Read Futuna-Aniwa Markus 4 Bible Online

Markus 4 - Futuna-Aniwa bible

Markus 4

¹Ura, Er Yesus biryi Galilea weik mekwan dam tamuboka binmou ci, Erci Er Imtamnyi biryi Teleb Uram eterenmou. Ba, ninyi ilinto Er dam buluboka yanganmai uca, Erci kisibdobmou ci, co ngun-ngun deici burbindoka eterebmou. Eterebmou ba, sun buluboka yanmai nang nirya ara mekwan katum dam bukoka Er Uram kekebmai.

²Kekebmai ura, Er Yesus biryi kemdeirin uram yuk-yuk doboka sunsi eterebmou. Ara, Erci sunsi ato eboka eterebmou.

³“Ni kwityabwe, Ni kwinyabwe ab, Ni malnerabwe ab, sunci Ni eterebkwinsin uram asi kekendarur. Uki tentok tum aryi ninyi tentok wa damnyi er wa in dam binmou. Binmou ura, erci wa tubloamwe dam asi gandum du yala kwekde banmou.

⁴Kwekde banmou ba, ton yala ara bisik dam sakmou. Bisik dam sakmou dinyi ara, maka aryi yandoka a yala asi doyibsekmou.

⁵Ba, ton yala ara keil deici asi sakmou. Keil deici sakmou dinyi ara ola betekoka abmou.

⁶Ola betekoka abmou bok, yating tukwe umbura kum binmou ba, kiting tin aryi, koula dansekmou.

⁷Er wa damnyi biryi kwekde banmou bok, ton yala ara sungsunga kankan sakmou. Ba, a yala ara sungsunga kolong aryi du kum moubmou. Dola ara minola aboka nibmou aryi, a yala du kum moubmou.

⁸Er wa damnyi biryi tuba kwekde banmou bok, ton yala ara mirin tukwe, tukwe teleb ai sakmou. A yala ara betekoka abmou ci, du ilinto moubmou. Ton yala ara du tiga puluh baryi moubmou. Ba, ton yala ara du enam puluh baryi moubmou. Ba, ton yala ara du seratus baryi moubmou,” eboka eterebmou.

⁹Er Yesus biryi a uram eterebmou cok, Erci sun kekenmai nang asi ato ebmou. “Sun amol a kusurur nang ara Ni a ebman uram kekenmarum to asi diboka tuba teneina teleb,” ebmou.

¹⁰Er Yesus biryi a kemdeirin uram sirya eterebmou ura, Er miliramnyi nang amolbaryi nang ab Er dam kuramnyi nang yuk nang ab tonkwa bindoka yuk kunmai. Yuk kunmai bok, sunci, “A kemdeirin uram unato ati eterebmasir do?” teneboka Er Yesus bisi asibdenmai.

¹¹Asibdenmai ba, Er Yesus biryi sunsi ato ebmou, “Sunda Ni uram talerandum nang kundarur ati, Niryi a kemdeirin uram deyok sunsi lak eterebkwinsin. Er Imtamnyi bira Weik Sienyi kurur ci, ninyi ilinto lebdeiboka Er amwetam bun nang kibdeibkwansir ara minob lak kum kuramwe dinyi asi sunci ur bikdarur. Ati, Niryi sunsi a kemdeirin uram deyok ati lak eboka eterebkwinsin. Ba, Niryi kemdeirin uram deyok asi sun yuk nang Ni uram kum taleraming nang dam ara lak kum kibkwan. A nang asi Niryi uram kebdeiboka kiklina uram dem aryok etereran.

¹²Ara, nabi Yesaya biryi minob kerek sekamwe to kunubkwande ati, Niryi a nang asi kemdeirina uram akwe eboka etereran. Er Imtamnyi biryi, ‘A nang sun kanya kat kurande,’ tenen minob bikmou ati, Erci Yesaya bisi ato eboka eterebmou, ‘A nang ara asing dinmangiryok, asing kum eibkwaming. A nang ara, “Kekebtibyi,” tenebingiryok, diboka kum kekebkwaming. A nang ara, “Er Imtamnyi dam tamuboka kum yankwaming,” teneramingiryok, “Er Imtamnyi biryi nun malyi kun dinyi kilibsicei,” teneraming.’ (Yesaya 6:9-10) Nabi Yesaya biryi sun Er Imtamnyi Uram diboka kum taleraming nang ati minob ura ato kerek sekdeiamwe,” ebmou.

