Read Futuna-Aniwa Lukas 11 Bible Online

Lukas 11 - Futuna-Aniwa bible

Lukas 11

¹Uki tentok tum aryi Er Yesus biryi mutuk tentok bukoka Er Imtamnyi bisi molonmou. Ani, sirya molobmou ura, Ersi miliramnyi nang ninyi tentok aryi Er Yesus bisi ato ebmou, “Nai, Yohanes ninyi me dongoramunyi biryi er miliramnyi nang asi, ‘Er Imtamnyi bisi molona ara ato eboka molobdobkwandarur,’ eboka eterebwe to, Kanci nunbabyi, ‘Er Imtamnyi bisi molona ara ato eboka molobkwandarur,’ eboka eterebsurum,” eboka molobmou.

²Ba, Er Yesus biryi sunsi ato ebmou, “Sunci Er Imtamnyi bisi molobdobkwamamunyi ura, ato eboka molobdobkwandarur, ‘Nai Imtam Kurumnyi, Ninyi nirya aryi, “Iya Teleb kurumnyi,” eboka Kan si ererdeikina teleb. Kanda iya weik sienyi kurum ati, Kanci lebdeiboka kaliksimin ba, ninyi nirya aryi Kan arungdeirisin uram dobdobting.

³Arub aryi yina yibkwamabyi kikimanto Kanci karebsurum.

⁴Ninyi aryi nunsi malyi dinyi kubdongobmasingnyi asi nunci tuba kum teneiramib to, Kanbabyi neiktoto nun malyi kun dinyi asi tuba kum teneibsiminci. Tonda, isa aryi yandoka, “Malyi kubting,” tenen dumdesici ba, Kanda Imtamnyi biryi bisik sekoka lebdobsurum.’ Ato eboka molobkwandarur!” ebmou.

⁵Ura, Er Yesus biryi Er miliramnyi nang asi ton ato ebmou. Ara, “Sun kankan aryi ninyi tentok anaboka lukunda dukduk en aryi er kwit bisi bindoka, ‘Ni kwit, ni ninyi bun bisik ai yibanmang cok, ni ai yanmang ba, niryi du dongobkwaman dinyi utotoa ton kum deibman ati, kan roti kwaning tokol winiryi tiya karebnurum ba, aminda aryi kanbabyi unubkwankin,’ erdarur.

⁶

⁷Ato ebmamunyi bok, anyi biryi ato esurur, ‘Nun kamursininmasirima mem! Nun bublan sirya tirikdobmabci, ni nerabwe mabwe ab sirya mabdobmab ati, ni kwit, niryi bukoka kum dobkarebkwankin,’ erdarur.

⁸Ati, Niryi sunsi ebkwinsin, anyi biryi, ‘Ni kwit,’ tenena ara ‘Burongna ni li,’ tenebdandaturyok, erda molobmatunyi biryi yandoka alyi kum asa aryi titik-titik eboka molordanmamunyi deyok aryi, bukoka er molobdobmaci dinyi dorkarerdandarur,” eboka kikliboka eterebmou.

⁹Ato kikliboka eterebmou cok, “A deyok aryi, Niryi sunsi ebkwinsin, unanyi biryi molobdobci ura, ersi karebkwande. Ba, unanyi biryi ingkirikdobci ura, erci eibdobkwande. Ba, unanyi biryi ai bublan congom-congom ebdobci ura, erti ai bublan kukeibkwande. A deyok aryi, sun Nai Imtamnyi biryi sunsi karebkwansir ati molobdobdarur. Ba, sunci lak eibdobkwandum ati ingkirikdobdarur. Ba, iya bublan sunti kukeibkwansir ati, ai bublan congom-congom ebdobdarur.

¹⁰

¹¹Dantam nang aryi er nai bisi er mi aryi mekinaiya molobdobmaci bok, mekinaiya unumna kwatima dorkarenung do? Ato ton kum kunung. Erda, sun mabwe aryi molobdobmanyi dinyi to dorkareraming.

¹²Tonda, dantam nang aryi er nai bisi er mi aryi kirim du molobdobmaci bok, kirim du unumna kalum dorkarenung do? Ninyi tentok aryi sun mabwe asi ato ton kum kunung.

¹³Ati, sun yu kanya bondarur nang ababyi, sunci ninyi karena diboka bingdarur ci, sun mabwe-nermabwe aryi sun molobmangnyi dinyi to dorkarendarur. Ati, Er Imtamnyi namin kanya borutnyi bira wanok molobdobmangnyi nang ati Er Imtamnyi Kanya Roh Kudus kareransir,” Er Yesus biryi ato eboka eterebmou.

