Read Futuna-Aniwa Lukas 13 Bible Online

Lukas 13 - Futuna-Aniwa bible

Lukas 13

¹Er Yesus biryi ninyi nirya ati eterenmou talak aryi ninyi mikbaryi nang Er Yesus dam yanmai. Yanmai ura, ato eboka Er Yesus bisi nukarebmai, “Galilea mutuk nang aryi Yerusalem atei dam sun dama Er Imtamnyi biti domba kum kambing kum sapi kum oboka uk danmai ci, molonmai. Bok, Pilatus biryi a nang asi obdarur ebmou ba, obmai uca, sun ining ab sun oboka uk danmai bisam ining ab talbalibmou,” eboka nukmai.

²Asi, Er Yesus biryi a yandoka nukmai nang ati ato ebmou, “Sun tenebmarum ara, ‘Yuk Galilea mutuk nang nirya aryi sun malyi kunung dinyi ara ikin kum. Erda, a obmai Galilea nang ara sun malyi kunung dinyi ara ikin weik deyok aryi, ato kuboka obmai,’ tenebmarum do?

³Ato kuma, sun malyi kun dinyi asi ikin deyok ati kum obmai. Niryi sunsi ebkwinsin ara sunci, ‘Ni malyi kun dinyi taklobniryi, Er Imtamnyi kanya teleb kibdeibkwan dinyi akwe kunubkwan,’ kum teneramunyi ura, sunbabyi a nang dibmai to dibkwandum.

⁴Kum sun tenebmarum ara, ‘Siloam atei dam asi Yerusalem atei keil dukoka don ai aryi dakoka ninyi dinatam takubaryi siklibmou nang ara sun mining malyi kun dinyi ikin weik deyok aryi, siklibmou. Ba, yuk Yerusalem atei nang nirya ara sun malyi kun dinyi ara ikin kum,’ tenebmarum do?

⁵Ato kuma. Niryi sunsi ebkwinsin, sunci, ‘Ni malyi kun dinyi taklobniryi, Er Imtamnyi kanya teleb kibdeibkwan dinyi akwe kunubkwan,’ kum teneramunyi ura, sunbabyi a nang siklibmou ba, dibyi to kuboka dibkwandum,” ebmou.

⁶Er Yesus biryi kemdeirina ton dobmou ci ato kuboka eterebmou, “Ninyi tentok aryi er co anggur wa in dam asi co kwarang kouante. Ani, uki tentok tum aryi a co damnyi biryi, ‘A co kwarang du ton mourur do kum do?’ tenen dirbinmote. Uca, du ton kum mourante asi bindoka asing eibte.

⁷Ura, a co damnyi biryi er wa kalingnangnyi bisi ato ebte, ‘Kekerandum. Kwalina winiryi ara a co kwarang dam yandoka, “Du ton mourur do?” tenen diryanganun uca, co du kum mourur ba, ton dakoka yina kum kunun. Ati, a co kwarang ara wa in dam talyi tikwe ati kwebkabokdum!’ ebte.

⁸Uca, a wa kalingnanyi biryi ato ebte, ‘Nai, a kwalina ara kum kwebkabokwaman, erda takmaniryi tukwe deyok dam deibdongoboka kulonga deibdongo kimanyi ba, o kwalina dibdinyi ba, du ton kum moubci uca, kwebkabokwan,’ ebte,” eboka eterebmou.

⁹

¹⁰Er Yesus biryi, sun Yahudi yala nang wa in kum uki si Sabat tum tentok aryi Musa Uram eteren ai wengbindoka ninyi eterenmou.

¹¹A eterenmou ai umbura ara amnyok dukamwe ner tentok wengyanmou. A ner ara isa kanya wekamwe uca, amnyok dukmuruamwe ba, tikoka yibindobman kum kuramwe talak ara kwalina dinatam takubaryi kwaliamnyi.

¹²Asi, Er Yesus biryi a ner asing eibmou ura, nabmou ba, Er dam yanmou ura, ato ebmou, “Se Ni kwin, kan u yikurur dinyi ara sirya kwetebkinyi ba, lobdobkwinkir,” ebmou. Ura, Er Yesus biryi ato eboka Er taruk a ner deici deibdongobmou akiryok, a ner amnyok dukamwe ara tubto minob kuramwe ato kibdobmou. Ba, a ner aryi Er Imtamnyi bisi si weik ereboka kibdobmou.

¹³

¹⁴Ba, Er Yesus biryi uki si Sabat tum asi ninyi kwetebmou deyok aryi, Musa Uram eteren ai kalingnamunyi bira yu wekmou. Ura, akai wekmai nang asi ato ebmou, “Sun wa in uki tum ara uki nabaryi berengdur ati, taruk louboka bun tum si Sabat tum aryi ninyi kwetena mem! Erda uki nabaryi berengdur uki asi ninyi kweten uki tum kibdobmun ci, ‘Nun kwetebkwansir,’ tenen bobde yanmunyi ura, kwetebdandobdarur!” ebmou.

