Read Futuna-Aniwa Markus 11 Bible Online

Markus 11 - Futuna-Aniwa bible

Markus 11

¹Er Yesus ab Er miliramnyi nang ab banmai ani, Yerusalem atei mutuk dam yanmai. Ara, a mutuk ara, “Zaitun kon,” dam asi atei si Betfage ab Betania ab doramnyi dam yanmai. Yanmai ura, Er Yesus biryi Er miliramnyi nang bitinyi asi naboka uram ebkarebmou.

²Ara, Erci sunsi ato eboka ebkarebmou, “Sunda minob menekoka eikatei asi birurum. Atei birumunyi ura, bisam keledai kabunyi ukuryok nebmar asi birikmangnyi asi asing eibkwandurum. A keledai deici tam ara ninyi ton burdena kum kubmai. Ati, a keledai kabunyi asi asing eibdurumnyi ura, tabwe lobdongoboka boyarurum.

³Asi, ninyi aryi sunsi, ‘Sunda keledai ara unato ati lobdongoboka bobanmarurum do?’ eboka asibdesingnyi ura, sunci asibmasingnyi nang asi ato ebkwandurum, ‘Nun Du biryi, “Keledai boyarurum,” ebmasir ati, keledai tiya ati bobinmaminyi asi aminda tubto tamuboka boyankwanim ca,’ ebkwandururum,” ebmou.

⁴Er Yesus biryi Er milirandei nang bitinyi asi ato eboka bokdeibmou ura, sunci binmarei ani, keledai mi asi ai bublan dam bisik lingkwa dam birikdeibmai asi asing eibmarei ura, lobdongobmarei.

⁵Lobdongoboka bobanmarei bok, ninyi ton dam a tikabyi nang aryi sunsi ato eboka asibdenmai, “Sunda keledai asi unato ati lobdongoboka bobanmarurum do?” eboka asibmai.

⁶Ato eboka asibdenmai uca, sunci Er Yesus biryi, “Ato-ato ebdurum,” ebmou to kuboka ebmarei. Ba, sunci, “Ur bobirurum,” ebmai.

⁷Ebmai ura, sunci a keledai asi Er Yesus dam boyanmarei. Boyanmarei ura, sunci sun alib ongon aling kwiriboka keledai deici asi yangabdeibmai. Ura, Er Yesus weleboka keledai deici asi burbinmou.

⁸Burbinmou ba, ninyi ilinto aryi sun alib ongon aling kwiriboka Er binkwamou bisik ai deibde banmai. Ba, yuk nang ara wa in dam aryi kuboka co bok ilinto kubmou te kusakoka Er Yesus binkwamwe bisik ai deibde banmai. Ara, “Nun Nai bira Erebdobnyi,” teneboka ato kubde banmai.

⁹Ato kubde banmai ura, ninyi nirya ara sun menekoka banmai nang ab sun aminda yanganmai nang ab antaniboka uram weik doboka ato ebmai, “Hosana! Er Imtamnyi bira nun arungdeirisurutnyi biryi bokdonokmounyi bira nun dam yanganmar ati, nunci Er si weik eboka kibdobkwayeb.

¹⁰Anyi bira nun aibwe Daud bitonyi weik sienyi kurur ci, ninyi ilinto lebsiriryi kalikwansir ati, Er si weik eboka kibdobdarur. Hosana! Ninyi nirya aryi Er Imtamnyi si weik ebkwayeb.” (Mazmur 118:25-26)

¹¹Ninyi nirya aryi uram weik doboka Er Yesus biti ato ebmai ba, Er Yesus Yerusalem atei binmou. Binmou ura, Erci Bait Allah ai ara Er Imtamnyi biti ninyi dama deirin ai asi wengbindoka akai dam kuramwe dinyi utotoa nirya diblilibde yibanmou. Bok, inibmou ba, Er Yesus ab Er miliramnyi nang amolbaryi ab anaboka atei Betania dam tamuboka binmai.

¹²Mabmai ani, berekwe ura, Er Yesus ab Er miliramnyi nang ab aryi atei Betania aryi kuboka banmai ba, Er Yesus kwaning atanmou.

¹³Kwaning atanmou ura, Erci dinmou uca, kwarang co ton o tikamwe asi asing eibmou. Co kwarang bok ilinto boramwe ati, Er Yesus biryi, “Du ton mouranci asi dakoka yibkwan,” teneboka a co kwarang dam binmou. Dam binmou ura, ketengmou uca, a co kwarang ara muryi aryi du ton kum mouramwe, erda bok dem boramwe asi asing eibmou.

