Read Futuna-Aniwa Matius 27 Bible Online

Matius 27 - Futuna-Aniwa bible

Matius 27

¹Mabmai ani, berekwe ura, belekuna kobdob kubmou bok, Er Imtamnyi kan ninyi kan noutam kuboka antanirdeirin deyok nang ab sun Yahudi yala nang sien nang ab buluboka wekmai ura, uram sisikmai cok, “Er Yesus bisi obkwayeb,” eboka uram sekwetebmai.

²Ura, sunci Er Yesus bisi tabwe debmai ci, boboka Yerusalem atei aryi kuramwe Erebdobnyi si Pilatus bisi bobindoka karebmai. Anyi Pilatus bira Roma weik sienyi Kaisar amwetam bunanyi kuramuryok, sun Yudea mutuk nang arungdeiriramwe.

³Ura, Er Yesus bisi kikibmounyi Yudas biryi kekebmou uca, “Er Yesus bisi weneboka obkwanung ba, dibdur,” eboka uram sekwetebmai asi bikmou. Bikmou uca, erci er kanya dam aryi lukmou ba, erci, “Se, Yesus Er deyok kum kubmar bok, Niryi Ersi talyi ati kikibman se,” tenebmou. Ura, erci Yesus bisi kikibkwamou ati, sunci ersi keil uang si perak tiga puluh baryi karebmai asi erci, “Ni li,” tenen dobmou ci, Er Imtamnyi kan ninyi kan noutam kuboka antanirdeirin deyok nang ab, sun Yahudi nang sien nang ab dam bobindoka tamubkarebmou.

⁴A co bok tamubkarebmou ci, erci sunsi ato ebmou, “Anyi Yesus bira deyok kum kubmar bok, niryi Ersi talyi ati kikibman se,” ebmou ci, “Dobkarebman deyok aryi, malyi kun dinyi kubman se,” ebmou. Ebmou bok, sunci ersi ato ebmai, “Kan yuk aryi malyi dinyi kubmarim bok, nun aba kuma,” ebmai.

⁵Uca, Yudas biryi a karebmai keil uang ati, “Ni li,” tenen Bait Allah ai dam donoklobokmou ura, anabdobmou. Anabdobmou ura, erci se tenen aryok, “Nidamnyi obdankwan,” tenen ngang tabwe yubdanmou uca, dibmou.

⁶Ura, Yudas biryi donoklobokmou keil uang ati Er Imtamnyi kan ninyi kan noutam kuboka antanirdeirin deyok nang aryi dobmai cok, sunci ato ebdanmai. “A keil uang ati una kubkwayeb do? A keil uang ara ninyi kikiboka ourina dengna keil uang kubmar ati Musa Uram deib aryi Er Imtamnyi bisi ninyi dama deirirdan ai umbura deiboka miningna mem,” ebmai.

⁷Ura, sunci uram sisikmai ci, “A keil uang aryi sun tingyangan nang dibingnyi nang tukwi dongon tukwe dekwayeb,” eboka dodeibmai. Ara, “Tukwe iniboka moyok kiknin nang tukwe a keil uang aryi dekibyi uca, sun tingyangan nang tukwi dongon ai kubkwande,” ebmai uca, dekmai.

⁸Ura, a tukwe dekmai ara ninyi kikiboka ourin dengna keil uang aryi dekmai deyok aryi, ninyi aryi a tukwe asi si siboka, “Ninyi ourin dengna aryi dekmai tukwe,” eramnyi ani, uki talak ababyi ato enung.

⁹Ato kuboka Er Imtamnyi biryi uram ebdeibmaca bobaramunyi si Yeremia biryi minob ebdeiamwe to kunubmou. Ara, Yeremia biryi minob ura ato ebmou, “Sunci keil uang perak tiga puluh baryi doboka sun tukwe iniboka moyok kiknin nang tukwe dekmai. Ati, Er Imtamnyi biryi nisi ebdeibnou to, sunci a tukwe asi dekmai. Ara, sun Israel yala nang aryi, ‘Anyi bisi yakdonokwayeb ati keil uang tiga puluh baryi karebkwayeb ara kikiman,’ tenen dekmai ani, sunci a dengna dinyi doboka a tukwe asi dekmai.” (Zakharia 11:12-13; Yeremia 19:1-13; 32:6-9) Ato eboka Yeremia biryi minob eamwe to, sun Er Imtamnyi ai wa in sien nang aryi kunubmai.

