Read Futuna-Aniwa Markus 9 Bible Online

Markus 9 - Futuna-Aniwa bible

Markus 9

¹Eterebmou cok, Er Yesus biryi Er miliramnyi nang asi ato ebmou. “Niryi sunsi diboka ebkwinsin uram asi kekendarur. Er Imtamnyi biryi Iya Erebdobnyi kurur ci, ninyi lebdeiboka kalikwansir tum dam kubmar. A dinyi kunubkwande ara sun a tikmarum nang ara sun kam tuba kuramunyi ba, Er Imtamnyi bira Iya Erebdobnyi kurur ci, mikib dinyi kiknibdiryi, ninyi lebdeiboka kalikwansir asi ton nang aryi asing eibkwandum,” ebmou.

²Ura, uki amubaryi kunmai ani, uki nabaryi tum berekmou ura, Er Yesus biryi Er miliramnyi nang si Petrus ab, Yakobus ab, Yohanes ab asi, “Ei ereboka bukwe mutuk kon asi welebinkwayeb,” ebmou. Ura, sun kwityabwe ara takloboka ereboka bukamwe mutuk kon asi welebinmai. Ura, sun winiryi nang aryi dinmai uca, lukdandoka Er Yesus bol nirya tamubmou ci, Er milil akwe arabmou.

³Milil atonyi kibmou ba, Er ongon aling ara lumtaiya ato kiboka iya kait kubmou. Sun tukwetam aryi kuboka kait aling kikniraming nang aryi ato dinyi iya kait sirik ara ton kum kikninung.

⁴Ura, Er Yesus miliramnyi nang aryi tuba dinmai uca, ninyi bitinyi ara Er Imtamnyi Uram minob bikoka ermururandei nang si Elia ab Musa ab asi asing eibmai. Ara, Er Yesus miliramnyi nang aryi asing eibmai ba, Elia ab Musa ab asi Er Yesus ab tonkwa ebdanmai ci, uram sisingmai asi asing eibmai.

⁵Ura, Petrus biryi Er Yesus bisi ato ebmou, “Nai Du, bitinyi nang ara nun ab tonkwa atam kuna teleb. Nunda atam asi keis ol ai winiryi dobkwayeb. Ara, kanti tenen ton ai dobibyi ura, tonda Musa biti tenen ton ai dobibyi ura, tonda Elia biti tenen ton ai dobkwayeb,” ebmou.

⁶Er Petrus biryi ato ebmou cok, erci er kum bikmou aryi ato ebmou. Er ab er kwityabwe ab aryi ilil tenen dinyi asi asing eibmai deyok aryi, sun ilil weik kubmou ati, erci teneiboka kum ebmou.

⁷Tuba dinmai bok, duwa aryi sunsi lilibdongobmou ci, sunsi a duwa umbura aryi uram ton kekebmai. Ara, Er Imtamnyi biryi duwa umbura aryi ato ebmou, “Anyi Yesus bira Ni Mi, Ni boukwe weik kununyi kurur. Ati, sunci Er Uram asi diboka kekebdarur,” ebmou.

⁸Er Imtamnyi biryi ato ebwe kekebyi ura, Er Yesus miliramnyi nang dibkinkanikdanmai. Uca, Elia ab Musa ab ara asing kublabum ena aryi kum dandobmarei ba, ingkiriklobmai. Ba, diramnyi uca, Er Yesus kikwe sun ab tonkwa tikmai asi asing eibmai.

⁹Ura, Er Yesus ab Er miliramnyi nang winiryi ab mutuk kon aryi kuboka yurbinmai ci, Er Yesus biryi sunsi ato ebmou, “Ni kwityabwe, a ilil tenen dinyi asi asing eibmanurum to ara sunci yuk nang asi lak ebmunyei. Ni Ninyi Dasinyi bisi dibmanyi ani, sirya kam bukokmanyi ura, sunci a eibmanurum deyok ati, yuk nang asi ur lak ebdarur.” Ato eboka Yesus biryi Er miliramnyi nang si Petrus ab, Yakobus ab, Yohanes ab asi ebdeibmou.

¹⁰Ba, sunci a kubmou to yuk nang asi lak kum ebmai bok, Er Yesus biryi ebmou deyok ati, sun kanya kankana kubmou ba, sunci sun mamun asibdanmai. Ara, “Nun nai biryi, ‘Kam bukokwan,’ ebmar ara unato ati ebmar do?” eboka sun mamun asibdanmai.

