Read Futuna-Aniwa Lukas 17 Bible Online

Lukas 17 - Futuna-Aniwa bible

Lukas 17

¹Er Yesus biryi Er miliramnyi nang asi eterenmou ci, ato ebmou, “Aminda ara ton nang aryi ton yuk nang asi, ‘Malyi kun dinyi kubting,’ tenen yan benebdankwaming. Bok, ‘Malyi kun dinyi kubting,’ tenen yan benebkwandanyi bira aminda ara Er Imtamnyi biryi ersi wenebkwande.

²Ba, Er Imtamnyi Uram ukuryok kekeboka kunurkalinmarinyi bisi ninyi tentok aryi, ‘Malyi kun dinyi kubte,’ tenen malyi kun dinyi dam bobici. Ura, anyi bisi ikin keil aryi ngang youbdongoboka mekwan umbura dongorbinkwamandate ara malyi ikin kum. Bok, ‘Malyi kun dinyi kubte,’ tenen bobinandinyi bisi Er Imtamnyi biryi wenebkwande dinyi ara iya ikin weik dinyi bobdeibkwande.

³Ati, sunci yuk nang asi yan benebmunyei ati kalikdandobdarur! Sun kwityabwe aryi sunsi malyi kubdongobsingnyi ura, lilibdeibkwandarur! Ba, sun kwityabwe aryi, ‘Naie ni malyi kubman,’ tenebci ura, er malyi kun dinyi ara luba kiboka er ab antanibdeibdandarur!

⁴Ba, uki tentok berekmaci tum aryi sun kwit biryi liki tabaryi sunsi manmalirdongonmasiriryi, sun dam liki tabaryi yandoka, ‘Ni malyi kunman dinyi ara malyi to kunman,’ tenebman eboka lak eryanganmaci ura, er malyi kun dinyi luba kiboka er ab antanibdeibdandarur!” ebmou.

⁵Ura, Er miliramnyi ani, yuma deyok kouboka Teleb Uram eterebkalibkwamnyi nang amolbaryi nang aryi sun Nai bisi ato ebmai. “Nai Kanci nun dib tenenub dinyi tabakdongobsurum!” ebmai.

⁶Ato ebmai bok, Er Yesus biryi sunsi ato ebmou, “Sunci Niryi eteresunun uram asi diba teneramunyi dinyi asi, keibyi du mitika ato sun kanya dam kuansici ura, a co kwarang asi, ‘Tobkaboka weik mekwan deici tingbirum,’ ebdate ababyi sun ebmandate to kunubkwamote,” ebmou.

⁷Er Yesus biryi Er miliramnyi nang asi ato ebmou, “Sun kankan aryi unanyi biryi kwaning wa irmilinanyi kum bisam wininanyi kum dekdante. Ura, a irmilinanyi bira wa in dam binmote ani, yangate asi er nai biryi, ‘Olong kwaning yiroryarum,’ ebte do?

⁸Ato kum ebte, erda erci ato asi ebkwamote, ‘Olong yandoka acu murun ongon aling der arikna arikbiminyi ura, ni yibkwaman yina kiknirdeibniminyi ba, ni yinmanyi ani, sirya yibdobnyi ura, kan yibkwandim,’ ebte.

⁹Ura, er nai yinmote asi sirya yibdobte ura, er wa irmilinanyi biryi er ebmote to kunuboka yina kiknibdeibmote ba, sirya yibmote deyok aryi, er wa irmilinanyi bisi, ‘Ni wa irmilinanyi,’ eboka kibdobte do? Ato kum ebte erda, ‘Anyi er nong dekse ara ato kuboka bita kiknirdeinkwanurur asi yironkwanun,’ tenebte.

¹⁰Ato aryi sunbabyi ati ebmasin, Niryi ukutoto wa nirya, ‘Ibde bindarur,’ ebmasinyi ura, sunci ato ebkwandarur, ‘Nunda, wa irmilin nang kunub deyok aryi, nun ibmanto wa akwe kunuboka ibde bankwayeb ati, nun kisal dangsina mem,’ ebkwandarur!” ebmou.

