Read Futuna-Aniwa Markus 14 Bible Online

Markus 14 - Futuna-Aniwa bible

Markus 14

¹Er Yesus biryi Er miliramnyi nang asi sirya kobdob tum deyok eterebmou bok, sun Er Imtamnyi kan ninyi kan noutam kuboka antanirdeirin deyok nang ab sun Musa kerek sengna etereramnyi nang ab aryi, “Er Yesus bisi una kuboka talebibiryi obkwayeb do?” teneboka marmun yibmai. Marmun yibmai ba, weik kwalina si Paskah ab weik kwalina si Bung-bung Ena Kum Roti ab asi kwaliramnyi tum dam kubmou. A weik kwalina tum berekwamou ura, uki bitinyi maberekloboka sun Yahudi yala nang nirya buluboka a kwalina kwalibkwamai.

²Ati, sun marmun yibmai nang aryi ato ebdanmai. “Kwalibkwamib tum ara Er Yesus bisi taleboka obibyei. Ninyi ilinto ara Ersi dib teneraming ati, a nang nirya buluboka uram walulum eboka kerebsingnyei,” ebdanmai.

³Er Yesus ab Er miliramnyi nang ab mutuk si, “Zaitun kon,” aryi kuboka atei si Betania binmai. Binmai ura, ninyi si Simon biryi sunsi du dongobmou ura, sunda er ai asi wekoka yina yinmai. Anyi bira yuma ara susa taleamunyi kuramwe asi, ukuryok ara er susa kum danmou. Er Yesus ab Er miliramnyi nang ab ara er Simon ab tonkwa yina yinmai bok, ner tentok wengyandoka Er Yesus dam tikmou. A ner ara kat tukwe aryi kiknin moyok asi tong teleb me kibdeiamwe moyok asi dubdakoka yanmou. A dikdongobmou tong teleb me ara iya dengna weik dinyi asi kubmou. Kubmou bok, a ner aryi Er Yesus dam yana tikmou ci, erci a moyok kuktaleboka a tong teleb me nirya ara Er Yesus kisok dub asi dikeibmou.

⁴Dikeibmou ba, sun akai bukmai nang ton nang ara sun kanya aryi, “Se, unato ati dengna weik dinyi asi talyi dikeibmar do?” tenebmai.

⁵Ato tenebmai ura, sunci, “A tong teleb me ara yuk nang dekoka dengna ilinto dobdobtibyi ura, sun utotoa kum nang asi bokoka karebtibyi,” tenebmai uca, a ner asi kerebmai.

⁶Kerenmai bok, Er Yesus biryi sunsi ato ebmou. “Taklobdarur se, a ner asi kerebmunyei. A ner aryi kubmanir to ara talyi ati kum kubmanir. Er kubmanir to ara teleb dinyi kubmanir. Ato kubmanir deyok aryi, Ni kanya teleb kubmanir.

⁷Sun bona bon kum nang ara sun ab tonkwa iya kundarur ati, ‘A nang asi karebkub,’ tenebmunyi tum ara sunsi karendarur. Bok, Nira sun ab tonkwa iya kum kunkwamib ati, Nisi karebnindaute tum iya kum kubkwande.

⁸Ati, a ner ara tong teleb me dikeibmanir ara diboka kubmanir. Ninyi din nang ara keil umbura kum dongobmangiryok, tong teleb me asi dingdongoraming to, ninyi aryi Nisi keil umbura dongobkwaning tum dam kubmar ati, a ner aryi diboka kuboka Ni nong asi kiknibminikoka tong teleb me dikeibmanir.

⁹Ati, sunci Nisi kekendarur. Niryi sunsi diboka ebkwinsin. Sunda a ner asi kerebmarum bok, ninyi nirya aryi a ner asi kisal dakwaming. Ara, im dangna tukwe dangna nang nirya aryi Teleb Uram deyok kekebkwaming nang nirya aryi a ner aryi ukubmanir to kekebkwaming. Kekebkwaming ba, sunci a ner aryi ukubmanir to iya teneibkwaming ati, sun yuk nang asi etererbinkwaming,” eboka Er Yesus biryi sun Er ab tonkwa yinmai nang asi eterebmou.

