Read Futuna-Aniwa Markus 15 Bible Online

Markus 15 - Futuna-Aniwa bible

Markus 15

¹Ura, sun Yahudi yala nang sien nang aryi belekuna kobdob aryi uram sisikmai ci, sunci Er Yesus deyok ati uram sirya dodeibmai. Ara, sun Er Imtamnyi kan ninyi kan noutam kuboka antanirdeirin deyok nang ab, ton sun Er Imtamnyi Uram etereramnyi nang ab, ton sun yuk sien nang ab tonkwa sisikoka Er Yesus deyok ati uram dodeibmai. Ara, sunci ato eboka dodeibmai, “Anyi bisi tabwe debibyi ura, sun Roma nang weik sienyi amwetam bunanyi si Pilatus dam bobinkwayeb. Ura, nunci er Pilatus bisi ato ebkwayeb, ‘Anyi bira malinyi kurur ati, kanci arukoka “Anyi bisi weneboka obdarur,” ebdum,’ ebkwayeb,” eboka dodeibmai. Ato eboka dobdeibmai uca, sunci Er Yesus bisi tabwe deboka sun Roma nang weik sienyi amwetam bunanyi si Pilatus dam bobinmai.

²Sirya bobinmai ura, er Pilatus biryi deyok liliboka Er Yesus bisi ato eboka asibdenmou. “A nang aryi Kansi durungdongonmaking uram ara dib do kum do? Kanda sun Yahudi yala nang weik sienyi kurum do?” eboka asibdenmou. Ba, Er Yesus biryi ersi, “Yo, kanci ebmanirim to a kunum. Niryi yukto kum ebkwaman,” ebmou.

³Ato sirya ebmou ura, sun Er Imtamnyi kan ninyi kan noutam kuboka antanirdeirin deyok nang aryi tola ati tatab-tatab eboka yuk dinyi-yuk dinyi ilinto aryi ebmai.

⁴Tatab-tatab enmai ura, Pilatus biryi Er Yesus bisi tubto ato eboka asibdenmou. “A nang aryi deyok ilinto eboka tatab-tatab ebmaking bok, Kanci limdaron uram ton kum dekeibkwamarim do?” eboka asibmou.

⁵Uca, Er Yesus biryi Pilatus bisi uram ton kum tamubdeibmou. Ba, er Pilatus biryi, “Naie, unatoa ati, Erdamnyi libdarona kum kubmar do?” tenebmou.

⁶Ura, er Pilatus biryi, “Anyi bira malinyi kum kurur ati, una kuboka lebkwan do?” tenebmou. Tenebmou cok, erci ato tenebmou. “Weik kwalina talak berengnande ba, tabwe deamingnyi tentoknyi bisi lordeiriran. Ara, sun Yahudi yala nang aryi wiboka, ‘Anyi bisi lobdeibsurum,’ eboka sunci wibmanginyi bisi lordeiriran. Ati, ukuryok ara kwalina sirya berekmar ati, niryi sun Yahudi yala nang asi, ‘Unanyi bisi lobdeibkwan do?’ eboka asibkun. Asibnyi uca, sunci ‘Er Yesus bisi lobdeibsurum,’ ebingnyi ura, niryi Er Yesus bisi lobdeibkun,” tenebmou.

⁷Ba, a talak aryi ninyi wenen ai dongoamunyi si Barabas a kuramwe. Anyi bira ninyi oamunyi kuramwe. Ara, Yahudi yala nang ilinto aryi bokom-bokom eboka, “Sun Roma nang ara nun atei asi yana arungnansing nang asi yakwetebkwayeb,” eboka buluamiryok, Barabas biryi ninyi oamwe.

⁸Ura, kwalina talak sirya berekmou ati, ninyi ilinto aryi buluboka er Pilatus bisi ato eboka molobmai. “Kwalina sirya berekmar ati, kanci kan ukurandim to tabwe debinyi bisi lobdeibsurum,” eboka molobmai.

⁹Ato eboka molobmai ba, er Pilatus biryi sunsi, “Er Yesus bira sun Yahudi yala nang weik sienyi bisi lobdeibkwinsin do?” ebmou.