¹⁰

¹¹Ura, sun Yahudi yala nang sien nang aryi Er Yesus bisi boboka Roma weik sienyi amwetam bunanyi Pilatus bobinmai ura, Er Yesus bisi a Erebdobnyi urasintam aryi tikeibmai. Ura, Pilatus biryi Er Yesus bisi ato eboka asibdenmou, “Kanda sun Yahudi yala nang Weik Sienyi a kunum do?” eboka asibdenmou. Uca, Er Yesus biryi, “Diba. Kanci ebmanirim to dib kubmar,” ebmou.

¹²Ba, sun Er Imtamnyi kan ninyi kan noutam kuboka antanirdeirin deyok nang ab sun Yahudi nang sien nang ab aryi Ersi tatab-tatab ebmai ba, Er Yesus biryi ton dengdeirina kum kubmou.

¹³Uca, Pilatus biryi Ersi ato ebmou, “Kanda Kan kurum to bingkunung nang aryi yandoka durungdongonmaking uram ara kekenmarim do kum do?” eboka asibdenmou.

¹⁴Ato ebmou bok, Er Yesus biryi uram ton doboka ena kum kubmou. Ara, tatab-tatab en uram yuk-yuk asi ebmai bok, Erci uram tentok ababyi eboka kum dekeibmou. Uca, Kaisar amwetam bunanyi biryi er kanya dam aryi, “Nai kobe, Erci Erdamnyi kum libdanmar,” tenebmou.

¹⁵Ura, weik kwalina Paskah berengnande ba, Pilatus bira sun ninyi wenen ai umbura aryi kun nang kankan aryi tentoknyi bisi lordeiriramwe. Ara, weik kwalina Paskah berengnande ura, sun Yahudi yala nang aryi bulubmai ura, sunci wibdeiboka, “Anyi bisi lobdeibsurum,” eboka moloramnyi to erci kuboka lordeiriramwe.

¹⁶Tonda, a talak ara ninyi si Barabas bira yu dinyi akwe kunuramunyi bisi taleboka ninyi wenen ai dongoamnyi.

¹⁷Ura, Pilatus biryi asing dinmou uca, Yahudi yala nang ilinto akai dam buluboka wekmai ati asing eibmou ati, Erci sunsi ato eboka asibdenmou. “Niryi unanyi bisi lobkwetebkwansin do? Barabas bisi lobdeibkwansin do? Anyi Yesus bira, ‘Kristus ninyi lemna Weik Sienyi,’ enungnyi bisi lobdeibkwan do?” Ato eboka erci asibdenmou.

¹⁸Ara, Pilatus biryi Er Yesus biti, “Erda malinyi kuma,” tenen bikmou ci, Erci, “Sun Yahudi yala nang sien nang ara Erti yu kanya boraming deyok aryi, Ersi dobkarebmang,” tenen bikmou ci, ato eboka asibdenmou.

¹⁹Ura, Pilatus bira er bun sokon ninyi deyok lilin bun sokon bukoka uram enmou bok, er ner aryi er wa irmiliramnyi nang deib aryi uram ton ebdeibmou. Ara, Pilatus ner aryi yuk nang deib aryi ato ebmou, “Anyi Yesus bisi deyok kum kubmar ati, kanci Anyi bisi wenen dinyi karebminyei. A lukunda mabman ara lengdera mabman ci, Anyi biti lengdera mabmab uca, ni kanya ara Anyi deyok aryi mambul mitik kum kunmanir. Ati, kanci Anyi deyok ati uram sengkwetebminyei!” ebdeibmou.

