Read Futuna-Aniwa Markus 10 Bible Online

Markus 10 - Futuna-Aniwa bible

Markus 10

¹Ura, Er Yesus ab Er miliramnyi nang ab ara Kapernaum atei aryi anaboka Yudea mutuk binmai ci, me Yordan koubkaboka otam mutuk binmai. Banmai ura, bisik noutam mabmai ani, Yudea mutuk binmai ura, ninyi ilinto Er dam tubto buluryanmai. Ba, Er Yesus biryi sunsi, Er etereramwe to tubto eterebmou.

²Eterebmou bok, Farisi nang ara er Musa kerek sengna asi diblilibde kunuramnyi ton Er Yesus dam yanmai. Ara, “‘Er Yesus biryi malyi ton kubte,’ tenen ukubdenkub,” teneboka Ersi ato eboka asibdenmai. “Nai, nunci asirdena uram ton asibdenkub. Ara, er akenyi biryi er doanci ner asi tanglona teleb do mem do? A deyok asi Kanci lak ebsurum,” ebmai.

³Ato ebmai bok, Er Yesus biryi sunsi tamuboka asibdenmou, “Er Musa biryi a deyok ati una ebdeibsou do? eboka sunci Nisi lak ebnindarur!” ebmou.

⁴Ebmou ba, sun Farisi nang aryi Ersi, “Er Musa biryi ato eboka kerek sekmou, ‘Er akenyi biryi, “Taklobkwinkin,” eboka kerek sengna kerek sekdiryok, erci er ner asi tanglona teleb,’ ebdeiamwe,” ebmai. (Ulangan 24:1,3)

⁵Ba, Er Yesus biryi sunsi, “Er Musa biryi ato eboka kerek sekmou bok, erci, ‘Sun doamingnyi nerabwe asi minola taklobingnyei,’ teneboka, ‘Kerek sengna kerek sekmun cok, ur taklobdarur,’ eboka ebdeibmou. Ara, sun aibweyabwe aryi, ‘Er Imtamnyi Uram asi kekena nun li,’ teneboka sun doamnyi nerabwe asi talyi tangloramnyi. A deyok aryi, er Musa biryi, ‘Bisik sekwan,’ teneboka ato eboka kerek sekmou.

⁶Sunda sun doamunyi ner asi talyi tanglorandum bok, Er Imtamnyi biryi minob tum aryi, ‘Ninyi kiknibkwan,’ tenebmou ci, Erci teneiboka sal ab ner ab tonkwa kiknibsou. Ara, ‘Sun akenyabwe ab sun doramingnyi nerabwe ab tonkwa kubkwaming,’ tenen Erci, ‘Sal ab ner ab tonkwa kiknibsou.’ (Kejadian 1:27; 5:2) Ato eboka Er Imtamnyi Uram ermururamunyi biryi kerek sekmasou.

⁷Kerek sekmou cok, erci ato eboka eteresurur. ‘Sal ab ner ab tonkwa kiknibsou deyok ati, sal ara sun nai ab sun kwin ab asi takloboka sun ner asi doboka er ab tonkwa kubkwanung.

⁸Ara, sun nang bitinyi ara tub tentok ato kiboka bokdanman kum kubkwanung.’ (Kejadian 2:24) Ati, sun nang bitinyi yuk-yuk tuba kum kuranding, erda nong tentok ato kuranding.

⁹Ati, Er Imtamnyi biryi, ‘Tonkwa kubdurung,’ ebmou ati, sun ninyi aryi, ‘ “Iya tanglordana teleb,” ena mem.’” Ato eboka Er Yesus biryi sun Farisi nang asi uram ebkarebmou.

¹⁰Ebkarebmou ura, Er Yesus bindoka ai ton wekmou. Wekmou ura, Er miliramnyi nang aryi miliboka a eterebmou deyok ati, Ersi asibdenmai.

¹¹Asibdenmai ba, Er Yesus biryi sunsi, “Unanyi-unanyi aryi er ner asi, ‘Iya takwinkin,’ eboka yuk ner asi dobci ura, anyi bira ato kuboka er ner urasin dam manmalibkwande.

¹²Ba, er ner aryi er akenyi bisi takloboka yuknyi biryi dobci ura, a ner ara er akenyi urasin dam manmalibkwande.” Ato eboka Er Yesus biryi Er miliramnyi nang asi tabakoka eterebmou.

