Read Futuna-Aniwa Markus 1 Bible Online

Markus 1 - Futuna-Aniwa bible

Markus 1

¹Teleb Uram deyok ara Er Yesus Kristus bira Er Imtamnyi Mi kurur ci, ninyi lebkalibsou uram nukwinsin.

²Er Imtamnyi biryi uram ebdeibmaca bobaramunyi si Yesaya biryi minob kerek sekdeiamwe to, Teleb Uram kunubkalibmou. Nabi Yesaya biryi ato eboka minob kerek sekamwe, “Kekebnurum. Nira Imtamnyi biryi ninyi tentok ara Ni uram erbinkwandanyi bisi bokdonokwan. Anyi biryi Kan ninyi Lembinkwamaranyi bisi menekdiryok, bisik lilibkwankir.” (Maleakhi 3:1)

³“Ni uram erbinkwandanyi bira ninyi kun kum ai aryi kurandiryi, uram dobkwande. Erci uram weikanun doboka ato ebkwande, ‘Er Iya Mikibnyi yankwansir ati, sunci sundamnyi kiknibminikdamun ci, bisik yabdarur. Er Iya Mikibnyi yankwansir bisik asi udikum yabmun cok, Ersi kibdobdarur.’ Ato eboka Er Imtamnyi Uram erbinkwandanyi biryi uram dobkwande,” ebdeiamwe. (Yesaya 40:3)

⁴A uram deyok ara nabi Yesaya biryi minob kerek sekamwe to, kunubmou. Ara, Er Yesus Kristus biryi ninyi lebkwansou ati kum yankwande bok, Er Imtamnyi biryi ninyi me dongonkwamunyi si Yohanes bisi minob bokdonokmou. Ura, Yohanes bira ninyi kun kum ai aryi kuramuryi, Er Imtamnyi Uram ebmuruboka lak etereramwe. Eterenmou uca, ninyi ilinto aryi er etereramwe uram, “Kekebtibyi,” tenen nang ara er dam buluryangaramnyi ura, er Yohanes biryi sun Er Imtamnyi Uram dib teneramnyi nang ara me dongoramwe. Ura, erci sunsi ato eramwe, “Ni kwityabwe ab, ni kwinyabwe ab, ni malnerabwe ab, kekerandarur. Sunci sun malyi tenendarur dinyi taklobmun ci, Er Imtamnyi biryi teleb tenesurur dinyi akwe teneiboka kunubdarur.” Ebmou cok, erci sunsi, “Sunci ato kubmunyi ura, niryi sunsi me dongona teleb. Ati, sunci, ‘Er Imtamnyi biryi nun malyi kun dinyi kilibmasir,’ tenen bikwandum ati, niryi sunsi me dongobkwansin.” Ato eboka Yohanes biryi sun er dam bulubmai nang asi Er Imtamnyi Uram lak etereramwe.

⁵Ato ebde etereramwe talak aryi, ninyi ilinto aryi er Yohanes dam asi yangaramnyi. A yangaramnyi atei nang ara, Yehuda mutuk kuramnyi nang ab, sien atei Yerusalem kuramnyi nang ab yangaramnyi. Yandoka kekeramiryi dib tenebde ura, sun malyi kun dinyi ati ato eboka lak eramnyi. “Diba, nunci malyi kuramoubwe,” eboka lak ebne nang asi Yohanes biryi sunsi me si Yordan aryi me dongoramwe.

⁶Ba, Yohanes er ongororamwe aling ara unta otong aryi wiamwe aling asi ongoramwe. Ba, sabya ara unta kala aryi kikniamwe sabya asi deiriramwe. Ba, er yibde kuramwe yina ara kwising ab kwiryi me ab asi yibde kuramwe.

⁷Ura, Yohanes biryi Er Imtamnyi Uram ebmuruboka lak etereramuryi, erci sun kekeramnyi nang asi ato eramwe. “Nira mikibnyi kum kunun. Erda, ni dongtam yankwandanyi bira iya mikibnyi kurur. Nira Er arungnanyi kunun cok, niryi Ersi dirnilina ati, kikib kumnyi kunun. Ni dongtam yankwandanyi bira Iya Erebdobnyi kurur ati, nira Er yan karuk tabwe dungkaringna babyi lona babyi nira kikib kumnyi kunun.

⁸Niryi me dem aryi me dongoransin bok, Erda ni dongtam yankwandanyi biryi Er Imtamnyi Kanya Roh Kudus aryi sun kanya dam asi dongobkwansir.” Ato eboka etereramwe.

