Read Futuna-Aniwa Matius 9 Bible Online

Matius 9 - Futuna-Aniwa bible

Matius 9

¹Ura, Er Yesus ab Er miliramnyi nang ab aryi Gerasa mutuk aryi kuboka anabdobmai ura, sunci co ngun-ngun dub burwelebindoka mekwan koubkabokmai ura, me katum dam dinatam yanmai ci, atei si Kapernaum yanmai. Akatei ara Yesus tuba-tuba tamurbaramwe atei kuramwe.

²Ura, ninyi tentok yan deneamunyi bira amsuna deib aryi maiboka bobmai cok, Er dam boyanmai. Ara, “Yesus bira mikibnyi kurur ati nun kwit bisi kwetebsute,” tenen boyanmai. Ura, Er Yesus biryi, “A nang ara Nisi dib tenenunung,” tenen bikmou ci, Erci a yan deneamunyi bisi ato ebmou, “A mi, Niryi kan malyi kuramumwe asi sirya kilibmakin ati, kan kanya karyi kukina teleb,” ebmou.

³Ato ebmou asi Musa kerek sengna etereramnyi nang ninyi mikbaryi aryi kekebmai ura, ato ebdanmai. “Se nai kobe, Er Imtamnyi biryok nun malyi kun dinyi kilibsute bok, anyi biryi Er Imtamnyi si yan yanibmar cok, ‘Kan malyi kun dinyi sirya kilibmakin,’ ebmar,” ebdanmai.

⁴Ato tenebmai asi Er Yesus biryi bikmou ci, Erci sunsi ato ebmou, “Sunda unatoa ati sun kanya dam aryi yu tenen dinyi akwe teneinmanurum do?

⁵Niryi anyi bisi, ‘Kan malyi kun dinyi sirya kilibmakin,’ diboka ebman bok, sunci Niti, ‘Talyi ati ebmar se!’ tenebmanurum. Ura, Niryi anyi bisi, ‘Kanci bukalaboka tikyibarorum!’ ebtinyi uca, sunci Niti, ‘Tabakdongoboka talyi ati ebmar se!’ tenebnindate do?

⁶Er Imtamnyi biryi Ni Ninyi Dasinyi biti mikib karebnou uca, Niryi sun tukwetam nang malyi kun dinyi kilibde banun. Ura, sunci a dinyi diboka bikwanurum ati, Niryi sun urasintam aryi ilil tenen dinyi kiknibkwan,” ebmou. Ato ebmou ura, Er Yesus biryi a yan deneamunyi bisi ato ebmou, “Kanci bukalaboka tikokmin ci, kan man amsuna bobdobmin ci, kan ai da birum!” ebmou.

⁷Er Yesus biryi ato ebmou ba, a yan deneamunyi bira bukalaboka tikokmou ci, er amsuna bobdobmou ci, er ai bindobmou.

⁸Ura, sun bulubmai nang aryi a ilil tenen dinyi kiknibmou asi asing eibmai ura, sun kanya ilil kubmou ba, sunci, “Er Imtamnyi biryi tukwetam nang asi Er mikib karebmou uca, ilil tenen dinyi kikniraming,” eboka Er Imtamnyi bisi si weik ebmai.

⁹Ura, Er Yesus adikum aryi anaboka banmou ani, bisik noutam aryi dinmou uca, Erda ninyi tentok si Matius bisi asing eibmou. Anyi bira, “Kaisar biti pajak dengna karebdarur,” eboka molormiliramunyi kuramuryok, pajak dengna ai bukmou asi asing eibmou. Ura, Yesus biryi ersi ato ebmou, “Ni milibnurum!” ebmou. Uca, Matius tikaboka Ersi milibmou.

¹⁰Ura, Matius biryi Yesus bisi du dongobmou ura, Matius ai wengbindoka yina yibmai. Ura, “Kaisar biti pajak dengna karebdarur,” eboka molormiliramnyi nang ilinto wengyanmai ura, Yesus ab Er miliramnyi nang ab yina tonkwa yibmai. Tonda, yuk nang ilinto ababyi wengyandoka yina tonkwa yibmai. A nang nirya ati sun Farisi nang aryi, “Malyi kun nang,” teneramnyi bok, Yesus ab Er miliramnyi nang ab sun ab tonkwa yina yibmai.

