Read Futuna-Aniwa Markus 3 Bible Online

Markus 3 - Futuna-Aniwa bible

Markus 3

¹Kunmai ani, uki ta tum ara wa in kum uki tum tubto kubmou ura, Er Yesus bira Musa Uram eteren ai wengbinmou. Asi, ninyi tentok ara taruk lamaamunyi bibabyi akai umbura bukmou.

²Bukmou ba, Farisi nang ara Musa kerek sengna asi diblilibde kunuramnyi nang ton ababyi akai umbura bukmai aryi sunci, “Er Yesus biryi anyi bisi arub aryi kwetebkwamar do? Arub ara wa in kum uki tum aryi kwetebci ura, nunci Ersi, ‘Ukubman kum dinyi asi ukubmarim,’ eboka wenebkwayeb,” teneboka dibde bukmai.

³Dibde bukmai bok, Er Yesus biryi taruk lamaamunyi bisi naboka, “Ni mi, kan a noutam tingyarum,” ebmou.

⁴Ba, er taruk lamaamunyi noutam tingbinmou ura, Er Yesus biryi sun Farisi nang asi ato ebmou. “Kekendarur. Uki ta tum ara nun wa in kum uki tum aryi ninyi aryi teleb kuna teleb do? Malyi kuna teleb do? Uki ta tum ara ninyi lemna tum kurur do? Ninyi on tum kurur do?” eboka Er Yesus biryi sunsi asibmou bok, sunci Ersi uram ton tamuboka dengdeina kum kubmai.

⁵Uram tamuboka dengdeina kum kubmai ba, Er Yesus biryi Er kanya aryi, “Se nai kobe, a nang kanya ara kat weik aryok e,” tenebmou. Ura, yu urasin bobdobmou ci, sun nirya asi dibkankanikokdenmou ci, Erci er taruk lamaamunyi bisi ato ebmou. “Ni mi, kan taruk ninikokdum,” ebmou. Ebmou ba, er taruk lamaamunyi biryi er taruk ninikdenmou uca, er taruk mikib kubmou.

⁶Ato kubmou ba, sun Farisi nang ara tikoka bindobmai ci, sunda er weik sienyi si Herodes miliramnyi nang asi bindoka “Er Yesus bisi una kuboka obkwayeb do?” eboka marmun yibmai.

⁷Er Yesus biryi er taruk lamaamunyi bisi sirya kwetebmou ura, Er ab Er miliramnyi nang ab anaboka Galilea weik mekwan dam asi banmai. Banmai bok, ninyi ilinto ara Galilea mutuk nang ab, Yudea mutuk nang ab yandoka milibmai.

⁸Tonda, sien atei Yerusalem kuramnyi nang ab, Idumea mutuk kuramnyi nang ab, Yordan me otam lingkwa kuramnyi nang ab, Tirus ab Sidon ab mutuk kuramnyi nang ab ara ninyi ilinto kuramiryok, buluboka Er Yesus dam yanganmai. A nang ara yuk nang aryi, “Er Yesus biryi ilil tenen dinyi kikniransir,” en uram kekebmai ati, Er Yesus dam yanganmai.

⁹Ninyi ilinto yanganmai ati, Er Yesus biryi Er miliramnyi nang asi ato ebmou, “‘Ninyi aryi ibdongobningnyei,’ tenen Ni kisibdobniryi lobdan ai co ngun-ngun deici bukwan. Ati, sunci mitik co ngun-ngun boyandarur,” ebmou.

¹⁰Ara, Er Yesus biryi yun taleramwe nang ilinto asi kweteramwe ati, sunci yun taleramwe nang ilinto asi Er dam boyanmai. A yun taleramwe nang aryi, “Nunbabyi kwetebkwansir ati, Er bol libdetibyi,” teneboka Er Yesus bisi ibdongobdenmai.

¹¹Tonda, sun isa wekamwe nang Er dam yanmai ba, isa aryi Er Yesus bisi asing eibmai ci, sunda luknubdongoboka tukwetam sakmai. Isa aryi uram weik eboka sakmai cok, “Kanda Er Imtamnyi Mi kurum,” eboka lak ebmai.