⁹Ura, uki tentok tum aryi Yohanes biryi Teleb Uram tuba eterenmou bok, Er Yesus Galilea mutuk kuramwe atei si Nazaret aryi kuboka Er Yesus Yohanes dam yanmou. Yanmou ura, Yohanes biryi Er Yesus bisi me Yordan aryi me dongobmou.

¹⁰Sirya me dongobwe ba, me umbura aryi anaboka tingyibau asi Er Imtamnyi biryi im bublan kukeibmou ba, Er Imtamnyi Kanya Roh Kudus ara maka emnanyi ato dandoka Er deici tam lang-lang yuryanganmou asi Erci eibmou.

¹¹Yuryanganmou ura, Er Imtamnyi biryi Yesus bisi, “Kanda Ni Mi Ni boukwe weik kukununyi kurum. Kanda Ni kanya teleb kurdeirinurumnyi kurum,” ebmou.

¹²Ebmou ura, Er Imtamnyi Kanya Roh Kudus aryi Er Yesus bisi, “Kanda ninyi kun kum ai bindoka kubdum,” ebmou. Ebmou ura, Erci Er Yesus bisi iniboka ninyi kun kum ai asi bobinmou.

¹³Inibobinmou ura, Er Yesus uki empat puluh baryi ninyi kum kun ai kuramwe. Kuramuryok, Erda bai kam kankan aryi kuramwe. Kuramwe bok, isa sienyi Iblis biryi, “Er Yesus biryi malyi kubte,” tenen yandoka ukurderamwe. Ukurderamwe ura, Er Yesus biryi malyi kun dinyi tentok ababyi ton kum kubmou ura, Iblis bira bindobmou. Bindobmou ura, sun Er Imtamnyi Uram eryuryangan nang, “Nun Nai,” tenen Er Yesus bisi miliryanmai.

¹⁴Kunmai ani, ninyi aryi Yohanes ninyi me dongoramunyi bisi tabwe deboka malyi kun nang dongon ai umbura dongobmai. Dongobmai ura, Er Yesus anaboka Galilea mutuk asi tamurbinmou ci, Erci sun Galilea nang asi Teleb Uram ara Er Imtamnyi Uram lak eterebkalibmou.

¹⁵Ara, Erci sunsi ato eboka eterebmou, “Er Imtamnyi biryi minob ebdeibmou to teleb uki tum sirya berekmar. Er Imtamnyi bira Iya Erebdobnyi kurur ci, ninyi lebdeiboka kalikwansir tum dam kubmar. Ati, sunci sun malyi tenendarur dinyi takmun ci, Er Imtamnyi kanya teleb kurdeirin dinyi akwe teneiboka kunubdarur. Kunubmun ci, sunci Ni eterebsin Teleb Uram diboka talebdobdarur.” Ato eboka Er Yesus biryi Er Imtamnyi Uram ebmuruboka lak etereramwe.

¹⁶Ura, Er Yesus Galilea mutuk kuramuryi etereramwe ani, weik mekwan Galilea katum dam yurbinmou. Yurbinmou ura, Erci diramwe uca, mekinaiya don nang ninyi bitinyi asi asing eibmou. A nang susuk ara dunyi si ara Simon ba, weitnyi si ara Andreas kunmarei. Sunci, “Mekinaiya donkwanim,” teneboka weik kwisib mekwan umbura dongonmarei.

¹⁷Dongonmarei bok, Er Yesus biryi sunsi ato ebmou, “Ni kwityabwe, Niryi sunsi yuk wa karebkwinsin ati, sunda Nisi milibnururum. Sunci mekinaiya dona taklobdurumnyi ura, Teleb Uram lak etereboka ninyi ilinto Ni dam boyankwanururum,” ebmou.

¹⁸Ebmou ba, a nang susuk aryi sun mekinaiya don kwisib asi deibloboka Er Yesus bisi milibmarei.

¹⁹Ura, mitikanun bai ani, diramwe uca, ninyi bitinyi Yakobus ab er weit Yohanes ab co ngun-ngun deici bukmarei asi asing eibmai. A nang susuk ara er Zebedeus mabwe kurandei. Sunda mekinaiya don co ngun-ngun deici bukmai ci, mekinaiya don kwisib kwilikmou asi denenmarei.

²⁰Ura, Er Yesus biryi sunsi nabmou. Nabmou ba, a nang susuk sunbabyi, “Er Yesus bisi milibkwanim,” tenen sun nai Zebedeus ab sun co ngun-ngun bukoka mekinaiya dormiliramnyi nang ab ara taklobmarei ci, Er Yesus bisi milibmarei.