²⁰Bok, sun Er Imtamnyi kan ninyi kan noutam kuboka antanirdeirin deyok nang ab sun Yahudi nang sien nang aryi sun bulubmai nang Yahudi yala nang ilinto ab uram sisingmai ci, sunci uram ebdarabmai cok, “Sunci, ‘Barabas bisi lobdeibminyi ura, Yesus bira weneboka obdarur,’ ebdarur,” eboka molonmai uca, sun bulubmai nang aryi, “Ato ebkwayeb,” ebmai.

²¹Ura, Kaisar amwetam bunanyi Pilatus biryi sunsi ato eboka asibdenmou, “A bitinyi nang ara unanyi bisi niryi lobdeibsute tenebmarum do?” Ato eboka asibdenmou uca, sunci, “Barabas bisi lobdeibsurum,” ebmai.

²²Ura, Pilatus biryi sunsi ato ebmou, “Ato ebmarum ura, niryi Anyi Yesus ninyi lemna Weik Sienyi Kristus enungnyi bisi una kubtinyi do?” eboka asibdenmou. Uca, sun nirya aryi ato ebmai, “Anyi bisi bing dakoka co lase deici labdarur!” ebmai.

²³Ato ebmai bok, Pilatus biryi sunsi ato eboka asibdenmou, “Anyi deyok kum kubmar ati, una deyok aryi nunci Anyi bisi weneboka co lase labtibyi do?” Ato ebmou bok, sun bulubmai nang ara uram weik to ibtabakoka dobmai ci, “Anyi bisi bing dakoka co lase deici labdarur! Anyi bisi co lase deici labdarur!” ebmai.

²⁴Ura, Pilatus biryi, “Yesus bisi lobdeibtinyi,” tenen ukubdenmou bok, sun Yahudi yala nang aryi er uram kum kekebmai. A dinyi asi bikdobmou ci, erci, “Sun bulubmang nang ara a deyok ati yu kuboka sun mamun obdanmanto kubingnyei,” tenebmou deyok aryi, erci, “Yesus bisi co lase ur deibting,” tenen uram dodeibmou. Ura, Pilatus biryi sun bulubmai nang urasin dam aryi me doboka er taruk me ilikabokmou ci, erci sunsi ato ebmou, “Anyi deyok kum kubmar asi sunci, ‘Weneboka obdarur,’ ebmanurum ati, a ikin ara ni dam kum kubmanir,” ebmou.

²⁵Uca, a wekmai nang nirya aryi ato ebmai, “Anyi ining sakwamar ikin ara nun ab nun mabwe dam kubkwande,” ebmai.

²⁶Ura, erci Barabas biti sun tenebmai to kuboka lobdeibmou. Bok, Er Yesus biti, “Tabwe litukdarur,” ebmou ba, tabwe litukmai ura, co lase deici laboka bing dakwamai ati sun taruk dam karebmou.

²⁷Ura, Kaisar amwetam bunanyi Pilatus biryi arungdeiriramwe yin doun nang aryi Er Yesus boboka Pilatus weik atei bowengbinmai. Ura, sunci sun yin doun nang buluna aryi kuboka yin doun nang yuk nang ababyi nirya nabmai ba, yanmai ura, Er Yesus noutam dongobdongoboka arubdongobmai.

²⁸Ura, sunci Er Yesus ongororamwe aling asi kwiriblobmai ura, weik sien nang ongoraming aling asi kuruta bol aling ongobdeibmai.

²⁹Ba, weik sien nang kaluraming kaluna ato dinyi ara tiling tabwe aryi kwaniboka kisok deici kalubdeibmai ci, sunci weik sien nang aryi taleraming kama ato dinyi doboka Er Yesus taruk siriktam kuboka dumubdeibmai. Ura, Er urasin dam kutam ikdongoboka buryanmai ci, Ersi ina ngilikmai ci, ato ebmai, “Teleb nun Nai sun Yahudi yala nang weik sienyi,” ebmai.

³⁰Ura, sunci Ersi si maka tulubdeibmai ci, Ersi dumubdeibmai kama dobtaleboka Er kisok tam asi kulab-kulab ebokmai.