¹²Lak ebmai bok, Er Yesus biryi, “Nira Er Imtamnyi Mi kunun bok, sunci Nisi lak enina mem,” eboka Erci isa asi erekdobmou.

¹³Uki tentok tum aryi Er Yesus mutuk kon welebinmou. Welebinmou ura, Erci Er wibmou nang akwe nabmou ba, sun kikwe weleboka Er dam binmai.

¹⁴Binmai ura, Erci ninyi amolbaryi nang tikeibmou. Tikeibmou ci, Erci a nang asi ato ebmou, “Ni kwityabwe, sunda Ni ab tonkwa kuramibyi ani, aminda aryi Teleb Uram deyok kouboka lak eterebde binkwandum ati, Niryi sunsi tikeibkwinsin,” ebmou.

¹⁵Ato eboka tikeibmou cok, Erci sunsi ato ebmou, “Sunci isa asi yakdonokoka sun isa wekanci nang asi teleb kibdeibkwandum ati, Niryi sunsi Ni mikib aryi karebkwinsin,” ebmou.

¹⁶Er Yesus biryi Teleb Uram eterebde binkwamnyi nang ara Erci tikeibmou nang sun si ara ato. Simon bisi tikeibmou. Anyi bisi Yesus biryi si doboka, “Petrus,” ebmou.

¹⁷Tonda, Yakobus ab er weit Yohanes ab asi Yesus biryi tikeibmou. A nang susuk ara Zebedeus mabwe kurandei asi Er Yesus biryi “Boanerges,” ara nun uram aryi “Liman lilim en nang,” eboka si dobmou. A nang susuk sun uram sisingnandei ara bokom-bokom eboka liman lilim ato ebde sisingnangdei. A deyok aryi, Erci “Liman lilim en nang,” eboka sun si dobmou.

¹⁸Ba, Er Yesus biryi tikeibmou nang yuk nang ara: Simon Petrus er du si Andreas ab, tonda, Filipus ab, Bartolomeus ab, Matius ab, Tomas ab, Alfeus mi Yakobus ab, Simon Zelot ab. Anyi Simon bira “Sun Roma nang asi nun mutuk aryi kuboka yakdonokwayeb,” teneramunyi kuramwe.

¹⁹Tonda, Yudas Iskariot bira Yesus bisi kikibkwamunyi bibabyi Er Yesus biryi tikeibmou. A nang amolbaryi nang ara Er Yesus biryi, “Teleb Uram eterebde binkwaming,” tenen sunsi tikeibmou.

²⁰Sirya tikeibmou ura, Er Yesus ab Er miliramnyi nang ab mutuk kon dam aryi yuryandoka ai tentok asi wengbinmai. Wengbinmai ba, ninyi ilinto buluboka Er dam yanganmai. Yanganmai ati, Er Yesus ab Er miliramnyi nang ab aryi, “Yina yibkwayeb,” tenebmai asi, yina yibman kum kubmou.

²¹Yina yibman kum kubmou bok, Yesus Er kwin ab Er weityabwe ab sun ababyi yanmai. Ara, ninyi aryi tola ati “Er Yesus bira luba talebmar,” ebmai deyok aryi, sunci a uram asi diba tenebmai ci, “Nun Du taruk taleboka ai bobinkwayeb,” tenen yanmai.

²²Ato tenen yanmai ura, Musa kerek sengna etereramnyi nang ton sien atei Yerusalem aryi kuboka yanmai. A nang aryi Er Yesus biti ato ebmai, “Anyi bira isa sienyi si Beelzebul wekunyi kurur.” Ebmai cok, sunci “Anyi biryi isa sienyi mikib aryi isa asi yangdonongnande,” ebmai ci, talyi tam kerebmai.

²³Sunci ato eboka kerenmai bok, Er Yesus biryi kemdeirin uram doboka uram dekeibmou. Ara, sunsi ato ebmou. “Tola ati ebmanurum. Nira isa sienyi weknounyi kuma. Nira isa weknounyi kurantinyi ura, Niryi isa asi yangdonongnantinyi do? Niryi ato kum kurantinyi.

