Read Futuna-Aniwa Markus 2 Bible Online

Markus 2 - Futuna-Aniwa bible

Markus 2

¹Kunmai ani, Er Yesus Kapernaum atei tamuboka binmou. Binmou ura, uki bitinyi kum winiryi kum mabmai ura, ninyi aryi, “Er Yesus atei tamuboka yanmararyi akai bukmar,” eboka lak ebmai ba, ninyi nirya aryi bikmai.

²Sirya bikmai ura, ninyi ilinto aryi Er Yesus bukmou ai dam buluryanmai uca, akai bublan dam ara sokon nirya libmou. Asi, Er Yesus biryi sunsi Teleb Uram eterebmou.

³Eterenmou bok, ninyi mikbaryi nang aryi yan deneamunyi bisi co malouwa caboka Er Yesus dam asi boyanmai. Ara, a boyanmai nang aryi ato tenebmai. “Er Yesus biryi nun kwit bisi kwetebte,” teneboka boyanmai.

⁴Boyanmai bok, ninyi ilinto libmai aryi, sunci Er Yesus dam bobinman kum kubmou. Damtoto bobinman kum kubmou ati, sunci akai aruma welebindoka, “Er Yesus adikum kobdob bukmar,” teneboka aruma dangabdeibmai. Aruma dangabdeibmai ura, sun kwit malouwa deici mabmoua kibmaning asi nimalyi-nimalyi dobkwetebmai.

⁵Dobkwetebmai ura, Er Yesus biryi, a nang dib tenen dinyi bikmou ura, Erci er yan deneamunyi bisi ato ebmou. “Ni mi, kan malyi kuramumwe dinyi ara Niryi sirya kilibmakin,” ebmou.

⁶Ato ebmou ba, sun Musa kerek sengna etereramnyi nang ababyi akai dam bukmai aryi Er Yesus biryi ebmou uram asi kekebmai ci, sun kanya tam aryi, “Se,” tenebmai.

⁷Ati, sunci, “Unato ati, Er Yesus biryi ninyi aryi ebman kum dinyi asi talyi ebmar do? Er Imtamnyi biryok nun malyi dinyi kilibsurur. Nun ninyi mamun aryi, ‘Kan malyi kurandim dinyi kilibmakin,’ ena ara mem dinyi kurur. Ati, ato ebmar ara anyi biryi Er Imtamnyi si yan yanibmar,” tenebmai.

⁸Sunci ato tenebmai bok, Er Yesus biryi sun tenebmai kanya bikmou ci, Erci sunsi ato eboka asibmou. “Unato ati, sunci, ‘Talyi ebmar,’ tenebmanurum do?” eboka asibdenmou.

⁹Ato eboka asibmou cok, Erci sunsi, “Dan dinyi asi caknam tenebmarum do? Niryi a yan deneamunyi bisi, ‘Kan malyi kuramumwe dinyi kilibmakin,’ ena ara caknam do? Niryi ersi, ‘Tikokmin ci, kan amsuna dobobdobminyi ura, bindobdum,’ ena asi caknam tenebmarum do? Sunci Ni ebkun uram asi diboka kekebdarur, ninyi kwetena ab, sun malyi kun dinyi kilina ab ara neiktoto ara caknam dinyi kuma. Ninyi kwetena ab malyi dinyi kilina ab ara Er Imtamnyi mikib aryok kikninun.

¹⁰Ni Ninyi Dasinyi kunun ati, Niryi sun tukwetam kurandum nang sun malyi kun dinyi kilina ara Nira kikibnyi kunun. Ati, sunci Nisi Er Imtamnyi bokwetebnounyi bisi, ‘Malyi kun dinyi ur kilisurutnyi,’ tenen bikwandum ati, Niryi anyi bisi kwetebkun,” ebmou.

¹¹Ato ebmou cok, Er Yesus biryi yan deneamunyi bisi ato ebmou. “Ni mi, kanda tikokmin ci, kan amsuna doboka dobdobminyi ura, kan ai ur bindobdum,” ebmou.

¹²Ba, a yan deneamunyi er yan mikib kubmou ba, ninyi nirya dinmai bok, tikokmou ci, erci er amsuna doboka bobdobmou ura, er ai binmou. Ba, sun ninyi nirya aryi “Naie, ato kubmar dinyi ara minob ton kum eiriramoubwe,” ebmai ci, Er Imtamnyi si weik ebmai.

¹³Kunmai ani, Er Yesus Galilea mutuk aryi weik mekwan dam tubto tamuboka binmou. Binmou ura, ninyi ilinto aryi Er dam buluryanmai ba, Erci sunsi Teleb Uram eterebmou.