¹⁰Ara, erci er kanya aryi ato tenebmou, “Sun Er Imtamnyi kan ninyi kan noutam kuboka antanirdeirin deyok nang ara sun mundu tulubmou ba, ‘Anyi bira malinyi bisi obdeibsutum,’ ebmaning bok, sun yuk nang aryi, ‘Anyi bisi lobdeibsutum,’ ebniting,” tenebmou ci, asibdenmou.

¹¹Asibdenmou ura, sun Er Imtamnyi kan ninyi kan noutam kuboka antanirdeirin deyok nang aryi murmurubdanin yibanmai ani, sunci, “‘Barabas bisi lobdeibsurum,’ ebdarur,” ebmai. Uca, sun bulubmai nang nirya aryi, “Barabas bisi lobdeibsurum,” ebmai.

¹²Ato ebmai ba, er Pilatus biryi sunsi, “Ura, anyi bira sunci, ‘Yahudi yala nang weik sienyi,’ ebmanurumnyi bisi niryi una kubkwan do?” eboka asibdenmou.

¹³Uca, sun a bulubmai nang nirya aryi uram weikanun doboka, “Co lase deici laboka bing dakdarur. Ba, dibdur,” ebmai.

¹⁴Asi, er Pilatus biryi sunsi tubto ato ebmou, “Sunci ato ebmanurum bok, Er malyi deyok ara ni ton kum bikman ati, sunci nisi lak ebnindarur.” Ebmou bok, sun bulubmai nang aryi uram doboka, “Er Yesus bisi co lase deici laboka bing dakdarur,” eboka ebtabak-ebtabak ebmai.

¹⁵Ebmai ba, er Pilatus biryi, “Niryi, ‘Ur,’ ebne ba, sun bulubmai nang aryi niti, ‘Ei, nun nai,’ tenebkwaning.” Ato tenebmou ci, erci sun bulubmai nang aryi molobmai to kunubmou. Ara, erci Barabas bira, “Lobdeibdarur,” eboka arukmou ura, erci Er Yesus bira, “Lituk-lituk eboka co lase deici likniboka bing dakdarur,” ebmou.

¹⁶Er Pilatus biryi, “Lituk-lituk eboka co lase deici likniboka bing dakdarur,” eboka arukmou ba, sun yin doun nang aryi Er Yesus bisi taleboka er Pilatus ai dam yin doun nang ai asi bowengbinmai. Bowengbinmai ura, sunci sun kwityabwe yuk yin doun nang nirya asi nabmai.

¹⁷Nabmai ura, sun yin doun nang nirya aryi, “Ina ngilikwayeb,” tenen Er Yesus ongon aling kwiribdeibmai ura, sien nang ongoramingnyi ato aling asi bol bi aling unuboka ongobdeibmai. Sirya ongobdeibmai ura, sunci sien nang kaluramnyi ato dinyi Er kisok asi ongobdeibmai. Ato dinyi ara kisok kaluna diba kuma, erda tiling-tiling aryi kwaniboka Er kisok asi ongobdeibmai.

¹⁸Ongobdeibmai ura, sunci, “Durukoka wenebkwayeb,” tenen “Ei nun nai teleb, Yahudi yala nang weik sienyi,” ebmai.

¹⁹Ato ebmai ura, bu kama aryi Er Yesus kisok tam lituk-lituk eboka si maka tulubdeiboka ina ngilikmai. Ina ngilikmai ci, yin doun nang aryi sun kutam ikdongoboka, “Ei nun nai, Kanda nun nai teleb,” ebmai.

²⁰Ura, Er Yesus bisi lituk-lituk eboka sunci Ersi dongobdeibmai bol bi aling ara tubto kwiribdeibmai ura, Er ongororamwe aling ongobdeibmai. Ongobdeibmai ura, sunci Er Yesus co lase deici laboka bing dakwamai ati bobinmai.

²¹Sun yin doun nang aryi Er Yesus bisi ninyi on dam bobanmai bok, ninyi tentok si Simon bira Kirene ateinyi ab bisik noutumang ebdanmai. Anyi bira Aleksander ab Rufus ab sun nai bira baitam aryi yanganmou asi, sun yin doun nang aryi ersi, “Kanda, Er Yesus bobmar co lase asi bobmilibdum,” eboka arukmai. Ba, Simon biryi Er Yesus bing dakwamai co lase asi bobmilibmou.

