Read Futuna-Aniwa Markus 8 Bible Online

Markus 8 - Futuna-Aniwa bible

Markus 8

¹Kunmai ani, uki tentok tum aryi ninyi ilinto Er Yesus dam bulubmai. Bulubmai ci, mabmai ani, uki winiryi kubmou ura, sun yina yibkwamai bok, yina ton kum kubmou. Ba, Er Yesus biryi Er miliramnyi nang asi, “Ni dam yandarur,” eboka nabmou.

²Nabmou ura, Erci sunsi ato ebmou, “A bulubmang nang asi Ni bico kubmanir. A bulubmang nang ara nun ab tonkwa uki winiryi kunmab uca, yina kum yibmab ati ebman.

³Niryi a nang asi, ‘Sun atei yuk-yuk bindarur,’ ebnyi ba, kwaning atan-atan a baronmangiryi bisik noutam lalakingnyei tenebman. Ton nang ara dam kum mutuk aryi kuboka yanganmai ati, sun yina kum yibtingiryok, atei tamurbingnyi ura, kwaning atan aryi lalakting,” ebmou.

⁴Er Yesus biryi Er miliramnyi nang asi ato ebmou ba, sunci Ersi ato ebmai. “Nai Du, nunda ninyi kun kum mutuk asi kunmab ati, nunci roti kwaning ara dankiryi dekdobtibyi uca, a nang nirya asi yina yibkarebtibyi do?” eboka asibmai.

⁵Ato eboka asibdenmai uca, Erci sunsi, “Sunda roti kwaning tokol ara unabaryi bobmarum do?” eboka asibdenmou. Ba, sunci Ersi, “Nunda roti kwaning tokol ara tabaryi a bobmab,” ebmai.

⁶Ebmai ura, Er Yesus biryi sun bulubmai nang asi, “Tukwe deici bukdarur,” ebmou. Ura, Erci a roti kwaning tokol tabaryi asi dobtalebmou ura, Er Imtamnyi bisi, “Nai Imtamnyi, Kanci nunsi a yina karebmasirim ati, Niryi Kan si weik eboka kibmakin,” ebmou. Ebmou ura, Erci a roti kwaning toboka-toboka Er miliramnyi nang asi karebmou ci, sunsi, “Sunci a roti kwaning doboka sun buluboka bukmang nang asi bokeibde yibindarur,” ebmou.

⁷Ebmou ura, a kubmou mekinaiya bitinyi winiryi asi neiktoto dobtaleboka Erci Er Imtamnyi bisi, “Nai Imtamnyi, Kanci nunsi a yina karebsirim ati, Niryi Kan si weik ebkin,” ebmou. Ebmou ura, Erci a mekinaiya sekoka Er miliramnyi nang asi karebmou. Karebmou ura, sunci bokeibde yibinmai.

⁸Bokeibde yibinmai ura, a nang nirya aryi kikiman yibmai ba, boubmou. Sirya yibmai ura, tobdoba kablobmai dinyi ara buluboka weik tower aling tabaryi asi kibdongobmai uca, langdeibmou.

⁹Sun roti kwaning yibmai nang ara ninyi empat ribu baryi nang kunmai ci, antaniboka yibmai. Sirya yibmai ura, Er Yesus biryi sunsi, “Sun atei yuk-yuk bindarur,” ebmou.

¹⁰Ebmou ura, Er Yesus ab Er miliramnyi nang ab co ngun-ngun burwelebindoka anabdobmai ci, mekwan deici banmai ani, mutuk si Dalmanuta binmai.

¹¹Binmai ura, sun Farisi nang ara Musa kerek sengna lilibde kunuramnyi nang ton Er Yesus dam yanmai. Ura, sunci Ersi ato ebmai, “Nai, nunci Kansi asirden dinyi ton asibdenkwankib. Ara, nunci kanti, ‘Erda Er Imtamnyi biryi Bokwetebmounyi kurur do kum do?’ tenekunub deyok aryi diboka bikwayeb ati, Kanci ilil tenen dinyi ara Er Imtamnyi biryi diboka kiknin dinyi asi lak kibsurum,” ebmai. A nang aryi ebmaia ara, “Er Yesus bisi malinyi ebtibyi,” tenen Ersi ato eboka ukubdenmai.