²¹Ura, mekwan katum dam aryi anaboka welebanmai ani, Er Yesus ab Er miliramnyi nang ab tonkwa atei si Kapernaum bindoka mabmai. Ani, sun Yahudi yala nang taruk louboka buramnyi tum si Sabat tum sirya berekmou ura, Er Yesus bira Musa Uram eteren ai asi binmou ci, Erci sun akai umbura wekmai nang asi Teleb Uram eterebmou.

²²Eterenmou ba, sun Er Uram kekebmai nang aryi, “Naie,” tenebmai. Er Yesus bira diboka bingnamunyi kuramwe aryi, iya bikdob dinyi eterebmou ati, sunci, “Naie, anyi bira diboka Er Imtamnyi Uram ebmuruboka eterebsir,” tenebmai. Er Yesus biryi mikib uram eboka eterebmou to, sun Musa kerek sengna etereramnyi nang aryi kum etereramnyi. A deyok aryi, sun akai umbura wekmai nang nirya aryi, “Naie,” tenebmai.

²³Er Yesus tuba eterenmou talak ara ninyi tentok ara isa kanya wekamunyi akai umbura wekmou ani, uram weik ebkalibmou.

²⁴Ura, er wekamwe isa kanya aryi Er Yesus bisi ato ebmou, “Yesus Nazaret ateinyi se! Kanci nunsi una kubkwinsirim do? Obkabokwamasirim ati, yanmaryim do? Nunda Kansi bikmakinim. Kanda Iya Telebnyi bira Er Imtamnyi biryi minob wiankounyi kurum.”

²⁵Isa aryi ato ebmou bok, Er Yesus biryi isa asi ato ebmou, “Ei, kan uram ena mem, kilikokdum! Kanci anyi bisi tabwe loboka anabdobmin ci, bindobdum.” Ato eboka Erci isa asi yakdonokmou.

²⁶Yakdonokmou ba, er isa kanya wekamunyi bira wiring-waring eboka dokoka maibmou ura, isa ara nguruk-nguruk eboka aburyi, anaboka bindobmou.

²⁷Er Yesus biryi ato kuboka isa asi yakdonokmou ba, sun ninyi nirya aryi, “Naie,” teneboka sun mamun asi ato ebdanmai, “A dinyi ara unato dinyi kubmar do? Anyi biryi eterebsir uram ara nun minob kum kekenub uram asi eterebmasir. Ati, Anyi bira diboka bingnanyi kurur aryi, bikdob dinyi akwe eterebsir. Anyi bira Er Imtamnyi Uram ebmuruboka eterebsir. Tonda, anyi biryi isa asi, ‘Anabkaboka bindobdarur,’ eboka yakdonokci ura, isa ara baroraming,” ebmai.

²⁸Ura, sunci, “Er Yesus biryi isa yakdonokmar,” eboka ebdanin-ebdanin baramnyi ani, Er Yesus biryi ilil tenen dinyi kiknibmou ara sun Galilea mutuk nang nirya kekebmai.

²⁹Ura, Musa Uram eteren ai aryi anabmai ura, Er Yesus ab Er miliramnyi nang ab tonkwa er Simon ab Andreas ab ai binmai. Ara, Yakobus ab Yohanes ab tonkwa binmai cok, sunda Simon ab Andreas sun ai wekmai.

³⁰Wengbinmai ura, Simon er yamalner ara tin uk aruma taleramwe ba, mabmou asi eibmai. Ura, sunci Er Yesus bisi, “Simon er yamalner uk aruma doronmar,” eboka lak ebmai.

³¹Lak ebmai ba, Er Yesus biryi Er mabmou ai tingbindoka Simon er yamalner taruk asi taleboka tikeibmou. Ura, er taleramwe uk aruma kum dandobmou. Uk aruma kum danmou ura, erci sunsi du dongobmou.

³²Du dongobmou ba, kiting sirya wekmou ura, sun Yahudi yala nang wa in kum uki tum sirya bisibmou ba, ninyi ilinto Er Yesus dam buluryanmai. Buluryanmai ba, sunci yun taleamwe nang ilinto ab, isa kanya wekamwe nang ilinto ab Er Yesus dam boyanganmai.

³³Boyanmai ura, Kapernaum nang nirya buluboka Er Yesus kunmou ai bublan dam aryi tikoka asing dinmai.

