Read Futuna-Aniwa Markus 13 Bible Online

Markus 13 - Futuna-Aniwa bible

Markus 13

¹Eterebmou ura, Er Yesus ab Er miliramnyi nang ab Bait Allah ai ara Er Imtamnyi bisi dama deirin ai dam aryi kuboka anabmai. Anabmai cok, er miliramunyi tentok aryi Er Yesus bisi ato ebmou, “Nai, dibderum. Naie. Bait Allah ai ara diboka teleb ai kurur. Akai deneboka dobmai keil abilinga ara teleb keil abilinga kubmar ba, akai ara lumun ab erebdoba ai kubmar,” ebmou.

²Ato ebmou bok, Er Yesus biryi ersi ato ebmou. “Akai teleb kuboka dobyi ara iya kum dankwande. A lumun ab erebdoba ai nirya ara iya daksakwande. Ara, ninyi aryi yandoka Bait Allah ai nirya dakwetebkwaming,” ebmou ura, anaboka bindobmai.

³Ura, Er Yesus ab Er miliramnyi nang ab ara Bait Allah ai dam aryi kuboka anabdobmai ura, yuryibindoka mutuk si, “Zaitun kon,” asi welebinmai. Welebindoka bukmai ci, otam aryi kuboka Bait Allah ai asing eibmai. Ura, Petrus ab, Yakobus ab, Yohanes ab, Andreas ab aryi sun yuk ai bindoka Er Yesus bisi ato eboka asibdenmai.

⁴“Nai, Bait Allah ai asi dakwetebkwaming tum ara una tum aryi kubkwaming do? ‘A dinyi nirya kunubkwande tum ara sirya kobdob tum sirya yankwamasir,’ tenen una kuboka bikwayeb do?” eboka asibdenmai.

⁵Uca, Er Yesus biryi sunsi ato ebmou. “Sunda diboka kalikdandobdarur. Yuk nang aryi tola uram eboka eterebsingiryi sunsi bowanikminiksingnyei ati diboka kalikdandobdarur.

⁶Sirya kobdob tum kum berekabde bok, ninyi ilinto aryi tola ati Ni si asi siboka abingiryi, sunsi, ‘Nira Er Imtamnyi biryi bokwetebnounyi a kunum,’ ebkwansing. Ba, tola ati ato ebsingnyi uca, ninyi ilinto aryi a tola en nang asi dib teneboka milibkwaming.

⁷Ura, sirya kobdob tum kum kuabde bok, mar ordana uram ilinto asi kekebkwandum. Ara, ninyi aryi sunsi, ‘Ei mutuk nang mar obdaraming, ou mutuk nang ababyi mar ordaraming. Ura, a mutuk nang ababyi mar ordankwaming.’ Ninyi aryi sunsi ato ebsingnyi ura, sun kanya ilil kusina mem. Ati, sunci, ‘A dinyi kum kubte ura, sirya kobdob tum dam kum yankwamar,’ tenen ilil kusina mem. Mar ordardanmanyi ba, sirya kobdob tum dam kum yankwamar ati ebman.

⁸Ba, ton mutuk nang aryi yuk mutuk nang ab obdankwaming. Weik sienyi tonyi bisi milin nang aryi weik sienyi yuknyi milin nang ab mar obdankwaming. Ba tonda, sirya kobdob tum kum berekabde bok, mutuk mikbaryi ara mutuk eimna dobkwande. Ba, kwaning koubmangnyi bok, kwaning nong mana kum kubdiryi, kwaning atan weik kubkwansir. A dinyi nirya ara ninyi kanya asi mambul kubdeibkwansir bok, iya mambul weik kurdeirin dinyi minob kum yankwande.

⁹Ati, sunda diboka kalikdandobdarur. Sirya kobdob tum kum kuabde bok, Nisi miliranurum nang asi taleboka nun Yahudi yala nang asi deyok liliboka wenen nang bulun ai asi bobinkwansing. Ura, nun deyok liliboka wenen nang aryi sunsi, ‘A nang ara malyi kun nang,’ eboka kulab-kulab eboka wenebkwansing. Sunda Nisi miliranurum ati, a nang aryi sunti, ‘Nun li,’ tenen sunsi taleboka yuk deyok liliboka wenen nang ara sun Er Imtamnyi Uram walwal nang bok, iya erebdob nang dam asi bobinkwansing. Ura, sun Roma nang weik sienyi amwetam bun nang ab ton sun weik sien nang ab aryi sun deyok lilinmasingnyi uca, sunci a erebdob nang asi Ni deyok lak ebkwandarur.

¹⁰Ura, sirya kobdob tum kum kuabde bok, sun im dangna tukwe dangna nang nirya aryi Teleb Uram asi kekebkwanung.

¹¹Sun ninyi aryi sunsi taleboka bobinkwansing ba, sunci, ‘Una ebkwan do?’ tenen mambul kanya bobmunyei. A tum ara Er Imtamnyi Kanya Roh Kudus aryi sun kanya dam asi, ‘Ato-ato ebdum,’ eboka eterebsici to, sunci ebmuruboka ebkwandarur.