¹⁴Eterebmou ani, sirya eterebmou ura, bisik ai banmai ci, Er Yesus biryi diramwe uca, ninyi tentok Alfeus mi si Lewi asing eibmou. Anyi bira sun bisik yibaronmangnyi nang asi, “Sunci Roma nang weik sienyi Kaisar biti pajak dengna karebdarur,” eboka molormilin ai bukmou asi asing eibmou. Ura, Er Yesus biryi ersi ato ebmou. “Nisi milibnurum,” ebmou. Ebmou ba, Lewi tikokmou ci, Er Yesus bisi milibmou.

¹⁵Milibmou ba, Lewi ai binmai ci, yina yibmai bok, ninyi ilinto sun ab tonkwa yina yibmai. A nang ara, Roma nang weik sienyi Kaisar biti pajak dengna molormiliramnyi nang yuk nang ilinto ab, tonda, yuk nang ara ninyi aryi ina ngilikoka “Malyi kuraming nang,” eramnyi nang ababyi wekmai ura, Er Yesus ab Er miliramnyi nang ab tonkwa yina yibmai. A nang ara ninyi ilinto aryi, “Er Yesus uram kekebtibyi,” tenen Ersi milibmai ci, Er ab tonkwa yina yibmai.

¹⁶Tonkwa yina yinmai bok, Musa kerek sengna etereramnyi nang ton yanmai ci, eibmai ura, sun kanya tam aryi, “Se,” tenebmai. Ura, sunci Er Yesus miliramnyi nang asi ato ebmai. “Unato ati, sun Du ab, sun Kaisar biti dengna molormiliraming nang ab, yuk malyi kun nang ab tonkwa kunung ci, yina yinmang do? Sun Du bira ukubman kum dinyi kubmar,” eboka kerebmai.

¹⁷Asi, Er Yesus biryi a ebmai uram kekebmou ci, Erci kiklina uram doboka sunsi ato ebkarebmou, “Sun kib nang aryi ninyi kwetenanyi bisi kum namnaming. Erda sun yun taleranci nang aryi, ‘Kwetebnurum,’ eboka namnaming. Nibabyi neiktoto ninyi kwetenanyi bitonyi kunun. Ati, sun kanya aryi, ‘Nunda teleb to akwe kunub nang,’ teneramingnyi nang asi bisiboka Niryi sun malyi kuramingnyi nang asi diryanganun. Niryi, ‘Sunci sun malyi kurandau dinyi takdarur,’ enun cok, sun malyi kuamingnyi nang asi teleb kubdeibkwan ati yanman.” Ato eboka Yesus biryi sun Musa kerek sengna etereramnyi nang asi ebkarebmou.

¹⁸Sun Yohanes ninyi me dongoramunyi bisi miliramnyi nang ab, ton sun Farisi nang ab aryi, “Er Imtamnyi kanya teleb kubdeibkwayeb ati, yina si teboka buna teleb,” tenen si teboka buramnyi. Si teboka buramnyi bok, Er Yesus miliramnyi nang ara ato kum kuramnyi. Ura, uki tentok tum aryi ninyi ton nang aryi Er Yesus dam yandoka sunci Ersi ato eboka asibmai. “Nai, er Yohanes bisi miliraming nang ab, ton sun Farisi nang miliraming nang ab ara yina si teboka buraming bok, unato ati Kan miliranking nang ara ato kum kuranung do?” eboka asibmai.

¹⁹Bok, Er Yesus biryi kiklina uram aryi doboka sunsi uram dekeibmou. Ara, Erci sunsi ato ebmou. “Ner te murumna tum aryi sun ner dobkwandinyi ab tonkwa kuramingnyi nang ara yina si teboka kum buraming, erda, yina yiraming. A nang ara ner dobkwandinyi ab tonkwa kuramingnyi ura, sun kanya kilkil deyok aryi, yina si teboka kum buraming. Ato aryi Ni miliraning nang ababyi neiktoto ukunung. Nunda uku talak ara tonkwa tuba kuramib deyok aryi, nun kanya kilkil kuransir ati, si teboka kum buramib.

²⁰Ani, aminda aryi Ni miliraning nang sunbabyi si teboka bukwaming. Ara, ninyi aryi Niryi sun kanya teleb kurdeirinanyi bisi dobtaleboka bobiningnyi talak aryi, Ni miliraning nang mambul kanya bobingnyi uca, si teboka bukwaming,” ebmou.