¹¹Er Yesus bira atei Yerusalem banmou ci, Samaria mutuk wiliba kan Galilea mutuk wiliba kan bisik kuboka banmou.

¹²Banmou ani, atei tentok wengbanmou bok, ninyi takubaryi susa taleamwe nang aryi Er Yesus eibmai ura, “Nun susa talebsou ati, yuk nang dam bibyei,” tenebmai ci, yuk ai tikdobmai cok, uram dobmai, “Se Yesus ninyi eterenanyi, Kanci nunsi boukwe kibdobsurum se!” eboka uram dobmai.

¹⁴Ura, Erci a takubaryi nang asi dibdenmou ura, ato ebmou, “Sun susa taleanci ani, sirya akabsakdobmaci nang aryi Musa kerek sengna umbura aryi sekdeibwe to kunuboka Er Imtamnyi kan ninyi kan noutam kuboka antanirdeirin nang dam amurdarbaraming. Ato kuboka sunbabyi Nisi, ‘Diba Erci kwetebkwamasir,’ tenebmun cok, amurdarbindarur!” ebmou. Ba, a takubaryi nang aryi Er Yesus uram diba teneboka bisik noutam banmai talak uca, sun taleamwe susa ara nirya akabsaksekdobmou.

¹⁵Ba, ninyi tentok ara er nong dirdarderamwe uca, er nong bol taleamwe susa ara nirya kum dandobmou. Ura, er kanya kilkil aryi tubto tamuboka Er Yesus dam yanganmou ci, uram weikanun iboka Er Imtamnyi bisi si weik ebde yanmou.

¹⁶Ani, Er Yesus urasin dam luknubdongo ngang dakdongoboka buryanmou ci, Er Yesus bisi kibdobmou. A yandoka ukubmounyi bira sun Yahudi yala nang aryi, “Samaria nang ara Er Imtamnyi bisi diboka kum tenenung nang,” teneramnyi ateinyi biryi kubmou.

¹⁷Ura, Er Yesus biryi ato ebmou, “Se, Ni kweteabne nang ara ninyi takubaryi,” tenebman bok, toubnibaryi nang ara dantam binmang ba, anyi tentok tubto tamuboka yanmar do?

¹⁸Yahudinyi kuma aryi tamuboka yanmar ci, Er Imtamnyi bisi, “‘Ni Nai, Kanci nisi sirya kwetebmanirim,’ eboka kiryanmar bok, sun Yahudi yala nang yoka ara ninyi tentok ababyi ton tamuryangana kum kubmang ati, sun nirya ara dantam binsekmang da?” ebmou.

¹⁹Ato ebmou ura, Samarianyi bisi, “Kan biramnyi aryi Nisi, ‘Diba Er Imtamnyi biryi Bokwetebunyi biryi kwetebmanir,’ tenebmarim deyok aryi, sirya lebmakin ati, ur tikoka bindobdum!” ebmou.

²⁰Sun Farisi nang aryi Er Yesus bisi ato eboka asibdenmai, “Una talak aryi Er Imtamnyi bira kalingna Weik Sienyi kurur lak kibwande do?” eboka asibdenmai. Uca, Er Yesus biryi sunsi ato ebmou, “Er Imtamnyi bira Weik Sienyi kuboka ninyi ilinto Er amwetam kun nang kibdeibkwande talak ara ilil tenen dinyi asi asing eibmunyi uca, lak kum kibkwande, erda ninyi kanya umbura aryi lak kibkwande.

²¹Tonda, ninyi aryi, ‘Dibdendarur e. Atam yandoka kunmar, tonda otam yandoka kunmar,’ kum ebkwaming. Erda, Er Imtamnyi bira Weik Sienyi kurur ci, sun kankan dam yandoka ninyi Er amwetam kun nang kibdeibsou,” ebmou.

²²A sirya ebmou ura, Er miliramnyi nang asi ato ebmou, “Sunci, ‘Ninyi Daunyi tamuryankwande uki tum ara ola berekte ba, asing eibtibyi,’ teneramunyi ababyi sun asing aryi ola kum eibkwandum.