¹¹Ura, Musa kerek sengna dirniliramnyi nang Farisi nang aryi ato kubmou asi eibmai ci, sunci Yesus Er miliramnyi nang asi ato ebmai, “Sun eteresurutnyi bira, ‘Dengna karebdarur,’ eboka molormiliramnyi nang ab tonkwa bukoka yina yinmang se. Tonda, yuk malyi kun dinyi kunung nang ab tonkwa bukoka yina yinmang se. Unato ati sun eteresurutnyi biryi ato dinyi kunmar do?” Ato eboka asibmai.

¹²Uca, Er Yesus biryi a ebmai uram asi kekebmou ura, Erci sunsi ato ebmou, “Sun nong kib nang ara, ‘Ninyi kwetenanyi nabmunyi ura, kwetebsute,’ eboka kum namnaming. Erda, sun u yin nang ara, ‘Ninyi kwetenanyi yate ura, kwetebsute,’ teneraming. Ati, Niryi a malyi kun nang ati, ‘Teleb kubdeibkwan,’ tenen sun ab tonkwa bukoka yina yinmab.

¹³Ati, sunci anabdobmunyi ura, Er Imtamnyi biryi minob ebdeiansou uram asi nukdoboka diboka teneibdarur. Ara, Er Imtamnyi biryi ato eboka minob ebdeiansou, ‘Nira Imtamnyi biryi nunukeiboka teleb tenenun to ara, “Mambul kun nang asi bico teneboka milibting,” tenenun. Ati, Nira Imtamnyi biryi, “Dama deirin dinyi karebniting,” tenen nunukeiboka kum tenenun,’ (Hosea 6:6) Ato eboka Er Imtamnyi biryi minob ebdeiansou. Ati, Nira Er Imtamnyi biryi bokdonoknounyi bira tukwetam yuryase ara, ‘Teleb kun nang ati nabkwan,’ tenen kum yuryase. Erda, ‘Malyi kun nang asi nabnyi uca, Er Imtamnyi dam kun nang kibting,’ tenen yuryase,” ebmou.

¹⁴Ura, Yohanes ninyi me dongonanyi bisi miliramnyi nang ton aryi Er Yesus bisi yandoka ato ebmai, “Nunda Yohanes ninyi me dongonanyi bisi milinub nang ton sun Musa kerek sengna dirnilinung nang Farisi nang ton ara, ‘Er Imtamnyi kanya teleb kibdeibkwayeb,’ tenen yina si teboka bunub. Bok, Kan milikunung nang ara yina si teboka kum buraming ara unatoa ati ato kum kuraming do?” eboka asibmai.

¹⁵Uca, Er Yesus biryi ato eboka sunsi uram dekeibmou, “Ner te murumna tum ara ner dobkwamatunyi bisi dam kun nang ara engen kanya boboka yina si teboka bukting do? Ato tenen kum. Erda, sunci kilkil kanya boboka ner dobkwamatunyi ab tonkwa buramingiryok, yina yiraming. Bok, ner dobkwamatunyi sun ab tonkwa tuba kum kuranting ura, er dam kun nang ara engen kanya boboka yina si teboka bukwaming. Ati, Ni ner dobkwandanyi bitonyi ab Ni miliraning nang ab tonkwa tuba kuramibiryok, sunci kilkil kanya boboka yina yiraming. Ani, Ni sun ab tonkwa tuba kum kubkwamib talak berekci ura, Ni dam kun nang ara mambul kanya boboka yina si teboka bukwaming,” ebmou.

¹⁶Ato ebmou ura, Er Yesus biryi, “Niryi Teleb Uram etereransin ab sun Farisi nang ara Musa kerek sengna etereraming nang aryi etereraming uram ab ati, ‘Neika tabtabukman kum,’ teneboka bikting,” tenebmou ci, Erci kemdeirina bitinyi tabakdongoboka eterebmou. Ara, Erci ato ebmou, “Minob ongoramibyi aling sirya kwilikci ura, nunci ukuryok dekmabyi aling sekoka aling sekdoba asi dobmabyi ura, kwilikmaci aling minob aling asi tablakdongoboka denebtibyi do? Ato tenen kum. Aling sekdoba ukuryok dinyi asi doboka kwilikmaci aling minob dinyi asi tablakdongoboka denebtibyi bok, diboka kum denebtibyi. Erda, sirya denebtibyi ababyi, aling sekdoba ukuryok dinyi ab minob aling kwilikmaci dinyi ab ara yuk-yuk kwiliksinibokte uca, minob aling kwilikmaci dinyi ara tabakoka kwilikte.