¹⁰Sirya eterebmou ura, Er Yesus bisi miliramunyi Yudas Iskariot bira anabdobmou ci, sun Er Imtamnyi kan ninyi kan noutam kuboka antanirdeirin deyok nang asi binmou. Anyi bira Er Yesus bisi miliramuryok, kikinanyi kibmou ci, sun Er Imtamnyi ai wa in deyok nang dam bindoka “Yesus bisi taleboka obkwayeb,” ebmou.

¹¹Ebmou ba, sun Er Imtamnyi ai wa in deyok nang kanya kilkil kubmou ura, sunci er Yudas bisi, “Teleb. Kanci nunsi, ‘Yesus a kunmar,’ eboka eterebsiminyi ba, talebibiryi, co bok dengna weik karebkwankib.” Ebmai ura, er Yudas biryi, “Niryi Er Yesus bisi una tum aryi dobkarebkwan do?” teneboka teleb uki tum ingkiringmou.

¹²Mabmai ani, sun Yahudi yala nang aryi kwalibde baramnyi tum si Bung-bung Ena Kum Roti yiramnyi tum berekmou. A kwalina asi uki yuma kobdob tum kuramwe ba, sun Yahudi yala nang aryi “Lukunda ara Paskah kwalibkwayeb,” tenen domba asi oboka yuramnyi. Ara, “Minob ura, Er Imtamnyi biryi leboka nun aibweyabwe asi mutuk Mesir aryi kuboka bobinmou,” tenen Paskah kwaliramnyi. A kwalina asi uki yuma kobdob tum berekmou ura, Er Yesus miliramnyi nang aryi Er Yesus bisi ato eboka asibdenmai. “Nai, kwalina si Paskah ara dantam kwalibkwamab do? ‘Kiknirminingbitibyi,’ tenen asibdenmakib.”

¹³Asibdenmai ba, Er Yesus biryi Er miliramnyi nang asi ninyi bitinyi arukoka bokdonokmou. Bokdonokmou ci, sunsi ato ebmou. “Sunda Yerusalem atei birumunyi ura, ninyi tentok ara moyok me kweboka bobmarinyi ab ebdankwamarum. Ebdamunyi ura, sunci anyi bisi milibkwandurum.

¹⁴Milibdongobmarumunyi ani, a moyok bobmarinyi bira ai wekbici ura, sunbabyi akai wengbindoka er ai damnyi bisi ato ebkwandurum. ‘Nai, kan dukoka don alib ai ara lo kubmar ai asi kanci nunti nuksurum. Ara, nun Du ninyi eterenanyi biryi ebdeibmar to ati ebmanim. Nun Du ab nun Er miliramib nang ab kan dukoka don alib ai asi wekibiryok Paskah kwalibkwayeb ati, “Akai nuksurum,” tenen molobmanim.’ Ato eboka er ai damnyi bisi ato molobkwandurum.

¹⁵Sirya ebdumunyi ura, erci sunsi, ‘Ur wekdarur. Ni dukoka don alib ai asi eitiba,’ eboka eterebkwansir. Ara, lumun weik ai asi bun sokon co lamna nirya deiboka kiknibminikmang ai asi nuksici ba, kiknirminingmasurumunyi asi, nunda aminda yabyi ura, Paskah kwalibkwamab.” Ato eboka Er Yesus biryi Er milirandei nang bitinyi asi arukoka bokdonokmou.

¹⁶Bokdonokmou ura, sunda Betania atei aryi kuboka Yerusalem atei binmarei. Binmarei ura, Er Yesus biryi sunsi ebmou to kunubmou. Ara, me kweboka bobanmunyi tentok ab ebdanmai ura, erci sunsi dukoka don alib ai eterebmou ura, sunci sun Paskah kwalibkwamai dinyi nirya asi kiknibminikmarei.

¹⁷Kiknibminingmarei ba, inibmou ura, Er Yesus ab Er miliramnyi nang takubaryi ab yandoka eikai asi antaniboka wekmai.

¹⁸Wekmai ura, sun nirya tonkwa bukmai ci, Paskah kwalibmai. Kwalibmai ci, Er Yesus biryi Er kwityabwe asi, “Kekenindarur. Diboka kunubkwande dinyi asi lak eterebkwinsin. Sunda Ni ab tonkwa bukmab nang asi tentoknyi biryi Nisi kikibkwamanir. Anyi bira Ni ab tonkwa yinmab nang asi tentoknyi biti ebman,” ebmou.