¹⁴Uki tentok tum aryi Er Yesus biryi, ninyi tentok isa kanya wekamwe ba, uram kum eramwe asi isa kanya yakdonokmou. Ba, a isa kanya anabkaboka yibarou ura, anyi bira uram ebkalibmou ba, ninyi ilinto aryi, “Nai kobe,” tenebmai.

¹⁵Bok, a nang kankan aryi ton yuk nang ara ato ebmai, “Erci isa kanya yakdonokmar ara isa sienyi si Beelzebul mikib aryi yakdonokmar,” ebmai.

¹⁶Ba, ton yuk nang ara, “Ersi dubdetibyi,” tenebmai ura, Er Yesus bisi ato ebmai, “Imtam aryi yanaminyi ura, ilil tenen dinyi ton kiknibderum,” ebmai.

¹⁷Ato ebmai bok, Er Yesus biryi sun tenebmai kanya bikmou ura, ato ebmou. “Weik sienyi kalingnande mutuk asi mar bordaramingnyi ura, orsengdaraming, tonda sun mining ai abala mar bordaramingnyi ura, tonkwa antaniboka kum kuroraming. Erda bongwalwalardaraming.

¹⁸Ato ara isa sienyi Iblis kalingnande mutuk nang aryi bokdandoka mar bobdating ura, er kalingnande mutuk nang nirya obsekdating. Ati, sunci Nisi, ‘Isa sienyi si Beelzebul mikib aryi isa kanya asi yangdonokmar,’ ebmanurum ara diboka kum ebmanurum. Nira er kalingnande mutuk tamnyi kum kunun.

¹⁹Ati, sunci Nisi, ‘Isa sienyi si Beelzebul mikib aryi isa kanya mer asi yangdonongdur,’ tenebmanurum ara malyi to tenebmarum ati, Niryi sunsi asirdena ton asibdenkwinsin, sun Yahudi yala nang ababyi isa kanya mer asi yangdonongnung ara unanyi mikib aryi yangdonongnung do? Isa sienyi mikib aryi do? Er Imtamnyi mikib aryi do? Sunda unatoa ati, sun mining yala nang ati, ‘Er Imtamnyi mikib aryi isa kanya mer yangdonongnung,’ tenendarur bok, Niti tenenindarur ara, ‘Beelzebul mikib aryi isa kanya mer yangdonongdur,’ tenenindarur do? Sun mining atei nang ara, ‘Beelzebul mikib aryi isa kanya yakdonokman kum,’ tenen dinyi ara bingnung ati, sunci Nisi tatab-tatab erdongonmanumunyi ura, ‘Talyi tatab-tatab en kum,’ eboka lak ebsiting.

²⁰Bok, Niryi Er Imtamnyi mikib aryi isa mer asi yakdonokmanyi asing eibmamunyi ura, sunci ato tenen bikwandarur. ‘ “Er Imtamnyi bira mikib weik kuboka arukdeibkwansir talak ara nun dam yanmarci kunmar,” tenebkwandarur,’ tenen ukubmanun,” ebmou.

²¹Ato ebmou cok, Er Yesus biryi isa kanya yakdonokmou deyok ati tubto kikliboka sunsi ton ato ebmou. “Ninyi tentok aryi mikibnyi kiknibdandoka yin mar kikniboka er ai kalingdoraunte ura, er bona talena ara tentok ababyi ton kum waningdante.

²²Bok, ninyi tentok iya mikib kobdobnyi yandoka dub ererdaranturyi yin mar kiknirante dinyi nirya dalubte ura, ersi milibmating nang ati bokeibte. Ura, mikibnyi kimdarante ababyi surukum ebte.

²³Ati, unanyi biryi Nisi kum miliranirinyi bira erda Ni mar ordananyi kurandiryi. Ba, unanyi biryi Ni ab tonkwa ninyi naboka Er Imtamnyi mabwe nermabwe kum bulurdeiriranimnyi bira erci yakdonokoka bongwalwalarsinirande,” ebmou.

²⁴Er Yesus biryi ton ato kuboka eterebmou, “Isa kanya ara ninyi kanya dam aryi anaboka yibindanci ura, talyi noutam asi yibinkirikoka er kubdobmanto ai ati ingkiringkiringnande. Ani, er kubmanto ai ton kum eibdobci ura, ato erande, ‘Ni tubto tamuboka abniryi, takloyase ai wengdorbinkwan,’ erande.

