Read Futuna-Aniwa Markus 16 Bible Online

Markus 16 - Futuna-Aniwa bible

Markus 16

¹Mabmai ani, sun Yahudi yala nang aryi wa in kum uki tum asi berekmou ani, kiting sirya wekmou ura, sun Yahudi yala nang aryi wa in kum uki tum sirya bisibmou. Ba, Maria Magdala atei ner ab, Yakobus er kwin si Maria ab, Salome ab aryi, “Nun Du nong asi bindoka lubdeibkwayeb,” teneboka tong teleb co yung asi dekmai.

²Ura, mabmai ani, sun Yahudi yala nang yuk uki tum eramnyi tum berekwe ura, belekuna kobdob kubmou ara, a nerabwe aryi Er Yesus tukwi dongobmai keil umbura dam binmai.

³Bisik ai banmai ura, a nerabwe ara ato ebdanin banmai, “Naie, keil bublan tirikna ara weik ati, unanyi biryi bongoboka kukeibkwamasir do?” eboka asibdanin banmai. Ani, damtoto bindoka dirderamnyi uca, bublan keil sirya kuklobmou asi eibmai. Ura, “Naie, una kubmar do?” tenebmai.

⁵Ura, a nerabwe keil umbura wengbindoka diramnyi uca, “Naie,” siriktam lingkwa asi kamnyi tentok bukmou asi asing eibmai. A kamnyi bira kait ongon aling ongobmunyi bisi asing eibmai ura, a nerabwe sun ilil aryi lukdanmai.

⁶Ato kuboka lukdanmai bok, a kamnyi biryi sunsi, “A nerabwe, sun ilil kusina mem,” ebmou. Ebmou cok, erci sunsi, “Sunda Er Yesus Nazaret ateinyi bisi co lase deici bing dakmainyi biti ingkiringmarum ara, Erda atam kum eibkwamarum. Sun Du bira dibmou ani, sirya kam bukokmar. Sun Du maibmongwe ai ara olong dem kubmar a, dibdendarur.

⁷Sirya dibdemunyi ura, Er Yesus milinung nang asi bimunyi ura, ato eboka lak ebdarur, ‘Nun Du bira sirya kam bukokmar aryi, Galilea mutuk binmar. Ati, sun Du biryi sirya ebdeibmasou to, sunbabyi Galilea mutuk asi bindoka Er ab ebdankwandarur.’ Sunci ato eboka Er Yesus miliraming nang ab er Petrus bibabyi eterebdarur.” Ato eboka er kamnyi biryi a nerabwe asi eterebmou.

⁸Uca, a nerabwe sirim asa birbir eboka keil umbura dam aryi anaboka sun ilil weik aryi bindobmai. Bindobmai ura, sunda ilil weik kubmou ati, sun eibmai dinyi yuk nang asi lak kum ebmai.

⁹Er Yesus kam bukokmou uki tum ara Hari Minggu yuma uki tum belekuna kobdob aryi kam bukokmou. Kam bukokmou ura, Er Yesus biryi “Kam bukokman,” eboka Er miliramnyi nang ab ebdanmai. Ara, yuma kobdob ara isa tabaryi wekamwe asi Er Yesus biryi teleb kubdeiamwe ner si Maria Magdala atei ner ab ebdanmarei.

¹⁰Ebdanmarei ura, Magdala atei ner si Maria aryi bindoka Er Yesus miliramnyi nang dam asi, “Nun Du bira sirya kam bukokmar ba, ni ab ebdanmanim,” eboka nukmou. Bindoka nukmou bok, sunci, “Nun Du bira diba dibmou,” tenen tuba engenmai ara, er Maria biryi ebmou uram ara diba kum tenebmai.

¹²A sirya ura, Er Yesus bira Er milirandei nang ninyi bitinyi ab ebdanmai. A bitinyi nang ara, atei tam aryi kuboka baitam banmarei asi, bisik noutam aryi ebdanmai cok, sunci Ersi anmalakoka kum bikmarei. Ara, Erci Erdamnyi yuknyi kibdanmou deyok aryi, sunci Ersi anmalakoka kum bikmarei.

¹³Ura, Er Yesus biryi Erdamnyi lak kibdanmou ura, sunci bindoka sun kwityabwe asi, “Nun Du bira kam bukokmar,” eboka nukmarei. Bok, sun kwityabwe aryi a bitinyi nang lak ebmarei uram ara dib kum tenebmai.

¹⁴Ura, sirya kobdob ara Er Yesus biryi, “Ni sirya kam bukokman,” eboka Er miliramnyi nang koklombaryi nang yina yinmai bok, Er Yesus biryi Erdamnyi lak kibdanmou ci, sun ab tonkwa ebdanmai. Ebdanmai cok, Erci sunsi wenebmou. Ara, sun Er Yesus ab ebdanmai nang aryi, “Nun Du bira sirya kam bukokmar,” ebmai bok, sunci ton nang ebmai uram dib kum tenebmai ba, Erci sunsi, “Sun kanya kat deyok aryi, dib tenena mambul kubmasir,” eboka wenebmou.

¹⁵Sirya wenebmou ura, Er Yesus biryi Er miliramnyi nang asi ato ebdeibmou. “Sunda im dangna tukwe dangna mutuk nirya bimunyi ura, ninyi nirya asi Teleb Uram eterebde bindarur.

¹⁶Sun Nisi dib tenebningnyi nang ara me dongobmunyi ura, Er Imtamnyi biryi lebkwande. Ba, sun Nisi dib kum tenebningnyi nang asi Er Imtamnyi biryi bai donokoka iya wenebkwande.”

¹⁷Ebmou cok, Er Yesus biryi Er miliramnyi nang asi ato eterebmou. “Sun Nisi dib tenebningnyi nang ara Ni si deici aryi ilil tenen dinyi kiknibkwaming. Ara, Ni si deici aryi isa asi yakdonokwaming. Tonda, sun kum bingnamingnyi uram asi bikoka ebkwaming.

¹⁸Ba, Nisi dib tenebningnyi nang aryi kwatima asi talebingnyi bok, kum dibkwaming. Ninyi din me asi yibmunyi ababyi, ur kubkwandum. Ura, sunci sun u yiranci nang kisok deici asi sun taruk deibdongobmunyi ura, a nang ara Ni si deici aryi nakibdobkwaming.” Ato eboka Er Yesus bira dibmou ani, kam bukmounyi biryi Er miliramnyi nang asi eterebmou.

¹⁹Ura, Er Yesus bira erebdobmounyi biryi Er miliramnyi nang asi sirya eterebmou ura, Er Imtamnyi mikib aryi Ersi imtam bowelebinmou. Imtam bowelebinmou ura, Er Yesus bira Iya Erebdobnyi kiboka Er Nai Imtamnyi bisi siriktam burbinmou.

²⁰Burbinmou ura, Er miliramnyi nang ara anaboka im dangna tukwe dangna mutuk nirya bindoka Teleb Uram eterebde binmai. Eterebde banmai ba, Er Imtamnyi biryi miliboka ilil tenen dinyi kikniramwe. Ara, ninyi nirya aryi Teleb Uram dib tenebkwamnyi ati, Er Imtamnyi biryi miliboka ilil tenen dinyi kikniramwe.