¹²Ura, sirya kobdob tum kum kuabde bok, er du biryi, ‘Ni weit asi obting,’ tenen er weit asi taleboka sun ninyi on nang dam bobinkwande. Ba, er nai biryi, ‘Ni mi asi obting,’ tenen er mi asi taleboka sun ninyi on nang dam bobinkwande. Ba, sun mining mabwe aryi, ‘Nun nai nun kwin asi obting,’ tenen sun nai sun kwin asi taleboka sun ninyi on nang dam bobinkwaming.

¹³Sunda Nisi miliranurum ati, ninyi nirya aryi sunti, ‘Obtibyi,’ tenen mar ibkwansing. Mar ibkwansing bok, sunda sun kanya dam aryi katabum eboka Nisi tanglona kum ci, iya milibnindarur. Sun tanglona kum Nisi iya milibkwaningnyi nang asi Er Imtamnyi biryi iya lebkwande,” eboka eterebmou.

¹⁴Er Yesus biryi eterenmou ci, Er miliramnyi nang asi ato eboka ton eterebmou. “Ura, sirya kobdob tum kum kuabde bok, ninyi aryi Bait Allah ai asi wekoka iya ina ngilikman dinyi asi wekman kum dam bowengyankwaming. A ina ngilikman dinyi deyok aryi, Er Imtamnyi biryi er ai asi iya taklobci ura, akai kum dankwande. Ati, sunci a dinyi asing eibmunyi ura, sun Yudea mutuk kuramingnyi nang nirya ara, ‘Nun ordana nang dam yanganmang ati, obsingnyei,’ teneboka sun kuramingnyi atei yuk-yuk aryi anaboka bai cung bindoka mutuk kon ai welebindobkwanung. Er a ebne uram asi dibde nukwandinyi biryi kalikoka a dinyi diboka lilibkwandur.

¹⁵A tum ara sun ai dam kubkwamingnyi nang aryi, ‘Nun ordana nang dam yanganmang ati, obsingnyei,’ teneboka yan dum sorokloboka cung bindobkwanung. Ara, ‘Ni ai wekoka ni dinyi dobdobtiniryok,’ tenena kum ci, sun dinyi nirya deibloboka yan dum sorokloboka cung bindobkwanung.

¹⁶Ba, sun wa dam kunmangnyi nang ababyi, ‘Atei tamurbindoka ni ongon aling bobdobniryok,’ tenena mem, erda sun dinyi nirya deibloboka, ‘Nun ordana nang dam yanganmang ati, obsingnyei,’ tenen yan dum sorokloboka cung bindobkwanung.

¹⁷A tum ara mambul weik kurdeirin dinyi kubkwansir. Sun mundu boamingnyi nerabwe babyi, sun mi mum dininmangnyi nerabwe ababyi cung dorbinman kum kubkwaming ati, Ni bico tenebman.

¹⁸‘A dinyi ara muryi talak ara bisik yibinman kum talak aryi kubsicei,’ tenen sunci Er Imtamnyi bisi molobdobdarur.

¹⁹Sirya kobdob tum dam kubkwande tum ara sun kanya asi iya mambul kurdeirin dinyi kubkwansir. Minob ura Er Imtamnyi biryi utotoa nirya kikniamwe dinyi ara ato kum kuramwe. Tonda, ukuryok dinyi ababyi ato ton kum kurur. Tonda, aminda ababyi ato dinyi ara ton kum kubkwande.

²⁰A tum ara iya mambul kurdeirin dinyi kubkwansir ara, tiya ati kubkwansir. Ara, Er Imtamnyi biryi, ‘Niryi boukwe kuboka wibse nang asi lebkwan,’ tenebmou ati, a mambul kurdeirin dinyi tiya ati kubkwansir. Er Imtamnyi biryi, ‘A kunum,’ minola kum ebte ura, ninyi nirya dibting ati ebman.

²¹A dinyi nirya kubsici ba, ninyi aryi sunsi tola ati, ‘Er Imtamnyi biryi bokwetebmounyi Ninyi Lemsinanyi atam kunmar, otam kunmar,’ ebsingnyi uram ati, diba tenebmunyei.

²²Ba, ton nang aryi tola ati eboka ‘Nira Er Imtamnyi biryi bokwetebnou lemsinanyi a kunum yanman,’ ebkwaming. Ba, yuk nang aryi tola ati eboka, ‘Nira Er Imtamnyi Uram ebdeibmaca bobananyi a kunum,’ ebkwansing. A nang ara ilil tenen dinyi kiknibkwaming ati, ninyi ilinto aryi, ‘A nang asi Er Imtamnyi biryi bokwetebmou nang aca,’ tenen dib tenebkwaming. A nang aryi, ‘Er Imtamnyi biryi boukwe kuboka wibwe nang ababyi nunsi milibsiting,’ teneboka ato kuboka bowanikminikdenkwansing.