²⁴Atei bitinyi asi, ‘Unaci babwe kuramib,’ erdaramingnyi atei nang, ton atei nang aryi ton atei nang asi mamun ton ordaraming do? Ato ton kum ukunung. ‘Nun ordana nang aryi obkiriboka muna kibdongobsingnyei,’ tenebingnyi ura, sun mamun ton kum ordaraming.

²⁵Tonda, atei tentok aryi ai abala mar iya ordaramingnyi ura, akatei nang neiktoto minola iya kum dankwanung.

²⁶Ati, isa sienyi biryi er mining miliraming nang asi yakdonokte ura, er mikib minola kum dankwamote,” ebmou.

²⁷Ura, ton ato ebmou. “Ura, yuk kiklina uram ton doboka eterebkwinsin. Ninyi tentok aryi mikibnyi atei bindoka, ‘Er bona asi dobdobkwan,’ tenebci ura, erci a mikibnyi bisi tabwe debdeibdiryok, er bona nirya asi dorande. Ati, Nibabyi neiktoto, Niryi isa sienyi bisi tabwe debniryok, Niryi er dinyi asi, ‘Ni dinyi,’ eran ci, sun isa aryi tabwe deamwe nang asi lemdeirinun,” ebmou.

²⁸Ebmou cok, Er Yesus biryi sunsi ton ato ebmou, “Diboka kekebdarur. Sun ninyi aryi malyi kurandum dinyi nirya asi Er Imtamnyi biryi kilibkwamasute. Tonda, sunci Er Imtamnyi si ina ngilikoka yanibmunyi ura, Er Imtamnyi biryi kilibkwamasute.

²⁹Erci a dinyi nirya kilibkwamasute bok, sunci Er Imtamnyi Kanya Roh Kudus asi ina ngilikoka yanibmunyi ura, a dinyi ara iya kum kilibkwansir. A dinyi ara iya malyi kun dinyi kurur ati iya kilibman kum dinyi kurur ba, Er Imtamnyi biryi iya teneirisurur,” ebmou.

³⁰Ato eboka Er Yesus biryi sunsi wenebmou. Ara, sun Musa kerek sengna etereramnyi nang aryi Er Yesus biti, “Isa sienyi wekunyi,” ebmai deyok aryi, Er Yesus biryi sunsi “Sunci ato eboka Er Imtamnyi Kanya Roh Kudus asi ina ngilikoka yanibmunyei,” ebmou ci, weneboka eterebmou.

³¹Ura, Yesus Er kwin ab Er weityabwe kobdob ab Er Yesus kunmou ai asi yanmai. Yanmai ura, bublan dam dibde tikmai ci, sunci yuk ninyi asi, “‘Yesus ab ebdatibyi,’ tenen yanmab ati, Ersi nambindarur,” ebmai.

³²Nambinmai ura, Er Yesus bira ninyi noutam kobdob asi bukmou ba, ninyi ilinto aryi Ersi noutam dongobdongoboka bukoka aknabdongobmai. Asi, sunci Ersi ato ebmai. “Nai, Kan kwin ab Kan weityabwe ab ara Kan ab tonkwa, ‘Ebdatibyi,’ tenebmang ci, yandoka bublan dam dibde tikmaking,” ebmai.

³³Ato ebmai bok, Erci sunsi, “Eterena ton eterebkun,” tenebmou ura, sunsi ato ebmou. “Ni kwin bira una ner do? Ba, Ni weityabwe ara una nang do?” eboka asibdenmou.

³⁴Asibdenmou cok, Erci sun Er dam bukoka asi bukoka aknabdongobmai nang asi dibdenmou. Ura, Erci Er taruk ukdongobde yibinmou ci, sunsi ato ebmou. “Dindarur, a wekmarumci asi Ni uram kekerandum nang ara Ni kwinyabwe ab Ni weityabwe ab kurandum ci.

³⁵Ati, unanyi-unaner aryi Er Imtamnyi kanya teleb kurdeirin dinyi kunuramingnyi ura, a nang ara, ‘Ni weityabwe,’ ab, ‘Ni malnerabwe,’ ab, ‘Ni kwinyabwe,’ ab kuramingiryi,” eboka Er Yesus biryi sunsi eterebmou.