²⁵Ato ebci ura, tamuboka takloboka binandinyi bisi yandoka diranci uca, er takloboka binandinyi bira telebto kuboka kuroranci bok, Er Imtamnyi Kanya Roh Kudus asi wengyangana kum kuanci ba, Er Yesus milinanyi kum kuranci asi asing eirande.

²⁶Ato kuboka kuranci asi yandoka eibci ura, anabkaboka iya yu but kobdob isa mer asi tabaryi naboka boyangarande ba, akai umbura yandoka kuraming. Ba, isa mer wengyandoka kuraminginyi bira minob kuranci kamuk ara yuk ba, isa kanya tabaryi er kanya dam wengyangnyi ba, kubkwanci kamuk ara iya yu mitik kumnyi kubkwandur,” eboka eterebmou.

²⁷Er Yesus uram tuba sisingmou bok, ninyi ilinto wekmai kankan aryi ner tentok aryi, “Er Yesus bira Er Imtamnyi Uram diboka eteresurur,” tenebmou. Ura, erci Er Yesus Er kwin bisi kisal dakmou ci, uram doboka ato ebmou. “Kanda Er Imtamnyi Uram diboka etereransirim ati Kan mundu boboka deiankou ner ab mum diniankou mum ab ara Er Imtamnyi biryi wibdeiboka kisal dangdur ner kurur,” ebmou.

²⁸Ato ebmou bok, Er Yesus biryi ato ebmou, “Er Imtamnyi Uram kekeboka kalingnamingnyi nang asi Er Imtamnyi biryi kisal dangdur nang kuramingiryi,” ebmou.

²⁹Ninyi ilinto aryi Er Yesus bisi arubdongobmai talak ara Erci uram doboka ato ebmou, “A talak kundarur nang ara yu kanya akwe bondarur cok, Nisi, ‘Erci ilil tenen dinyi ton kiknibdete asi asing eibtibyi,’ tenenindarur. Bok, sun dam ara ilil tenen dinyi ara Yunus biryi kiklibdeibmou dinyi sirya bingdarur ati, Niryi ilil tenen dinyi tentok ababyi ton kum kiknibdenkwaman.

³⁰Yunus biryi Niniwe atei nang dam asi bindoka ato eboka eterebmou. ‘Sun malyi kun dinyi taklobmunci Er Imtamnyi Uram asi diboka kekeboka kunubdarur,’ eboka eterebmou. A kiklibdeibmou to asi Ni Ninyi Dasinyi bibabyi a talak kunmarum nang ati, ‘Sun malyi kun dinyi taklobmun ci, Er Imtamnyi bisi kanya teleb kurdeirin dinyi akwe kunubdarur,’ eboka eterenmasin,” ebmou. [1]

³¹Ura, tonda Er Yesus biryi ato ebmou, “Minob talak uca, me youkwa sien ner biryi mutuk sirya aryi kuboka weik sienyi Salomo bingna dinyi kekeryanmou. Bok, Salomo bingna dinyi outam kibkweteboka eitam kununyi biryi eteresunun dinyi asi sun a talak kunmarum nang ara diboka diba kum tenendarur. A deyok aryi, sirya kobdob wenebkwansir uki tum ara me youkwa tam weik sien ner ab sun a talak kunmarum nang ab tonkwa kam bukokmun cok, a ner aryi sun nirya asi tatabdongobkwansir.

³²A neiktoto kuboka, Yunus biryi Niniwe nang dam asi Er Imtamnyi Uram bindoka eterebmou ura, sun malyi kun dinyi takloboka Er Imtamnyi bisi diba tenebmai. Bok, Yunus outam kiboka eitam kununyi biryi eteresunun. Asi, sun a talak kunmarum nang ara diba kum tenendarur deyok aryi, sirya kobdob wenebkwande tum ara Niniwe nang ab a talak kunmarum nang ab ara tonkwa kam bukeibkwansir. Bok, Niniwe nang aryi sun a talak kunmarum nang asi tatabdongobkwansing,” ebmou.

³³Er Yesus biryi ninyi ilinto asi eterenmou ci, ato eboka eterebmou. “Ninyi tentok aryi uk ubna dinibdongobci ura, dobtaleboka ai aumbonga kum inirdeirande. Tonda tower aling bublan tirikna aryi kum siklirdeirande erda dobtaleboka co lamna deici asi deirirande. Ba, akai wengyanganmangnyi ninyi nirya a uk ubna milil asing eiraming. Ato aryi, Niryi sunsi, ‘Er Imtamnyi Uram Ni etereran uram asi diboka bikdobting,’ tenenun ci, laktoto kiboka eteresunun ati diboka bikdobkwandarur.