¹⁷Tonda, co anggur du yung ukuryok urubmangnyi dinyi asi doboka bisam kambing kala aling minob wibmangnyi aling umbura aryi dongoraming do? Ato tenen kum. Ato kubting ura, a co anggur du yung ukuryok urubmangnyi dinyi ara bung-bung ebci uca, kambing kala aling minob dinyi minola kwilikte. Sirya kwilikte ura, a co anggur du yung nirya ara diksakdobte. Ati, ‘Kambing kala aling bung deboka kwiliksakcei,’ teneramingiryok, co anggur du yung ukuryok urubmangnyi dinyi asi doboka kambing kala aling ukuryok wibmangnyi dinyi asi kirdongoraming. Ura, co anggur du yung ukuryok urubmangnyi dinyi ara bung-bung ebci ababyi, kambing kala aling ukuryok dinyi ara mikib kurande aryi kum kwilikde ba, co anggur du yung kum diksakdobte,” ebmou. Ara, “Teleb Uram ab sun Farisi nang aryi eteraming uram ab ati, ‘Neika tabtabukman kum,’ tenen bikting,” tenen Er Yesus biryi ato eboka eterebmou.

¹⁸Er Yesus biryi Yohanes miliramnyi nang asi uram tuba enmou bok, Musa Uram eteren ai deyoknyi tentok yanmou. Anyi bira Yesus biti, “Ni Nai,” tenen er kutam ikdongobmou ci, Er Yesus bisi ato eboka molobdobmou, “Nai se, ni nebnyi ukuryok sirya diabde bok, Kanci yandoka er nong deici asi taruk deibdongobminyi ba, er tubto kam bukokwande,” ebmou.

¹⁹Ura, Er Yesus biryi tikokmou ci, anyi milibmou ba, Er miliramnyi nang ab tonkwa er ai binmai.

²⁰Anyi atei banmai ci, bisik noutam banmai talak aryi ner tentok bunga ining yibarmururamwe ner ara sun ab ebdanmai. A ner bunga ining yibarmurubkalibmou ani, kwalina amolbaryi kwaliamuryok, tuba yibarmururamwe. A ner ara Yesus dongtam bindoka dam yanmou ci, Erci Yesus ongoramwe aling alib aling asi bol libdenmou.

²¹Ara, a ner aryi, “Er Yesus alib ongon aling talebdenmanyi aryi ni kwetebkwamanir,” tenebmou. Ato tenebmou ci, erci dongtam kuboka yandoka Er Yesus alib ongon aling asi bol libdenmou.

²²Bol libdenmou ba, Er Yesus biryi bikmou ci, Erci danguboka a ner asi dibdenmou ci ato ebmou, “Se Ni nebnyi, kan ilil kanya bobminyei. Kanci Nisi dib tenebmanirim deyok aryi, Niryi kansi sirya kwetebmakin,” ebmou. Ato ebmou talak aryok a ner bunga ining yibarmururamwe kum dandobmou.

²³Ura, banmai ani, Er Yesus bira Musa Uram eteren ai deyoknyi ai dam wengbindoka diramwe uca, bu un nang ara bu unmai ba, ninyi ilinto bulubmai ara uram dobmai ci, engena weik engebmai.

²⁴Ura, Erci akai dam wengbinmai ci, Erci a boukwe bobmai nang asi ato ebmou, “A nebnyi ara iya kum dibmar. Erda, er wi mabmar ato kunmar. Ati, sunci binsekdobdarur,” ebmou. Bok, akai wekmai ninyi ara, “A nebnyi ara dibmara eibmab asi talyi ati ebmara,” tenebmai ci, sunci Er Yesus biti si akwi tubmai.

²⁵Ura, Erci a wekmai nang nirya asi sirya yakwetebmou ba, bindobmai ura, Er Yesus bira wengbindoka a nebnyi sirya dibmou asi taruk talebdeibmou ci, kam bukeibmou ura, a nebnyi ara bukokmou.

²⁶Ura, Er Yesus biryi a nebnyi dibmou asi kam bukeibmou asi asing eibmai ura, ninyi aryi a uram asi boboka a mutuk dam nirya asi ebdongobdanin yibinmai.