¹³Uki tentok tum aryi ninyi ton nang Er Yesus dam yandoka, sunci, “Nun Nai biryi nun mitik mabwe bol asi liboka kisal dakte,” teneboka sun mitik mabwe asi Er Yesus dam boyanganmai. Ba, Er Yesus miliramnyi nang aryi sun mabwe dam nang asi kerebmai.

¹⁴Ato kerebmai asi, Er Yesus biryi asing eibmou ci, Erci, “Se,” teneboka Er miliramnyi nang asi erekdobmou. Ara, Erci sunsi, “Sunci mitik mabwe asi bisik sengminingna mem Ni dam ur yangana teleb. A mitik mabwe ara luknubdob kanya boboka Ni dam yanganmang. Ati, sun ato kanya boboka Ni dam yangnyi nang asi Er Imtamnyi Iya Erebdobnyi amwetam kun nang kuraming ati ebman.

¹⁵Ati, Niryi sunsi diboka ebkwinsin uram asi kekendarur. Unanyi-unaner aryi luknubdob kanya kum boboka, ‘Er Imtamnyi Iya Erebdobnyi amwetamnyi kibdobtinyi,’ kum tenebci ura, Er Imtamnyi Iya Erebdobnyi amwetamnyi iya kum kibdobte,” ebmou.

¹⁶Ura, Er Yesus biryi a mitik mabwe asi iribdobmou ci, Er taruk sun nong deici tam deibdongoboka kisal dakmou.

¹⁷Ura, Er Yesus ab Er miliramnyi nang ab aryi anabkwamai bok, ninyi tentoknyi bira bona bonanyi Er dam yanmou. Yanmou ura, Er Yesus bisi ato eboka asibmou, “Nun Nai bira Erebdobnyi,” teneboka er kutam ikibmou. Ikibmou cok, erci Yesus bisi ato ebmou. “Nai eteresurumnyi, Kanda telebnyi kurum ati, niryi uram ton asibdenkwinkin. Ara, una kubtinyi uca, nira Er Imtamnyi ab tonkwa iya kubkwanim do?”

¹⁸Asibdenmou ba, Er Yesus biryi ersi, “Kanci Nisi unato ati, ‘Telebnyi,’ ebmanirim do? Ninyi nirya ara malyi kun nang akwe kurandum bok, Er Imtamnyi tentok telebnyi kurur.

¹⁹Kanda Er Imtamnyi ab tonkwa iya kubkwandurum ati, Er ebdeibsou uram asi kanci kunubdum. Ara, kanci Er Imtamnyi biryi ebdeibsou uram asi bingdumca. Erci ebdeibsou uram ara ato, ‘Ninyi ona mem, ukula yordana mem, yuk nang dinyi asi ukula dona mem, tola ati eboka tatab-tatab ena mem, yuk nang dinyi, “Dobdobtinyi,” tenen, tola ati si ablangna mem, sun nai sun kwin ab uram kekeboka teleb akwe kubdarur.’ (Keluaran 20:12-16; Ulangan 5:16-20) Ato eboka Er Imtamnyi biryi ebdeibsou. Ati, kanci a dinyi nirya kunubminyi uca, Er Imtamnyi biryi iya teleb dinyi karebkici uca, kan ab Er ab tonkwa iya kubkwandurum,” ebmou.

²⁰Ba, a bona bonanyi biryi Ersi, “Nai, a ebmarim dinyi ni mitik talak uca dibniliboka kunubde yanganun ani, uku talak ababyi kununun,” ebmou.

²¹Ebmou ba, Er Yesus biryi ersi dinmou uca, ersi boukwe weik kubmou. Boukwe weik kubmou cok, Erci anyi bisi, “Kanda Er Imtamnyi biryi ebdeibsou uram diblilibde kunurum bok, deyok tentok asi kum kunurum. Ati, kanci kan talerandim bona nirya ara yuk nang asi dekoka abmin ci, co bok dobminyi ura, a co bok nirya bokoka sun utotoa nirya bona bon kum nang asi ur dem karebdum. Ur karebminyi ura, Er Imtamnyi biryi unuboka iya teleb dinyi karebkwankir ba, kanda Er ab tonkwa iya kubkwandurum. Ati, yandoka Nisi milibnurum,” ebmou.