¹³Er Yesus biryi ato ebmou ura, Erci Er miliramnyi nang asi tubto ato ebmou, “Ni kwityabwe, sunda Ni eterebmasin kemdeirin uram deyok kum bikmarum do? Sunci a eterebmasin kemdeirin uram deyok kum bikmarum ati, yuk kemdeirin eterebkwansin uram deyok ara una kuboka bikwandum do? Ati, Niryi sunsi a eterebmasin kemdeirin uram deyok lak eterebkwinsin.

¹⁴Er wa damnyi biryi yala kwekde banmou yala ara Er Imtamnyi biryi eteresurur uram kurur ati ebmonwe.

¹⁵Kwekde banmou bok, ton yala ara bisik dam sakmou ebmonwe. A dinyi ara Er Imtamnyi Uram keken nang kankan ton nang aryi kuraming to ati kiklibmonwe. A nang ara Er Imtamnyi Uram kekeramingnyi bok, isa sienyi minola yandoka, ‘A nang ara Er Imtamnyi Uram asi dib teneibingnyei,’ tenen, erci Er Imtamnyi biryi ebmaci uram asi ukula dorsengnande. Ara, maka aryi a bisik dam sakmou yala doyibsekmou ebmonwe ara, isa sienyi biryi Er Imtamnyi biryi ebmaci uram ukula dorsengnande.

¹⁶Ura, ton yala ara keil deici asi sakmou. A dinyi ara Er Imtamnyi Uram asi kekeraming nang yuk nang asi kuraming to kurur. A nang ara Er Imtamnyi Uram kekeramingiryok, sunci kilkil kanya boboka a uram minola taleraming.

¹⁷Sunda Er Imtamnyi Uram asi kilkil kanya boboka minola taleraming asi, diboka kum taleraming, erda tiya akwa taleraming. A nang sun kanya dam aryi Er Imtamnyi Uram yating kum dianci aryi sunda Er Imtamnyi Uram iya kum taleraming. Ara, ikin dinyi bobkalibingnyi ba, sun kanya mambul kubci ura, a nang ara Er Imtamnyi Uram minola tangloraming. Tonda, sun yuk nang aryi ‘Obtibyi,’ tenen Er Imtamnyi Uram taleraming nang asi ingkirikoka domyangangnyi ba, a nang ara Ni uram diboka kum taleraming nang ara mambul kanya boboka Er Imtamnyi Uram minola tangloraming.

¹⁸Ura, ton yala ara sungsunga kolong dam sakmou. A dinyi ara Er Imtamnyi Uram keken nang yuk nang aryi kuraming to kiklibkun.

¹⁹A nang ara Er Imtamnyi Uram kekeramingiryok, sunci yuk dinyi-yuk dinyi teneiboka udikum kimnaming ba, Er Imtamnyi Uram diboka kum taleraming. Tonda, yuk nang aryi, ‘Bona ara tiya dinyi aca,’ kum teneiriraming ci, ‘Bona ilinto bobdobtibyi,’ teneboka sunci Er Imtamnyi Uram diboka kum taleraming. Tonda, yuk nang ara utotoa yuk dinyi ati ingkiringnamingiryi, Er Imtamnyi Uram diboka kum taleraming. Ba, a nang ara sun kanya dam aryi Er Imtamnyi Uram du kum mourande.

