Read Futuna-Aniwa Markus 6 Bible Online

Markus 6 - Futuna-Aniwa bible

Markus 6

¹Ura, Er Yesus biryi Yairus nebnyi asi sirya kam bukeibmou ura, Erci anaboka Er atei nang kuramnyi atei si Nazaret binmou. Akatei banmou ura, Er miliramnyi nang ab tonkwa binmai.

²Binmai ci, mabmai ani, uki ta tum ara wa in kum uki tum berekmou ura, Er Yesus bira Musa Uram eteren ai bindoka sun akatei umbura wekmai nang asi Teleb Uram eterebmou. Eterenmou ba, sun kekebmai nang ilinto aryi, “Naie, Anyi bira diboka bingnanyi kurur. Unanyi biryi Ersi eterebwe do? Ba, Erci ilil tenen dinyi kiknirutnyi kurur do?” tenebmai.

³Ato tenebmai ci, ato ebmai, “Anyi bira nun atei kuramuryi, ai doramunyi kuma do? Diba, Anyi bira Maria er mi si Yesus. Er weityabwe ara Yakobus ab, Yoses ab, Yudas ab, Simon ab nun atei nang kunung ara bingnub. Ba, Er malnerabwe ababyi nun bikmanub.” Ato ebdanmai ci, sunci sun kanya aryi, “Anyi bira nuntonyi biryi Er Imtamnyi Uram ebdeibmaca bobaramingnyi tonyi kum kurur,” teneboka yu wekmou.

⁴Asi, Er Yesus biryi sun tenebmai kanya bikmou ura, Erci sunsi ato ebmou, “Nunda Er Imtamnyi Uram ebdeibmaci to lak etereramibyi nang ara eikatei-okatei bindoka etereramibyi ba, sun eikatei nang okatei nang aryi, ‘A nang aryi eterebsing uram ara diboka kekebkwayeb,’ teneransing. Bok, nun Er Imtamnyi Uram ebdeibmaci to lak etereramibyi nang aryi nun mining atei yandoka etereramibyi ura, nun mining atei nang ab nun mining ai ninyi ab aryi, ‘A nang aryi eterebsing uram ara kekena nun li,’ eransing,” ebmou.

⁵Ara, Er Yesus bisi mining atei nang aryi, “Anyi bira nun li,” tenebmai ati, Erci ilil tenen dinyi ilinto kiknibman kum kubmou. Erda Er mining atei Nazaret kunmou ba, Erci yun taleramwe nang akwe mitikanun taruk deiboka kwetebmou.

⁶Kwetebmou cok, Erci Er kanya aryi, “Naie, unato ati Ni mining atei nang aryi Nisi dokdonokmaning do?” tenebde kunmou. Ura, Er Yesus Nazaret atei aryi anaboka a mutuk nirya yibinkirikoka yuk atei-yuk atei bindoka Teleb Uram eterebde binmou.

⁷Eterebde binmou ci, Erci Er miliramnyi nang amolbaryi asi naboka sunsi ato ebdeibmou, “Ni kwityabwe, sun bitinyi-bitinyi kiboka bokdamun ci, Teleb Uram lak eterebde bindarur,” ebdeibmou. Ura, Erci sunsi ton ato ebmou, “Sunci sun isa wekanci nang asi isa yakdonoka kwetebkwandarur,” eboka Erci Er mikib aryi sunsi karebmou.

⁸Ebmou cok, Erci sunsi ato eboka ebdeibmou. “Sun eterebde baramunyi ura, utotoa-utotoa douboka bobmunyei. Erda, dumuna kama akwe dumubdobmun ci, eterebde bana teleb. Sun kwaning ab aling ab co bok ababyi bobmunyei.

⁹Tonda, baramunyi ura, sunci yan karuk ara ur ongodobkwandarur. Bok, ongon aling ara bitinyi ongona mem,” ebmou.