¹¹Sun kankana kubmou ba, sunci Er Yesus bisi Elia deyok ati asibdenmai. Ara, sunci Er Yesus bisi ato eboka asibdenmai, “Sun Musa kerek sengna etereraming nang aryi ato eraming, ‘Elia bisi yuma yaci ura, Er Imtamnyi biryi Ninyi Lemsurutnyi bira aminda bokwetebkwansir,’ enung. Ara, unato ati sunci ato eboka etereraming do?” eboka asibdenmai.

¹²Sunci ato eboka asibdenmai ba, Er Yesus biryi sunsi ato ebmou. “Diba, er Elia bira yuma yandoka utotoa nirya teleb kimdeirinanyi a kunum yanmar. Ura, Er Ninyi Daunyi biti Niryi sunsi asibdenkwinsin. Sun Er Imtamnyi Uram minob bikoka ermururamnyi nang aryi kerek sekoka anyi biti ato eramnyi, ‘Er Ninyi Dankwandanyi bisi ninyi aryi ina ngilikoka iya mambul kubdeibkwaming.’

¹³Bok, er Elia deyok ati ebkwinsin uram asi kekendarur. Anyi bira aminda aryi yankwandanyi kuma, erda sirya yanamunyi ati ebmasin. Ara, Ni kum yanmase bok, Elia bitonyi Nisi menekoka sirya yanamunyi. Anyi yanmou ura, sun ninyi aryi erti, ‘Anyi bisi malyi kubdeibtibyi,’ tenebmai to, sunci ersi malyi kubdeibmai. Ato kuboka sun Er Imtamnyi Uram minob bikoka ermururamnyi nang aryi erti kerek sekmai to sirya kunubmou.” Ato eboka Er Yesus biryi sun Er ab tonkwa milibmai nang Petrus ab, Yakobus ab, Yohanes ab asi eboka eterebmou.

¹⁴Sirya eterebmou ura, Er Yesus ab Er milibmai nang winiryi ab mutuk kon aryi kuboka yuryibinmai ura, sunci sun kwityabwe toubnibaryi nang dam asi yanmai. A nang asi ninyi yubwa-yubwa ilinto buluboka wekmai ci, aknabdongonmai. Sun a tikmai nang kankan ara Musa kerek sengna etereramnyi nang ababyi ninyi mikbaryi Er Yesus miliramnyi nang ab tonkwa lulubdanmai asi asing eibmai.

¹⁵Ara, ato eboka lulurdanmai bok, sun ninyi yubwa-yubwa aryi Er Yesus bisi asing eibmai ci, sunci “Naie,” teneboka Er Yesus bisi bindoka kibdobmai.

¹⁶Kibdobmai bok, Erci sunsi ato ebmou, “Una deyok ati, sunci Ni kwityabwe ab lulubdanmarum do?”

¹⁷Asibdenmou ba, sun bulubmai nang kankan aryi tikmunyi biryi Ersi ato ebmou. “Nai, ni mi asi Kan dam boyanman. Ni mi kanya ara isa aryi wekwe uca, uram ton kum erur.

¹⁸Isa aryi ersi talerande ba, er wiring-waring eboka tukwetam dokde marande ato kubci ura, kamol yaluboka si darab-darab eboka mi yal sirirande. Ati, niryi yandoka Kan miliranking nang dam asi, ‘Ni naiyabwe, sunci isa asi yakdonokdarur,’ eboka molobman ba, kan kwityabwe aryi, ‘Isa anaboka bindobdum,’ eboka yakdonokmang bok, sunda isa asi kum yakdonokmang,” ebmou.

¹⁹A mi er nai biryi ato ebmou ba, Er Yesus biryi sun Er dam bulubmai nang asi ato eboka wenebmou. “Sun uku kurandum nang ara Er Imtamnyi bisi dib kum tenerandum nang se! Nira sun ab tonkwa iya kuna Ni li. Sunci Er Imtamnyi bisi dib kum tenerandum ati, Ni kanya mambul kubmanir,” ebmou cok, Erci sunsi ato ebmou, “A isa taleamwe mi asi Ni dam boyandarur,” ebmou.

²⁰Ba, sunci a mi asi Er Yesus dam boyanmai ura, a mi wekamwe isa aryi Er Yesus bisi asing eibmou ura, a mi asi tomoboka oublobmou. Uca, a mi wiring-waring eboka tukwetam dokoka mabmou. Ura, a isa wekamwe mi ara kamol yaluboka bubatikde donmou.