²²Er Yesus biryi ato ebmou ba, a bona bonanyi er kanya mambul weik kubmou ura, anaboka bindobmou. Ara, er boramwe bon dinyi ilinto kuramwe ati, erci er kanya aryi, “Ni dinyi asi bokoka ur kum karebkwan se,” teneboka mambul kanya boboka bindobmou.

²³Sirya bindobmou ura, Er Yesus biryi Er miliramnyi nang asi ato eboka eterebmou. “Sun bona bon nang ara sun dinyi asi, ‘Nuna takeibyei,’ teneboka nunukdeiboka abingiryi ati, sunda Er Imtamnyi Iya Erebdobnyi amwetam kun nang kimdongona ara sunsi ikin weik kubkwande,” ebmou.

²⁴Er Yesus biryi ato ebmou uca, Er miliramnyi nang sun kanya dam aryi ilil weik kubmou. Ura, Er Yesus biryi sunsi tubto ato ebmou, “Ni kwityabwe ara Ni boukwe kusunun nang, Er Imtamnyi bisi dib tenena ab Er Imtamnyi amwetam nang kimdongona ab ara ikin weik dinyi kurur.

²⁵Weik bisam si unta aryi yumci um bisik wengbana ara ikin weik kubmote bok, sun bona bon nang aryi Er Imtamnyi amwetam nang kimdongona ara diboka iya ikin dinyi kurur,” ebmou.

²⁶Er Yesus biryi sunsi ato tubto ebmou ba, Er miliramnyi nang sun kanya ilil weik kubtabakmou. Uca, sunci, “Naie, ato kubci ura, ninyi nirya ara lebmanto kum kubtibyi,” ebdanmai.

²⁷Ebdanmai ba, Er Yesus biryi sunsi dinmou ci, ato ebmou, “Sun tukwetam nang aryi ukubman kum tenebmarum bok, Er Imtamnyi bira Iya Mikibnyi ukubman kum dinyi ton kum kurur,” ebmou.

²⁸Er Yesus biryi Er miliramnyi nang asi ato eboka eterebmou ba, er Petrus biryi Ersi ato ebmou. “Nai, kekebdum. Nunda nun taleramoubwe dinyi utotoa nirya asi taklobmoubwe ura, Kansi milirankib,” ebmou.

²⁹Ebmou ba, Er Yesus biryi Er miliramnyi nang asi ato ebmou. “Unanyi-unaner aryi Niti, ‘Nun Nai bisi dibnilibtiniryi, Teleb Uram lak eterebmilibtinyi,’ tenebci ura, er dinyi taklobci ura, anyi-aner asi Er Imtamnyi biryi unuboka karebkwande. Unuboka karebdiryok, Erci ukuryok dinyi mitik kum tabakde karesurur. Tonda, unanyi-unaner aryi Nisi boukwe kuboka ati, er ai asi taklobmaci ura, anyi-aner asi Er Imtamnyi biryi unuboka karebdiryok, ai tabakde karesurur. Tonda, unanyi-unaner aryi Nisi boukwe kuboka ati, er duweityabwe ab er malnerabwe ab asi taklobmaci ura, Er Imtamnyi biryi unuboka karebdiryok, duweityabwe ab malnerabwe ab tabakoka karesurur. Tonda, sun nai sun kwin ab asi taklobmangnyi nang ab, sun mabwe nermabwe asi taklobmangnyi nang ab, tonda, sun wa dam asi taklobmangnyi nang ababyi neiktoto Er Imtamnyi biryi unuboka karebdiryok tabakoka karesurur. Ara, ukuryok kam tuba kuramib ba, Er Imtamnyi biryi sun Nisi diboka milibmaningnyi nang asi sun taklobmarum ci, dinyi unuboka karebdiryok liki seratus baryi (...)

³⁰

³¹A tum berekci ura, Er Imtamnyi biryi erebdob kanya bon nang ilinto asi dongtam deiboka luknubdeibkwande. Ba, luknubdob nang ilinto asi Erci Er taramtam asi deiboka erebdeibkwande.” Ato eboka Er Yesus biryi Er miliramnyi nang asi eterebmou.