¹⁰Ato ebmou cok, Erci sunsi ton ato ebmou, “Ton yuk atei bamunyi ba, akatei nang aryi du dongobsingiryi, ‘Nun ab tonkwa kubkwayeb,’ ebsingnyi ura, sunci a ebmasingnyi nang ai akwe bukoka mabkwandarur. Yuk ai ara bukoka mabmunyei tenen ebman.

¹¹Tonda, anabdobmun ci, yuk atei bamunyi ba, akatei nang aryi sunsi, ‘Nun atei yasumunyei,’ eboka sun eterebkwandum uram kum kekebsingnyi ura, sunci akatei aryi anaboka yuk atei asi binkwandarur. Akatei nang aryi Er Imtamnyi Uram asi dokdonokingnyi ura, sunda kuna takloboka anabdobmun ci, sun yan mintal dubmasici ara kiliblobdarur. Ato kubmunyi uca, akatei nang aryi, ‘Er Imtamnyi biryi nunsi ato kuboka bai donokwansir,’ tenen bikwaming. Ara, sunci, ‘Nunci Er Imtamnyi Uram eterebde baraming nang asi yakdonokmab ati, Er Imtamnyi biryi nunsi, “Mintal kilirloraming to nang kunung,” tenesurur deyok aryi mintal kiliblobmang nang to kuboka, Erci nunsi bai donokwansir,’ tenen bikwaming,” ebkarebmou.

¹²Er Yesus biryi Er miliramnyi nang asi ato eboka ebdeibmou ura, sunda bitinyi-bitinyi kiboka bokdanmai ci, eterebde binmai. Eterebde banmai ura, sun eterena kekebmai nang asi, “Sunci sun malyi tenerandum dinyi takmunyi ura, Er Imtamnyi kanya teleb kurdeirin dinyi akwe teneiboka kunubdarur,” eboka eterebmai.

¹³Eterebmai ci, sunci isa wekamwe nang ilinto asi isa yakdonokoka teleb kubdeibmai. Tonda, sunci sun yun yiramwe nang asi kwetebmai. Ara, ninyi nirya aryi, “Er Imtamnyi mikib aryok liknibdongoboka kwetebmang,” tenen bikwamnyi ati, sunci co zaitun yung me doboka sun yun yiramwe nang nong asi likdongobmai. Ba, a yun yiramwe nang asi Er Imtamnyi mikib aryi teleb kubdeibmou.

¹⁴Sun Er Yesus miliramnyi nang eterebde baramnyi ati, ninyi ilinto aryi Er Yesus biryi ukuramwe to asi kekeramnyi. Ninyi ilinto kekeramnyi ura, Galilea mutuk kalingnamwe weik sienyi si Herodes erbabyi Yesus kuramwe deyok kekebmou. Ba, ton yuk nang ara Er Yesus deyok ara sun kum bingnamiryi, ato eramnyi, “Anyi bira Yohanes ninyi me dongoramunyi kurur. Ninyi aryi Yohanes bisi sirya obmai uca, dibmou asi, kam bukokmou. Anyi bira kam bukokmounyi kurur ati, erda mikib kuboka ilil tenen dinyi kiknirur,” ebmai.

¹⁵Ba, yuk nang ababyi Er Yesus bira neiktoto sun kum bingnamnyi ba, ato eramnyi, “Anyi bira Er Imtamnyi Uram ebdeibmaca bobaramunyi si Elia kurur,” eramnyi. Ba, ton yuk nang ara, “Er Yesus bibabyi Er Imtamnyi Uram ebdeibmaca bobaramnyi nang atonyi kurur,” eramnyi.

¹⁶Sun ninyi aryi Er Yesus biti ato eramnyi ba, Galilea mutuk kalingnamwe weik sienyi si Herodes biryi a nirya kekebmou. Ura, erci Er Yesus biti ato ebmou, “Naie, Yohanes ninyi me dongoramunyi tubto kam bukokmar. Ni arungna nang asi niryi ebmase to kuboka Yohanes bisi ya ngang dakoka obmai bok, tubto kam bukokmar,” tenebmou.

