Read Futuna-Aniwa Lukas 12 Bible Online

Lukas 12 - Futuna-Aniwa bible

Lukas 12

¹A talak aryi Er Yesus biryi eterenmou ba, ninyi yubwa-yubwa ilinto yandoka Ersi arubdongoboka dongmirdanmai bok, Erci Er miliramnyi nang akikwe ebkarebmou ci, ato ebmou. “Sun Farisi nang ara Musa kerek sengna dirniliramnyi nang ara kanya tam ara yu kanya bobmangiryok, baitam asi Er Imtamnyi Uram diboka kunun nang ato kimdanung dinyi ara ninyi ilinto dakdongobde yibanung. Ati, sunda diboka diblilibdandoka kalikdandobkwandarur.

²Ukuryok ara sun ninyi nirya ara yu kanya boraming dinyi yuk nang dam ara lak kum kimdamunyi ababyi aminda ara lak kibkwande. Tonda, ukuryok ara ninyi sun dam nang siklirdongordaramingnyi dinyi ababyi aminda ara lak kibdeibkwande ba, ninyi nirya bikwaming.

³Ara, ato deyok ati ebman, unanyi biryi, ‘Malyi, ninyi kum kekenmang ai ara uram yuk to ebmanyi ani, ninyi ilinto kekenmangnyi ai ara yuk to ebkwan,’ teneramingnyi ababyi aminda ara lak kibkwande ba, ninyi nirya bikwanding. Ba tonda, ‘Malyi, ni yuk inibdob ai aryi uram ebmana yuk nang kum bingmaning,’ teneramingnyi ababyi aminda ara lak kibwande,” ebmou.

⁴Ebmou cok tonda ato ebmou, “Se Ni kwityabwe, Niryi sunsi ebkwinsin ara yuk ninyi ara nong dem osin nang ati, ‘Nun obsingnyei,’ tenen ilil kusina mem! Erda sunci ilil tenebkwamunyi bira Er Imtamnyi bisi ilil tenebkwandarur! Er Imtamnyi urasin dam asi malyi kubnyei ura, ninyi nong babyi kanya babyi oboka, uk buk weikto angmaci umbura dam dongon mikib bobunyi bisi ilil tenebkwandarur!

⁵

⁶Mitik maka ninienyi amubaryi ara mitik keil uang bitinyok dengdandarur dinyi ababyi, Er Imtamnyi biryi a maka mer asi tentok ababyi luba ton kum kimdur.

⁷Ato kuboka, Er Imtamnyi urasin dam ara maka ninienyi outam kibkweteboka sun ninyi ara bikdob dinyi kundarur deyok aryi, sun kisok otong ababyi nirya nungsurur ci, Er Imtamnyi biryi sunsi iya dibniliboka kalingsur ati sunci ninyi asi ilil tenena mem!” ebmou.

⁸Ato ebmou cok, ato ton ebmou, “Niryi sunsi ebkwinsin, unanyi-unaner aryi Nisi ninyi urasin dam aryi, ‘Anyi bira diba Ninyi Daunyi kurur,’ eboka lak eramingnyi ura, Nibabyi Er Imtamnyi ab Er Uram eryuryangan nang ab tikoka dinmangnyi ai aryi, ‘Anyi bira Ni bingnunyi kurur,’ ebkwan.

⁹Bok, unanyi-unaner aryi Nisi ninyi urasin dam aryi, ‘Anyi bira diba Er Imtamnyi biryi Bokwetebunyi kurur kuma, eboka ni li,’ ebnirinyi bira Nibabyi Er Imtamnyi urasin dam ab Er Uram eryuryangan nang tikmangnyi urasin dam ab aryi, ‘Anyi bira Ni kum bingnunyi kurur,’ ebkwan.” Ato eboka Erci Er miliramnyi nang asi ebkarebmou.

¹⁰Ura ton, Er Yesus biryi kilibman kum malyi kun dinyi ati ato ebmou, “Unanyi biryi Nisi, ‘Erda Ninyi Daunyi kuma, nun li,’ eboka u dokom erandum malyi kun dinyi ara kilibkwamasitinyi. Bok, unanyi-unaner aryi Er Imtamnyi Kanya Roh Kudus asi, ‘Tola, Er Imtamnyi Kanya Roh Kudus mikib aryi Er Yesus ab Er milinung nang ab wa inung kuma,’ eboka u dokom erongna malyi kun dinyi ara iya kilibman kum dinyi kurur.