³²Ura, Er Yesus ab Er miliramnyi nang ab ara “Yerusalem atei binkwayeb,” teneboka banmai ura, Er Yesus bira menekoka Er yuk banmou. Er Yesus Er yuk banmou ba, sun Er ab tonkwa banmai nang aryi, “Naie, unato ati Er yuk banmar do?” teneboka sun kanya ilil kibmou. Ilil kibmou bok, Er Yesus biryi Er miliramnyi nang amolbaryi nang asi nabmou ura, Erci sunsi, “Ato-ato kubkwanir,” eboka lak eterebmou.

³³Ara, ato ebmou, “Sunci Nisi diboka kekendarur. Nunda Yerusalem atei asi sirya welebinmabyi ura, ninyi aryi Ni Ninyi Dasinyi bisi talebkwaning. Ura, sun talebkwaning nang aryi Nisi bobindoka sun Er Imtamnyi kan ninyi kan noutam kuboka antanirdeirin deyok nang ab sun Musa kerek sengna etereraming nang ab asi bobinkwaning. Sirya bobiningnyi ura, a sien nang aryi Niti, ‘Anyi bira malinyi ati, Ersi obkwanung,’ teneboka sunci Nisi Er Imtamnyi Uram walwal nang dam asi bobinkwaning.

³⁴Bobiningnyi ura, sun Er Imtamnyi Uram walwal nang aryi Nisi ina ngilikoka si maka tulubdeiboka tabwe aryi lituk-lituk ebningnyi ura, obkwaning. Ato kuboka obningnyi ba, dibmanyi ani, uki winiryi tum berekci ura, kam bukokwan.” Ato eboka Er Yesus biryi Er miliramnyi nang asi “Ato-ato kubkwanir,” eboka eterebmou.

³⁵Ura, er Zebedeus mabwe si Yakobus ab Yohanes ab Er Yesus dam yandoka sunci Ersi, “Nai, Kanci nun molobkinimnyi dinyi asi karebsurum.”

³⁶Molobmarei ba, Er Yesus biryi sunsi ato ebmou, “Unato dinyi asi kubsute tenen molobkwanururum do?” eboka molobmarei.

³⁷Er Yesus biryi ato eboka asibdenmou ba, sunci Ersi, “Nai, Kan kam bukokmin ci, ninyi nirya aryi Kan si weik ebkwanking tum berekci ura, nun bitinyi Kan ab tonkwa bukoka sien nang kubtibyi. Ba, Kanci nunsi, ‘Tonyi siriktam, ba tonyi kwanimtam Ni ab tonkwa bukwayeb,’ eboka Kanci nunsi erebdeibsurum.” Ato eboka er Zebedeus mabwe aryi Yesus bisi molobmarei.

³⁸Bok, Er Yesus biryi sunsi ato ebmou. “Sunda kum bikmarurum aryi ato eboka molobmanururum. Er Imtamnyi biryi Nisi kum erebdeibkwanir bok, ninyi aryi Nisi duboka iya mambul kubdeibkwaning. Ati, Nira iya mambul dinyi bobkwan to, sunbabyi neiktoto iya mambul dinyi bobtururum do? Ato kum kubtururum!” ebmou.

³⁹Er Yesus biryi ato ebmou bok, sunci Ersi ato ebmarei, “Tola kuma, Kan mambul dinyi bobkwandim to, nunbabyi bobtinimnyi,” ebmarei. Ebmarei ba, Er Yesus biryi sunsi, “Dib ebmarurum. Sun ninyi aryi sunbabyi duboka mambul weik kubdeibkwansing ati ebman.

⁴⁰Bok, Niryi, ‘Tonyi siriktam kuboka buryarur ba, tonyi kwanimtam kuboka buryarur ba, Ni ab tonkwa bukwayeb,’ ena ara Niryi ebman kum. Unanyi-unanyi aryi Ni ab tonkwa bukwayeb nang ara Er Imtamnyi biryok wiboka erebdeibkwande.” Ato eboka Er Yesus biryi er Zebedeus mabwe asi eterebmou.

⁴¹Ura, sun kwityabwe takubaryi nang aryi a molobmarei deyok ati kekebmai ci, sun yu boboka Yakobus ab Yohanes ati, “Se,” tenebmai.