²¹Bubatikde donmou bok, Er Yesus biryi a mi er nai bisi, “Kan mi ara uki unabaryi ato kurande do?” eboka asibdenmou ba, er nai biryi Yesus bisi, “Ni mi mitik uca wekamwe ani, ukuryok ababyi tuba ato kurur.”

²²Tonda, “Isa aryi liki mikbaryi aryi, ‘Obtinyi,’ tenen uk dam dokdongobde me dam dokdongobde ni mi asi orderamwe. Ati, Kanci nunsi bico teneboka ni mi asi lebdum!” ebmou.

²³Ebmou ba, Er Yesus biryi a mi er nai bisi ato ebmou. “Unato ati, kanci Nisi, ‘Lebtum ura, lebdum,’ ebmanirim do? Sun Er Imtamnyi bisi dib tenen nang aryi molobmangnyi dinyi utotoa nirya kunubte,” ebmou.

²⁴Er Yesus biryi ato ebmou ba, a mi er nai biryi uram weik doboka Er Yesus bisi ato ebmou, “Nai, niryi Kansi dib tenebmakin. Dib tenebmakin bok, ni kanya bintinibmanir ati, Kanci miliboka ni kanya asi katabum ebdeibnurum,” eboka molobmou.

²⁵Ba, Er Yesus biryi ninyi ilinto Er dam bulubmai asi, asing eibmou cok, Erci a mi wekamwe isa asi, “A isa se, kanda wekumwe uca, a mi ara uram ton kum erur ci, uram kekebman kum mi kurur. Ati, Niryi kansi, ‘Anaboka iya bindobdum,’ ebmakin. Kanci a mi asi tamuboka wengyaminyei.” Ato eboka Er Yesus biryi isa asi kereboka yakdonokmou.

²⁶Ato eboka yakdonokmou ba, a isa ara ngolok-ngolok ebnin anaboka bindobmou. Ura, isa aryi tomoboka oublobmou uca, a mi ara wiring-waring eboka mabmou ura, a mi ara lalakmou ci, dibmana ato kubmou uca, sun bulubmai nang aryi, “Se, a mi sirya dibmar,” ebdanmai.

²⁷Ebdanmai bok, Er Yesus biryi taruk taleboka a mi asi tikeibmou. Ba, a mi katabum eboka tikokmou.

²⁸Ura, Er Yesus biryi a mi asi teleb kubdeibmou ura, er ai wengbinmou. Wengbinmou ura, Er miliramnyi nang miliboka Er ab tonkwa bukmai. Sun yuk bukmai cok, sunci Er Yesus bisi ato eboka asibdanmai, “Nai Du, unato ati nunci a isa asi yakdonokman kum kubsou do?”

²⁹Asibdenmai ba, Er Yesus biryi sunsi, “Isa ara yakdonokman kum yala kurur. Ato kurur bok, nunda Er Imtamnyi, ‘Kanci milibsurum,’ eboka molobtibyi ura, diboka yakdonoktibyi.” Ato eboka Er Yesus biryi Er miliramnyi nang asi eterebmou.

³⁰Eterebmou ura, Er Yesus ab Er miliramnyi nang ab anaboka mutuk Galilea dam yibarkiringmai. Yibarkiringmai ci, Er Yesus biryi, “Ni miliraning nang sun yuk asi uram ton eterebkwan ati, sun yuk nang aryi nun yibankub bisik ara biksingnyei,” tenebmou ci, sun yuk yibanmai.

³¹Ura, Er Yesus ab Er miliramnyi nang ab tonkwa sun yuk yibanmai cok, Er Yesus biryi sunsi ato eboka eterebmou. “Nira Imtamnyi biryi bokwetebnounyi bisi sun ninyi aryi taleboka obkwaning. Sirya obningnyi ura, dibmanyi ani, uki winiryi tum berekci ura, Ni kam bukokwan,” ebmou.

³²Ba, Er miliramnyi nang sun kanya dam ara a ebmou deyok ati, kankana kubmou. Sun kankana kubmou bok, sunci Ersi a deyok ati asirdena ilil kubmou.

³³Er Yesus ab Er miliramnyi nang ab Galilea mutuk yibarkiringmai ani, Kapernaum atei yanmai. Yanmai ci, Simon ab Andreas sun ai asi wengbinmai. Ura, Er Yesus biryi Er miliramnyi nang asi ato eboka asibdenmou, “Ni kwityabwe, nun bisik noutam yanganmabuburyi, sunci unato deyok ati, lulubdanmarum do?” eboka asibdenmou.

