Read Futuna-Aniwa Markus 5 Bible Online

Markus 5 - Futuna-Aniwa bible

Markus 5

¹Ibalya kum danmou ura, Er Yesus ab Er miliramnyi nang ab mekwan deici banmai. Banmai ani, Galilea mekwan koubkaboka otam katum asi Gerasa mutuk dararbinmai.

²Dararbinmai ura, Er Yesus ab Er miliramnyi nang ab co ngun-ngun deici aryi anaboka tukwe ai tingyurbai uca, isa wekamunyi tentok aryi sun ab ebdanmai. Anyi bira ninyi din nang tukwe dongoramnyi ai aryi anaboka yangau asi sun ab ebdanmai.

³Anyi bira ninyi din nang tukwe dongoramnyi ai akwe iya kuramuryi yu weik kuramwe deyok aryi besi tabwe ababyi debman kum kuramwe.

⁴Er atei nang aryi liki mitik kum er taruk ab yan ababyi tabwe demnamnyi uca, anyi mikib aryi besi tabwe ababyi bulurloramwe. Ba, anyi bisi ninyi aryi talebkataboka tabwe debman kum kuramwe.

⁵Ba, anyi bira kitingtam lukunda nirya aryi ninyi din nang tukwe dongoramnyi ai akwe iya kuramuryi, uram weik eboka ngolongnamwe. Anyi er yu weik aryi, erci keil doboka erdamnyi asi molongdaroramwe.

⁶Anyi biryi Er Yesus yanganmou asi asing eibmou ci, Er Yesus dam ola yandoka luknubdongoboka er kutam ikdongobmou.

⁷Ikdongobmou ba, Er Yesus biryi anyi wekamwe isa asi, “Isa, kan anyi umbura dam aryi anaboka bindobdum,” eboka yakdonokmou. Ba, isa aryi ngolok-ngolok eboka uram weik dobmou ci, Er Yesus bisi ato ebmai. “Kanda una kubkwansirim ati, yanmarim do? Yesus, Kanda Er Imtamnyi Mi, Er Iya Mikibnyi Mi kurum. Kanci nunsi obsiminyei. Kanci Er Imtamnyi si deib aryi, ‘Niryi sunsi kum obkwinsin,’ ebsurum,” ebmai.

⁸

⁹Ato eboka molobmai ba, Yesus biryi isa wekamunyi bisi, “Ni mi, kan si ara unanyi da?” eboka asibdenmou ba, anyi bira ato ebmou. “Nira isa ilinto seribu baryi kunun ati, ni si ara Legion,” ebdanmou.

¹⁰Ura, sun isa mer ilil wekamnyi aryi sunci Er Yesus bisi, “Kanci nunsi yuk mutuk asi yakdonoksiminyei,” eboka molobmai.

¹¹Ato eboka molobdobmai ba, a mutuk asinabyi asi ninyi winin bisam ilinto mol yinmai.

¹²Asi, sun isa mer aryi, “Yakdonokwamasiminyi ura, nunda ei mol yinmang bisam umbura asi wengbitibyi tenebmab ati, Kanci teleb ebsurum,” eboka molobdobmai.

¹³Molobdobmai ba, Er Yesus biryi, “Ur wengbindarur,” ebmou. Ura, isa mer ara sun wekaminyi umbura aryi anaboka a mol yinmai bisam umbura asi wengbinmai. Ura, a bisam mer yubwa ara dua ribu baryi kum ara nirya imun aryi me wengbinsekmai. Ara, mutuk asinabyi aryi cungyurbindoka mekwan umbura wengbindoka me isin daksekmai.

¹⁴Ba, sun a bisam mer kalingna nang aryi asing eibmai ura, cungbindoka atei yoka kuramnyi nang ab, bara atei kuramnyi nang ab, nirya asi a kubmou to lak eterebmai. Ura, a nang nirya diryanganmai.

¹⁵Sunda Er Yesus dam yanmai ci, asing diramnyi uca, isa mer wekamunyi bira Er Yesus biryi ersi teleb kubdeibmou. Ba, anyi bira ninyi kanya sirik bobmou ci, nong baning kuramunyi bisi ongon aling ongoboka ur bukmou asi eibmai. Ura, sun diryanmai nang aryi anyi ur bukmou asi asing eibmai ura, sun kanya ilil kubmou.

¹⁶Kubmou ba, sun a kubmou to asing eibmai nang aryi sunsi, “Er isa wekamunyi bisi Er Yesus biryi teleb kubdeibmar,” ebmai. Ebmai cok, sunci, “Er Yesus biryi isa asi yakdonokmar uca, isa ara bisam koukwe umbura dam wengbinmai. Ba, a bisam mer ara mekwan umbura wengbinsekmang,” ebmai.