²⁰Ura, sirya kobdob ara yuk yala ara mirin tukwe, tukwe teleb ai sakmou yala ebmonwe ara Er Imtamnyi Uram diboka kekeraming nang kurande to ati kiklibmonwe. A nang ara Er Imtamnyi Uram asi kekeramingiryi, a uram diboka taleraming. Diboka taleraming ci, Er Imtamnyi kanya teleb kurdeirin dinyi kunuraming. A nang sun kanya dam asi Er Imtamnyi Uram du mourande. Ara, ton nang kanya dam ara du tiga puluh baryi mourande. Yuk nang kanya dam ara du enam puluh baryi mourande. Ba, ton yuk nang kanya dam ara du seratus baryi mourande.” Ato eboka Er Yesus biryi a kiklina uram deyok Er miliramnyi nang asi lak kiboka eterebmou.

²¹Er Yesus biryi eterenmou ci, yuk kemdeirin uram ton doboka Er miliramnyi nang asi ato eterebmou. “Uk buk weisa asi uk abdeibibyi ura, belanga bublan asi deibdongoboka singirdongoramib do? Ato kum kuramib. Tonda, uk buk weisa asi uk abdeibibyi ura, ambonga dam asi deiriramib do? Ato kum kuramib. Erda, sun ai kuraming nang nirya asi uk milil arabkwandur nirya eibkwamangnyi to kuboka uk buk weisa abdeibibyi ura, erebdob ai deiriramib.

²²Ati, laktoto kum kurande dinyi ara ninyi aryi kum bingnamingnyi dinyi nirya ara lak kibkwande.

²³Sun amol kusurur nang ara a uram deyok diboka kekeboka bobdobdarur.” Ato eboka Er Yesus biryi eterebmou.

²⁴Ato eterebmou cok, Erci Er miliramnyi nang asi ton ato ebmou, “Niryi sunsi etereransin asi sunci kalikdandoka, ‘A uram deyok ara una deyok ati ebmar do?’ teneboka lilibdarur. Sunci kiklibmamunyi to, Er Imtamnyi biryi sunbabyi karebkwansir. Ati, sunci sulbalyi asa aryi Ni etereransin uram asi tentok-tentok lilibmunyi ura, deyok tentok-tentok akwe bikwandum. Ba, sunci busul kuboka ni etereransin uram asi tuba-tuba liliramunyi ura, deyok mitik kum bikwandum. Er Imtamnyi biryi sun kiklibmamunyi to karebdiryok, tabakdongoboka dekeibkwansir ati ebman.

²⁵Sun bona diboka kalingdoramingnyi nang asi nunci bona kareramib. Ba, sun bona waningnamingnyi nang ara nunci bona kum kareramib. Erda, sun bona waningnamingnyi nang taruk dam kubmaci dinyi ara nunci tamuboka dororamib. Ato kuboka Er Imtamnyi biryi Er Uram diboka liliraming nang asi Er Uram deyok tabakoka etereransir bok, Er Uram diboka kum liliraming nang ara Er Uram nirya dororande,” ebmou.

²⁶Er Yesus biryi eterenmou ci, Erci kimdeirina uram ton doboka ato eterebmou. “Er Imtamnyi biryi laktoto leboka kalikwansir tum deyok ati eterebkwinsin. A dinyi ara ninyi tentok aryi tukwe ai asi yala talyi tam kwekloaming to nang asi kiklibkun.

²⁷Anyi biryi yala sirya kweklobmaci ura, a yala ara yuk betekoka arande. Ara, yala kwekmarinyi bira kwekloboka mabci talak ababyi er dibde bun talak ababyi, lukunda talak ababyi, kitingtam talak ababyi a yala ara er yuk betekoka arande. Ara, ninyi aryi, ‘Yala ara una kuboka er yuk betekoka arande do?’ tenen kum bingnub bok, a yala ara er yuk betekoka arande.

²⁸Ara, kweklobmarinyi biryi dibde buranci ba, mirin tukwe ai tikanci yala ara er yuk du mourande. Ara, betekoka aranci ura, du nong maranci ura, du mourande.

²⁹Gandum du sirya mouranci ura, er wa damnyi yandoka touna ya aryi sekoka gandum du bulurkirande.” Ato eboka Er Yesus biryi Er Imtamnyi biryi laktoto leboka kalikwansir deyok eterebmou.