⁴²Ba, Er Yesus biryi Er miliramnyi nang asi naboka Erci sunsi, “Sun Yahudi yala nang kuma asi kalingnaming sien nang ab erebdob nang ab aryi, ‘Nun kalingna nang,’ teneraming bok, a nang aryi diboka kum kalingnaming. Erda, sunci ikin ilinto dinyi asi arukoka sun amwetam bun nang asi yan yaniboka kimdaming.

⁴³Ati, sunda a nang aryi ukuraming to asi dilina mem. Erda, unanyi-unanyi aryi, ‘Nira Erebdobnyi kibtinyi,’ tenebci ura, anyi bira luknubdandoka sun yuk nang asi dirnilinanyi kubdur.

⁴⁴Ba, unanyi-unanyi aryi, ‘Nira sienyi kibtinyi,’ tenebci ura, anyi bira luknubdandoka sun yuk nang nirya asi milinanyi kubkwandur.

⁴⁵Ati, Niryi ukuran to sunbabyi ukubdarur. Ara, Ni Ninyi Dasinyi kunun ci, Niryi, ‘Sun ninyi nirya aryi Nisi dibnilibniting,’ tenena kum kunun. Erda, Niryi, ‘Dibnilibkwan,’ tenen imtam aryi kuboka yuryanmase. Ara, Niryi, ‘Ninyi ilinto iya kam kubkwaming ati, Niryi leboka sunti dibkwan,’ tenen yuryanmase.” Ato eboka Er Yesus biryi Er miliramnyi nang asi eterebmou.

⁴⁶Sirya eterebmou ura, Er Yesus ab Er miliramnyi nang ara Yerikho atei yanmai. Ani, tubto anabdobmai ci, banmai ura, ninyi ilinto milibmai ba, sun ab tonkwa banmai. Asi, bisik noutam aryi ninyi tentok asing kuamunyi bira bisik iririkna dam asi bukmou ci, erci sun bisirbanmai nang asi, “Yina karebnurum, co bok karebnurum,” eboka molobmou. Anyi asing kuamunyi bira Timeus mi si Bartimeus kuramwe.

⁴⁷Bisik iririkna dam bukoka molobmou asi, ninyi aryi, “Er Yesus Nazaret ateinyi yanmasir,” ebmai. Ba, Bartimeus biryi a uram kekebmou ura, erci uram weikanun doboka ato ebmou. “Yesus, Kanda weik sienyi si Daud er yalanyi o. Kanci nisi boukwe kiboka ni asing teleb kubdeibnurum se,” eboka uram dobmou.

⁴⁸Ato eboka uram weik donmou bok, ninyi ilinto aryi ersi, “Se, kilikdum!” eboka erekdobmai. Erekdobmai bok, erci uram weikanun iboka dobtabakmou ci, “Yesus, Kanda Daud yalanyi, Kanci ni boukwe kibdobnurum se,” ebmou.

⁴⁹Asi, Yesus biryi kekebmou ura, tiklobmou ci, “Anyi bisi nabdarur,” ebmou. Ba, nabmai ba, sunci ersi, “Tikokdum, Er Yesus biryi kansi nabmakir ati, mambul kanya bon kum,” ebmai.

⁵⁰Uca, er Bartimeus biryi er alib ongon aling kwiribloboka ola tikokmou ci, Er Yesus dam anmalakoka binmou.

⁵¹Binmou ura, Er Yesus biryi ersi ato ebmou, “Niryi kansi una kubkwankin do? Kanci Nisi, ‘Ato-ato kubnurum,’ eboka ur molobnurum.” Ebmou ura, er asing kuamunyi biryi, “Nai, ni asing teleb kubdeibnimin ba, ni asing eibkatabkwan ati, molobmakin,” ebmou.

⁵²Bartimeus biryi ato ebmou ba, Er Yesus biryi ersi ato ebmou, “Ni kwit, kanci Nisi dib tenebmanirim ati, Niryi kan asing sirya kwetebmakin. Ati, kan ai ur birum.” Ebmou ba, Bartimeus lukdandoka asing eibkatabmou. Ura, Er Yesus biryi er asing teleb kubdeibmou ati, er Bartimeus biryi Er Yesus bisi milibmou.