Read Futuna-Aniwa Lukas 15 Bible Online

Lukas 15 - Futuna-Aniwa bible

Lukas 15

¹Er Yesus biryi ninyi etereramwe ura, Roma weik sien nang ati pajak dengna karebdarur en nang ab, yuk malyi kun dinyi kuramnyi nang ab Er Yesus dam yandoka Erci etereramwe uram kekeryangaramnyi.

²Ba, Farisi nang ab Musa kerek sengna uram etereramnyi nang ab aryi talak dobmai ci, ato ebmai, “Se, Anyi bira malyi kun dinyi kunung nang ab bukokmar aryi yina tonkwa yinmang,” ebmai.

³Ato ebmai ati Er Yesus biryi uram doboka neik deyok ati, kemdeirin aryi liliboka ato eterebde binmou.

⁴“Sun kankan dam aryi ninyi tentok aryi domba seratus baryi winirante asi, tentok wanikmote ura, una kubte do? Erci, ‘Malyi, tentok dinyi ara a kunmarur,’ kum tenebte erda sembilan puluh sembilan baryi dinyi ara winirante mutuk dam takloboka tentok domba ingkiringbite.

⁵Ingkiringbinmote ani, a wanikmote domba sirya asing eibte ura, er kanya kilkil aryi tomoboka takubdobturyi, yaute.

⁶Boyanganmote ani, sirya atei boyate ura, er kwityabwe ab, er ai dam ninyi ab naboka abturyi, ato ebte, ‘Ni kwityabwe, ni domba wanikmonwe bisam ara sirya eibman ci, bobde yanman aryi, ni kanya kilkil mitik kum kubmanir,’ eboka nukarebte ura, er kwityabwe ababyi kanya kilkil kubte.

⁷Ati, Niryi sunsi ebkwinsin, sembilan puluh sembilan baryi tuba kunmai domba ara ninyi sembilan puluh sembilan baryi nang ati kiklibmou. A nang ara ato tenenung, ‘Nunda utotoa malyi kun dinyi ton kum kunub,’ teneraming nang ati, imtam kuraming nang aryi, ‘Teleb,’ tenen dinyi ara mitiktoto teneraming. Bok, tentok domba wanikmou ani, dobmou domba ara ninyi tentok ati kiklibmou. Anyi bira er malyi tenen dinyi takloboka Er Imtamnyi Uram eanci to kununanyi kibci ura, sun kanya teleb aryi kilkil mitik kum kurande,” ebmou.

⁸Er Yesus biryi neik deyok ati enmou ci, yuk kemdeirina ton ebmou, “Ani, tonda ner tentok aryi dengna weik keil uang takubaryi deibdante uca, tentok wanikmote. Ura, uk ubna una kum-kum nimalyi kwarakdeiboka ai sungsunga kiboka ingkiringmote ura, eibdobte do? Erci, ‘Malyi, tentok dinyi ara a wanikmanyi ababyi weika ara tuba deibdobman,’ kum tenebte. Erda, nimalyi kwarakdeiboka ingkiringdonmote ani, dobdobte.

⁹Sirya dobdobte ura, er ka nerabwe ab er ai dam nerabwe ab naboka ato ebte, ‘Ni kayabwe, ni keil uang wanikmonwe dinyi ara tubto sirya dobdobman ati, ni kanya kilkil kubmanir,’ eboka nukarebte ura, er kayabwe ababyi kanya kilkil kubte.

¹⁰Niryi sunsi ebkwinsin, a neiktoto kuboka ninyi tentok aryi er malyi kuranci dinyi takloboka Er Imtamnyi Uram eanci to kununanyi kibci ura, Er Imtamnyi ab Er Uram eryuryangan nang ababyi kanya kilkil kurande,” ebmou.

¹¹Er Yesus biryi eterenmou ci, neik deyok ati ton ato kemdeirina winiryi dinyi kebdeiboka eterebmou. “Bona bonanyi tentok aryi mabwe bitinyi deibdante.

¹²Ura, uki tentok tum aryi kelenyi biryi er nai bisi ato ebte, ‘Nai, kan talerum bona, “Aminda ara er dinyi kibkwande,” teneraniminyi bona talena ara ukuca karebnurum!’ eboka molobdobte. Ba, sun nai biryi er talerante bona talena sun bitinyi mabwe ati bokdeibte.

¹³Ura, kelenyi bira uki bitinyi kum winiryi kum ara erti karebmote bona ara dengdonmote ani, co bok akwe kibdobte ura, ‘Bobde binkwan,’ tenen dinyi akwe dekdobte ura, ninyi atei asi yuk mutuk tingdorbite. Yuk mutuk bindoka kurante ai ara, ‘Aminda ara ato kubde binkwan,’ tenen kanya teneirdena kum kurante. Erda, er bobdante bona talena nirya ara malyi kun dinyi ati kuboka waningsinirante.

¹⁴Ani, er bobdante bona talena nirya kum dandeibokte bok, er bindoka kurante mutuk dam ara kwaning atana li dobte ba, a mi ara kwaning ab ukutotoa nirya kum danabmurubte.