¹⁵Ato ebmou bok, Er Yesus biryi anyi bisi ato ebmou, “Sunda, kanya tam ara yu kanya bobmamun cok, Er Imtamnyi Uram diboka kunun nang ato kimdarandum nang se. Sun kankan dam ninyi tentok aryi er wa in bisam sapi kum, bisam keledai kum, wa in kum uki si Sabat tum ara er bisam winin ai aryi boboka me kin bobindoka kum kiringdeirbiting do? Kum, sun nirya ato kundarur ci, sun wa in bisam sapi ababyi uki si Sabat tum bok, boboka me kin bobindoka kiringdeirbandarur. Ato kun dinyi ababyi wa in dinyi tenendarur.

¹⁶Ato deyok aryi, sunbabyi Abraham deibdoba nang kundarur to a ner erbabyi Abraham deibdoba ner kurur. Bok, isa kanya aryi tabwe debninto kubwe talak ara kwalina dinatam takubaryi sirya kwalibyi. Ati, Ni boukwe deyok aryi, uki si Sabat tum bok, Niryi a ner asi isa tabwe debninto kubwe dinyi lobdeibman,” ebmou.

¹⁷Ato eboka Er Yesus biryi sunci, “Nun du ner,” kum teneramnyi dinyi lak kibmou ba, Er Yesus bisi, “Nun li,” teneboka bisik sengminingnamnyi nang ara alyi kubmou. Bok, Erci kubmou dinyi ara luba kibman kum dinyi kubmou ab Er etereramwe deyok aryi, yuk nang nirya ara sun kanya teleb kubmou.

¹⁸Er Yesus biryi ninyi asi Er Imtamnyi Uram eterenmou ci ato kebdeiboka eterebmou, “Unatoa aryi kikliboka Er Imtamnyi bira Weik Sienyi kurur amwetam kubkwandum ati eterebsitinyi do?

¹⁹A talak kubkwandum ati kiklina ara ninyi tentok aryi kwarang du mitika asi wa in dam bindoka kwekmaci uca, abdiryi weik welebci ura, te yangnande. Ba, maka mer aryi a co te asi ai laboka du deiraming to kubkwandum,” eboka kebdei eterebmou.

²⁰Ato eterebmou cok tonda ato ebmou, “Unatoa aryi kikliboka Er Imtamnyi bira Weik Sienyi kurur amwetam kubkwandum ati eterebsitinyi do?

²¹A talak kubkwandum ati kiklina ara ner tentok aryi roti kwaning kiknibkwamariryi sici borbosa ato dinyi ilinto kankan asi roti kwaning bung-bung eboka welerande dinyi ara mitik to keica dongobmaci ba, bung-bung eboka welerande ato kubkwansir,” eboka kiklibmou. Ara, ato ati kikliboka eterebmou, “Er Imtamnyi Uram asi akatei dam ara mitikanun etereanyi. Bok, weikto ara a etereanyi eterena aryi im dangna mutuk tukwe dangna mutuk nirya bikwaming,” tenen eterebmou.

²²Er Yesus biryi atei Yerusalem baramuryi mitik atei bina weik atei bina kiboka Er Imtamnyi Uram eterebde baramwe.

²³Ato kubde baramwe noutam aryi ninyi tentok Ersi yandoka ato eboka asibdenmou, “Nai ninyi mitikanun asi lemna dinyi dobdobkwaning do?” eboka asibmou.

²⁴Uca, Er Yesus biryi Er dam wekmai nang asi ato ebmou, “Imtam ai wengban bisik bublan ara dukubdob ati, ‘Una kuboka wengdorbinkwan do?’ tenen mambul kanya boboka kiknibdobkwandarur! Ara, ato ati ebmasin, aminda ara ninyi ilinto aryi, ‘A bisik bublan wengdorbitinyi,’ tenen ukurdenmangnyi bok, wengbinman kum kubkwande.

²⁵Ukuryok ara akai bublan ara Niryi tuba kukeibse tok, aminda Ni ai damnyi biryi yandoka bublan tirikdobnyi ura, ola kum wengdoryamunyi nang ara baitam tiklobmunci bublan congom-congom eboka, ‘Nai nun wengdoryankwayeb ati, bublan kukeibsurum se,’ eboka uram dobkwandum. Bok, Niryi ato ebkwansin, ‘Sunda Ni kum bingsunun ati, dantam aryi yanmarum do?’ ebkwansin.