¹⁴Du ton kum asing eibmou ura, Erci a co kwarang asi ato eboka submou, “Du kum moubmarim ati, ninyi aryi aminda kan du asi dakoka yibkingnyei.” Er Yesus biryi ato eboka a co kwarang asi submou ba, Er miliramnyi nang aryi kekenmai.

¹⁵Ura, banmai ani, Er Yesus ab Er miliramnyi nang ab Yerusalem atei dam yanmai. Yanmai ura, Erci Bait Allah ai ara Er Imtamnyi biti ninyi dama deirin ai dam wengbinmou. Ura, Erci sun Bait Allah ai dam kuboka dekdanmai nang asi yakdonokmou. A nang ara domba ab Er Imtamnyi biti deiriramnyi dama yuk-yuk asi dengdanmai bok, Er Yesus biryi sunsi baitam yakdonokmou. Yakdonokmou cok, Erci sun co bok amuma karen nang lamna nirya dangublobmou. Tonda, sun emnanyi asi dekoka kareramnyi nang bun sokon ababyi erci dangublobmou.

¹⁶Dangublobmou ura, Erci ninyi ilinto ara sun dekwamai bona asi boyibina yana kimai asi asing eibmou ura, Erci sunsi, “Bait Allah ai dam yibindoka bobina yana kimna mem,” ebmou.

¹⁷Ebmou ura, Erci sun a kubmai nang asi ato eboka eterebmou, “Er Imtamnyi Uram minob bikoka ermururamunyi si Yesaya biryi kerek sekamwe to sunci diboka kekebdarur. Er Imtamnyi biryi ato ebmar, ‘Ni ai ara sun im dangna tukwe dangna nang nirya aryi Nisi molobkwaning ai kubkwanir.’ (Yesaya 56:7) Er Imtamnyi biryi ato ebmou bok, sunci manmaliboka Er ai asi dengna weik molobtabangna nang ai kibdeibmarum.”

¹⁸Er Yesus biryi ato eboka wenebmou ura, sun Er Imtamnyi kan ninyi kan noutam kuboka antanirdeirin deyok nang ab ton sun Musa kerek sengna etereramnyi nang ab aryi kekebmai. Kekebmai ura, sunci, “Anyi bisi una kuboka obtibyi do?” tenen marmun yibkalibmai. Ara, ninyi ilinto aryi Erti, “Teleb Uram eterebmasir,” tenebmai ati, sun Yahudi yala nang sien nang aryi, “Ninyi nirya Er Yesus bisi milibingnyei,” tenebmai ci, ilil kubmou ura, marmun yibmai.

¹⁹Sunda marmun yiboka sisikdanmai bok, inibwe ba, Er Yesus ab Er miliramnyi nang ab anaboka Yerusalem atei aryi kuboka baitam binmai.

²⁰Mabmai ani, berekwe ura, Er Yesus ab Er miliramnyi nang aryi, “Yerusalem atei tamuboka binkwayeb,” teneboka banmai. Banmai ba, co kwarang tikamwe dam yibanmai. Yibanmai ba, sunci Er Yesus biryi submou co kwarang nirya ara koula danmou asi asing eibmai.

²¹Ura, er Petrus biryi Er Yesus bisi, “Nai, dirabderum, Kanci submumwe co kwarang ara sirya koula danmar anune,” ebmou.

²²Ba, Er Yesus biryi Er miliramnyi nang asi ato ebmou, “A co kwarang ara Er Imtamnyi mikib aryi koula danmar. Ati, sunci Er Imtamnyi bisi tuba-tuba dib tenebdarur,” ebmou.

²³Ato ebmou cok, Erci sunsi ato eboka eterebmou. “Niryi sunsi diboka ebkwinsin uram asi kekebdarur. Unanyi-unaner aryi er kanya dam aryi, ‘Ni molobnyi to Er Imtamnyi biryi dib ati kunubdeibkwanir,’ tenebci ura, anyi-aner aryi ebmaci dinyi ara Er Imtamnyi biryi kunubdeibkwande. Ba, unanyi-unaner aryi a mutuk kon asi, ‘Kan yuk tobkaboka ilila mekwan um asi wengbirum,’ ebci ura, erci er kanya aryi kankana kum kubmaci deyok aryi, anyi-aner ebmaci tok ilil tenen dinyi asi Er Imtamnyi biryi kunubkwande.

