebmou ci, “Ato kuma. Kan enmarim uram ara ni kum bikman,” ebmou.

⁷¹Ura, Petrus tikoka bisik lika bublan dam tingdongorbau uca, yuk wa irmilin ner aryi ersi eibdongoboka a wekmai nang asi ato ebmou. “Se, anyi bira Yesus Nazaret ateinyi ab tonkwa kururungnyi bisi yandoka tikmar,” ebmou.

⁷²Ebmou bok, Petrus biryi tubto tola ati ebmou ci, uram ebdarabmou ci, “Se Anyi bisi ni kum bingnunyi bok, talyi enmanirim,” ebmou.

⁷³A wa irmilin ner aryi eabwe talak uki kum tikabwe bok, akai dam kunmai nang aryi Petrus dam yandoka ato ebmai. “Kan uram dangunmarim ara sun Galilea mutuk nang danguraming to, dangunmarim ati lak kimakir ati bingmakib. Kanbabyi diba ati Er milindarutnyi tikmarim,” ebmai.

⁷⁴Uca, Petrus biryi uram katabum ebmou ci, “Tola uram kuma. Tola uram ebmatinyi uca, Er Imtamnyi biryi wenebnicei,” ebmou ci, “Anyi bira ni kum bingnunyi kurur asi talyi enmanurum,” ebmou. Ato ebmou talak aryok kirim uram ngalukmou.

⁷⁵Ura, kirim uram ngalukmou asi Petrus biryi kekebmou ci, erci Er Yesus biryi er dam eamwe uram asi kanya teneiboka bikmou, “Kirim uram kum ngalukabde bok, kanci Niti liki winiryi kuboka, ‘Ni kum bingnunyi,’ ebkwanirim,” eamwe asi kanya teneibmou. Ura, Er Petrus biryi baitam bindoka engena weik engebmou.