¹¹Ati, ‘Er Yesus bira nun li,’ tenen nang aryi sunsi taruk taleboka Musa Uram eteren ai kalingna nang urasin dam kum weik nang urasin dam kum mutuk talen nang urasin dam kum bobisingnyi ura, ‘Naie niryi una uram ebtinyi uca, lebdandobkwaman do?’ tenen kum! [2]

¹²A talak ara Er Imtamnyi Kanya Roh Kudus aryi sunci a nang urasin dam eboka lebdandobkwamamunyi to eterebkarebsici ura, a nang dam asi ebkwandum ati, ‘Se naie,’ tenena mem,” eboka eterebmou.

¹³Er Yesus eterenmou ba, wekmai nang kankan ninyi tentok aryi Er Yesus bisi ato ebmou, “Nun eteresurumnyi, Nai Kanci ni du bisi ebdum! Ba, nun nai taleramwe ani, deibloboka dibwe dinyi ara ni ton bokeibkwanir ati, ‘Bokdobdururum!’ ebdum!” ebmou.

¹⁴Uca, Er Yesus biryi anyi bisi ato ebmou, “Ni kwit e, Nisi ninyi tentok aryi, ‘Kanda sun bitinyi nang noutam tikoka deyok lilirdeinanyi kurandum,’ ton kum eboka tekeibnei. A wa ara Ni wa kuma,” ebmou.

¹⁵Ato ebmou cok sunsi tubto ebmou, “Sunci, ‘Bona weikanun talebtinyi,’ tenen tula kiringna dinyi ara kalikdandobdarur! Ninyi tentok aryi kam kurande dinyi ara bona weikto taleranci dinyi aryi kam kum kurur,” ebmou.

¹⁶Ura, Erci yuk kemdeirin uram ton kebdeiboka eterebmou. “Bona ilinto borantunyi tentok kurante, anyi bira er wa in dam ara yina lubde yibarante.

¹⁷Ura, er kanya dam aryi teneinmaturyi, ‘Wa ara sirya ibdobse ba, nong ara ilinto manmar ati, do talak ara dakwaman talak kubmar. Ati, ai ara sirya dobdobse bok, yina ilinto dongobmanto ai ara ton kum dobdobse ati, una kubnyi uca, yina kiboka ai dongodobkwan do?’ tenebte.

¹⁸Ura, ato kuboka teneibte, ‘Ni gandum du ab ni bona talena ab dongobkwan ai ara gandum du deirin ai dakoka abniryi, weikto ai nun doboka dongobkwan.

¹⁹A sirya dongobnyi ura, ni kanya asi, “Kanya o, kan dam ara bona talena ara mitik kum deibmakin. Ati, kwalina o kwali-o kwali baramingnyi talak ara taruk louboka buramin ci, kanya kilkil asa aryi yina yiboka me tuba yirmurunkwandim,” ebdankwan,’ tenebte.

²⁰Ato teneinmote asi, Er Imtamnyi biryi anyi bisi uram ato ebdeibte, ‘Se, kanda iya walwal kanya bororumnyi. Arub lukunda aryok kan isin nebneb en dinyi dobdobkinyi ura, kan ai dongobumwe yina ab bona ara unanyi dinyi kibkwande do? Kan dibminyi ura, kan boboka ai dongoraminyi dinyi ara dibkwandim ai kum bobinkwandim,’ ebte,” eboka kebdeiboka eterebmou.

²¹Ura, Er Yesus biryi kebdeiboka eterebmou dinyi ati lak ara ato kibmou, “Er Imtamnyi bisi diba kum tenerandiryok bona ilinto talerandiryi yuk nang asi boukwe kiboka ton karena kum uca, bona asi u deici deiboka tula kiringdarandinyi bira a kiklibman atonyi kurandiryi,” eboka eterebmou.

²²Er Yesus biryi Er miliramnyi nang ati yuk eterenmou ci, ato ebmou, “A deyok ati Niryi sunsi ebkwinsin, sun kam kurandum dinyi ati mambul kanya bona mem! Ara, sunci, ‘Ni arub ara una kubdobnyi uca, yibkwaman do?’ tenen mambul kanya bona mem! Tonda sun nong bol limdana ati, ‘Una kubdobnyi uca, nong bol libdandobtinyi do?’ tenen mambul kanya bona mem!

²³Er Imtamnyi biryi tenerur ara, ‘Sun isin nebneb en dinyi ab sun nong bol ab asi bikdob dinyi kundarur,’ tenerur. Ba, ‘Yina ab nong bol limdana ab ara malya,’ tenerur,” ebmou.

