Read Futuna-Aniwa Lukas 10 Bible Online

Lukas 10 - Futuna-Aniwa bible

Lukas 10

¹Er Yesus biryi Ersi milin deyok ati sirya eterebmou ura, Ersi miliramnyi nang yuk nang ninyi tujuh puluh baryi wibmou. Ura, “Ni aminda eterebde binkwan ati, sunci ebmanyi ba, kiknibdeibmangnyi asi, Ni aminda eterebnyi ababyi bikwanung,” tenebmou atei ab mutuk ab nirya asi ninyi bitinyi-bitinyi bokdonokmou ba, menengbindoka kiknirdeirbinmai.

²Er Yesus biryi sunsi bongdonongmou ura, ato ebmou, “Wa in dam koubdoba ara mitik kum kurur bok, wa in dam koubdoba ya sengmilin nang ara mitikanun kundarur. Ara, Er Imtamnyi biryi, ‘Lebkwan,’ tenerur nang ara mitik kum kunung bok, Er Imtamnyi biryi lemna uram deyok eteren nang ara mitika nun kundarur. Ati, Er wa in dam koubdoba damnyi Imtamnyi bisi molobmunyi ba, Erci wa in dam koubdoba ya sengmilin nang ton bokdonokwande.

³Ati, Niryi sunda domba mi asi yu kam kankan bongdonongnaming to kuboka bokdonokwansin. Ara, ‘Obkwayeb,’ tenen nang kankan dam bokdonokwansin ati sun damnyi kalikdamum bok, Niryi sunsi kalikwansin ati ur bindarur!” ebmou

⁴Ato ebmou cok, Er Yesus biryi ton ato ebmou, “Banmamunyi ura, sunci bisik ai deng yin co bok kin karakna ab bisik kona aling ab yan karuk ababyi, ‘Aminda ongobkwan dinyi,’ tenen ton bona mem! Tonda bisik noutam banmamunyi ba, ninyi eibdamunyi ura, a nang ab uram tal deiboka uki kum danarsinina mem! Erda sun teneibmamun ci, banmamunyi dinyi asi kunubkwandarur.

⁵Banmamunyi ani, ai tentok asi wengbinkumunyi ura, ato ebdarur, ‘Er Imtamnyi biryi akai ninyi dam asi antanin dinyi karebmasir,’ ebkwandarur!

⁶Ba, akai ninyi aryi sunci, ‘Er Imtamnyi biryi akai ninyi dam asi antanin dinyi karebmasir,’ ebmamunyi uram asi ninyi tentok aryi kekebsirinyi bira, ‘Lemna dinyi dobdobtinyi,’ tenenanyi kuranci aryi sun ebmamunyi uram ara er dam kubkwande. Asi, sun ebmamunyi uram asi ninyi tentok aryi ton kum kekebsingnyi ura, antanin dinyi ara sun dam kum kubkwande.

⁷Ura, ai tentok wengbindoka kunmamunyi talak ara akatei doramingnyi ai nirya wengkiringna mem! Erda, a bindoka kunmamunyi ai akwe kuramunci kwaning ab me ab kareransingnyi ba, yiramunyi dinyi ara sun wa iramunyi dinyi dengna a kunum doroninto kunkwandarur ati, ilil kum asa aryi ur dobde yinkwandarur,” ebmou.

⁸Ura tonda ato ebmou, “Weik atei tentok bamunyi ba, sunsi du dongoboka yina karebsingnyi ura, ur doyibdarur.

⁹Sirya yibdobmunyi ura, akatei u yiranci nang ara ur kwetebdarur. Sirya kwetebmunyi ura, sunsi ato ebkwandarur! ‘Er Imtamnyi Iya Erebdobnyi kurur ci, ninyi ilinto Er amwetam kun nang kibdeibkwande tum dam kubmar,’ eboka eterebdarur!

¹⁰Ba, weik atei bamunyi bok, akatei nang aryi, ‘Nun li,’ eboka du kum dongobsinyi ura, sunci weik bisik dam tingbimunyi ura, uram ara ato eboka dobkwandarur!