³⁰Eterenmou cok, Erci ato eboka eterebmou, “Er Imtamnyi biryi laktoto leboka kalikwansir deyok ara unato dinyi asi kiklibkwan do?

³¹A dinyi ara co uryi si sesawi du asi kiklibkwan. Co uryi si sesawi du ara du iya mitik aryi betekoka abci ura, ilila co tikoka te yangnande. A co uryi si sesawi co ara weik aboka yuk co mitik kimnande. Im dangna tukwe dangna asi iya weik arande co kurande. Kurande ati, weik maka ara imtam yibarande maka aryi yandoka a co bok kankan asi ai dorande. Er Imtamnyi biryi laktoto leboka kalikwansir dinyi ara neiktoto kurur. Ara, kubkalibmar ba, mitik to kubmar ati, laktoto kum kubmar. Kubmar ani, aminda aryi weiktoto dandoka lak kibkwande ara Er Imtamnyi biryi ninyi ilinto lebkwande,” ebmou.

³²

³³Ato ebmou cok, Er Yesus biryi sun Er dam buluryanganmai nang asi yuk kemdeirin uram yuk-yuk doboka eterenmou. Erci sunsi etereramuryi, sun kekeboka bingnamnyi to kikliboka etereramwe.

³⁴Ara, Erci sun yuk nang asi ara kemdeirin uram dem aryok eboka etereramwe ba, Er miliramnyi nang akwe ara kemdeirin uram deyok asi lak kiboka etereramwe. Ara, Yesus ab Er miliramnyi nang ab tonkwa yuk kuramiryok, Erci sunsi nirya lak kiboka etereramwe.

³⁵Er Yesus biryi sirya eterebmou ani, sintam danmou ba, sirya eterebmou ura, Erci Er miliramnyi nang asi ato ebmou. “Ni kwityabwe, nunda weik co ngun-ngun deici asi burwelebindoka atam aryi anaboka otam mekwan katum dam binkwayeb,” ebmou.

³⁶Ebmou ura, sunci sun buluryanmai nang asi, “Ura, nunda anabdobkub ati, bokdankwayeb. Sunda atei bindarur,” ebmai. Ura, bokdanmai ci, sunda weik co ngun-ngun deici burwelebinmai ura, sunda anaboka mekwan deici banmai. Banmai bok, ton nang ara yuk co ngun-ngun burwelebinmai ura, mekwan deici bindoka milibmai.

³⁷Mekwan deici banmai bok, lukdandoka ibalya weik dobkalibmou. Ibalya weik donmou uca, mekwan kwatib-kwatib eboka co ngun-ngun asi me aryi siklibmanto kunmou.

³⁸Co ngun-ngun asi me aryi langkibmanto kubmou bok, Er Yesus co ngun-ngun amwetam aryi kuboka kisok eremna deici erebdeiboka wi mablukmou. Wi mablukmou bok asi, sunci Ersi kamubdeiboka nabmai, “Nai Du o, ibalya weik donmar aryi nun me wekmanto kunmab ara, Kanda bico kum tenebmasirim do?” ebmai.

³⁹Ebmai ba, Er Yesus bukokmou ci, ibalya asi, “Kilikmin ci, takdum,” ebmou. Ato ebmou ba, ibalya kum dandoka me kwatib-kwatib ena ababyi kum danmou.

⁴⁰Ura, Erci Er miliramnyi nang asi, “Unato ati, ilil kubmasir do? Unato ati, sunci Nira mikibnyi bisi dib kum tenebmarum do?” Ato eboka Yesus biryi sunsi wenebmou.

⁴¹Sunda ilil weik kubmou ati, sun mamum asi ato eboka asibdanmai. “Naie, nun Du Yesus bira unatonyi kurur aryi ibalya ab me kwatib-kwatib ena asi, ‘Takdum,’ ebmar uca, ibalya ab me kwatib-kwatib ena ababyi kum danmar do?” ebdanmai.