¹⁷Ato eboka nukmai ba, a nang aryi kekebmai ci, sun ilil kubmou ati, sunci Er Yesus bisi, “Kanda nun mutuk kusin kum. Erda, anabdobmin ci, yuk mutuk bindobdum,” ebmai.

¹⁸Ba, Er Yesus biryi, “Ni binan,” ebmou ura, anaboka weik co ngun-ngun deici asi burwelebinkou ci welebarou. Bok, er isa wekamunyi bisi Er Yesus biryi teleb kubdeibmounyi biryi Ersi, “Nai Du, nira Kansi milibkitinyi,” eboka molobmou.

¹⁹Molobmou bok, Er Yesus biryi, “Kum, kanda kan atei biminyi ura, kan ai dam nang asi, ‘Er Imtamnyi biryi nisi bico teneboka abmanir aryi, Erci nisi isa wekanou dinyi yakdonokoka teleb kubdeibmanir,’ eboka lak etererbirum,” ebmou.

²⁰Ato ebmou ura, anyi biryi anabdobmou ci, Dekapolis mutuk asi atei takubaryi doramnyi mutuk yibarkirikoka a mutuk nang asi ato eboka lak eterebmou. “Nira isa wekanunyi bisi Er Yesus biryi teleb kubdeibmanir,” eboka lak eterebde yibinmou. Lak eterebde yibinmou ba, sun kekebmai nang nirya aryi, “Naie,” tenebmai.

²¹Er Yesus ab Er miliramnyi nang ab tonkwa co ngun-ngun burwelebinmai ura, sunci anaboka mekwan deici binmai. Banmai ani, Galilea mekwan katum atam tamuboka yanmai. Yanmai ba, ninyi ilinto aryi Er Yesus banmou me katum dam asi buluryanmai.

²²Ninyi ilinto Er Yesus ab tonkwa kunmai bok, ninyi tentok ara Musa Uram eteren ai kalingnamunyi si Yairus yanmou. Yairus er nebnyi dibmanto kunmou ba, erda mambul kanya bobdobmou ci, Er Yesus dam yanmou. Yanmou ba, erci Er Yesus bisi ebdanmarei ci, “Nai,” teneboka er kutam tukwe ai ikdongoboka er urasin tukwetam luknubokmou.

²³Ura, erci Er Yesus bisi ato ebmou. “Nai, ni nebnyi yun aryi dibmanto kunmar. Ati, Kanci yandoka er nong deici asi taruk deiboka kwetebminyi uca, ni nebnyi nakibdobkwande,” eboka molobmou.

²⁴Ato eboka molobdobmou ba, Er Yesus bira Yairus miliboka Yairus ai tonkwa banmarei. Banmarei ci, bisik ai banmarei bok, ninyi ilinto Er Yesus bisi milirbanmai ba, Er Yesus bisi libdongobmai.

²⁵A banmai nang kankan ara bunga ining yibarmururamwe ner tentok milirbinmou. A ner bunga ining yibarmururamwe talak ara kwalina amolbaryi kwaliamnyi.

²⁶A ner aryi ninyi kweten nang ilinto asi, “Kwetebnurum,” eboka bobaramuryi er taruk dam kuamwe bona nirya kwetena kira ilinto ati kareboka dengloramwe. Ato kuramwe bok, er bunga ining kum danana kum kuramwe, erda tabakoka bunga ining yibarmururamwe. A deyok aryi, a ner mambul weik dororamwe.

²⁷Mambul weik dororamuryi, “Er Yesus bira dib ati ninyi kwetesurur,” en uram sirya kekebmou ci, Er Yesus dam yanmou. Ura, erci, “Niryi Yesus alib ongon aling kubkub talebdenyi aryok, Er mikib aryi ni kwetebkwamanir,” tenebmou. Ura, erci Er Yesus dongtam bindoka Er alib ongon aling kubkub asi talebdenmou.

²⁸

²⁹Ato kuboka talebdenmou uca, er bunga ining yibarmururamwe ara kum danmou. Ba, erci, “Nonge, Er Yesus biryi sirya kwetebnir,” tenebmou.

³⁰A ner aryi talebdenmou asi, Er Yesus biryi, “Ninyi kweteran mikib ton anaboka ninyi kwetenmar,” tenen bikmou. Ura, Erci tiklobmou ci, sun Er dongtam milibmai nang asi asibdenmou. “Ni alib ongon aling kubkub asi unanyi kum unaner kum aryi talebdenmanir do?” eboka asibdenmou.