²⁴A deyok aryi, sunci Er Imtamnyi bisi Ersi molorandum ba, sunci sun kanya dam aryi, ‘Ni molobman dinyi asi Er Imtamnyi biryi dib kunubdeibkwanir,’ iya tenerandarur. Ato kuramunyi ura, sun molobmunyi dinyi asi Er Imtamnyi biryi diboka kunubkwansir,” eboka eterebmou.

²⁵Ebmou cok, Er Yesus biryi Er miliramnyi nang asi ton ato eterebmou. “Sunda Er Imtamnyi bisi Ersi molorandum ba, yuknyi yuk ner aryi malyi kubdeibsici ba, sun kanya a deyok ati, mambul kubsici ba, sunci, ‘A dinyi teneina ati takwan,’ teneboka anyi-aner ab yuma antanibdandarur. Sirya antanibmunyi ura, Er Imtamnyi bisi ur molobdarur. Ara, Er Imtamnyi biryi sun malyi kun dinyi kiliboka sun ab tonkwa antanibkwansir ati, sunbabyi neiktoto sun yuk nang ab antanibdarur.

²⁶Ati, sunci yuk nang aryi malyi kun dinyi asi luba kum kibmunyi ura, sun Nai Imtamnyi biryi sun malyi kurandum dinyi ababyi neiktoto kum kilibkwansir,” eboka Er Yesus biryi eterebmou.

²⁷Ura, Er Yesus ab Er miliramnyi nang ab ara yanganmai ani, Yerusalem atei yanmai. Ura, Er Yesus bira Bait Allah ai ara Er Imtamnyi biti ninyi dama deirin ai dam wengbindoka dirkiringmou. Banmou ba, sun Er Imtamnyi kan ninyi kan noutam kuboka antanirdeirin deyok nang ab sun Musa kerek sengna etereramnyi nang ab, tonda sun Yahudi yala nang asi kalingnamnyi sien nang ab aryi Er Yesus dam yanmai.

²⁸Yanmai ura, sunci Er Yesus bisi ato eboka asibmai, “Kanda ambutum ara unato ati sun atam dengdanung nang asi baitam yakdonokmomwe do? Unanyi biryi Kansi, ‘Ato-ato kubdum,’ eboka wa karebkou ba, kubmomwe do?” eboka asibmai.

²⁹Sunci ato eboka asibdenmai uca, Er Yesus biryi sunsi tamuboka asibdenmou, “Yohanes ninyi me dongoramunyi bisi unanyi biryi, ‘Ato kubdum,’ eboka takubdeibmou ati, tenebmarum do? Er Imtamnyi biryi takubdeibmou ba, ninyi me dongoramwe do? Ninyi aryi takubdeibmai ba, me dongoramwe do?” eboka asibdenmou.

³⁰

³¹Er Yesus biryi ato eboka asibdenmou ura, sun Yahudi yala nang kalingnamnyi sien nang ara kankana kubmou ba, sun mamun uram sisikdanmai. Ara, sunci ato ebdanmai, “Nunci, ‘Er Imtamnyi biryi takubdeibmou ba, ninyi me dongoramwe,’ ebibyi ura, Erci nunsi, ‘Ato ura sunda unato ati er Yohanes bisi dib kum tenebdarur do?’ ebkwamasir.

³²Ba, nunci, ‘Ninyi aryi takubdeibmai ba, me dongoramwe,’ ebibyi ura, ninyi nirya aryi nunsi yu weik bobkwansing,” ebdanmai. Ara, sun Er Yesus dam bulubmai nang nirya aryi, “Yohanes bira Er Imtamnyi Uram ebdeibmaca bobananyi,” teneramnyi deyok aryi, sun Yahudi yala nang kalingnamnyi sien nang aryi, “Ninyi aryi takubdeibmai ba, Yohanes ninyi me dongoramwe,” ena ilil kubmou.

³³Ura, sunci Er Yesus bisi uram dobmai ci, “Nun kum bingnub,” ebmai. Ato ebmai ba, Er Yesus biryi sunsi ato ebmou. “Sunda Yohanes bira kum bingdarur ura, Nibabyi neiktoto sun dam asi Nira anyi biryi wa takubdeiboka, ‘Ato dinyi-ato dinyi ukubdum,’ ebnou kum ebkwamasin,” eboka Er Yesus biryi sun Yahudi yala nang kalingnamnyi sien nang asi uram dobmou ebkarebmou.