¹¹‘Sun atei tukwe mintal nun yan dubmasir ara sun urasin dam aryi sirya kilibkabokamib. Ba, sunci nunsi, “Nun li,” ebmasurum nang ara diboka bikdobdarur! “Aminda ara Er Imtamnyi biryi nunsi wenebkwansir ara mintal kilibkabokmang to kubkwansir,” tenebkwandarur. Ato tenebmunyi ura, sun malyi tenendarur dinyi taklobmun ci, Er Imtamnyi kanya asi teleb kurdeirin dinyi akwe kunuboka sun kanya ara kiknibdobmamunyi bok, yankwamar,’ ebkwandarur!” ebmou.

¹²Er Yesus biryi ato ebmou cok tonda ato ebmou, “Niryi sunsi diboka ebkwinsin ara minob Sodom atei kuramnyi nang ababyi sun malyi kun dinyi ati, ikin takubdeiboka wenebkwande. Bok, Niryi bokeibmasinyi nang asi, ‘Nun li,’ eboka dokdonokwansing atei nang ara aminda sirya kobdob berekwande uki tum ara iya ikin weikto tabakdongoboka wenebkwande,” ebmou.

¹³Er Yesus biryi ato ebmou, “Se, sun Korazim atei kundarur nang ab sun Betsaida atei kundarur nang ab sun kankan dam ara ilil tenen dinyi kunurur bok, sun malyi kun dinyi takloboka engen kanya ton kum bondarur. Ati, aminda ara Er Imtamnyi biryi sunsi wenebkwansir. Sun Israel yala nang kobdob dam kunurur ilil tenen dinyi asi sun Tirus atei nang dam ab Sidon atei nang dam ab ara ato ilil tenen dinyi ton kum kunurur. Ato ilil tenen dinyi asi Israel yala nang kuma dam kunurante ura, sun malyi kun dinyi takloboka engen kanya boranting. Bok, erda sun dam ton kum kurur deyok aryi, sun malyi kun dinyi kum tanglonung.

¹⁴Ati, aminda sirya kobdob wenebkwande uki tum ara Tirus atei kuraming nang ab Sidon atei kuraming nang ab ababyi sun malyi kun dinyi ati weneboka ikin takubdeibkwande. Bok, sun Korazim atei kurandum nang ab sun Betsaida atei kurandum nang ab babyi sun malyi kun dinyi ati iya ikin weiktoto tabakdongoboka wenebkwansir.

¹⁵Ba, sun Kapernaum atei kurandum nang sun tenendarur ara, ‘Aminda ara nunda imtam erebdeibkwansir nang kunub,’ tenebdanmarum do? Ato tenen kum, aminda ara sunda uk bisik dobkwetebkwansir nang kundarur!” ebmou.

¹⁶Ato sirya ebmou ura, Er miliramnyi nang asi ato ebmou, “Unanyi biryi sun etereramunyi uram kekeranci ura, Ni en uram kekerandiryi. Ba, unanyi biryi sun etereramunyi uram asi, ‘Ni li,’ eranci ura, Nisi dongdonongnaniriryi. Ba, unanyi biryi Nisi ‘Ni li,’ eranici ura, Erci Ni bokwetebnounyi bisi dongdonongnandiryi,” ebmou.

¹⁷Er Yesus biryi tujuh puluh baryi bokdonokamwe nang sun kanya kilkil asa tamuryanmai ci, sun Nai bisi ato ebmai, “Nai Kan si deici aryi isa kanya mer asi, ‘Anabkaboka bindobdarur,’ ebibyi ura, nun uram kekeboka kunuboka baronung,” ebmai.

¹⁸Ato ebmai bok, Er Yesus biryi sunsi ato ebmou, “Niryi isa sienyi Iblis bisi muna sirya kibdongobse ba, imtam aryi bebe kuna ling eboka sakmou asi asing eibmase. Ati, Ni miliranurum nang ara Ni mikib aryi isa sienyi Iblis er mabwe asi muna kirdongonkwandum.

¹⁹Ati, Niryi sunsi yu kwatima ab yu kalum yan yaniramamunyi ababyi tamuboka si toransici bok, u kum yinkwansir tenen mikib karebsise. Ba, tonda isa sienyi Iblis biryi sunsi yu boboka dumderansici ababyi kum bikan ato kubdobkwandum tenen mikib karebsise.

²⁰Ati, sunci, ‘Isa kanya aryi, nun uram ebmabya kekeboka kunuboka barorur,’ tenen sun kanya kilkil kusina mem! Erda, sunci, ‘Er Imtamnyi biryi, “Ni nermabwe mabwe,” tenen nun si asi imtam kerek sengna umbura kerek sekmasir,’ tenen sun kanya kilkil kusina teleb,” ebmou.