¹⁹Uca, Er miliramnyi nang sun kanya mambul kubmou ba, sunci Ersi, “Se Nai, niryi Kansi kikibkwamakin ati ebmanirim do?” eboka asibdenmai.

²⁰Sun yuk-yuk aryi ato eboka asibdenmai uca, Er Yesus biryi sunsi ato ebmou. “Tola kuma, sun Nisi miliranurum nang amolbaryi nang asi tentoknyi biti ebmasin. Ni ab tonkwa neik suwa yangana aryi yibmanimnyi biryi Nisi kikibkwanir.

²¹Sun Er Imtamnyi Uram ermururamnyi nang aryi minob kerek sekamnyi to dib kunubkwande. Ara, sunci Niti eboka ato kerek sekamnyi, ‘Er Ninyi Dankwandanyi biti erdamnyi tentoknyi biryi kikibkwande.’ Sunda Niti eboka kerek sekmai to kunubkwanir bok, erda Nisi kikibkwamaniranyi bira Er Imtamnyi biryi bai donokoka iya wenebkwande. Anyi bisi kum deiante ura, ersi teleb kubte.” Ato eboka Er Yesus biryi Er miliramnyi nang asi er kikibkwamunyi biti ebmou.

²²Ura, Er Yesus ab Er miliramnyi nang ab tonkwa Paskah kwalibmai ci, Er Yesus biryi roti ton dobtalebmou ura, Er Imtamnyi si weik ebmou. Sirya ebmou ura, Erci a roti asi toboka Er miliramnyi nang asi bokeibmou. Bokeibmou ci, Erci sunsi ato ebmou. “A roti ara Ni nong a kunum. Ati, sunci, ‘Nun Du biryi nunti dibkwamar,’ teneiboka sunci a tobmasin roti asi doyibdarur.”

²³Ebmou ba, roti asi sirya doyibmai ura, Er Yesus biryi me yin moyok asi anggur du yung dikdongobmai asi dobtalebmou ci, Er Imtamnyi si weik ebmou. Sirya ebmou ura, Er miliramnyi nang asi ato ebmou, “Ur doboka boboka yibdarur,” ebmou ura, sun nirya doyibmai.

²⁴Anggur du yung sirya doyibmai ura, Er Yesus biryi Er miliramnyi nang asi ato ebmou. “A doyibmarum anggur du yung ara Ni ining a kunum. Ni dibnyi ba, Ni ining sakwande. Nira sun ninyi ilinto asi leboka Er Imtamnyi ab murubdeibkwansin ati, Ni dibkwaman, ining saknici asi. Ati, sunci, ‘Nun Du bira nunti dibkwamar,’ tenen teneiboka a anggur du yung asi doyibdarur,” ebmou.

²⁵Ba, anggur du yung sirya doyibmai ura, Er Yesus biryi sunsi ato ebmou. “Kekendarur. Nira anggur du yung asi iya kum yibkwaman. Ukura kum doyianyi ani, Er Imtamnyi Iya Erebdobnyi kurur ci, ninyi leboka kalikwansir talak sirya kubci ura, Ni kanya kilkil weik kubnici ba, anggur du yung tubto doyibkwan,” ebmou.

²⁶Ebmou ura, Er Yesus ab Er miliramnyi nang ab aryi mot seboka Er Imtamnyi si weik ebmai. Sirya ebmai ura, sunda Yerusalem atei aryi anaboka bai ani, mutuk Zaitun kon dam binmai.

²⁷Banmai ura, Er Yesus biryi Er miliramnyi nang asi, “Sun nirya ara sun kanya dam aryi Niti kankana kuboka Nisi taklobkwanurum. Ba, minob aryi Er Imtamnyi Uram ermururamunyi biryi nunti kerek sekeiamwe to, diba kunubkwamasir. Ara, erci nunti ato eboka kerek sekeamwe, ‘Er Imtamnyi biryi ato ebmar, “Niryi domba kalingnanyi bisi obkwan. Ba, erci kalingnanci domba mer nirya ara yuk-yuk binsekwaming,”’ eamwe. (Zakharia 13:7)

²⁸Er Imtamnyi Uram minob bikoka ermururamunyi biryi kerek sekmou to kunubkwansir bok, Nira dibmanyi ani, kam bukoknyi ura, Ni ab sun ab tonkwa tubto kubkwayeb. Ati, kam bukokmanyi ura, Galilea mutuk binmani bok, sunda aminda yankwandarur,” ebmou.