³⁴Sun asing ara berengna milil kanya dam wengyangasin bisik bublan ato bondarur. Ba, asing teleb kuansici ura, bisik teleb eiboka sun nong boboka yibarandum. Bok, sun asing asi kunuk dakansici ura, bisik diboka kum eirandum.

³⁵A deyok aryi, sun kanya dam asi bita teneibdandendarur, ‘Er Yesus eterena asi Ni kanya dam sirya wengyandoka berekeibnou do? Kunuk dam eterena malyi asi ni kanya dam tuba bonun do?’ tenen kanya teneibdenkwandarur.

³⁶Sun kanya tam nirya berengna milil arabkareansiriryi sun nong ababyi dinatam kalimna kunuk ton kum dakansici ba, kanya teleb akwe boramunyi ura, sun kubde ban tam ababyi teleb dinyi akwe kunubde binkwandarur,” eboka eterebmou.

³⁷Er Yesus biryi ninyi eterenmou ani, sirya eterebmou ura, Musa kerek sengna dirniliramnyi nang Farisinyi tentok aryi Yesus bisi, “Ni ab tonkwa yina yibkwanim ati, Ni ai yarum!” ebmou. Ba, Er Yesus anyi ai binmou ura, “Yina tonkwa yibkwayeb,” tenen bukoka arubdongobmai.

³⁸A arubdongobmai talak aryi, Farisinyi biryi Er Yesus bisi dinmou uca, yina dobde yina kabul talak aryi taruk me ilingdona kum kubmou. Ba, “Nai kobe, Er Yesus bira taruk me kum ilikdobmar cok asi yina dam buryanmar. Nun minob kubde yanganub ara malyi dinyi taruk bol linmabyi ati kanya teneiboka taruk me ilingkarongnub bok, Erda ato kum kubmar,” tenebmou.

³⁹Ato tenebmou bok, Er Yesus biryi wenen uram deyok winiryi doboka, Farisi nang ati wenebmou ci, ato ebmou. “Se, sun Musa kerek sengna dirnilindarur nang ara sun me yin moyok ab buna yangana ab ara baitam ati me ilingkarongdarur. Bok, sun kanya tam ara tula kiringna kanya boboka ukula don kanya weksici ura, yu dinyi mitik kum langkaringsurur ababyi kum ilingkarongdarur.

⁴⁰Sun iya kum bingdondarur nang se, Er Imtamnyi biryi sun nong bol kiknibsounyi biryok sun kanya tam ababyi kiknibsou ara sun kum bingdarur do? Sunda nong bol ilingdan dinyi ati bingdandarur. Bok, Erda sun malyi kanya bondarur dinyi ara Er nirya bingsurutnyi kurur.

⁴¹Ati, Niryi sunsi ebkwinsin, sun kanya aryi teleb kuboka Er Imtamnyi biti sun dama deirininto kuboka utoto kum nang ati ton bokeibdarur. Ato kubmunyi uca, Er Imtamnyi biryi sunsi malyi kuna kum nang ato kibdeibkwansir.

⁴²Bok, sun Farisi nang ara ato kundarur. Er Imtamnyi biryi, ‘Ato kubdarur,’ ebsou dinyi ara ton dinyi ababyi kunundarur ura, yuk dinyi ababyi kunubkwandarur. Sunda mitik dinyi ababyi teleb to kuboka utotoa dororandum dinyi nirya yuma dinyi ara Er Imtamnyi biti dama deiboka tamukarerandum. Bok, weik dinyi ara sunci ninyi nirya asi teleb kum kimdarur ab Er Imtamnyi bisi boukwe kum kimdarur deyok aryi, aminda ara Er Imtamnyi biryi sunsi wenebkwansir,” eboka wenebmou.

⁴³Ato ebmou cok, tonda ato eboka wenebmou, “Sun Farisi nang Musa kerek sengna dirnilindarur nang ara Musa Uram eteren ai wengbindoka, ‘Nunsi erebdeibsiting,’ teneboka erebdob sokon burandum ab, ‘Dengna ai dam kunmating nang aryi nunsi erebdeibsiting,’ tenerandum nang ara aminda Er Imtamnyi biryi sunsi wenebkwansir,” eboka wenebmou.