²²Ura, banmai ani, ninyi on dam mutuk si Golgota dam bobinmai. A mutuk si ara nun uram aryi dangubibyi ura, “Ninyi kisok yangkol yok dam,” ebtibyi.

²³Mutuk Golgota dam sirya yanmai ura, sun yin doun nang aryi Er Yesus bisi u kum danan me anggur du yung ab me talbaliboka karebdenmai. Karebdenmai bok, Erci sunsi, “Kum doyibkwan,” ebmou.

²⁴Kum doyibmou ura, sunci Er Yesus bisi co lase deici laboka bing dakoka abiryi, co ikwelebmai. A sirya ukubmai ura, sunci, “Er ongorur aling kwiriblobmab ara unanyi dinyi kibkur do?” eboka keil im sukmai uca, lotok marbinmou keil deici sukmunyi bisi Er Yesus ongoramwe aling karebmai.

²⁵Ura, kiting deibkatabwe bok, sun yin doun nang aryi Er Yesus bisi co lase deici likniboka bing dakoka abiryi, co ikwelebmai.

²⁶Co sirya ikwelebmai ura, sunci lase deici asi, “Sun Yahudi yala nang weik sienyi,” eboka kerek sekdeiboka Er Yesus kisok dub ai asi labdeibmai. Ba, sun a bisik yibanmai nang nirya aryi dibden ura, nukoka, “Ei, Anyi bira a deyok akiryi co lase laboka bing dakmang,” tenen bikwamanung ati, sun yin doun nang aryi ato eboka kerek sekdongobmai.

²⁷Ura, sun yin doun nang aryi Er Yesus bisi co lase deici likniboka dakmai ura, yuk nang ninyi bitinyi ara ninyi oandei nang asi neiktoto co lase deici likniboka bing dakmai. Ara, tonyi bira Er Yesus siriktam kuboka ikoka bing dakmai ba, tonyi bira kwanimtam kuboka ikoka dakmai ci, Er Yesus ab tonkwa wenebmai.

²⁸Ato kubmai uca, Er Imtamnyi Uram umbura aryi ebdeiamwe to diboka kunubmou. Ara, “Ninyi aryi erda, ‘Sun malyi kun nang ab tonkwa milirandanyi,’ teneramnyi,” eamwe uram kunubmou.

²⁹Ura, sun bisik ai yibanmai nang aryi Er Yesus bisi ina ngilingmai. Ara, sunci Ersi ato eboka ina ngilikmai. “Kanda, ‘Er Imtamnyi biti dama deirin ai dakdeiboka uki winiryi aryok tubto dobkwan,’ erumnyi bica!

³⁰Kanci bing kwinibkaboka abmin ci, co lase deici aryi yuryarum. Kanci kandamnyi lebdandobdum, se!” enmai.

³¹Sun bisik ai yibanmai nang aryi ato eboka ina ngilingmai bok, sun Er Imtamnyi kan ninyi kan noutam kuboka antanirdeirin deyok nang ab sun Er Imtamnyi Uram eteren deyok nang ababyi ato ebdanmai, “Anyi bira yuk nang ara lemdeiramwe asi, Erdamnyi ara kum lemdaronmar,” enmai.

³²Ato enmai cok, sunci Er Yesus biti ato enmai, “Anyi bira Er Imtamnyi biryi bokdonokmounyi Ninyi Lemsurutnyi kuranci ura, Erdamnyi lebdandiryi co lase deici aryi yuryaci ura, nunci anyi bisi dib tenebkwayeb,” eboka ina ngilikmai. Asi, sun yin doun nang aryi Er Yesus ab tonkwa bing dakmai nang ababyi Er Yesus bisi ina ngilikmarei.

³³Ura, kiting dukduk en yakna amolbaryi kubmou bok, inibmou uca, a mutuk nirya kunuk dakmou. Ani, kiting yalingna kiting yakna winiryi aryi tubto berekmou.