²⁹Er Yesus biryi Er miliramnyi nang asi ato eboka eterebmou bok, er Petrus biryi, “Nai Du, Kanda ato ebmasirim bok, niryi Kansi kum taklobkwamakin. Nun kwityabwe nirya aryi Kansi taklobkingnyi ababyi, nira Kan ab tonkwa iya kubkwanim,” ebmou.

³⁰Ato ebmou bok, Er Yesus biryi Petrus bisi ato ebmou, “Kekenurum. Tola kuma, kanbabyi Nisi taklobkwamanirim. Arub lukunda aryok maka kirim yim uram liki bitinyi kum ngalukabde bok, kanci liki bitinyi winiryi ebtabakoka, ‘Anyi bira ni kum bingnunyi,’ ebkwanirim,” ebmou.

³¹Ato ebmou bok, er Petrus biryi Er Yesus bisi, “Nai, ato tenen kum. Nira Kanti, ‘Anyi bira ni kum bingnunyi,’ kum ebkwamakin. Sun ninyi aryi nibabyi osingnyi bok, nira Kanti ato kum ebkwankin.” Er Petrus biryi ato eboka ebtabak-ebtabak ebmou ba, er kwityabwe nirya aryi Er Yesus bisi neiktoto ebmai.

³²Enmai ci, banmai ani, Er Yesus ab Er miliramnyi nang ab Zaitun kon dam mutuk si Getsemani binmai. Binmai ura, Er Yesus biryi sunsi ato ebmou. “Nira otam bindoka Er Imtamnyi bisi molobkwaman ati, sunda atam dibde buknindarur,” ebmou.

³³Ebmou ura, Erci Petrus ab Yakobus ab Yohanes ab asi, “Sunda Nisi milibnindarur,” eboka inibdobmou. Ura, mitikanun bai ani, Er Yesus kanya ara mambul weik aryi ilil weik kubkalibmou.

³⁴Ati, Erci Er miliramnyi nang winiryi nang asi ato ebmou. “Ni kanya mambul weik kubnir deyok aryi, din kanya deinmanir. Ati, sunda kalikoka atam dibde buknumunyi ba, Ni yuk otam binkun,” ebmou.

³⁵Ura, Er Yesus mitikanun bau ani, tukwe deici dokoka Er Imtamnyi bisi molonmou. Ura, Erci Er Imtamnyi bisi, “Nai, Kanci Niti, ‘Lebkwan,’ tenebniminyi ura, Kanci a yankwamanir mambul dinyi asi bisik sekdum,” eboka molobmou.

³⁶Ebmou cok, Er Imtamnyi bisi ato eboka molobmou, “Nai, Kanda iya mikibnyi kurum ati, Kanci a yankwamanir mambul dinyi asi bisik sekoka lebdeibnurum. Nira ato eboka molobmakin bok, Kan tenebniminyi tok akwe ur da kunubnurur,” ebmou.

³⁷Ato eboka molobmou ura, Er Yesus tikoka tamuryandoka diramwe uca, Er miliramnyi nang winiryi ara wi mabmai asi eibmou. Ura, kamubdeiboka Petrus bisi ato ebmou. “Ni kwit Simon Petrus se! Unato ati, kan wi mabmarim do? Kiting yakna tentok asi kalikoka dibde buna ara mambul kubmakir do?

³⁸Sun wi mana mem. Erda, kalikoka abmun ci, Er Imtamnyi bisi molobdobdarur. Ba, sunci, ‘Mambul dinyi yangasici ura, manmalibibyei,’ tenen Er Imtamnyi bisi, ‘Lebsurum,’ eboka molobdobdarur. Sunda sun kanya dam aryi, ‘Kalikdandobkwanuba,’ tenerandum bok, sun nong mitang kusurur deyok aryi, diboka kum kalikdaute ati, Er Imtamnyi bisi, ‘Kanci nunsi milibsurum,’ eboka molobdandobdarur,” ebmou.

³⁹Ato eboka sirya kamubdeibmou ura, Er Yesus bira tubto Er yuk otam bindoka Er Imtamnyi bisi molorbinmou. Ura, neik uram eboka Erci yuma eboka molobmou to akwe tubto molobmou.