¹⁷Ara, Herodes biryi er arungna nang asi, “Yohanes bisi ya ngang dakoka obdarur,” ebdeiamwe deyok ara ato kuamwe. Yohanes ninyi me dongoramunyi kam tuba kuramuryi, etereramwe bok, sun ninyi aryi ersi ato ebmai. “Er Herodes biryi er weit Filipus ner si Herodias ukula dobdobwe,” ebmai. Ba, Yohanes biryi Herodes bisi, “Kanda kan weit ner ukula dobdobumwe ara malyito kubumwe,” ebmou asi kekebmou ura, Herodes yu weik kubmou. Ba, er arungna nang asi, “Yohanes biryi nira, ‘Malinyi kurum,’ ebmanir ati, sunci ersi taruk taleboka tabwe deboka ninyi wenen ai asi dongobdarur,” ebmou. Ura, sunci Yohanes bisi taruk taleboka tabwe deboka malyi kun nang dongon ai asi dongobmai.

¹⁸

¹⁹Yohanes biryi erekdamwe deyok aryi Filipus doamwe ner Herodias aryi tulum douboka, “Yohanes bisi obnung,” eramwe. Eramwe bok, Herodes biryi, “Mem,” eramwe ba, Yohanes bira kam kuramwe.

²⁰Herodes biryi, “Yohanes bira Er Imtamnyi biryi wibmounyi bica, malinyi kuma, erda teleb kurur,” tenen erci er Yohanes bisi ona er ilil kuramwe. Ba, erci, “Yohanes bisi ona ara ni li,” eboka limdoramwe. Ato eramuryok, Herodes biryi, “Yohanes uram kekebtinyi,” tenen erci liki tentok-tentok Yohanes bisi namdamwe ba, erdaran deici Yohanes biryi eramwe uram kekeramwe ura, er kanya dam aryi bintiniramwe. Ara, erci, “Er Yohanes biryi etereransir uram Teleb Uram aci,” teneramwe ati, “Una kubkwan do?” teneramwe. Ato kuboka er Herodes bira er kanya dam aryi bintiniramwe.

²¹Ura, er kanya dam tuba bintiniramwe bok, er Herodes deiamwe uki tum kubmou. Herodes er deiamwe tanggal kubmou ba, erci, “Kwaliboka yibkwayeb,” eboka ninyi naboka du dongobmou. Ba, Herodes biryi du dongobmou ura, er miliboka wa iramnyi nang ab, er yin doun nang seribu baryi nang asi arungnamnyi nang ab, tonda sun Galilea mutuk deyok nang nirya yandoka Herodes ab tonkwa yinmai.

²²Er du dongobmou nang ab tonkwa yibde bukmai ci, Herodias nebnyi yandoka bubatikde merenmou. Bubatikde merenmou ba, er Herodes ab sun dibde bukmai nang aryi, “A nebnyi telebto kuboka merenmar,” tenen sun kanya teleb kubmou. Ba, Herodes er kanya teleb kubmou ati, erci Herodias nebnyi asi, “A nebnyi, kanda telebto kuboka merebmarim ati, unato dinyi karebkwankin do? Kanci nisi ur molobdobdum. Kanci nisi molobniminyi to kuboka karebkwamakin.

²³Tola ati ebnyi ura, ni dibnyei. Ati, kanci nisi, ‘Kan talerandim mutuk nirya noutumang wilibdobnimiryi, kan dinatam tuba taleaminyi bok, nira dinatam talebkwan,’ ebminyi ababyi, niryi kansi dinatam nukwankununa,” ebmou.

²⁴Ato ebmou ba, a nebnyi aryi, “Unatoa molobdobkun do?” teneboka er kwin Herodias bisi asirbinmou. Uca, er kwin biryi, “Ninyi me dongoramunyi Yohanes bisi obdeibniting,” tenen tuba teneiramwe aryi, er nebnyi asi, “Kanci ato eboka molobdum, ‘Ninyi me dongoramunyi Yohanes er kisok asi molobman,’ ebdum,” ebkarebmou.