²³Niryi a dinyi nirya minob bikoka sunsi eterebsin ati, sunci dibdoka kalikdandobdarur,” eboka eterebmou.

²⁴Ebmou cok, Er Yesus biryi Er miliramnyi nang asi ato eterebmou. “A tum ara sun kanya asi mambul kurdeirin dinyi yankwansir tum berekci ura, ilil tenen dinyi kubkwansir. Ara, Er Imtamnyi Uram ermururamnyi nang aryi minob kerek sekamnyi to kunubkwande. Ara, sunci, ‘Kiting sinarya ton wala tilil ton kum daci ura, kunuk dakwande.

²⁵Im amwetam kurande dinyi nirya ara lulukwande ba, kurya nirya ara imtam aryi kuboka daksakwande.’ Ara, Er Imtamnyi Uram ermururamnyi nang aryi minob kerek sekamnyi to kunubkwande.

²⁶A dinyi sirya kunubci ura, ninyi nirya asing eibkwaming ba, Ni Ninyi Dasinyi bira imtam aryi kuboka tamuryuryankwan. Ara, Nira mikib weiknyi ton milil ilintonyi kubniryok, duwa ilinto deici aryi bukoka tamuryankwan. (Daniel 7:13)

²⁷Tamuryanganyi ba, Niryi sun Er Imtamnyi Uram eryuryangan nang asi arukoka bokdonokwan. Ba, Niryi sunsi bokdonokoka, ‘Sunci yaletam bindoka, kitingbantam bindoka, me utam bindoka, me youkwetam bindoka, Er Imtamnyi biryi boukwe kuboka wibwe nang asi Ni dam boyandarur. Ati, a nang nirya asi buluboka Ni dam boyandarur,’ eboka bokdonokwan,” ebmou.

²⁸Ato ebmou cok, Er Yesus biryi Er miliramnyi nang asi ton ato eboka eterebmou. “Niryi kiklina uram ebkwan ati, sunci kekendarur. Co kwarang asi silikwandiryi, mim dingmaci ura, sun ninyi aryi, ‘Ei, co keta dobkwamar,’ tenen bingnaming.

²⁹Ati, sunbabyi neiktoto, sunci Ni ebmanto mambul kurdeirin dinyi nirya asi asing eibmunyi ura, sunci, ‘Sirya kobdob tum ara dam kubmar,’ tenen bikwandarur.

³⁰Ati, Niryi sunsi diboka ebkwinsin uram ara kekendarur. Sun a kurandum nang tuba kuramun bok, Niryi ebmanto dinyi nirya kunubkwande.

³¹Im amwetam kurande dinyi ab tukwetam kurande dinyi ab nirya kum dankwande bok, Ni eterebmasin uram ara dib kunubkwande deyok aryi, iya kubkwande,” ebmou.

³²Ato ebmou cok, Er Yesus biryi Er miliramnyi nang asi ton ato eterebmou. “A dinyi nirya kunubkwande tum ara ninyi nirya aryi kum bikwaming. Er Imtamnyi Uram eryuryangan nang ababyi kum bikwaming. Ba, Ni Er Imtamnyi mi ababyi kum bikman. Erda, Ni Nai Imtamnyi tentok asi a uki tum bingdur,” eboka eterebmou.

³³“Sunda a dinyi nirya kunubkwande tum ara kum bikmarum ati, diboka kalikdandobdarur,” ebmou.

³⁴Ura, Er Yesus biryi kiklina uram doboka Er miliramnyi nang asi ato eboka eterebmou. “Ai damnyi tentok aryi, ‘Ninyi atei binkun,’ tenebmou ura, er arungna nang yuk-yuk asi arukoka sunsi, ‘Ni ninyi atei kubkwan talak ara ato-ato wa irandarur,’ ebdeibmou ura, er ai kalingnanyi bisi, ‘Ni tamuryankwan ati, kanda kalikoka dibde buranurum,’ ebmou.

³⁵Ebmou cok, erci, ‘Ati, sunci neiktoto kalikoka dibde bunkwandarur. Sun er ai damnyi arungna nang aryi sun nai tamuryankwamwe tum asi kum bikmai ato, sunbabyi neiktoto Ni tamuryankwan tum asi kum bikwandum. Ati, sunci, ‘Nun nai sintam aryi tamuryankwande do? Lukunda dukduk en aryi tamuryankwande do? Belekuna kobdob aryi tamuryankwande do?’ tenen kalikoka dibde bunkwandarur.

³⁶Nira lukdandoka yangani ba, Niryi sunsi wi mabmamunyi asi eibsinyei.

³⁷Ati, a ebmasin uram ara ninyi nirya ati, ‘Kalikoka dibde bunkwandarur,’ tenen ati ebman,” eboka Er Yesus biryi Er miliramnyi nang asi eterebmou.