⁴⁰Liki bitinyi sirya molobmou ura, Erci tikoka tamuboka Er miliramnyi nang asi tubto wi mabmai asi eibmai. Ara, lukunda kubmou aryi, asing elekeiboka buna ikin kubmou ba, wi mablukmai. Asi, Er Yesus biryi sunsi tubto kamubmou ba, sun alyi kubmou ati, Ersi uram ton tamurkarena kum kubmai.

⁴¹Ura, Er Yesus tubto molorbinmou ani, tamuryandoka diramwe uca, Er miliramnyi nang ara tubto wi mabmai asi eibmou. Ura, Er Yesus biryi liki winiryi dinyi sunsi wenebmou. Ara, Erci sunsi ato ebmou, “Sunda wi sul aryi iya manmarum do? Bukokdarur! Mambul tenen dobkun uki dam kubmar. Ba, Ni Ninyi Dasinyi bisi sun malyi nang aryi taleboka obkwamaning.

⁴²Ati, sunda bukoka tikokmunyi ba, bankwayeb. Dindarur, Ni kikibkwiniranyi dam a yangar ati, ebdankub,” ebmou.

⁴³Er Yesus tuba uram enmou bok, Er Yesus miliramnyi nang amolbaryi asi tentok Yudas bira sun dam yanganmou. Ara, Er Yesus ab Er miliramnyi nang ab Getsemani mutuk binmai ura, Yudas bira sun ab tonkwa kum binmai. Erda, “Ni Nai bisi kikibkwan,” tenebmou ci, sun Yahudi yala nang sien nang asi molorbinmou. Molorbinmou ci, sunsi arukmou ba, ya touna doun nang ton co balala doun nang ninyi yubwa mikbaryi buluboka er Yudas bisi milibmai. A nang ara sun Er Imtamnyi kan ninyi kan noutam kuboka antanirdeirin deyok nang ab ton Er Imtamnyi Uram etereramnyi nang ab ton sun Yahudi yala nang atei sien nang aryi bokdonokmai ba, “Er Yesus bisi diboka talebkwayeb,” tenen yanmai.

⁴⁴A nang yangana kabul talak ara, Yudas biryi, “Yuknyi bisi kirikoka talebingnyei,” teneboka ersi milibmai nang asi, “‘Nun talebkwamamibinyi bira unanyi da,’ tenena ara niryi eterebkwamasin. Nira nun talebkwamamibinyi ab eibdanimnyi ara, niryi bindoka Ersi iribkwaman. Ni iribninyi bira Er Yesus a kunum. Anyi bisi diboka taleboka bobinkwandarur,” ebmou.

⁴⁵Ebmou ura, er Yudas biryi yandoka Er Yesus ab ebdanmarei ura, erci, “Ni Nai, teleb,” eboka iribdobmou ci, u kunkunukmou.

⁴⁶U kunkunukmou ba, sun talebkwamai nang aryi Er Yesus bisi diboka talebmai.

⁴⁷Talebmai asi, ninyi tentok aryi yu kuboka, “Sunbabyi ton obkwan,” teneboka ya touna dobdobmou ci, ninyi amol asi sekwetebmou. Ara, antanirdeirin sienyi Imam Besar er arungnanyi bisi amol sekwetebmou.

⁴⁸Ura, Er Yesus biryi Er talebmai nang asi ato eboka wenebmou. “Se, Nira ninyi onanyi kunun tenebmanurum darib? Sunda unato ati ya touna douboka co balala douboka Nisi talebmanurum do?

⁴⁹Nira Bait Allah ai dam uki mikbaryi kuransiryi lak etereranse talak uca, taleanindaute bok, sunci Nisi kum talebmanindau. Bok, ukuryok iniboka yanmarum ci, sunci Nisi talebmanurum se! Kekeranindarur, sun Er Imtamnyi Uram ermururamnyi nang aryi Niti kerek sekmai to kunubkwamanir ati, sunci Nisi talebmanurum.” Ato eboka Er Yesus biryi sun Ersi diboka talebmai nang asi ebmou.

⁵⁰Sirya talebmai ura, Er miliramnyi nang nirya ara ilil kubmou ba, sun Nai bisi takloboka binsekdobmai.