²⁵Ura, a nebnyi ola Herodes dam tamurbinmou ci, ato eboka molobdobmou, “Nai, ni molobkwinkin dinyi ara Yohanes ninyi me dongoramunyi kisok asi molobman. Ati, Yohanes kisok ya ngang dakoka suwa deici deibdongoboka nisi karebnurum,” eboka molobmou.

²⁶Ato molobmou ba, Herodes er kanya ara mambul weik kubmou cok, erci, “Nisi Er Imtamnyi biryi obnicei ebman ati, niryi ni ebdeibmanto kunubkwan. Kum kunubnyi ura, sun kwaliboka yinmab nang aryi ni ebdeibmanto kekekmang ati, sunci niti tola enanyi ebningnyei,” tenebmou.

²⁷Ura, Herodes biryi sun iya malyi kun nang asi oramunyi bisi ato eboka arukmou. “Kanci ya doboka ninyi wenen ai biminyi ura, Yohanes bisi obdum. Obminyi ura, ya ngang dakoka kisok ara boyarum,” ebmou. Ura, sun iya malyi kun nang oramunyi biryi bindoka er Yohanes ya ngang sekwetebmou.

²⁸Ura, erci Yohanes kisok asi suwa deici deibdongoboka boyanmou. Ba, Herodias nebnyi asi karebmou ura, a nebnyi aryi er kwin Herodias bisi karerbinmou.

²⁹Ato kuboka sunci Yohanes me dongoramunyi bisi obmai. Ura, sun er Yohanes miliramnyi nang aryi a kubmou to kekebmai ura, sunci, “Tukwe dongobkwayeb,” teneboka yanmai. Yanmai ura, sunci er Yohanes nong buma dem bobindoka keil umbura dam asi dongobmai.

³⁰Sun Er Yesus miliramnyi nang aryi Teleb Uram deyok kouboka eterebde baramnyi ani, Er Yesus dam tamuryanmai. Tamuryanmai ura, sunci Er Yesus bisi, “Nunda ukuboka-ukuboka kuramaburyi, nunci ato-ato eboka etereramoubwe,” eboka nukarebmai.

³¹Ato eboka nukmai ura, ninyi ilinto aryi, “Er Yesus ab ebdatibyi,” tenen Er dam yandoka bindoka kimai. Ninyi ilinto sun ab ebdanmai ati, Er Yesus ab Er miliramnyi nang ab aryi, “Yina yibtibyi,” tenebmai asi, yina yibman kum kubmou. Ura, Er Yesus biryi Er miliramnyi nang asi, “Ni kwityabwe yandarur, sunda isin sebkwandum ati, nunci a bulubmai nang asi takloboka ninyi kun kum ai binkub,” ebmou.

³²Ato ebmou ura, sunda, “Ninyi kun kum ai bindobkwayeb,” teneboka co ngun-ngun deici burwelebinmai ci, anaboka mekwan deici binmai.

³³Bok, ninyi ilinto aryi, “Dantam banmang do?” tenen dibnilibokmai ani, “Adikum banmang,” tenen bikdongobmai. Ura, sunda mutuk kib bis kuboka abiryi, minob bindoka Er Yesus ab Er miliramnyi nang ab binkwamai bulunmai. Ara, ninyi ilinto eikatei-okatei aryi anaboka tukwe kib bis yandoka Er Yesus binkwamwe dam buluboka yanganmai.

³⁴Yanganmai ba, Er Yesus bira weik co ngun-ngun dub aryi kuboka tukwe ai tingbinmou ura, ninyi ilinto buluryanganmai asi asing eibmou ura, sunsi, “Ni bico,” tenebmou. Ara, Erci sunti, “A nang ara Er Imtamnyi Uram diboka kum bingnaming nang asi Ni bico tenenun. A nang ara ninyi aryi kum kalingnaming domba ato kuraming. Sunda waningna domba ato kuraming deyok aryi, sun binkwaming bisik kum bingnaming ati, Niryi sunti, “Ni bico kunurur,” tenebmou. Ato tenebmou ura, Er Yesus biryi sunsi eterena aryi deyok ilinto eterenmou.