²⁴Er Yesus biryi ato ebmou ura, yina ab nong bol limdana ati mambul kanya bon deyok ati kiklina bitinyi kikliboka eterebmou. Yuma kiklibmou dinyi ara ato. “Sunci maka teom mer asi dibdendarur! A maka mer aryi ton kum kounung, ton kum kirkiringnung, yina kiboka deirin ai ababyi ton kum kiboka co sangkul umbura dongordeirinung. Bok, Er Imtamnyi biryi a maka mer asi yina yirkarerur. Ati, sun ninyi ara Er Imtamnyi biryi maka mer yina karerur bok, sun ninyi asi ara iya kanya deiboka yina tabakoka karesurur.

²⁵Ati, unanyi biryi er isin nebneb en dinyi ati, ‘Una kubdobnyi uca, kam ton kunmaniryok asi dibkwan,’ tenen mambul kanya boboka kam kun uki ton tabangdandarur do? Ato ara iya ton kum kunung.

²⁶Ati, sunci mitik deyok isin nebneb en uki ababyi ton tabakdanman kum kuransici ura, sun yina dinyi ab sun nong bol limdaron dinyi ab ara wanok ukubdandobman kum ati, ‘Una kubkwan do?’ tenen kum,” ebmou.

²⁷Ba, kiklina bitinyi dinyi ara ato eboka kiklibmou. “Sunci sikil keta asi dibdendarur! A co aryi ongon aling ton kum wiboka ongorur. Bok, Niryi sun dam ebkwinsin ara er weik sienyi Salomo bona ilinto taleramunyi kuramwe talak ababyi sikil keta orande bol ato ongon aling ara ton kum ongoramwe

²⁸Ba, wa in dam sungsunga arub ara keta teleb to obmaci asi ambutum ara kwiniboka uk daraming dinyi ababyi Er Imtamnyi biryi bol merengdeirande, sun ninyi ara erebkaboka weiktoto merengdeisurur ati sun ninyi ara mambul kanya bona mem.

²⁹A dinyi nirya ara tukwetam kunung nang ara Er Imtamnyi bisi diboka kum bingnung nang aryi ingkiringnung. Bok, sun Nai Er Imtam kurutnyi bira sun dam kum kubmasici dinyi nirya ara bingsurur! Ati, sunci, ‘Una kubdobnyi uca, kwaning me yibkwaman do?’ tenen mambul kanya boboka udikum deina mem!

³⁰

³¹Ati, Niryi sunsi ebkwinsin, sunci, ‘Er Imtamnyi biryi leboka kalingna Weik Sienyi amwetam asi kubdobtinyi,’ tenen ingkirikdobmunyi ura, sunci, ‘Yibtibyi,’ tenebmamunyi dinyi ab, ‘Ongobdobtibyi,’ tenebmamunyi dinyi ab yuk dinyi ababyi nirya ara sun dam tabakdongoboka karebkwansir.

³²Sun mitikanun kunmarum nang ara, Er Imtamnyi biryi sunsi lebdeiboka Er amwetam bun nang asi kibdeibkwansir ati, sun kanya ilil kusina mem!

³³Sun bona talena nirya dekmunyi ura, Er Imtamnyi biti sun dama kareninto kuboka utotoa kum nang ati karebdarur! Ba, sunda kanya ara, ‘Imtam ai dam ara kum danana kum kubkwande bona ab, ukula don nang ababyi bol lirdena kum kubkwaming dinyi ab, bulbula ababyi kum otokwande dinyi ab asi dobdobkwayeb,’ tenen kiknibdeibdarur.

³⁴Ara, ato deyok ati ebmasin, sun kanya ara bona deibmamunyi ai sun kanya ababyi adikum akwe teneindarur ati, a dinyi taklobmunci eikai dam kurur dinyi akwe teneibdarur,” ebmou.

³⁵Er Yesus biryi Er miliramnyi nang ati yuk eterenmou ci, ton ato eboka eterebmou, “Sunda sun nai dibde bunkwamunyi ura, nong acu murun ongon aling der arikna deibdobmunyi ura, ‘Wa ibkwayeb,’ tenen sun uk ubna ababyi buk dinibdongobmunyi ba, abci ura, sun nai lukunda yangana ati kiknibdeiboka dibde bunkwandarur! [3]

³⁶Ba, sunda wa irmilin nang aryi sun nai bira ner kam dongordan dam binanci ati, ‘Nun nai yandoka bublan congom-congom ebci asi kum bikibyei,’ tenen dibde buraming. Ba, sun nai yandoka bublan congom-congom ebci ura, bublan ola kungdeiraming ato nang kubdarur!

