Read Futuna-Aniwa Matius 28 Bible Online

Matius 28 - Futuna-Aniwa bible

Matius 28

¹Er Yesus dibmou ura, uki bitinyi tum berekmou ura, sun Yahudi yala nang wa in kum uki tum si Sabat tum kubmou. Ura, uki Sabat tum bisibmou ura, mabmai ani, uki winiryi tum berekmou ara sun Yahudi yala nang aryi yuma kobdob uki tum eramnyi tum kubmou. A uki tum berekmou ura, belekuna kubmou bok, atei Magdala ner Maria ab, ton yuk Maria ab anaboka Er Yesus dibmoua tukwi dongobmai ai asi dirbinmarei.

²Ura, “Naie,” Er Imtamnyi Uram eryuryangananyi imtam aryi kuboka yuryanmou uca, mutuk eimna ilinto dobmou. Anyi biryi yuryandoka Er Yesus tukwi asi dongobmai keil umbura dam tingbinmou ci, erci, “Keil umbura dam kukeibkwan,” tenen weik keil bublan tiringna asi bongom-bongom eboka barwetam maryibinmou ci, a keil deici burbinmou.

³Asing dinmai uca, anyi er urasin ab nong ab ara milil weik kubmou ba, er ongon aling ara lumtaiya ato iya kait kubmou asi eibmai.

⁴Uca, yin doun nang ara Er Yesus tukwe dongon dam kalikde tikmai nang ara ilil weik aryi sirim talebmou ba, dirlalangna nang ato kibmai.

⁵Ato kibmai bok, Er Imtamnyi Uram eryuryangananyi biryi a nerabwe asi ato ebmou, “Sunda Er Yesus co laboka bing dakmangunyi biti ingkiringyanmarurum ara ni bikmasin. Ati, sun kanya ilil kusina mem!

⁶Sunda Yesus bisi ingkiringyanmararum bok, Erda atam tuba kum kubmar. Erci sunsi, ‘Er Imtamnyi biryi Nisi kam bukeibkwanir,’ ebmasou tok, Er Imtamnyi biryi kunubmar ci, Ersi sirya kam bukeibmar. Ati, sun ton a yandoka Er mabdeibmongwe ai dibderumun ci, Er dibmoua tukwi ara a kum kubmar ati asing eibkwandurum.

⁷Ura, sunci minola bindoka Er milinung nang koklombaryi asi erbirumunyi ura, ‘Er Imtamnyi biryi nun Du Yesus bisi sirya kam bukeibmar,’ eboka erbirurum. Tonda, sunci, ‘Nun Du bira minob menekoka Galilea mutuk binkwamar ati, sunbabyi o mutuk asi bindoka Er ab tonkwa ebdankwandarur. Ura, Er Imtamnyi biryi nisi ebdeibnou to ara sirya ebmurubmasin,’” ebmou.

⁸Uca, a nerabwe bitinyi ara ninyi tukwe dongon dam akiryi kuboka minola anabdobmarei ci, “Nun Du miliramnyi nang koklombaryi erbinkwinim,’ tenen cung banmarei. Cung banmarei ba, sun kanya ara kilkil mitik kum kubmou bok, ilil asa ababyi kubmarei.

⁹Ura, “Erbinkwanim,” tenen cung banmarei ci, bisik noutam aryi banmarei bok, Er Yesus lukdandoka sun ab ebdanmai. Ara, Er Yesus kam bukokmounyi biryi a nerabwe asi, “Teleb,” eboka kibdobmou. Uca, a bitinyi nerabwe ara, “Nun Du,” tenen Er Yesus dam bindoka sun kutam ikdongoboka burbinmarei ci, Er yan asi talebdongobmarei cok, Ersi si weik ebmarei.

¹⁰Ura, Er Yesus biryi sunsi ato ebmou, “Sun kanya ilil kusina mem! Sunci bindoka Ni kwityabwe miliraning nang koklombaryi dam erbirurum ara, ‘Galilea mutuk bimunyi ura, nun Du Yesus kam bukokmaranyi ab ebdankwandum,’ eboka erbirurum,” ebmou.