³⁵Eterenmou uca, kiting wekou ura, Er miliramnyi nang aryi Er Yesus dam yandoka sunci Ersi ato ebmai. “Nai Du, nunda ninyi kun kum mutuk asi kunmab bok, kiting wekur.

³⁶Ati, Kanci sun a bulubmang nang asi ato ebdum, ‘A kunum sirya eterebmasin ati, bokdankwayeb,’ ebdum. ‘Ba, sunci dam dordanung atei, bara atei kum, atei yoka kum asi bindoka yina dekdobdarur,’ ebdum,” ebmai.

³⁷Ato ebmai bok, Er Yesus biryi sunsi, “Kum, sunci a nang asi yina yibkarebdarur,” ebmou. Ebmou ba, sunci Ersi ato ebmai, “Nai Du, nunci yina dengbindoka a nang nirya asi yina yibkarebman kum. A nang kwaning yina yibkwarebkwamabyi ura, co bok mitik kum bulubtibiryok, yina dekoka a nang nirya asi yina dektibyi. Ara, dengna weik dinyi si dinar yubwa ilinto bulubtibiryok, nunci a nang nirya ati, yina dektibyi.” ebmai.

³⁸Ato ebmai bok, Er Yesus biryi sunsi, “Sunda roti kwaning tokol ara unabaryi bobmarum do?” eboka asibdenmou. Uca, sunci dirdenmai ci, “Nunda roti kwaning ara tokol amubaryok bobmab ba, mekinaiya ara bitinyok a bobmab,” ebmai.

³⁹Ebmai ura, Er Yesus biryi Er miliramnyi nang asi, “Sunci ninyi nirya asi, ‘Sunda liliboka deici yuk-yuk bukdarur,’ ebdarur,” ebmou.

⁴⁰Ba, deici ilinto yuk-yuk bukmai. Ton deici ara ninyi seratus baryi buluboka bukmai ba, ton yuk deici ara ninyi lima puluh baryi tonkwa bukmai.

⁴¹A nang nirya sirya liliboka bukmai ura, Er Yesus biryi a kubmou roti kwaning tokol amubaryi ab mekinaiya bitinyi ab dobtalebmou. Ura, Erci imtam dibweleboka Er Imtamnyi bisi, “Nai Imtamnyi, Kanci nunsi yina karebmasirim ati, Niryi Kan si weik eboka kibdobmakin,” ebmou. Ebmou ura, Erci a kwaning roti ara toboka-toboka Er miliramnyi nang asi, “Ninyi nirya asi bokeibde yibindarur,” eboka karebmou. Karebmou ura, Erci a bitinyi mekinaiya ababyi sekoka-sekoka bokeibmou.

⁴²Ato kuboka bokeibmou ba, Er miliramnyi nang aryi bokde yibanmai uca, a nang nirya kikiman yibmai ba, boubmou.

⁴³Yina sirya kikiman yibmai ura, roti kwaning tobdoba ab mekinaiya toubdoba ab ara ton kablobmai. A kablobmai dinyi asi buluboka weik tower aling amolbaryi asi kibdongobmai uca, langdeibmou.

⁴⁴Sun a buluboka wekmai ci, roti kwaning ab mekinaiya ab yibmai nang ara sal yoka dem ara ninyi yubwa-yubwa lima ribu baryi nang yibmai.

⁴⁵A nang nirya aryi sirya yibmai ura, Er Yesus biryi Er miliramnyi nang asi ato ebmou. “Ni kwityabwe, sunda weik co ngun-ngun deici burwelebinmunyi ura, mekwan koubkaboka katum dam donung atei Betsaida minob bindarur. Ba, Ni aminda yankwan,” ebmou. Ura, Er miliramnyi nang co ngun-ngun deici burwelebinmai ura, anabdobmai. Anabdobmai ura, Er Yesus biryi sun bulubmai nang asi, “Bokdankwayeb,” ebmou.