¹²Ato ukubdenmai bok, Er Yesus biryi sun tenen kanya bikmou ci, Er kanya dam aryi se tenebmou. Ura, Erci sunsi ato ebmou, “Sun uku kurandum nang aryi unato ati Nisi, ‘Nunci Kansi dib tenebkwayeb ati, ilil tenen dinyi kiknibsurum,’ eboka molobmanurum do? Niryi sunsi diboka ebkwinsin uram asi diboka kekebdobdarur. Sunda Nisi dib kum tenerandum ati, Niryi ilil tenen dinyi sunti lak kum kibkwansin,” ebmou.

¹³Er Yesus biryi ato ebmou ura, Erci co ngun-ngun dub burwelebinmou ci, Er miliramnyi nang ab tonkwa anabdobmai. Ura, “Mekwan otam katum binkwayeb,” teneboka mekwan deici binmai.

¹⁴Sunda anaboka mekwan deici banmai ura, roti kwaning borona kum uca luba kibloboka binmai ba, co ngun-ngun umbura ara roti kwaning tokol tentok kubmou.

¹⁵Asi, Er Yesus biryi sunsi ato ebmou, “Ni kwityabwe, sun Farisi nang ab, Galilea mutuk kalingnande weik sienyi si Herodes ab ara malyi kun nang kuraming. A nang malyi kuraming to ara roti kwaning asi weik danaran dinyi si ragi ato kurur. Ragi ara roti asi dongoboka inibibyi ura, roti weik danarande. A nang ara neiktoto kuraming. Ara, sunda yuk nang ab tonkwa kuboka malyi kun dinyi kubingnyi uca, sun yuk nang aryi diliboka malyi kun dinyi ilinto kunuraming. Ati, sunci a nang aryi etereraming uram kum kekebmun ci, sun malyi kuramingto dilibmunyei.” Ato eboka Er Yesus biryi Er miliramnyi nang asi eterebmou.

¹⁶Eterebmou bok, Er miliramnyi nang aryi Er Yesus biryi ebmou to lilibmai ci, sunci, “Nunda roti kwaning kum bobmab ati, nun Du Yesus biryi ragi deyok ebmasir,” ebdanmai.

¹⁷Ebdanmai bok, Er Yesus bikoka Erci sunsi ato ebmou. “Sunda unato ati ‘Kwaning roti kum bobmab ati, nun Du Yesus biryi ragi deyok ebmasir,’ ebdanmarum do? Sun kanya kat kusurur aryi Ni ebman dinyi ara kum bikmarum do?

¹⁸Sunda asing a kubsou bok, asing kum eibmarum do? Sunda amol a kubsou bok, diboka kum kekebmarum do? Sunci Ni kiknibmase ilil tenen dinyi diboka kum teneibmanurum do?” Ato eboka Er Yesus biryi sunsi wenebmou.

¹⁹Ato eboka wenebmou cok, Erci sunsi ton ato ebmou, “Ninyi lima ribu baryi nang bulubmai ba, Niryi roti kwaning tokol amubaryok aryi tobmasise ura, a nang nirya yibmai ba, boubmou ara tuba bikmarum do? Ati, a nang nirya yibmai ura, sunci kablobmai dinyi ara buluboka kibdongobmandau uca, weik tower aling unabaryi langdeibmou do?” eboka asibdenmou. Asibdenmou ba, sunci Ersi, “Kibdongobmoubwe uca, weik tower aling amolbaryi langdeibmou,” ebmai.