³⁷Sun nai biryi yandoka dinmaci uca, er wa irmilin nang ara sun nai yangana ati dibde buramingnyi ura, sun nai biryi yandoka kisal dangnande. Niryi sunsi diboka ebkwinsin ara sun nai biryi yandoka, ‘Wa ibkwan,’ tenen, nong acu murun ongon aling der arikna deibdobci ura, er wa irmilin nang asi, ‘Ni dam ur yandoka yina deirin co lamna bukoka aknabdongobdarur,’ erande. Ba, sunci er dam yangnyi ura, erci sunsi du dongorande.

³⁸Sun nai biryi lukunda dukduk en kum berekdoroban kum yandoka diranci uca, sunci dibde buramingnyi asi asing eibci ura, sunsi kisal dangnande,” ebmou.

³⁹Ato ebmou cok, ton yuk kiklina aryi Er kwityabwe asi katabum ebdeibmou. “Ninyi tentok ai damnyi biryi, ‘Ukula don nang ara a talak yankwamang,’ tenena kum kubmaci ura, ‘Ukula don nang yandoka ni ai dakoka bona dobdobningnyei,’ tenen kalikoka buraming.

⁴⁰Ato kuboka Ni Ninyi Dasinyi tamuryankwan uki tum ara sunci, ‘A uki tum tamuryankwande,’ kum tenebkwandum. Ati, sun Ni miliranurum nang ara diboka kiknibdeiboka kalikoka dibde buramunyi bok, Ni yankwan,” ebmou.

⁴¹Ato ebmou ura, Petrus biryi uram doboka ato asibdenmou, “Nun Nai, Kanci a kebdeiboka ebmarim uram ara nun kikwe ati ebmasirim do nun ninyi nirya ati kebdeiboka ebmasirim do?” eboka asibdenmou.

⁴²Uca, Er Yesus biryi danguboka Petrus bisi asirdeninto kubmou uca, Er miliramnyi nang asi ato kubdarur ebmou, “Sun kankan dam asi sun nai ai dam aryi busul kuboka wa irantunyi bisi, ‘Ni binkwan talak ara kanci yuk wa irmilin nang sun yina dorkaren talak kubci ura, dorkarenkwandimnyi erebdeibkin,’ eboka tikeibte.

⁴³Ura binante, ani, yandoka dirante uca, er wa kareboka binantunyi biryi wa diboka irante ura, anyi bisi kisal dakdobte,” ebmou.

⁴⁴Ato ebmou cok, tonda ato ebmou, “Niryi sunsi ebkwinsin, sun nai biryi wa diboka irantunyi bisi, ‘Erda wa diboka irur deyok aryi, ni ai dam kurur dinyi nirya kalingkwandanyi erebdeibman,’ ebte.

⁴⁵Bok, a erebdeiantunyi bira yu kasaknyi kurante ura, er kanya dam aryi, ‘Ni nai kum yankwande,’ eboka er nai wa irmilin nang yuk nang ab er nai wa ir milin nerabwe ab asi kulaboka, er nai ai kwaning me doyiboka, walina talen me yiboka kimnante.

⁴⁶Ura, a wa irmilinanyi biryi, ‘Ni nai bira a uki tum yankwande do a talak yankwande do?’ tenerante uki tum kum yankwamote, erda er kum tenerante uki tum yaute. Ura, sun nai biryi yandoka dirante uca, anyi biryi kurante dinyi bikte ura, a wa irmilinanyi bisi oboka ya kalibte. Ura, er nai biryi a wa irmilinanyi bisi busul kanya kum boramingnyi nang iya weiktoto wenebkwande to kuboka wenebte,” ebmou.

⁴⁷Ato kebdeiboka eterebmou cok, tubto Erci lak kiboka eterebmou, “Wa irmilin nang ninyi tentok aryi er nai teneibmote dinyi ara bikanturyok erci kiknibdeiboka wa ina kum kurante ura, er nai biryi kulabkwamote ura, weikto kulabte.

⁴⁸Bok, wa irmilinanyi biryi er nai teneibmote dinyi ara kum bikanturyi er nai biryi ersi kulabmanto dinyi kunubmote ura, er nai biryi kulabkwamote bok, er nai teneibmote dinyi kum bikante deyok aryi, mitikanun kulabte. Ba tonda, Er Imtamnyi biryi unanyi bisi, ‘Er Imtamnyi wa irmilina ati Ni wa asi kanya teleb kuboka ibde binkwande,’ tenen kisal dakoka weiktoto kareanci ura, ersi weiktoto molobkwande. Ba, unanyi bisi kalingnandum eboka mitik kum kareanci ura, kalikoka kurandinyi bira weikanun tabakdongoboka molobkwande,” ebmou.