³¹Ato kuboka Ersi ina ngilikoka kulabmai ura, weik sien nang ongoraming ongon aling ongobdeibmai dinyi kwiribdeibmai ura, Er ongororamwe aling tubto ongobdeibmai. Ura, sunci Er Yesus bisi boboka co lase deici bing dakoka labkwamai ati baitam bobinmai.

³²Er Yesus boboka atei tam aryi kuboka baitam bobanmai bok, bisik noutam aryi ninyi tentok Kirene ateinyi si Simon ab ebdanmai. Ura, anyi bisi Er Yesus co lase bobmoua bobmilibkwamou ati arukdongobmai.

³³Ura, bobanmai ani, mutuk kon si, “Golgota,” ara nun uram deib aryi danguboka, “Ninyi kisok yangkol yok ato mutuk kon,” asi bobinmai.

³⁴Ura, sunci Ersi anggur me sik weik me ab talbalibmai asi dinibmai. Ba, Erci a me asi mulakdenmou ura, taklobokmou.

³⁵Ura, sun yin doun nang aryi Yesus bisi doboka bing dakoka co lase deici labmai. Sirya labmai ura, sunci Er ongoramwe aling asi bokdobkwamai ati, keil im sukmai ci, bokdobmai.

³⁶Sirya bobdobmai ura, sun yin doun nang aryi burbindoka sunci bing dakmai ai kalikmai ci, dibde bukmai.

³⁷Ba, co lase deici laboka bing dakmaia kisok dub kobdob ara Er Yesus bisi weneboka obmai deyok ati kerek sekdongobmai. Ati, ato sekmai, “Anyi bira sun Yahudi yala nang Weik Sienyi kurur,” eboka kerek sekdongobmai.

³⁸Ura, Er Yesus bisi co lase deibmai ai ara ninyi orandei nang ninyi bitinyi ababyi bing dakoka co lase deici labmai. Tonyi bira Er Yesus siriktam kuboka co lase deib aryi labmai ba, tonyi bira Er Yesus kwanimtam kuboka co lase deib aryi labmai.

³⁹Ura, sun bisik ai yibanmai nang aryi Er Yesus co lase deici laboka bing dakmaia asi eibne ura, sunci Ersi ina ngilikoka malyi kimai ci, sun ngang kwakurongmai.

⁴⁰Ati, sunci Ersi ato enmai, “Se Kanci, ‘Er Imtamnyi biti ninyi dama deirirban ai asi dakdeiboka uki winiryi aryok tamuboka dobkwan,’ erum ati, Kanci Kandamnyi lebdandobdum. Kanda diboka Er Imtamnyi Mi kuraminyi ura, Kanci Kandamnyi lebdandobmin ci, co lase dub akiryi yuryarum!” ebmai.

⁴¹Ato kuboka sun Er Imtamnyi kan ninyi kan noutam kuboka antanirdeirin deyok nang ab Musa kerek sengna uram etereramnyi nang ab, sun Yahudi nang sien nang ababyi Ersi ina ngilingmai.

⁴²“Yuk nang asi kweteboka lemdeiriramuryok, Erdamnyi ara lebdandobman kum kurur aryok! Erda, Israel yala nang Weik Sienyi kurante ura, ukuca co lase deici akiryi yuryanderur. Erci Erdamnyi biti lebdate ura, nunci Ersi, ‘Weik Sienyi dib kurur,’ tenebmatibyi.

⁴³Erci, ‘Er Imtamnyi biryi Nisi lebdeibkwamanirca,’ tenen Er kanya deibmariryi. Ati, ‘Er Imtamnyi biryi Ersi lebkwande do? Kum do?’ tenen dibde bukwayeb. Erci Erdamnyi biti, ‘Nira Er Imtamnyi Mi kunun,’ erdarur. Ati, Er Imtamnyi biryi Erti, ‘Ni kanya teleb kurdeirininanyi,’ tenebte ura, Erci Anyi bisi lebdeibte.” Ato eboka sunci Yesus bisi ina ngilikmai.