³⁴Ato eboka asibdenmou ba, sunci alyi aryi uram ton kum ebmai. Ara, bisik noutam aryi sunci, “Nun kankan ara unanyi biryi er kwityabwe asi, ‘Ato-ato kubdarur,’ enanyi kibkwande do?” eboka lulubdanmai.

³⁵Uram ton kum ebmai ba, Er Yesus biryi bukmou ci, Er miliramnyi nang amolbaryi nang asi, “Yandarur,” eboka nabmou. Ura, sunsi ato eboka eterebmou, “Unanyi-unanyi aryi, ‘Nisi sienyi kiboka sun yuk nang asi aruktinyi,’ tenebdinyi bira erdamnyi luknubdongobdandoka sun yuk nang nirya asi dibnilibkwandur.”

³⁶Ebmou cok, Er Yesus biryi mitik mi ton sun kankan dam asi boyanmou. Ura, Erci a mi asi iribmou ci, Er miliramnyi nang asi ato eboka eterebmou.

³⁷“A mitik mi ato luknubdandob kanya ato bon nang ara Ni dam kun nang kunung ati, ebmasin. Ba, unanyi-unanyi aryi luknubdandoka atonyi erebdob kumnyi bisi Ni deyok aryi, dibnilibci ura, Niryi er ato dibnilibmarinyi biti, ‘Ato kuboka Nibabyi dibnilibmanir,’ tenenun. Ba, unanyi-unanyi aryi Nisi dibnilibnici ura, Ni Nai Imtamnyi Ni bokwetebnounyi biryi a nang ati, ‘Nira Imtamnyi bibabyi dibnilibmaning,’ tenesurur.” Ato eboka Yesus biryi Er miliramnyi nang asi eterebmou.

³⁸Ura, Yohanes biryi Er Yesus bisi ato ebmou, “Nai Du, ninyi tentok aryi isa yakdonokmou asi asing eibmoubwe. Ara, anyi biryi isa asi, ‘Er Yesus si deici aryi anaboka bindarur,’ eboka yakdonokmou. Ba, nunci ersi, ‘Takdum,’ ebmoubwe. Ara, anyi bira nun ab tonkwa milin kumnyi biryi kubmou ati, nunci ersi, ‘Takdum,’ ebmoubwe,” ebmou.

³⁹Er Yohanes biryi ato ebmou ba, Er Yesus biryi Er miliramnyi nang asi ato ebmou. “Sunci anyi bisi, ‘Takdum,’ eboka bisik sengna mem se. Unanyi-unanyi aryi Ni si deib aryi ilil tenen dinyi kiknibmaci ura, anyi bira Nisi, ‘Malinyi,’ minola kum ebkwanir.

⁴⁰Sun nunti ‘Nun li,’ tenesin kum nang ara nun kwityabwe kunung ati ebman,” ebmou.

⁴¹Ebmou cok, Er Yesus biryi sunsi ato ebmou, “Niryi sunsi diboka ebkwinsin uram asi kekendarur. Unanyi-unaner aryi sunti, ‘A nang ara Er Ninyi Lemsurutnyi bisi miliraming nang kunung,’ tenebci ura, ‘Ni yina moyok aryi me ur doyibdarur,’ ebsici ura, ato ebmasirinyi bisi Er Imtamnyi biryi dekeiboka kisal weik dakwande,” eboka eterebmou.

⁴²Eterebmou cok, Er Yesus biryi Er miliramnyi nang asi ato ebmou. “Unanyi biryi Nisi dib tenebkalibmangnyi nang asi tentoknyi bowanikminikci ba, a luknubdandobnyi biryi Nisi dib tenen dinyi asi taklobci ura, Ni Nai Imtamnyi biryi er bowanikminikmarinyi bisi bai donokoka iya wenebkwande. Ara, Er Imtamnyi biryi, ‘Ni mabwe asi tentoknyi bisi bowanikminikmanir,’ teneboka iya wenebkwande. Er ato kuboka malyi kubdeibmarinyi bira er ngang asi ikin weik keil biribdongobting ura, ilila mekwan um bong asi dokdonokting ura, teleb kubte. Ato wenen dinyi ara mambul weik kurdeirin dinyi kubte asi, Er Imtamnyi biryi a bowanikminikmarinyi bisi wenebtabakoka erci anyi bisi diboka iya mambul kurdeirin dinyi takubdeibkwande.”