²¹Ato ebmou cok, Er Yesus biryi yuk kiklina ton doboka sunsi ato eterebmou. “Nunci minob ongoramibyi aling kwilikci ura, ukuryok aling bilul aryi sektaleboka me ilingna kum aling asi tablakdongoboka ton deneramib do? Ato kum kuramib. Ato kubtibyi ura, akaling nirya tarakte. Ato kuboka, sirya denebdongobtibiryi, ongon aling asi me ilikoka kiting ai labtibyi ura, ukuryok aling aryi tablakdongobmatibyi aling asi liboka nurubte. Ura, a denebmatibyi ongon aling ara nirya tarakte,” ebmou.

²²Ato ebmou cok, Er Yesus biryi yuk kiklina doboka neik deyok akwe eterebmou. Ara, Erci sunsi ato ebmou, “Nunci anggur du dakoka urubdongobmabyi ura, anggur du yung doboka minob moyok asi dingdongoramib do? Ato kum kuramib. Ato kubtibyi ura, anggur du yung nirya asi diksakte. Ara, ukuryok anggur du yung ara bung-bung eboka minob kiknianting moyok minola luboka anggur du nirya diksakte.” Ato eboka Er Yesus biryi eterebmou. Ara, ato ati, Erci sunsi eterebmou. “Sunci, ‘Teleb Uram ab minob kunuramnyi dinyi ab ara tabtabukman kum,’ tenen bikting,” tenebmou ci, ato eboka eterebmou.

²³Kunmai ani, sun Yahudi yala nang wa in kum uki si Sabat tum berekmou bok, Er Yesus ab Er miliramnyi nang ab tonkwa talyi banmai. Uki si Sabat tum ara sun Yahudi yala nang aryi wa in kum uki tum berengnamwe. Asi, Yesus ab Er miliramnyi nang ab ara gandum wa in dam banmai ura, Er miliramnyi nang kwaning atanmou ba, gandum du dakoka yik yibmai.

²⁴Yik yibmai asi, sun Farisi nang aryi eibmai ci, Er Yesus bisi kereboka ato ebmai. “Dibderum, Kan miliranking nang ara ukuna mem dinyi asi ukunmang. Nun aibwe Musa biryi, ‘Uki ta tum si Sabat berekci ura, wa ina mem,’ eansou bok, Kan miliranking nang aryi gandum du dakoka yibmang ara, Musa Uram asi yan yanibmang ci, kubmang,” ebmai.

²⁵Ato eboka wenebmai asi, Er Yesus biryi sunsi ato ebmou. “Ni miliraning nang aryi kubmang to ara mem kuma. Minob talak aryi nun aibwe Daud ab er miliramnyi nang ab kwaning atanmou ba, ‘Erci ukubmou dinyi ara una kubmou do?’ asi sun ton bingdarur do? Erci kubmou dinyi ara Er Imtamnyi kerek sengna umbura aryi sekamnyi ati, sunci nukoka dibde ebmandau do?

²⁶Nun aibwe Daud ab er miliramnyi nang ab kwaning atanmou ba, erci keis ol ai si Kemah Suci ai dam binmou. Ura, erci Er Imtamnyi kan ninyi kan noutam kuboka antanirdeirin sienyi si Abyatar bisi ato eboka molobmou. ‘Nun kwaning atanmasir ati, Er Imtamnyi biti dama deirin roti kwaning a kubmar dinyi ara nunti dobkarebsiminyi ba, nun yibkwayeb,’ eboka molobmou ba, Abyatar biryi, ‘Ur yibdarur,’ ebmou. Ura, nun aibwe Daud ab er miliramnyi nang ab aryi Er Imtamnyi dama deirin roti asi doboka yibmai. A roti kwaning ara talyi nang ton kum dobde yiramnyi erda, Er Imtamnyi kan ninyi kan noutam kuboka antanirdeirin nang akikwe yiramnyi bok, dobkarebmou ba, yibmou,” ebmou.

²⁷Ato ebmou cok, Er Yesus biryi sunsi ato eterebmou. “Er Imtamnyi biryi, ‘Uki ta tum aryi wa ina mem,’ eansou ara, ‘A uki tum ara ninyi nirya aryi te louboka bukwanung,’ tenen eansou. Ato eansou cok, Er Imtamnyi biryi, ‘Ikin dinyi takubdeibkwan,’ kum tenesurur.

²⁸Ba, Ni Ninyi Dasinyi kunun ati, Niryi, ‘Uki ta tum aryi ato kuna teleb, ato kuna mem,’ ena ara kikibnyi kurun.” Ato eboka Er Yesus biryi Er miliramnyi nang asi libdobmou ato eterebmou.