⁴⁴Ba, a ninyi on nang ninyi bitinyi ara Yesus ab neik ai kuboka co lase deici laboka bing dakmai nang ababyi Er Yesus bisi ina ngilikmai.

⁴⁵Ura, kiting dukduk en aryi kibmou bok, a mutuk nirya ara kunuk dakmou ani, kiting yakna winiryi kimbau ura, berekmou.

⁴⁶Kiting yakna winiryi ato kubmou ba, Er Yesus biryi uram weikanun iboka ato ebmou, “Ni Nai Imtamnyi, Ni Nai Imtamnyi, Kanda Nisi unatoa ati taklobmanirim do?” ebmou ci, Yahudi yala nang uram aryi, “Eli, Eli, lama sabakhtani?” eboka uram dobmou. (Mazmur 22:1)

⁴⁷Er dam a tikmai nang aryi ato kekebmai uca, sunci ato ebmai, “Ura, ‘Elia biryi yandoka lebdeibnute,’ tenen nabmar,” ebmai.

⁴⁸Asi, sun kankan aryi ninyi tentok ola bindoka kerketa bok daktaleboka sik anggur me likdongobmou ura, co balang urub dam kitibdongoboka dobweleboka Er Yesus si bama deici likdongobmou.

⁴⁹Ato kubmou bok, yuk nang aryi ato ebmai, “Se, ato kun kum. Elia nabmar ati, Elia lemdeiryankwande kum dirongnub,” ebmai.

⁵⁰Ura, tubto Er Yesus biryi uram weikanun ibmou ba, dibmou.

⁵¹Ba, Er Yesus bira dibmou talak aryok, Bait Allah ai ara Er Imtamnyi biti ninyi dama deirirban ai aryi kuboka noutam wilimna diribkweteamnyi aling asi eitam kobdob aryi kuboka nirya kwilikde yurbinmou ani, bitinyi kibmou. Tonda, mutuk eimna mitik kum doboka keil aryok buramwe mutuk kon ara bitinyi kiboka dalubsakmou. [7]

⁵²Ba, din nang tukwi dongoamnyi ai ababyi bublan kuklobmou ba, Er Imtamnyi bisi dib teneramnyi nang diamnyi ara kam bukokmai ci, tukwe umbura aryi anabmai.

⁵³Ura, Er Yesus sirya kam bukokmou ura, sunbabyi Er Imtamnyi biryi wiamwe atei Yerusalem atei bindoka ninyi ilinto urasin dam aryi sundamnyi lak kibdanmai.

⁵⁴Ba, a kalikmai yin doun nang sun bomenengnanyi biryi mutuk eimna doboka ilinto kubmou asi asing eibmou ura, erci ilil kanya boboka ato ebmou, “Anyi bira diba ati Er Imtamnyi Mi kurur,” ebmou. Tonda, er ab tonkwa kubmai yin doun nang ababyi ilil kanya boboka neik uram aca ebmai.

⁵⁵Ba, adikum ara nerabwe ilinto wekmai ara yuk dikum tikmai ci, dinmai ba, Er Yesus bisi onmai ci, kunmai dinyi nirya eibmai. A nerabwe ara Er Yesus bisi yina kareboka dibnilibkwamai ati, Galilea mutuk aryi kuboka Er Yesus ab tonkwa yanmai nerabwe.

⁵⁶A nerabwe kankan ara atei Magdala ner Maria ab, Yakobus ab Yusuf ab sun kwin Maria ab, Zebedeus mabwe sun kwin ab kuboka tikmai.

⁵⁷Ura, sintam kunmou ba, inibkou bok, ninyi tentok si Yusuf bira atei Arimatea anyi biryi Pilatus dam binmou. Anyi Yusuf bira bona ilinto boramunyi kuramuryok, Er Yesus milinanyi kibmounyi kuramwe.