²⁰Ura, Erci sunsi ato ebmou, “Tonda, yuk tum aryi ninyi empat ribu baryi nang bulubmai ba, Niryi roti kwaning tabaryi tobmasise ura, a nang nirya yinmai ba, boubmou ara sun tuba bikmarum do? A nang nirya sirya yibmai ura, sunci kablobmai dinyi buluboka kibdongobmandau uca, weik tower aling unabaryi langdeibmou do?” Ato eboka asibdenmou ba, sunci Ersi ato ebmai, “Kibdongobmoubwe uca, weik tower aling tabaryi langdeibmou,” ebmai.

²¹Ba, Erci sunsi, “Ura, unato ati sunbabyi walwal tuba kusurur do?” Ato eboka Er Yesus biryi Er miliramnyi nang asi wenebmou.

²²Ura, Er Yesus ab Er miliramnyi nang ab mekwan deici banmai ani, mekwan katum tingbinmai atei si Betsaida dam binmai. Ura, ton nang aryi asing kuamunyi bisi Er Yesus dam boyanmai ci, Er Yesus bisi ato ebmai, “Nai Du, Kanci nun kwit asing bam asi bol libdemin ci, kwetebdum,” eboka molobmai.

²³Ba, Er Yesus biryi asing kuamunyi bisi taruk taleboka akatei aryi kuboka baitam bobinmou. Baitam bobinmou ura, Erci si maka tulubdeiboka asing kuamunyi asing bam deici asi likdeiboka Erci Er taruk er asing kuamunyi asing deici tam deibmou. Ura, Er Yesus biryi ersi, “Kanda asing sirya eibmarim do kum do?” eboka asibdenmou.

²⁴Ato eboka asibdenmou ba, erci er asing erekmou ci, dibdenmou. Ura, erci Er Yesus bisi ato ebmou, “Nai Du, bita kum eibkatabman. Tonda, ninyi yibanmang ara co asi kumwe aryi dortorande to kunmar,” ebmou.

²⁵Ebmou ura, Er Yesus biryi tubto Er taruk asing kuamunyi asing deici tam tubto deibdongobmou. Ba, utotoa-utotoa nirya asi diboka asing eibkatabmou.

²⁶Ura, Er Yesus biryi ersi ato ebmou, “Ni mi, kan atei tamurbirum. Erda, kanci Betsaida atei asi tubto biminyei,” ebmou.

²⁷Ura, Yesus ab Er miliramnyi nang ab Betsaida atei aryi anaboka banmai ani, Kaisarea Filipi mutuk binmai. Bisik noutam banmai ci, Er Yesus biryi Er miliramnyi nang asi, “Sun ninyi aryi Nisi unanyi enunung da?” eboka asibdenmou.

²⁸Ba, sunci Ersi ato ebmai, “Ton nang aryi, Kanda, ‘Yohanes ninyi me dongoramunyi kurur,’ eranking. Yuk nang aryi, Kanda, ‘Er Imtamnyi Uram ebdeibmaca bobaramunyi Elia kurur,’ eranking. Tonda, yuk nang aryi, Kanda, ‘Er Imtamnyi Uram ebdeibmaci to lak etereramnyi nang atonyi kurur,’ eranking” ebmai.

²⁹Ebmai ba, Er Yesus biryi sunsi ato ebmou, “Ura, sunda Nisi unanyi teneranurum do?” ebmou. Ato eboka asibdenmou ura, er Petrus biryi Ersi, “Nai Du, Kanda Er Kristus bira Er Imtamnyi biryi bokwetebkounyi Ninyi Lemsurumnyi kurum,” ebmou.

³⁰Ato ebmou ba, Er Yesus biryi ersi ato ebmou, “Kanci dib ebmanirim bok, sunci sun yuk nang asi ato eboka lak eterebmunyei,” ebmou.