⁴³Ebmou cok, Er Yesus biryi Er miliramnyi nang asi ton ato ebmou. “Er Imtamnyi biryi, ‘Malyi dinyi ni li,’ tenesurur ati, sunci ukubdeboka malyi kubmunyei. Ati, sunci sun kanya dam aryi, ‘Dinatam taruk aryi malyi dinyi ton kubtinyi,’ tenebmun cok, sunci a malyi dinyi kum kubkwandum ati, ‘Malyi kun dinyi bisik sekwan,’ tenen, ‘Ni taruk dinatam ababyi sekdatinyi,’ tenebdarur. Sunda ato kubmunyi ura, taruk tentok akwe kubsici bok, Er Imtamnyi ab tonkwa kuboka iya kam kubkwandum. Ba, sunci, ‘Dinatam taruk aryi malyi dinyi kubkwan,’ tenebmun cok, malyi kun dinyi bisik kum sekmunyi ura, sun taruk dinatam-dinatam tuba kubsici asi, Er Imtamnyi biryi bai donokoka sunsi iya wenen ai asi dongobkwansir. Akai ara uk tangabman kum ai kurur.

⁴⁴Akai ara lebdanman kum ai kurur ci, ku iya yirur ai ton uk yiboka iya arur ai kurur.

⁴⁵Ura, sunci sun kanya dam aryi, ‘Dinatam yan aryi malyi dinyi kubtinyi,’ tenebmunyi ura, sunci, a malyi dinyi kum kubkwandum ati, ‘Malyi kun dinyi bisik sekwan,’ tenen, ‘Ni yan dinatam ababyi sekdatinyi,’ tenebdarur. Sunda ato kubmunyi ura, yan imben-imben ebmunyi asi, Er Imtamnyi ab tonkwa kuboka iya kam kubkwandum. Ba, sunci, ‘Ni yan aryi malyi dinyi kubkwan,’ tenebmun ci, sirya kunubmunyi ura, yan dinatam-dinatam kubsici bok, Er Imtamnyi biryi bai donokoka sunsi iya wenen ai asi dongobsicei.

⁴⁶Akai ara lemna kum kun ai kurur cok, ku aryi iya olobde yirande ai ton uk yiboka iya arur ai kurur.

⁴⁷Ura, sunci sun kanya aryi, ‘Dinatam asing aryi eiboka malyi kubtinyi,’ tenebmunyi ura, sunci a malyi kun dinyi kum kubkwandum ati, ‘Bisik sekwan ati, ni asing dinatam kwebdatinyi,’ tenebdarur. Sunda ato kubmunyi ura, asing tentok akwe kubsici asi, Er Imtamnyi Iya Erebdobnyi amwetam kun nang kibkwandum. Ba, sunci, ‘Dinatam asing aryi eiboka malyi kubkwan,’ tenebmunyi ura, asing dinatam-dinatam kubsici asi, Er Imtamnyi biryi bai donokoka sunsi iya wenen ai asi dongobsicei.

⁴⁸Akai ara lemna kum kun ai kurur cok, ku iya yirur ai ton uk yiboka iya arur ai kurur.”

⁴⁹Ebmou cok, Er Yesus biryi Er miliramnyi nang asi ato ebmou. “A wenebmasin uram ati sunci, ‘mambul weik kurdeirisina uram akwe,’ teneboka, ‘Uk ato yisurur dinyi,’ tenebtumunyi asi, teleb kurdeirin uram akwe kurur ati ebman. Ati, sunci Ni ebmasin uram asi diboka kunubmunyi ura, iya kam kubkwandum.”

⁵⁰Ebmou cok, Er Yesus biryi sunsi ato ebmou. “Yina asi to teleb kubdeibkwamib ati, garam deibdongoramib. Garam ara teleb dinyi kurur cok, malyi kibte ura, yina asi to teleb kum kubdeibtibyi. Sunci, ‘Nun kankan aryi unanyi sienyi kibkwande do?’ eboka tuba lulurdamun cok, sunda malyi kibwe garam ato talyi kubkwandum. Ati, sunci lulurdana asi takmun ci, sun yuk nang ab tuba-tuba antanibdandoka teleb akwe kubdarur.” Ato eboka Er Yesus biryi Er miliramnyi nang asi eterebmou.