²⁶Ato ebsinyi bok, sunci ato ebkwandum, ‘Nunda Kan urasintam yina yiboka Kan ab tonkwa kuboka kimnamuburyi, Kanci nun atei dam eterebde yibaramumwe uram ara nunbabyi kekeramoubwe,’ ebkwandum.

²⁷Ato ebmunyi bok, Niryi ato ebkwansin, ‘Nira sun kum bingsunun ati, sunda dantam aryi yanmarumci ato enmarum. Yu kanya akwe boyibamunyi nange. Ni urasin dam a tingna kuma minola bindobdarur!’ ebkwansin.

²⁸Ato eboka yakdonoksinyi ba, ‘Se,’ tenen kanya bobmun ci, si darab-darab en mutuk uk bisik bindoka dinmamunyi ba, Er Imtamnyi bira ninyi leboka kalingna Weik Sienyi kurur mutuk dam imtam asi, Abraham bukmaci asi asing ebkwandum. Tonda, Ishak bukmaci asing eibkwandum. Tonda, Yakub bukmaci asi asing eibkwandum. Ba tonda, Er Imtamnyi Uram minob ebdeibmaci to lak etereramnyi nang bukmangnyi asi asing eibkwandum. Ato asing eibmunyi bok, sunda baitam yakdonokwansin ba, engeboka mambul kanya mitik kum dobkwandum.

²⁹Ba, Er Imtamnyi biryi Bokwetebnounyi tamuryankwan tum ara yaletam atei nang ab, kitingbantam atei nang ab, me utam atei nang ab me youkwa tam atei nang ab aryi Er Imtamnyi bira ninyi leboka kalingna Weik Sienyi kurur mutuk dam imtam asi, sun Yahudi yala nang kum bok, buluryandoka antaniboka yina yibkwaming.

³⁰Ba, diba kobdob ati, ukuryok talak aryi sun ninyi ilinto aryi, ‘Iya teleb,’ kum tenerandum dinyi ara aminda Er Imtamnyi biryi nunukdeibkwande. Ba, ukuryok talak aryi ninyi ilinto aryi, ‘Iya teleb,’ tenerandum dinyi ara aminda Er Imtamnyi biryi kum nunukeibkwande,” eboka eterebmou.

³¹Er Yesus biryi ninyi eterenmou talak aryi Farisi nang ninyi mikbaryi Er Yesus dam yandoka ato ebmai, “Kansi weik sienyi Herodes biryi, ‘Obkwan,’ tenebmakir ati, Herodes kalingdur mutuk Galilea akiryi bindobdum!” ebmai.

³²Ato ebmai bok, Er Yesus biryi sunsi uram dekeibmou, “A yu biribdob kam asi bindoka ebdarur, Nira arub ab ambutum ab a kubde binkwaman talak ara isa kanya wengdur nang ab u yirur nang ab kwetenmanyi ani, uki weik kum ibmaniryok Er Imtamnyi biryi teneibnou to kuboka sirya irbinkwaman.

³³Ato tenebman cok, Er Imtamnyi Uram ebdeibmaca bobanyi bisi Yerusalem dam ona kum uca, yuk atei dam ona ara malyi to ati dam talak akiryok Yerusalem dam binkwaman cok wa inman. Ati, sunci titik-titik eboka, ‘Birum,’ enmanurum ara mem!” ebmou.

³⁴Ato ebmou ura, atei Yerusalem nang ati boukwe eibmou ci, ato ebmou, “Se Yerusalem, Yerusalem, kanda Er Imtamnyi Uram ebdeibmaci to lak etereramnyi nang orkarongdum. Ba, Er Imtamnyi biryi kan dam bongdongdur nang ara keil aryi donmaminyi uca, dinung. ‘Niryi tuba-tuba kirim aryi er mabwe bulubdeiboka ol amwetam dongobdeiboka irirande to kubkwaman,’ tenen kunmanyi bok, kanda, ‘Ni li,’ tenerum.

³⁵A deyok aryi, Niryi sunsi diba ati diboka ebkwinsin, a talak ara Ni asing kum einmanumunyi ani, Ni Yerusalem atei dam bisam keledai deici bukoka wengyanganyi uki tum aryi sunci ato ebkwandum, ‘Er Imtamnyi si deici aryi yanganmar ati, Er si asi weik ebkwayeb!’ (Mazmur 118:26) Ato ebkwandum tum aryi asing eibkwanurum. Ato ebmun cok, sun kanya dam yu weksici ura, sunci Niti, ‘Nun li,’ tenebkwanurum. A deyok aryi, Er Imtamnyi biryi sunsi kalingsina kum kubsiriryi, taklobsici ura, sun atei olong dem kubkwande,” ebmou.