²³Tonda, aminda ara yuk nang aryi sunsi ato ebkwansing, ‘Er Imtamnyi biryi bokwebmounyi bira o yanganmar onun e,’ ebkwansing. Ba, ton nang aryi, ‘Er Imtamnyi biryi bokwebmounyi bira a yanganmar anun e!’ ebsingnyi ati, ‘Diba,’ tenen kunuboka adikum dirbana mem.

²⁴Erda, Ni Ninyi Dasinyi tamuboka yuryankunyi tum ara bebe aryi im kubkub dinatam ling ebci ba, dinatam ababyi longanirande to, kubkwande.

²⁵Ato kuna kabul talak ara Er Imtamnyi biryi Bokwetebnounyi bira yuma kobdob mambul weik dinyi donmanyi bok, a talak kunmang nang aryi, ‘Nun li,’ eboka dokdonokwaning,” ebmou.

²⁶Ato ebmou cok, neik deyok ati kiklina ton ato ebmou, “Ni Ninyi Dasinyi tamuryuryankwan tum ara Nuh kuramwe talak aryi kuamwe to kuboka kunubkwande.

²⁷Nuh kuramwe talak ara mangkau aryi kwaning yiboka me yiboka, ner kabdeibdandoka kuramnyi. Ani, Nuh weik co ngun-ngun umbura wengdorbinmou tum ara me oboka ninyi nirya siklibmou ba, isin daksekmai.

²⁸Ato kuboka, Lot kuramwe talak ababyi neiktoto mangkau aryi kwaning yiboka me yiboka, dekdandoka, wa iboka ai doboka kibde kuramnyi.

²⁹Ani, Lot atei Sodom aryi anaboka atei si Zoar barou tum ara Er Imtamnyi biryi uk mo ab du keil leibmangnyi ba, nger-nger erande ato dinyi asi imtam aryi dobkwetebmou ba, ninyi nirya yaliboka yibkabokmou.

³⁰A kubmou to Ni Ninyi Dasinyi tamuryuryankwan tum ababyi ato kubkwande.

³¹Ati, a berekwamaci tum aryi unanyi biryi ai aruma dub weleboka tikmaci asi yanganyi ura, yuryibindoka ai umbura wengbindoka er bona-bona dorbana mem. Ba, wa in dam kunmangnyi nang ababyi tamuboka atei yangana mem.

³²Lot ner aryi, ‘Nai kobe, nun bona takloyanganmab aryok se,’ tenebmou ci, dirtamurderamwe uca, diamwe asi kanya teneibdenkwandarur!

³³Unanyi biryi kam kun dinyi ati, ‘Wanikdanyei,’ tenen dungdaroranci ura, aminda ara iya kam kun dinyi kum dobdobkwande. Ba, unanyi biryi Ni deyok ati kunmariryi, kam kun dinyi waningdaranci ura, aminda ara iya kam kun dinyi dobdobkwande.

³⁴Ati, Niryi sunsi ebkwinsin, a berekwande tum lukunda ara ninyi bitinyi neik sokon mabmaringnyi bok, tonyi dobdobnyi ura, tonyi bira taklobkwan.

³⁵Ba, nerabwe bitinyi gandum du taingmaringnyi bok, ton ner dobdobnyi ura, ton ner ara taklobkwan.

³⁶Tonda, ninyi bitinyi wa in dam wa ibde kunmaringnyi bok, tonyi dobdobnyi ura, tonyi bira taklobkwan,” ebmou.

³⁷Ato ebmou ura, Er miliramnyi nang aryi Ersi asibdenmai, “Nai dantam aryi ato kubkwande do?” eboka asibdenmai. Uca, Er Yesus biryi sunsi ato ebmou, “Er Imtamnyi biryi Bokwetebnounyi tamuryankunyi tum ara ninyi nirya bikwaming. Dei bum bunmaci dikum ara, ‘Ninyi tukwi adikum mabmar,’ tenen bingdaming to a uki berekwamaci ura, ninyi nirya bikwaming,” ebmou.