²¹A talak akiryok Er Yesus bisi Er Imtamnyi Kanya Roh Kudus aryi langkarikmou ba, Er kanya teleb kubmou ura, ato ebmou. “Nai Imtamnyi, Niryi Kansi, ‘Ni Nai,’ eboka kibdobmakin. Nai Kanda im ton tukwe ton kikniamoumnyi, Kanci etekdob nang urasintam ab bingna nang urasintam ab ara ninyi lebkwande Weik Sienyi eboka bokwetebnumnyi deyok ati, ‘Bikingnyei,’ tenen inibdeibumwe uca, sunda kum bingnung. Bok, Kanci a deyok ara mitik mabwe urasintam ara lak kibdeibumwe. Nai Kanda ato dinyi asi teleb tenerumnyi kurum.

²²Nai Kanci Kan mikib ab utotoa nirya ab ara ni taruk dam karebnumwe ba, yuk nang aryi Ni kum bingnunung. Erda, Nai Kan tentok Ni bingnurum. Ba, Kanbabyi yuk nang ara ton kum bingkunung bok, erda Ni tentok asi Kan bingkunun. Bok, Ni Kan Mi aryi, ‘Lak kibkun,’ tenebnyi nang dam asi, ‘Ni Nai bira atonyi,’ ebkarebnyi ura, a nang ababyi Kansi bikwanking,” ebmou.

²³Ato sirya ebmou ura, Er Yesus biryi Er miliramnyi nang tam akwe urasin deiboka sunsi ato ebmou, “Er Imtamnyi Uram ebdeibmaci to lak etereramnyi nang ab weik sien nang ilinto ab aryi, ‘Er Imtamnyi biryi ninyi tentok bokdonokwansin eamunyi biryi lemyasute,’ tenen dibde buramnyi bok, kununa sun asing kum eiramnyi. Bok, sun ukuryok kurandum nang ara a dinyi nirya ara sun asing eirandum ati, sun kanya kilkil kusina teleb,” ebmou.

²⁴

²⁵Uki tentok tum aryi Musa kerek sengna etereramunyi tentok aryi, “Er Yesus bira Musa kerek sengna ara diboka bingdur do? Kum do?,” tenen Er Yesus bisi yandoka asibdenmou. “Ninyi eterenanyi, niryi una kubdobtinyi uca, iya kam kun dinyi dobdobtinyi do?” eboka asibdenmou.

²⁶Ato eboka asibdenmou uca, Er Yesus biryi tubto tamuboka Musa kerek sengna etereramunyi bisi asibdenmou, “Musa biryi, ‘Ukubdarur-Ukuna mem,’ kerek sengna umbura dam ara una eboka kerek sekamwe do? Ba, a kerek sengna nungminyi ura, una tenerum do?” eboka asibdenmou.

²⁷Uca, anyi biryi ato ebmou, “Musa biryi ato eboka kerek sekeiamwe, ‘Sunci sun Nai Imtamnyi bisi diboka boukwe weik kibdarur. Tonda, sunci sun Nai Arungdeirisurutnyi bisi tuba-tuba teneiramun ci, Er teleb tenesurur to tanglona kum uca kunubde bindarur. (Ulangan 6:5) Ato kubmun cok, sun damnyi boukwe kimdarandum to kuboka sun ninyi mamun ababyi boukwe kibdandarur,’ Musa biryi ato eboka kerek sekeiamwe asi nungnun,” ebmou. (Imamat 19:18)

²⁸Ato ebmou ura, Er Yesus biryi Musa kerek sengna etereramunyi bisi ato ebmou, “Kan ebmarim to ara diboka ebmarim ati, a ebmarim to asi diblilibde kunubminyi uca, iya kam kun dinyi dobdobkwandum,” ebmou.

²⁹Er Yesus biryi ato ebmou bok, anyi biryi, “Libdandobtinyi,” tenebmou ura, ato eboka tubto asibdenmou, “Nun ninyi mamun ara unanyi do?” eboka asibdenmou

³⁰Uca, Er Yesus biryi ato ebmou, “Ninyi tentok Yerusalem atei aryi, ‘Yerikho atei bindobkwan,’ tenen mangkau yurbanmou. Asi bisik noutam aryi ukula don nang urasintam boboka karerdarbaninto kubmou. Ba, ukula don nang aryi er bona bobdobmou dinyi akikwe nirya dorona kum kubmai, erda er ongon aling ababyi nirya kwilikloboka er nong ara kulab-kulab eboka onmai ani, dibmanto kou ura, deibloboka binsekdobmai.