²⁷Er Yesus Musa Uram eteren ai deyoknyi ai aryi anaboka banmou ura, ninyi bitinyi asing kuamwe nang aminda tam kuboka milibmarei ci, uram doboka ato ebde banmarei, “Weik sienyi Daud deibdobanyi se. Kanci nunti bico kibdobsimin ci, kwetebdeibsurum se,” eboka uram dobde banmarei.

²⁸Banmarei ani, Er Yesus bira ai tentok wengbinmou ura, a asing kuamwe nang bitinyi ababyi wengbindoka Ersi yandobmarei. Ura, Er Yesus biryi sunsi ato eboka asibdenmou, “Sunci Niti, ‘Kwetebdeibsurum,’ ebmanururum to, diboka dib tenebmanururum do?” eboka asibdenmou. Uca, sunci Ersi ato ebmarei, “Yo, nun Nai Arungdeirisurumnyi. Diba. Kanda mikibnyi kurum ati Kanci nunsi diboka kwetebdeibsutum ati tenebmakinim,” ebmarei.

²⁹Ura, Er Yesus biryi sun asing bol libdenmou ci, ato ebmou, “Sunci dib tenebdobmanururum to sunsi kunubkwamasir,” ebmou.

³⁰Ato ebmou ba, sun asing kuamwe ara elekmou ba, asing eibkatabmarei. Ura, Er Yesus biryi sunsi ato eboka ebkatabdeibmou, “Niryi sunsi kwetebdeibmasin ara yuk nang aryi biksingnyei. Ati, sunci a dinyi lak eterebdumunyei!” ebmou.

³¹Ato ebkatabdeibmou bok, sunda baitam yibinmarei ura, “Er Yesus biryi nun asing kuansou asi elekeibsou,” eboka a mutuk dam nirya nukde yibinkirikmarei.

³²Er Yesus biryi asing kuamwe nang bitinyi kwetebmou ura, anabkaboka barorei ura, Er Yesus dam asi uram kum eramwe asi isa kanya wekamunyi tentok boyanmai.

³³Ura, Er Yesus biryi isa kanya asi sirya yakdonokmou ura, anyi uram kum eramunyi biryi uram ebkalibmou. Ba, ninyi ilinto aryi, “Se nai kobe,” tenebmai ci, ato ebmai, “Ato kiknibmar ilil tenen dinyi ara nunda Israel yala nang ton minob talak aryi kuboka kum eiriramoubwe,” ebmai.

³⁴Ato ebmai bok, Musa kerek sengna dirniliramnyi nang Farisi nang aryi ato ebmai, “Anyi biryi isa yakdonokmar ara isa sienyi mikib aryi yakdonokmara,” ebmai.

³⁵Er Yesus biryi ato kuramuryi weik atei ab mitik atei ab nirya yibarkiringnamwe. Ara, Erci Musa Uram eteren ai yuk-yuk asi wengbindoka, “Er Imtamnyi bira Weik Sienyi kurur ci, Er amwetam nang kibmangnyi nang asi lebdeibkwande,” eboka Teleb Uram etereramuryi, Erci sun yuk u-yuk u yiramwe nang asi nirya kweteramwe.

³⁶Ura, Er Yesus biryi ninyi ilinto bulubmai asi diramwe uca, Erci sunti bico teneramwe. A bulubmai nang ara domba ato nang kuramnyi bok, ninyi tentok ababyi sunsi, “Er Imtamnyi Uram kekebdarur,” eboka kum kalingnamwe. Ati, a bulubmai nang ara mambul kanya boramiryok, “Unanyi biryi lebdeiboka milibkwansir do?” tenen kum bikmai. Ato kuramnyi deyok aryi, Er Yesus biryi sunti bico tenebmou.

³⁷Ura, Er Yesus biryi Er miliramnyi nang asi ato ebmou, “Wa in dam aryi kuboka nong mabmar dinyi ara mitik kum kurur bok, sun kwaning kwinirmilin nang ara mitik toa nun kunung.” Ara, “Ninyi ilinto aryi Teleb Uram dobdobmanto kunung bok, Teleb Uram eteren nang ara mitikanun akwe kunung,” tenen Erci ato ebmou.

³⁸Ebmou cok, Erci ato ebtabakmou, “Er Imtamnyi wa irmilin nang ara mitikanun akwe kuraming deyok aryi, sunci Er Imtamnyi bira wa in dam deyoknyi bitonyi bisi molobmunyi ba, Erci Er wa irmilin nang asi tabakoka tubto ton bokdeibkwande,” ebmou.