⁴⁶Ebmou ura, sunda sun atei yuk-yuk binmai. Binmai ura, Er Yesus bira Er yuk kubmou ci, Erci, “Ni Nai Imtamnyi bisi molobkwan,” teneboka mutuk kon dam welebinmou. Welebinmou ura, Erci Er Imtamnyi bisi molonmou.

⁴⁷Ani, inibkatabmou ura, Er Yesus miliramnyi nang ara co ngun-ngun deici bukoka mekwan deici tuba banmai. Asi, ibalya sun urasin deiboka banmai tam aryi yandoka sunsi tomordonongmou ba, sunda me katum minob kum binmai. Sunda kilin co aryi co ngun-ngun asi mikibanun kilinmai cok, lukunda nirya banmai asi, me katum dam bana kum kubmai. Asi, Er Yesus bira tukwe kib ai tuba kunmou ura, a nirya asing eibmou. Ura, im ki likou talak aryi Er Yesus bira mekwan asok deici yaniboka mekwan noutam banmou co ngun-ngun dam binmou. Banmou ani, dam binmou ura, a co ngun-ngun menekbisibmanto kubnin bau.

⁴⁸

⁴⁹Menekbisibmanto kubnin bau ba, Er miliramnyi nang aryi Erda mekwan deici yanganmunyi bisi asing eibmai. Ura, sunci ersi kum bikmai deyok aryi, “Isa yanganmasir,” tenebmai ci, sun ilil aryi ngolokmai.

⁵⁰Asi, Er Yesus sunsi ato ebmou, “Ni kwityabwe, sun ilil kusina mem. Sun kanya katabum ebsurur. Nira sun Du a kunum yanganman anune,” ebmou.

⁵¹Ura, Er Yesus co ngun-ngun dub burweleyanmou. Burweleyau ura, Erci ibalya donmou asi, “Ibalya, takdum,” ebmou uca, ibalya kum danmou. Ibalya kum danmou ura, Er miliramnyi nang aryi, “Naie,” teneboka mambul weik kubmou.

⁵²Er Yesus iya mikibnyi kuramwe asi sunci diboka kum tenebmai ati, sunci, “Naie,” tenebmai. Sun kanya kat kuramwe ati, sunda Er Yesus biryi kiknibmou ilil tenen dinyi deyok kum teneibmai. Ara, roti kwaning mitikanun kubmou bok, Erci roti kwaning tobmou uca, ninyi ilinto yibmai ba, boubmou. Er Yesus miliramnyi nang a deyok kum teneibmai ati, sunci Er Yesus bira iya mikibnyi kurur asi diboka kum bikmai ci, sunci, “Naie,” tenebmai.

⁵³Er Yesus biryi ibalya kum daneibmou ura, mekwan deici banmai ani, mekwan katum dam doramnyi atei Genesaret mutuk tam yanmai.

⁵⁴Ura, sunda co ngun-ngun deici aryi anaboka tukwe ai tingyurbinmai. Ura, a mutuk nang aryi, “Nun Du Yesus yanganmar,” tenen bikmai.

⁵⁵Ato bikmai ci, a mutuk nang nirya buluboka Er Yesus binkwamwe ai yanganmai. Er Yesus banmou bok, a mutuk nang aryi, “Yesus a yandoka kunmar,” en uram asi kekebmai ura, miliboka sun yun taleramwe nang asi co malouwa caboka boyanmai.

⁵⁶Ara, Er Yesus bara atei kum, atei yoka kum, mitik atei kum binkou bok, a nang aryi sun yun taleramwe nang asi atei keta dam bobindoka deibmai. Bok, Er Yesus bira bisirorbinmou asi sun yun taleramwe nang aryi Er Yesus bisi, “Kan alib ongon aling kubkub talebdenkwankib,” eboka molobmai. Ura, sunci Er Yesus alib ongon aling kubkub talebdenmai nang nirya ara Erci kwetebmou.