⁵⁸Ati, Yusuf biryi Kaisar amwetam bunanyi Pilatus dam bindoka, “Er Yesus dibmoua tukwi asi doboka tukwe dongobtinyi,” eboka molobmou. Ura, Pilatus biryi er yin doun nang asi arukdeibmou ba, sunci Yesus Er tukwi co lase deib aryi labmou asi doboka Yusuf bisi karebmai

⁵⁹Ura, Yusuf biryi Er Yesus dibmou tukwi asi dobmou ura, kait kaluna si lenan nining ton kurdena kum dinyi aryi akubdeibmou.

⁶⁰Sirya akubdeibmou ura, erci Yesus Er tukwi doboka keil umbura dam deirirbinmou. A tukwe umbura ai ara Yusuf dinyi kubmou. A keil umbura dam ara wa in nang aryi keil umbura teleboka ukokmai ani, er Yusuf biti ukuryok kiknibdeibmai. A keil umbura dam asi bindoka Er Yesus tukwi bisi deirirbinmou. Ura, keil bublan tirikna aryi kamubdongoboka tirikdongobmou ura, bindobmou.

⁶¹Ato kubmou bok, atei Magdala ner Maria ab, ton yuk Maria ab ara tukwe dongon dam a kunmarei ci, bublan tirikmou otam bunmarei.

⁶²Mabmai ani, berekwe ura, sun Yahudi yala nang wa in kum uki tum sirya berekmou ura, sun Er Imtamnyi kan ninyi kan noutam kuboka antanirdeirin deyok nang ab sun Musa kerek sengna dirniliramnyi nang Farisi nang ab aryi Pilatus dam binmai.

⁶³Binmai ura, sunci ersi ato ebmai, “Nai, nunci kanya teneinmab uca, Anyi Yesus tola uram enanyi bira kam kuramwe talak aryi ato eamwe, ‘Nira dibmanyi ani, uki winiryi tum berekci ura, Ni kam tubto bukokwan.’ Ato eramwe asi nun teneinmab.

⁶⁴Ati, nai, nunci a dinyi teneinmab cok, molona ton molobkwinkib. Kanci kan yin doun nang asi arukdeibminyi ba, a tukwe dongon dam asi kalingbinung. Ara, arub aryi kuboka uki winiryi bisibde ba, kalingbinung. Kalingna kum kubmangnyi ura, Anyi Er milinung nang aryi Er dibmara tukwi asi ukula dobobde bingiryi, sunci tola ati yuk nang asi, ‘Er Yesus bira dibmar ani, kam tubto bukokmar,’ ebingnyei. Ato kuboka ebingnyi ura, yuk nang aryi, ‘Diba ebmang,’ tenebingnyei. Anyi bira Erdamnyi ati, ‘Nira ninyi lemna ati Weik Sienyi kunun,’ eboka lak eramwe uca, ninyi ilinto asi bowanikminikmou. Ura, Anyi Er milin nang aryi Er tukwi asi ukula dobingiryok, ‘Er Yesus bira kam bukokmar,’ ebingnyi uca, a dinyi ara tabakoka ninyi ilinto bowaningminingna dinyi kubte,” ebmai.

⁶⁵Ura, Pilatus biryi sunsi ato ebmou, “Ni arungdeirinun yin doun nang ton asi ebdeibnyi ura, sunsi miliboka keil umbura dam bindoka kalikwaming. Ati, sunci, ‘Ato-ato kubtibyi uca, diboka kalikwayeb,’ tenen bikmarum to a kalingna nang asi lak ebmunyi ura, sunci diboka-diboka kalikwanung,” ebmou.

⁶⁶Ato sirya ebmou ura, sun Er Imtamnyi ai wa in sien nang ab sun Farisi nang ab anaboka tukwe dongon dam binmai. Ati, sunci, “Yesus milin nang aryi Er tukwi asi ukula dobingnyei,” tenen Er Yesus tukwe dongobmai ai bublan tirikna dam asi sisa deibmai. Sisa deibmai ura, sunci sunsi milibmai yin doun nang asi, “Atam otam tikmun cok, diboka kalikdarur,” ebmai uca, a nang aryi Er Yesus tukwe bis dongon dam kalikmai.