⁴⁹Er Yesus biryi Er kwityabwe asi yuk eterenmou ci, ton ato eboka eterebmou, “Ni tukwetam yuryase ara, ‘Uk sirika donokmangnyi uca, uk arande to kubte,’ tenen yuryase. Ba, Er Imtamnyi Uram asi diboka diba tenen nang ab Er Imtamnyi Uram asi diboka diba tenen kum nang ab asi Er Imtamnyi Uram aryi yuk-yuk wibdobkwanung. Ati, ‘Dam talak akiryok ola kunubdeibtinyi,’ tenebman,” eboka eterebmou.

⁵⁰Ura, tonda ato ebmou, “Dina kum kubmanyi talak ara Ni kanya ara mambul mitik kum kubkwanir. Ba, a mambul mitik kum dobniryok dibkwan dinyi aryi Nisi ilil weik mekwan dam ato dongobkwanir.

⁵¹Sunci Ni yase ati tenendarur ara, ‘Anyi bira antanirdeiryasounyi yau,’ tenendarur bok, Niryi sunsi ebkwinsin ara Ni yase ara, ‘Mar ibdandarur,’ tenen yase.

⁵²A deyok aryi, a talak akiryok deyok koubdandoka, tentok ai umbura aryi ninyi amubaryi nang mar ibdangiryi ninyi winiryi nang kibdobingnyi ura, ninyi bitinyi nang asi mar ibdeibkwaming. Ba, ninyi bitinyi aryi winiryi nang asi mar ibdeibkwanding.

⁵³Sunci mar ibdangnyi ura, Er nai biryi er mi asi mar ibdeibkwande ba, er mi aryi er nai bisi mar ibdeibkwande. Ba, er kwin biryi er nebnyi asi mar ibdeibkwande ba, er nebnyi aryi er kwin bisi mar ibdeibkwande. Ba, er naiyong biryi er kaibwa ner asi mar ibdeibkwande ba, er kaibwa ner aryi er naiyong bisi mar ibdeibkwande,” eboka eterebmou.

⁵⁴Er Yesus biryi Er kwityabwe yuk eterenmou ani, sirya eterebmou ura, Erci ninyi nirya ati, ato ebmou. “Sunci dinmamunyi uca, mutuk nirya ngoukmaci ura, a talak aryi sunci ato erandum, ‘Mutuk nirya ngoukande ati mo cebkwamar,’ erandum. Ba, sun a ebmamunyi tok kunurande.

⁵⁵Ba, kiting wengbariryi lak kibci ura, ‘Ambutum ara dou kubkwande,’ erandum. Ba, sun a ebmamunyi tok kunurande. [4]

⁵⁶Sunda yu kanya bomamun cok, Er Imtamnyi Uram diboka kunun nang kimdandarur nang se. Sun kankan dam kunubkwamaci dinyi ara ola bikoka, ‘Ato kubkwamar aryi kubmar,’ tenendarur. Bok, unatoa ati a talak aryi Niryi kikninun dinyi ara, ‘Er Imtamnyi bira Weik Sienyi kurur ara laktoto kibkwamar ati kunmar,’ kum tenendarur do?

⁵⁷Ba, ton sunda, ‘Er Imtamnyi biryi ebdeibsou dinyi asi kunubkwan,’ ebdandoka kunubmanto nang kundarur bok, ato kum erdandarur.

⁵⁸A deyok aryi, sun mar ibdanamunyi nang ab tonkwa weik sienyi dam binkwamamunyi ura, bisik ai aryi antanibdandobmun cok, asi weik sienyi dam binkwandarur. Ato kum kubmun cok, weik sienyi dam banmamunyi asi weik sienyi biryi ninyi wenena uram sengkwetenanyi bisi dobkarebsicei. Ba, anyi biryi kuboka er wa irmilin nang asi dobkarebsicei. Ba, a nang aryi ninyi wenen ai dam dongorbisingnyei.

⁵⁹Niryi sunsi ebkwinsin, ara sun bobloamunyi dinyi nirya kum dekamunyi ura, akai dam aryi ola anabkaboka yibarona kum kubkwandarur. Ati, sun malyi kun dinyi ton kuramunyi ura, weik sien nang aryi kum wenebmasingnyi talak aryi uram minob ola sisikabokwandarur!” eboka eterebmou.