⁵¹Barsekdonmai ura, kamnyi tentok Er Yesus bisi milibmou asi Er Yesus bisi talebmai nang aryi a kamnyi talebmai. Anyi bira kaluna aryi akubdandobmou asi ongon aling ongobmunyi bisi talebmai ba, erci er akurdan aling asi langakloboka nong baning cung dorbinmou.

⁵²

⁵³Ura, sun ya touna doubmai nang ab co balala doubmai nang ab aryi Er Yesus bisi taleboka abiryi, bobinmai. Ara, Er Imtamnyi kan ninyi kan noutam kuboka antanirdeirin sienyi Imam Besar ai bobinmai. Sirya bobinmai ura, sun Yahudi yala nang sien nang nirya bulubmai. Ara, sun Er Imtamnyi kan ninyi kan noutam kuboka antanirdeirin deyok nang ab, ton sun Yahudi yala nang atei sien nang ab, ton sun Er Imtamnyi Uram etereramnyi nang ab aryi, “Uram sisikwayeb,” tenen tonkwa bulubmai.

⁵⁴Bulunmai ura, Petrus bira Er Yesus bisi talebmai nang asi dongtam kuboka dibliliboknin binmou ci, erbabyi antanirdeirin sienyi Imam Besar ai dam wengbinmou. Wengbinmou ura, ai damnyi arungna nang dam kankan bindoka sun ab tonkwa bukoka uk eingmou. Ara, “Ni Nai bisi una kubkwamang do?” tenen er Petrus bira dibde bukmou.

⁵⁵Dibde bukmou ura, sun Er Imtamnyi kan ninyi kan noutam kuboka antanirdeirin deyok nang ab ton sun Yahudi yala nang asi uram sengkweten nang yuk nang nirya aryi Er Yesus biti uram sisingmai. Ara, sunci, “Er Yesus bisi obtibyi,” tenebmai ci, tatab-tatab ebdongobkwamai uram asi ingkiringmai bok, Er malyi kuna ton dinyi kum eibmai.

⁵⁶Ninyi ilinto aryi Er Yesus bisi tatab-tatab ebmai bok, tola uram akwe eboka tatab-tatab enmai. Ba, ninyi tentoknyi biryi enmou to ara yukto ebmou ba, tonyi biryi enmou ara neiktoto kum enmai.

⁵⁷Tatab-tatab enmai cok, ninyi ton nang ara tikoka abiryi, sunbabyi tola ati eboka ato ebmai. “Uki tentok tum aryi nun kekebmoubwe ura, anyi biryi ebman kum dinyi eboka lak eterebmou. Ara, erci Er Imtamnyi biti dama deirin ai asi ina ngilikoka ato ebmou. ‘Akai ara ninyi aryi doamnyi asi Niryi dakeiboka abniryi, uki winiryi tum berekci ura, ninyi aryi dobman kum ai asi Niryi unuboka dobkwan,’ ebmou asi kekebubwe,” ebmai.

⁵⁸

⁵⁹Ba, ninyi ton nang aryi ato dinyi enmai asi, bita kum bikmai ati, tonyi biryi enmou to yuknyi biryi ebmou to neiktoto kum ebdanmai.

⁶⁰Ato kuboka tatab-tatab enmai asi, sunci Er Yesus malyi kun dinyi ton kum eibmai ura, antanirdeirin sienyi Imam Besar tikokmou. Ura, erci Er Yesus bisi ato ebmou, “Se, Kan uram ton kum tamubkarebkwamasirim do? A nang aryi Kansi tatab-tatab enmaking deyok ara iya malyi deyok ati, kum bikmarim do?” eboka asibdenmou.

⁶¹Antanirdeirin sienyi Imam Besar ato eboka asibdenmou bok, Er Yesus biryi tamuboka uram ton kum dekeibmou. Ba, anyi antanirdeirin sienyi biryi Ersi tubto ato ebmou, “Kanda Er Imtamnyi biryi bokwetebkounyi bira Ninyi Lemsurumnyi kurum do? Kanda Er Imtamnyi Mi kurum do?” eboka asibdenmou.