³⁴Kiting terebmou ba, Er Yesus biryi uram weikanun doboka ato ebmou, “Eloi, Eloi, lama sabakhtani,” ebmou. Ara, nun uram aryi danguboka en ura ato, “Ni Nai Imtamnyi, Ni Nai Imtamnyi, Kanda Nisi unato ati taklobmanirim do?” eboka dobmou. (Mazmur 22:1)

³⁵Uca, sun dam a tikmai nang aryi kekebmai ci, ato ebmai, “Kekendarur e, Anyi bira Elia bisi nabmar,” ebmai.

³⁶Ba, ton yuknyi biryi, “Er Yesus bisi me dinibkwan,” tenen yandoka nutuma dobtaleboka sik me asi toubdongobmou ura, dinibmou. Nutuma ara lai urub asi lumubdeiboka dobwelebmou cok, erci Er Yesus bisi sik me dinibmou. Sirya dinibmou ura, erci sun ina ngilikmai nang asi, “Takdarur se, er Elia biryi yandoka Ersi lebdeibkwamar ati dibde bukwayeb,” ebmou.

³⁷Ato ebmou ura, Er Yesus biryi uram weikanun dobmou ura, isin dakdobmou.

³⁸Sirya dibmou ura, Bait Allah ai umbura aryi ilil tenen dinyi kiknibmou. Ara, wilimna dolorkweteramnyi aling asi noutumang kwilikde yuryibinmou.

³⁹Ura, sun yin doun nang sienyi biryi Er Yesus dam otam tikoka dinmou aryi Er Yesus dibmou uca, ilil tenen dinyi kubmou ba, “Nai ilil tenen dinyi aca,” tenebmou ura, “Diba, Anyi bira Er Imtamnyi Mi kurur,” ebmou.

⁴⁰Ba, Er Yesus dibmou ura, nerabwe mikbaryi ara yuk ai tikoka dinmai. A nerabwe kankan ara Maria Magdalena ab, Salome ab, yuk Maria bira kam nang si Yakobus ab Yoses ab sun kwin kuboka tikmai ci, dinmai.

⁴¹A nerabwe ara Er Yesus Galilea mutuk kuramwe ura, Ersi miliboka dirniliramnyi nerabwe. Ba tonda, yuk nerabwe ilinto ara Er Yesus ab tonkwa Yerusalem atei binamnyi nerabwe ababyi, yuk ai tikoka a dinyi nirya eibmai.

⁴²Kunmai ani, inibwe ura, sun Yahudi yala nang aryi wa in kum uki si Sabat tum dam kubmou. Ara, kiknibminingna uki tum tuba kubmou bok, ninyi tentok si Yusuf atei Arimateanyi biryi er Pilatus dam bindoka, “Niryi Er Yesus dibmara tukwi ara keil umbura dam dongorbinkwan,” eboka molobmou. Anyi Yusuf bira sienyi uram sangkweteramunyi kuramuryi, erci Er Imtamnyi Iya Erebdobnyi kurur ci, ninyi leboka kalikwansir talak asi dibde buramunyi kuramwe.

⁴³

⁴⁴Er Yusuf biryi Pilatus bisi molobmou ba, “Naie, Er Yesus sirya dibmar darib?” tenebmou ura, erci sun yin doun nang sienyi bisi asibdenmou, “Dan kiting yakna aryi dibmar do?” eboka asibdenmou.

⁴⁵Uca, sun yin doun nang sienyi biryi Er Yesus dibmou kiting yakna lak ebmou ura, er Pilatus biryi Yusuf bisi, “Er tukwi ara ur doboka keil umbura dongorbirum,” ebmou.

⁴⁶Ura, Yusuf bindoka namin ongon aling asi dekmou ci, Er Yesus dibmou tukwi co lase deici aryi dobkweteboka a namin ongon aling aryi akubdeibmou. Sirya akubdeibmou ura, erci Er Yesus tukwi asi keil umbura dam deibdongobmou. A deirirbinmou keil um ara keil asi teleboka ukamnyi keil um asi deibdongobmou. Deibdongobmou ura, erci a keil bublan bongobdongobnin-bongobdongobnin banmou ani, tirikdongobmou.

⁴⁷A dongorbinmou ura, Maria Magdalena ab, Yoses er kwin Maria ab ara dinmarei bok, er Yusuf biryi Er Yesus dibmoua tukwi asi keil umbura dam deibdongobmou.