⁴⁴Ura, tonda Er Yesus biryi neik dinyi atikwe kiklina ton eboka wenebmou. Ara, “Sunda ninyi din nang tukwe dongon dam asi sisa kum deiamingnyi ba, alib tam mangkau yibaraming ato nang kundarur. Ara, sun kanya tam ara yuk-yuk malyi tenen dinyi mitik kum kusurur bok, yuk nang aryi, ‘A nang ara teleb kunung nang,’ teneboka sunsi mangkau miliransing nang kundarur,” eboka wenebmou.

⁴⁵Ato kuboka wenebmou asi, Musa kerek sengna etereramnyi kekebmai ura, ninyi tentok aryi Er Yesus bisi asibdenmou ci, ato ebmou, “Nun eteresurumnyi, ato eboka wenebmarim to ara nunbabyi ina ngilikoka wenebmasirim,” ebmou.

⁴⁶Ato ebmou bok, Er Yesus biryi, Musa kerek sengna etereramnyi nang ababyi wenen uram ebkarebmou ci, deyok winiryi doboka wenebmou. “Sunci yuk nang asi, ‘Ato kubdarur-ato kubdarur,’ eboka ikin takubdeibmunyi ura, ton mitikanun milibkwayeb ton kum tenendarur. Erda, ‘Sun takubdeibmab nang a kunum ikin takubdobkwaming,’ tenebmunyi ura, taruk mungkurungdorandum nang aminda ara Er Imtamnyi biryi sunsi wenebkwansir,” eboka wenebmou.

⁴⁷Ura, tonda ato eboka wenebmou, “Er Imtamnyi biryi uram ebdeibmaci to lak etereramnyi nang asi sun aibweyabwe aryi oramnyi nang bok, sunci teleb-teleb kiboka tukwe ungna dam ai dordeirandum deyok aryi, aminda ara Er Imtamnyi biryi sunsi wenebkwansir,” eboka wenebmou.

⁴⁸Ato eboka wenebmou cok, “Ato kuboka teleb-teleb kimdarur ci, sun aibweyabwe aryi Er Imtamnyi Uram ebdeibmaci to lak etereramnyi nang asi oramnyi ara sunda teleb tenendarur ci, kasuboka tukwe dongon dam asi ai dordeirindarur.

⁴⁹A deyok aryi, Er Imtamnyi Iya Bikdobnyi biryi ato ebwe, ‘Sun dam asi Niryi Ni uram ebdeibmanya boban nang ab Ni uram deyok kouboka eterebde ban nang ab bokdonokwan. Ba, a nang ara ton nang ara obingnyi ura, ton nang ara kulab-kulab eboka wenebkwaming.’

⁵⁰Ato kubingnyi deici aryi Er Imtamnyi biryi uram ebdeibmaci to lak etereramnyi nang ining sangnamwe dinyi nirya ara a talak kunmarum nang sunsi kisok dakwansir. Ara, minob im ton tukwe ton kiknibmou talak ara Adam mi Habel bisi deyok kouboka obde yanamnyi ani, sirya kobdob ara Zakharia bisi Bait Allah ai dam aryi oryanamnyi. Ati, Niryi sunsi ebkwinsin ara a nang oramnyi ba, ining sangnamwe nirya ara a talak kunmarum nang sunsi kisok dakwansir,” eboka wenebmou.

⁵¹

⁵²Ura, tonda ato eboka wenebmou, “Sun Musa kerek sengna eterendarur nang ara Er Imtamnyi Uram bikoka eterena ara sun dam kurur. Bok, sunbabyi a bingna dinyi ara kum bingdondarur cok, yuk nang aryi, ‘Er Imtamnyi bokwetebunyi bisi asing eiboka Er Uram kekeboka diboka bikdobtibyi,’ tenen kunmangnyi ura, sunci, ‘Anyi uram kekena mem!’ eboka bublan tiringdongondarur deyok aryi, aminda ara Er Imtamnyi biryi sunsi wenebkwansir,” eboka wenebmou.

⁵³Ato sirya ebmou ura, Er Yesus adikum aryi anaboka bindobmou. Ba, Musa kerek sengna etereramnyi nang aryi tuba-tuba Ersi dibliliboka yuk-yuk asirdena asirkiringnamnyi.

⁵⁴Ba, sunci, “Una ebte asi kekebtibyi ura, deyok deibdongoboka taleboka obtibyi,” tenen Ersi kalingkiringnamnyi.