¹¹A nerabwe bitinyi ara bisik noutam tuba banmarei bok, sun yin doun nang ara Er Yesus keil umbura dongon dam kalikmai nang ton aryi weik atei Yerusalem minob binmai ci, sunci Er Imtamnyi kan ninyi kan noutam kuboka antanirdeirin deyok nang dam bindoka, “Ato-ato kubmou,” eboka nirya nukde binmai.

¹²Uca, sun Yahudi nang sien nang yuk nang ab uram sisingmai ani, sunci, “Ato-ato kubkwayeb,” tenen uram dobdeibmai. Ara, sunci uram dobdeibmai to, sunci a yin doun nang asi co bok dengna ilinto dinyi karebmai.

¹³Co bok ilinto karebmai cok, sun Yahudi yala nang sien nang aryi sun yin doun nang asi ato eboka ebkarebmai. “Sunci ato eboka ninyi urasintam aryi lak ebdarur, ‘Lukunda kubmar talak ara wi mabmab ba, Er Yesus milin nang ton aryi yandoka Er tukwi asi dobobdaki binmang,’ ebkwandarur,” ebmai.

¹⁴Ebmai cok, sunci ato ebmai, “Ura, sun nai Kaisar amwetam bunanyi Pilatus biryi a uram asi kekebte uca, erci sunti, ‘Diboka kum kalikmang ati wenebkwan,’ tenebsute ba, nunci sunsi libsiryok, sun nai Erebdobnyi ab tonkwa uram teleb-teleb eboka sisikwamab uca, erci sunsi kum wenebkwamasir,” eboka ebkarebmai.

¹⁵Uca, a yin doun nang aryi a karebmai co bok ilinto asi dobdobmai ura, sunci sun Yahudi nang sien nang aryi ebkarebmai to kuboka kunubmai. Ati, sunci tola ati, “Er Yesus milin nang ara lukunda yandoka Er Yesus tukwi dobobdaki binmai,” eboka nukde binmai. Ato eboka nukde binmai uca, sun Yahudi yala nang kankan aryi ninyi ilinto aryi, “Dib,” tenebmai ci, uku talak ababyi a tola uram asi tuba nungnung.

¹⁶Ura, a nerabwe bitinyi ara Er Yesus kam bukokmounyi biryi sunsi ebdeibmou to kuboka Er Yesus miliramnyi nang dam bindoka, “Nun Du bira kam bukokmar ura, Erda Galilea mutuk bindoka sun ab tonkwa ebdankwandum,” eboka nungbinmarei. Uca, sun koklombaryi nang aryi a uram asi kekebmai ura, sunci anaboka Galilea mutuk binmai ara Er Yesus biryi sunsi ebdeibmou mutuk kon asi welebinmai.

¹⁷A mutuk kon asi welebinmai ura, sunci Er Yesus kam bukokmounyi ab ebdanmai. Ebdanmai cok, sunci, “Nun Du,” tenen sun kutam ikdongoboka Ersi si weik ebmai. Bok, sun kankan aryi ton nang aryi, “Nun Du diboka kam bukokmar do?” tenen sun kanya ara kankana tuba kunmou.

¹⁸Ura, Er Yesus biryi sun dam tingyandoka ato ebmou, “Er Imtamnyi biryi Nisi iya mikib dinyi karebnou uca, Niryi imtam kurur dinyi ab tukwetam kurur dinyi utotoa nirya asi taleboka arukdeibde banun.

¹⁹Nira iya mikib dinyi dobdobman deyok aryi, sunci im dangna tukwe dangna mutuk atei nirya bindoka Ni uram eterebde bimun ci, ninyi ilinto Ni milin nang kibdeibkwandum. Sunci sun im dangna tukwe dangna nang asi Nisi miliraning nang kibdeibmun ci, sunsi me dongobkwandarur. Ara, Ni Nai Imtamnyi si ab Nira Er Imtamnyi Mi si ab Er Imtamnyi Kanya Roh Kudus si deib aryi me dongobkwandarur.

²⁰Ura, Niryi sunsi etereransise to eterermururamun cok, sunci, ‘A uram nirya asi diboka kunubde bindarur,’ ebkwandarur. Ura, Niryi sunsi tanglona kum uca iya milibkwansin. Ara, uku talak aryi kuboka aminda sirya kobdob uki talak ababyi tuba-tuba milibkwansin.” Ato eboka Er Yesus biryi Er miliramnyi nang koklombaryi asi ebdeibmou.