³¹Uca, Er miliramnyi nang aryi, “Nai Du, Kanda unato ati ato eboka asibdenmasirim do? A dibderum, ninyi ilinto ibdongoboka milibmaking deyok aryi kubmakir,” ebmai.

³²Ato ebmai bok, Er Yesus biryi, “Unanyi kum unaner kum aryi Nisi talebdenmanir do?” tenen dibkankanikdenmou.

³³Dibkankanikdenmou bok, Er Yesus dongtam kuboka talerbinmou ner ara, “Nun Du biryi nisi kwetebnir,” tenen bikmou cok, a ner aryi, “Erci nisi kerebkwamanir ati ebmar do?” tenen er ilil asa aryi sirim talebmou. Bok, sirim asa aryi Er Yesus dam yandoka er kutam ikdongobmou. Ikdongobmou ura, erci Er Yesus bisi ato ebmou. “Nai, Kansi ara niryi talebdenmakin. Ara, ni bunga ining yibarmururanou asi, ‘Kanci ni kwetebnute,’ tenebmakin ci, kansi talebdenmakin,” ebmou.

³⁴Ato ebmou ba, Er Yesus biryi a ner asi, “Ni nebnyi, kanci Nisi diboka tenebmanirim ati, Niryi kansi sirya kwetebmakin. Iya kwetebmakin ati, kan kanya kilkil kubkiri bok, kan ai ur birum,” ebmou.

³⁵Er Yesus biryi a ner ab tonkwa uram tuba sisingmarei ura, Yairus bira er Musa Uram eteren ai kalingnamunyi bira dibde tikmou. Dibde tikmou asi er ai ninyi ton yanmai ci, ato ebmai. A nang ara Yairus ai aryi kuboka yanmai ura, Yairus bisi ato ebmai, “Nai, kan nebnyi sirya dibmar. Ati, kanci nun nai eteresinanyi bisi, ‘Ni nebnyi kwetebnurum,’ ena takdum,” ebmai.

³⁶Asi, Er Yesus biryi kekebmou ci, a nang enmai uram siklibkweteboka Yairus bisi ato ebmou. “Ni kwit e, kan mambul kanya bona kum. Nira mikibnyi kunun ati, Niryi kan nebnyi asi teleb kubdeibkun. Ati, kanci Nisi dib tenebnurum,” ebmou.

³⁷Ato ebmou ura, Erci sun milibmai nang asi, “Sun nirya ara nunsi milibsin kum, erda Petrus ab, Yakobus ab, Yakobus er weit Yohanes ab sun winiryok nang akwe nun milibsurum,” ebmou.

³⁸Ebmou ura, barabyi ani, Yairus ai bindoka diramnyi uca, akai dam ninyi ilinto bukmai. A nang bukmai ci, urumna eboka mot yaboka, “Yairus nebnyi, Yairus nebnyi dibmar,” engenmai asi eibmai.

³⁹Ura, Er Yesus biryi a engenmai nang eibmou ci, Erci Yairus ai wekoka aburyi, sunsi ato ebmou. “Uram kilikdarur se! Unato ati, sunci urumna eboka mot yaboka engenmarum do? A nebnyi ara iya kum dibmar. Erda, er wi mabmar,” ebmou.

⁴⁰Ato ebmou asi akai umbura wekmai nang aryi kekebmai ura, ato ebmai. “Bohoi, tola ati ebmara,” tenebmai ci, Er Yesus biryi ebmou to dib kum tenebmai. Ba, Er Yesus biryi a ninyi asi, “Baitam bindobdarur,” eboka yakwetebmou. Ura, Erci er nai ab, er kwin ab, Er miliramnyi nang winiryi nang ab asi inibdobmou ura, a nebnyi maibmai ai binmou.

⁴¹Binmai ura, Erci a dibmou nebnyi taruk asi talebdongoboka a nebnyi asi, “Talita kum,” ebmou. Ara, nun uram deib ara, “Ni nebnyi, bukokmin ci, tikokdum,” ebmou.

⁴²Ba, a nebnyi diba dibmou asi, kam bukokmou ci, tikoka aburyi, er yuk yibinmou. A nebnyi er kwalina ara kwalina amolbaryi kwaliamnyi nebnyi asi diba dibmou bok, Er Yesus biryi kam bukeibmou. A nebnyi kam bukokmou deyok ara sun akai buluboka wekmai nang nirya aryi, “Naie,” tenebmai.

⁴³Ato tenebmai ati, Er Yesus biryi sunsi, “Yuk nang asi a kubmar to ebdongobmunyei,” ebkatabmou. Liki bitinyi winiryi ato ebmou ura, Erci sunsi ato ebmou. “A nebnyi asi yina karebmun ba, er ur yibdur,” ebmou.