³¹Ebmou cok, Er Yesus biryi Er miliramnyi nang asi ato eboka eterebkalibmou. “Ni kwityabwe, Ni Ninyi Dasinyi kunun bok, sun ninyi aryi duboka Nisi mambul weik kubdeibkwaning. Ara, sun Yahudi yala nang deyok nang ab, sun Er Imtamnyi kan ninyi kan noutam kuboka antanirdeirin deyok nang ab, tonda sun Musa kerek sengna etereraming nang ara niti, ‘Malinyi,’ teneboka dokdonokwaning. Dokdonokoka abningiryi, sunci Nisi, ‘Dobtaleboka obdarur,’ eboka arukingnyi ura, ninyi aryi nisi mambul weik kubdeibningiryok, obkwaning. Ba, dibmanyi ani, uki winiryi tum berekci ura, Ni kam bukokwan,” eboka eterebmou.

³²Er Yesus biryi sunsi ato lak eterebmou ba, Petrus biryi Yesus bobinmou ura, er ab tonkwa yuk sisikmarei ci, Yesus bisi ato ebmou, “Nai Du se, takdum. Ninyi aryi Kansi obkwanking uram kekena ni li.” Ato eboka Petrus biryi Yesus bisi kerebmou.

³³Kerebmou ba, Er Yesus biryi tikoka Erci Er miliramnyi nang asi Er urasin deibmou ci, Petrus bisi ato ebmou, “Ukurdenmanirimnyi, kanda bindobdum. Kanda Er Imtamnyi biryi teneirinurur dinyi kum bikmarim. Erda, tukwetam dinyi akwe tenebmarim,” eboka wenebmou.

³⁴Er Yesus biryi Petrus bisi ato eboka wenebmou ura, Erci sun miliramnyi nang ab sun yuk bulubmai nang ab asi, “Ni dam yandarur,” eboka nabmou. Ura, Erci sunsi ato ebmou, “Unanyi-unaner aryi, ‘Er Yesus bisi milibtinyi,’ tenebdobci sal kum ner kum ara sun teneramingnyi dinyi asi dongtam kibdeiboka Er Imtamnyi kanya teleb kurdeirin dinyi akwe kununa teleb. Tonda, sun Nisi milibningnyi nang ara ato tenena teleb. Ara, sunci, ‘Co lase ara ikin dinyi takubdeiboka nisi obningnyi ababyi, nira kilkil kanya kuboka ni Du bisi iya milibkwan.’ Sun Nisi miliraniting nang aryi ato tenena teleb.

³⁵Ba, unanyi-unaner aryi, ‘Ninyi aryi obningnyei,’ tenen Nisi kum milibnici ura, anyi-aner ara iya dibkwande. Ba, unanyi-unaner aryi Teleb Uram lak etereboka Nisi iya miliranici ura, anyi-aner asi ninyi aryi obmangnyi bok, Er Imtamnyi biryi a nang asi kam bukeiboka iya lebkwande.

³⁶Unanyi-unaner aryi im dangna tukwe dangna bona nirya bobdobmate ani, sirya dibci ura, anyi-aner aryi er bona asi tuba borante do? Ato tenen kum.

³⁷Unanyi-unaner dibci ura, anyi-aner aryi er bona nirya karebte obura, kam bukokte do? Ato tenen kum.

³⁸Sun ukuryok kuraming nang ara Er Imtamnyi bisi tangloraming nang kuramiryok, iya malyi kuraming nang kunung. Ati, unanyi-unaner aryi, ‘Ninyi aryi nisi dokdonokningnyei,’ tenen Ni deyok ab Ni eterena deyok ati, alyi kubte ura, anyi-aner asi, nibabyi neiktoto alyi kubdeibkwan. Ara, Ni Ninyi Dasinyi aminda Er Imtamnyi Uram eryuryangan nang ab imtam aryi kuboka tamuryanyi ura, Niryi a nang asi dokdonokwan. Nira Ni Nai Imtamnyi bitonyi kuboka milil weiknyi ton iya mikibnyi kubniryok, tamuryanyi ura, sun imtam ai aryi Uram eryuryangan nang ilinto milibkwaning ba, Niryi a nang asi dokdonokwan.” Ato eboka Er Yesus biryi Er miliramnyi nang ab sun yuk bulubmai nang asi eterebmou.