³¹Asi, aminda tam ara Er Imtamnyi kan ninyi kan noutam kuboka antanirdeirinanyi bibabyi mangkau aryi neik bisik akwe yurbanmou. Ani, anyi oblobmai asing eibmou cok, bisik leiboka kiringdorbinmou.

³²A neiktoto kuboka Bait Allah dam wa irmilinanyi, Lewi yalanyi tentok ababyi neik bisik akwe yurbanmou. Ani, anyi oblobmai asing eibmou cok, bisik leiboka kiringdorbinmou.

³³Ura aminda ara Samaria mutuknyi sun Yahudi yala nang ab tonkwa ninyi bun ton kum ururdaramnyi atei nang tentok yurbanmou. Ani, ukula don nang aryi oblobmainyi dam binmou ura, diramwe uca, oblobmainyi bisi asing eibmou. Ura, er boukwe mitik kum aryi boukwe sangkuruk-sangkuruk ebmou.

³⁴Ba, anyi oblobmaia dam tingbinmou ura, anyi dilaka asi anggur me ab ninyi kwetena ab aryi likdongoboka liboka kwetebmou. Ato kuboka sirya kwetebmou ura, tomobtaleboka er bukmou bisam keledai dub burdirbindoka bobinmou ani, tiya dekoka man ai dongorbinmou ci, kwetebmou.

³⁵Ura, ambutum toa ara tiya dekoka man ai damnyi bisi keil uang dengna weik dinyi bitinyi karebmou ura, ato ebmou, ‘Kanci anyi kalingdamin ci, kweterandum! Anyi kweteramin ci, kan co bok yuk-yuk dinyi dengnaminyi to ara aminda ni tamuryanyi tum aryi kanbabyi unubkwankin,’ ebmou.

³⁶Ati, kan tenebmarim ara a winiryi nang aryi kubmai dinyi ara unanyi kubmou dinyi asi oblobmai boukwe bobmou ci, ‘Ninyi mamun boukwe kibdarur,’ ebmou dinyi lak kibmou do?” Ato eboka Er Yesus biryi Musa kerek sengna eterenanyi bisi asibdenmou.

³⁷Uca, Musa kerek sengna eterenanyi biryi ato ebmou, “Oblobmainyi bisi boukwe aryi er boukwe sangkuruk-sangkuruk ebmou ba, kwetebmounyi bisi, ‘Ninyi mamun boukwe kibdarur,’ ebmou to lak kibmou,” ebmou. Ura, Er Yesus biryi anyi bisi ato ebmou, “Bindobminyi ura, a kekebmarim to kuboka ninyi mamun asi boukwe kiboka kunubkwandum!” ebmou.

³⁸Er Yesus ab Er miliramnyi nang ab bisik noutam banmai ci, atei tentok binmai. Binmai ura, akatei ner si Marta biryi sunsi naboka er ai du dongobmou.

³⁹A ner Marta bira er weit ner si ara Maria. Maria bira Er Yesus yan dam buryandoka Er Yesus eterenmou uram asi kekenmou.

⁴⁰Bok, Marta bira mambul kanya bobdobmou ci, sunsi du dongobmou. Ura, Marta biryi Er Yesus dam tingyandoka ato ebmou, “Nai, Kanda ni weit ner aryi taklobokmanir ba, ni yuk mambul doboka yina kiknirminingmasin dinyi ara Kanda malyi tenebmanirim do? Kanci ersi, ‘Kan du ner milirbirum,’ ebminyi ba, ni miliyanici ura, tonkwa yina kiknibdeibdobkwansinim,” ebmou.

⁴¹Ato ebmou bok, Er Yesus biryi Marta bisi ato ebmou, “Se Marta, Marta, kanci yina kikninmasirim dinyi ababyi teleb kunmasirim bok, erda kan biramnyi yuk-yuk dinyi ati weikto mambul kanya bon dinyi aryi orminingdarandem.

⁴²Bok, iya bikdob dinyi ara tentok kurur. Ati, Maria biryi wibdobmar dinyi ara iya teleb dinyi asi wibdobmar ci, kanya luknubdongoboka Ni uram enman asi kekenmar. Ati, kanci bisik sengminingninto kunmarima mem!” ebmou.