⁶²Uca, Er Yesus biryi ersi, “Dib ebmanirim, Nira anyi a kunum kunun,” ebmou. Ebmou cok, Erci, “Ni Ninyi Dasinyi diboka kunun ati, sunci asing eibkwanurum. Ara, Nira Er Iya Mikibnyi ab tonkwa bukoka kalikwanim ba, sunci Nisi eibkwanurum. Ura, Niryi, ‘Im dangna tukwe dangna nang nirya sun malyi deyok lilibkwan,’ tenen imtam aryi kuboka duwa deici yankwan asi asing eibkwanurum,” ebmou. [2]

⁶³Er Yesus biryi ato ebmou ba, antanirdeirin sienyi Imam Besar biryi “Se,” teneboka erci er ongobmou aling asi yu yaboka kwiliklobmou. Ura, ato ebmou, “Se, Anyi bira Er Imtamnyi bisi ina ngilikoka ‘Nira Er Imtamnyi biryi bokdonoknounyi a kunum kunun,’ ebmar. Ato eboka Erci Er Imtamnyi si asi yan yanibmar ci, Er malyi kun dinyi ara Erdamnyi biryi sirya lak kibdanmar. Ati, yuk nang aryi Er malyi kun dinyi lak kimna ati ingkiringmab ara takibyi ura, uram dodeibkwayeb,” ebmou. Ura, erci sun yuk sien nang asi, “Sunda tenebmarum ara, Anyi bisi una kubkwayeb tenebmarum do? Sun tenen kanya ton ebdendarur,” eboka asibdenmou. Ba, sun a bulubmai nang nirya aryi ato ebmai, “Anyi bisi obkwayeb,” eboka uram dobdeibmai.

⁶⁴

⁶⁵Uram sirya dodeibmai ura, ton nang aryi Er Yesus bisi si maka tulubdeiboka ina ngilikmai. Ina ngilikmai cok, sunci Er Yesus urasin asi aling kalubdeiboka abiryi, taruk inin aryi molong-molong eboka Er Yesus bisi obmai. Obmai cok, sunci Ersi, “Kanda lak kum dinyi bingdumnyi kurum ati, Kanci, ‘Nira, kan si ara anyi biryi onmanirim,’ eboka si sibderum,” eboka obmai. Ato kuboka obkalibmai ura, sun arungna nang aryi yandoka si kankanya deleng-deleng eboka obmai ci, bobinmai.

⁶⁶Ura, er Petrus neik ai dam aryi tuba dibde bukmou bok, Er Imtamnyi kan ninyi kan noutam kuboka antanirdeirin sienyi Imam Besar arungna nebnyi tentok aryi er dam yanmou.

⁶⁷A nebnyi aryi dinmou uca, Petrus bira uk eikde bukmou asi eibmou. Ura, erci Petrus bisi, “Se, kanbabyi Nazaretnyi si Yesus bisi milirumnyi bukmarim,” ebmou.

⁶⁸Ato ebmou bok, er Petrus biryi a ner asi, “Kum, kan ebmanirim to ara ni walwal,” ebmou. Ura, Petrus biryi, “Lak ebnicei,” tenen kisibdakoka akai bisik bublan dam barou. Ura, maka kirim yim uram ngalukmou.

⁶⁹Ura, er arungna nebnyi aryi ersi tubto eibdongobmou ci, sun adikum tikmai nang asi ato ebmou. “Se, anyi bibabyi er talebmangnyi bisi milirutnyi tikmar,” ebmou.

⁷⁰Asi, er Petrus biryi tubto, “Kum, kan ebmanirim to ara ni walwal,” ebmou. Ura, mitikanun bau uca, yuk nang adikum tikmai nang aryi ersi ato ebmai. “Tola kuma, kanda Galilea mutuknyi kurum ati, kanbabyi er Nazaretnyi bisi milirumnyi kurum lak bikmakib,” ebmai.

⁷¹Uca, er Petrus biryi sunsi ato ebmou, “Tola ati ebmanurum. Anyi bira ni kum bingnunyi. Tola ati, ‘Ni bingnun,’ ebtinyi ura, Er Imtamnyi biryi nisi obnute,” ebmou.

⁷²Ato ebmou ura, maka kirim yim aryi tubto uram ngalukmou. Uram ngalukmou ba, er Petrus bira Er Yesus biryi ersi ebmou to tamuboka kanya teneibmou. Ara, “Se, ara ni Nai biryi ebmou to sirya kunubmanir,” teneboka er Petrus baitam bindoka isin dakei isin dakei engebmou.