³⁴Dinmai bok, Er Yesus biryi ninyi ilinto kwetebmou. Ara, sun yun amuma-amuma yiramwe nang asi kwetebmou ab, Erci isa ilinto yakdonokoka isa wekamwe nang ab mitik kum kwetebmou ara isa ilinto yakdonokmou. Yakdonokmou ci, Erci sun isa asi ato ebmou. “Sun uram ena mem, kilikokdarur,” ebmou ura, kilikmai. Isa aryi, “Er Yesus bira Er Imtamnyi biryi wiamunyi kurur,” tenen bikmai ati, Er Yesus biryi sunsi, “Kilikdarur, eboka lak ebnumunyei,” ebmou.

³⁵Mabmai ani, belekuna kobdob ara Er Yesus bukokmou ci, atei aryi anaboka ninyi kun kum ai asi binmou. Binmou ura, Er yuk kunmou ci, Erci Er Imtamnyi bisi molonmou.

³⁶Molonmou bok, Simon ab er kwityabwe ab “Nun Du dantam binmar do?” teneboka Er Yesus bisi ingkiringbinmai.

³⁷Ingkiringde banmai ani, Er Yesus bisi eibmai ura, sunci Ersi ato ebmai. “Nai Du, ninyi nirya aryi, ‘Yesus ab ebdatibyi,’ tenen Kansi ingkiringmaking ati yarum,” ebmai.

³⁸Ato ebmai bok, Erci sunsi, “Ni ukuryok kum yankun. Nunda eikatei-okatei asi binkub ati, anabkwayeb. Niryi a mutuk eikatei-okatei nang ababyi Teleb Uram lak eterebkwaman ati yanman.” ebmou.

³⁹Ebmou ura, sunda tonkwa anabdobmai ura, Galilea mutuk nirya yibarkiringnamnyi. Yibarkiringnamiryi, Erci er Musa Uram eteren ai wengbindoka sun eikatei nang babyi okatei nang babyi Teleb Uram lak etereramwe. Etereramuryok, Erci isa asi yakdonokoka sun isa wekamwe nang asi kweteramwe.

⁴⁰Uki tentok tum aryi ninyi tentok ara susa taleamunyi Er Yesus dam yandobmou ba, ebdanmarei. Anyi bira mambul kanya boramwe ati, erci er kutam ikdongoboka Er Yesus bisi ato eboka molobmou, “Nai, Kanci nisi kwetebnurum. Kanda mikibnyi kurum ati, Kanci nisi, ‘Susa asi akabsakdur,’ ebniminyi ba, ni susa akabsakdobniriryi, kum dandobkwanir ati, dib tenebman” eboka molobdobmou.

⁴¹Ba, Er Yesus biryi bico tenebmou ci, Er taruk lakoka er nong susa kuramwe bol libdenmou. Ura, Erci er susa taleramunyi bisi, “Ni mi teleb, Niryi kansi kwetebkwinkin,” ebmou.

⁴²Ebmou ba, er susa akabsaksekdobmou ba, kum danmou uca, er bol ara yum bol deibmou.

⁴³Er bol yum bol deibmou ura, Er Yesus biryi anyi bisi ato ebmou. “Niryi kansi kwetebmakin to ara yuk nang asi talyi lak erdongona mem,” ebmou. Ebmou cok, tubto Erci er kwetebmunyi bisi ato eboka ebdeibmou, “Kanci Er Imtamnyi kan ninyi kan noutam kuboka antanirdeirinanyi bisi biminyi ura, erci kan nong asi diblilibdekurur. Diblilibdekici ura, erci kansi ato ebkwande, ‘Kan susa tuba kum danmar ci, kan bol yumnyi sirya kibmakir. Ati, ukuryok kan yuk nang ab tonkwa ur kubdobdarur,’ eboka antanirdeirinanyi biryi kansi ebkici ura, kanci Er Imtamnyi bisi kan susa talebkou ani, sirya akabdeibmakir ati kan dama deirirbirum. Ara, er Musa biryi sun kwetebmangnyi nang ati, arukansou to, kanci Er Imtamnyi bisi teneiboka dama deirirbirum,” ebmou.

⁴⁴

⁴⁵Er Yesus biryi ato ebmou bok, er kwetebmounyi biryi Er Yesus biryi ebdeibmou to kum kunubmou. Ura, erci bindoka, “Er Yesus biryi kwetebmanir,” eboka nirya lak ebmou. Uca, ninyi ilinto aryi Er Yesus dam bulubmai ura, Ersi seknebdanmai. Buluboka seknebdanmai ati, Er Yesus laktoto atei keta yibinman kum kubmou. Erda, atei aryi anaboka ninyi kun kum ai asi bina kuramwe. Ninyi kum ai kuramwe bok, ninyi ilinto aryi, “Kwetebsute,” tenen sun atei yuk-yuk aryi anaboka Er Yesus dam yangaramnyi.