¹⁵Ura, er bindoka kurante atei asi ninyi tentoknyi bisi wa irmilirbite. Ba, anyi biryi, ‘Ni bisam kalingkwanirim,’ eboka wa in dam bokdonokte. [6]

¹⁶Ba, a bindoka kalingnante talak ara kwaning atarante ura, ‘Bisam yina karebmating yina asi ton yibtinyi se,’ tenerante. Bok, ninyi tentok ababyi ersi yina ton kum kareranting.

¹⁷Ato kuranturyi, er kanya dam aryi ato tenebte, ‘Nai kobe ato kubse to ara malyi to kubse. Ni nai ai dam wa inung nang ara yina bulung ton kum bunung asi nira kwaning atan asa kunun uca, ni talya dibkwan.

¹⁸Ati, anabdobniryi, ni nai bisi bindobnyi ura, ato ebkwan, “Nai niryi Imtamnyi urasintam ab nai kan urasintam asi manmalibdongobsise.

¹⁹Ati, nai kanci ni mi enina ara malyi to ati, kanci nira wa irmilinanyi ebkwanurum,” ebkwan,’ tenebte.

²⁰Ura, anabdobturyi, er nai bisi tubto tamuboka bindobte. Banmote ani, atei damtoto baute ura, er nai biryi dinmote uca, er mi kelenyi yuk mutuk do yanganmote asi asing eibte. Ura, er mi boukwe aryi kanya sangkuruk-sangkuruk ebte ba, er mi yanganmote dam cungbindoka iribdobturyi, uw kunkunubdobte.

²¹Uca, a mi aryi ato ebte, ‘Nai niryi kan urasintam ab Er Imtamnyi urasintam ab asi manmalibdongobsise ati, nai kanci nisi ni mi enina ara malyi to ati, kanci nira wa irmilikinanyi ebnurum,’ ebte.

²²Ato ebte bok, a mi er nai biryi er wa irmilin nang asi ato ebte, ‘ “Ni mi nong,” tenebkwan ati, minola cungbindoka ongon aling teleb asi ongordeiryandarur. Ba, “Erda akai kurur dinyi kalingne mi,” tenebkwan ati taruk du dongona ababyi dongordeiryandarur. Ba tonda, “Erda ni wa irmilinanyi kuma,” tenebkwan ati, yan karuk ababyi ongordeiryandarur.

²³Sirya ongobdeibmunyi ura, bisam sapi ukuryok kabunyi nebmar ci, tub kablobmar bisam asi oboka yubdarur! Ni mi ara dibninto kubwe ani, tubto kam bukokninto kubmar. Tonda, waningnaming mi ato kubse asi yanmar ba, eibdanmanim deyok aryi, a uki tum ara teleb uki tum kubmar ati, kanya karyi asa aryi tonkwa yibkwayeb,’ ebte. Ura, sun nirya kanya kilkil aryi sun nai ebmote to kunuboka kwalibmatingiryi, mot sebting.

²⁵Bok, er mi dunyi bira wa in dam kunmote ani, yanganmote ani, ai dam yandoka kekerante uca, ai umbura ara bu eboka mot lilim ilinto enmating asi kekebte.

²⁶Ura, wa irmilinanyi tentok asi naboka asibdete, ‘Akai umbura dam ara una kunmarum ci, ato enmarum do?’ eboka asibdete.

²⁷Uca, a wa ir milinanyi biryi ato ebte, ‘Kan weit wanikdau ani, arub aryi sirya yanmar. Ba, kan nai ab teleb kuboka ebdanmaring ci, kan nai biryi ukuryok kabunyi nebmar ci, tub kablobmar bisam sapi asi oboka yubmar ci, kunmab,’ ebte.

²⁸Ato ebte ura, a mi dunyi bira er yu aryi akai wengbana kum kubte. Ba, er nai biryi sakweteboka nenem yaute.

²⁹Bok, a mi aryi er nai bisi ato ebte, ‘Nai bita kanya teneibderum! Nira kwalina o kwali-o kwali banunga nirya ara kan wa akwe ikunun. Ara, kan uram ebdeibmaminyi to ara niryi mitik ton kum lebesengnun bok, kanci bisam kambing mi ababyi ton kum karenurum. Ba, ni kwityabwe ab kanya kilkil aryi a bisam kambing oboka kwalibmabibiryi, tonkwa ton kum yinub.

³⁰Bok, kan mi ara kan bona boboka talyi yortamne nerabwe bobkirikoka kan bona nirya kum danarderbiu ani, arub aryi yaranyi bitikwe ilila bisam sapi oboka yubmarim,’ ebte.

³¹Uca, er nai biryi er mi dunyi bisi ato ebte, ‘Ni mi, kanda ni ab tonkwa iya tuba kununum ci, ni bonun bona ab talenun dinyi ab nirya ara kan dinyi kibkou.

³²Ati, kan weit ara dibninto kubwe ani, kam bukokninto kubmar. Tonda waningnaming mi ato kubse asi yanmar ba, eibdanmanim ati, ni ab kan ab tonkwa antanibdobnimiryi kanya kilkil kuboka mot semkwanim,’ ebte.” Ato eboka Yesus biryi kebdeiboka eterebmou.