Read Futuna-Aniwa Lukas 18 Bible Online

Lukas 18 - Futuna-Aniwa bible

Lukas 18

¹Er Yesus biryi Er miliramnyi nang asi kemdeirina ton doboka ato ebmou, “Er Imtamnyi bisi molobkwamamunyi ura, ‘Se kobe, nun molona ara kum kekeransir ati taklobkwayeb,’ tenen kum. Erda, molororamunyi ura, iya moloronkwandarur,” ebmou.

²Ura, kemdeirina ara ato kuboka eterebmou, “Atei tentok dam asi ninyi wenenanyi malyi tentok ara, ‘Er Imtamnyi biryi nisi wenebnicob,’ kum teneranturyok, dib kum tenerantunyi kuranturyi, yuk nang ababyi malyi kimnantunyi kurante.

³Asi, akatei dam ara sulyi ner tentok kuranturyi, ninyi wenenanyi malyi dam asi tuba-tuba yandoka ato erante, ‘Nai se, ni dinyi asi yuk nang aryi doronung ati kanci, “Er dam ner asi tamubkarebdarur!” ebdeibnurum!’ eryangarante.

⁴Bok, anyi bira liki winiryi kum dumbaryi kum ara a ner eryangarante uram ara kum kekeana ato kurongnante ani, tentok tum aryi er kanya tam aryi ato tenebte, ‘Nira Er Imtamnyi bisi ilil kum tenenun ci, ninyi tentok ababyi boukwe ton kum kimnun cok, erda a sulyi ner aryok tuba-tuba yandoka malyi kimyanganurur deyok aryi, iya ato akwe tuba ukuryanicob,’ tenen ati a ner dinyi boblobyi nang asi niryi, ‘A ner dinyi ara tamubkarebdarur!’ ebkwan. Ba, tuba-tuba neik uram akwe eryangaranir ara taklobkwande,’ tenebte,” ebmou.

⁵

⁶Ato kebdeiboka ebmou cok, Er Yesus biryi, “Sunci ninyi wenenanyi malyi akiryi ebkwamote to asi bita kanya teneibdendarur!

⁷Er Imtamnyi bira Erci wianci nang aryi kitingtam lukunda Ersi molobdobingnyi nang ara ton kum bitardeirirur do? Kum. Erci arub ara karena kum kubmanyi ani, yuk tum aryi karebkwan ton tenerur do? Ato ton kum tenerur.

⁸Ati, Niryi sunsi ebkwinsin, Er Imtamnyi biryi wianci nang asi yuk nang aryi tatab-tatab enmangnyi bok, Erci ola lobdeibkwande. Bok, Ni Ninyi Dasinyi tamuryuryankwan tum ara, ‘Er Imtamnyi biryi kum takwamanir, erda Erci lobdeibkwamanir ca,’ tenen molororamingnyi nang ab ara ton ebdankwayeb do?,” ebmou.

⁹Er Yesus biryi eterenmou ci, yuk nang ara malyi kiboka sun biram nang dub erebdandoka wingdaramiryi, “Nunda Er Imtamnyi urasintam ara teleb akwe kunun ba, yuk nang ara malyi dinyi ilinto kunung,” tenen nang ati a kemdeirina kebdeiboka eterebmou.

¹⁰“Ninyi bitinyi Bait Allah ai ara Er Imtamnyi biti ninyi dama deirin ai dam bindoka Er Imtamnyi bisi molorbitiring. A molorbitiring nang ara tonyi bira Farisinyi, Musa kerek sengna dirnilirantunyi biryi molorbite. Ba, tonyi bira, ‘Roma weik sienyi Kaisar biti pajak dengna karebdarur,’ eboka molormilirantunyi biryi molorbite.

¹¹Ura, wingdan kanya boramnyi nang Farisinyi tentok ara tikoka er kanya dam aryi molonmaturyi, ato eboka molobte, ‘Nai Imtam kurumnyi, nira yuk nang nirya aryi malyi kun dinyi kunung atonyi kum kunun, nira yuk nang aryi ukula don nang kunung atonyi kum kunun, nira yuk nang aryi yu kuraming atonyi kum kunun, nira yuk nang nerabwe talyi yona kumnyi kunun ba, tonda nira pajak dengna karebdarur erutnyi a tikmar atonyi kum kunun deyok aryi, niryi Kansi, “Ni Nai,” eboka kibdobmakin.

¹²Nira sembayang kublobmabyi talak kubde baramib uki talak uki bitinyi ara, “Er Imtamnyi bisi kanya teneibkwan,” tenen yina si teboka Kan si tuba molokununyi kunun. Ba, niryi ukutotoa nirya yuma dobmanyi dinyi ara Kansi ni dama deirinunyi kunun,’ eboka molobte.

¹³Bok, ‘Roma weik sienyi biti pajak dengna karebdarur,’ eboka molonanyi bira yuk ai tikdongoboka imtam dirwelena ara ilil asa aryi koukwe talebdandoka ato eboka molobdobte, ‘Nai Imtam kurumnyi, Kanci ni malyi kununyi bisi boukwe kibnurum!’ eboka molobdobte,” ebmou.

¹⁴Ura, Yesus biryi ato ebmou, “Ati, Niryi sunsi ebkwinsin, dengna molonanyi bira er ai barote ura, Er Imtamnyi biryi Er urasintam teleb kibdeibte bok, ai bindobte. Ba, Farisinyi bisi teleb kum kibte asi ai bindobte. A deyok aryi, unanyi biryi kanya dub erebdandoka wingdan kanya boranci ura, anyi bira luknubdeibkwande. Ba, unanyi biryi luknubdob kanya boranci ura, aminda erebdeibkwande,” eboka eterebmou.

¹⁵Er Yesus biryi ninyi eterenmou bok, ninyi wise aryi, “Mitik mabwe nermabwe Er Yesus dam bobibyi ba, Erci a mabwe nermabwe asi bol libderiryi kisal dakwande,” tenen sun mabwe nermabwe yuk-yuk boboka Er Yesus dam boyanmai. Ato teneboka boyanganmai bok, Er miliramnyi nang aryi eibmai ura, sun mabwe nermabwe boyanganmai ninyi asi kerebmai.

¹⁶Bok, Er Yesus biryi a mabwe nermabwe asi nabmou ura, Er miliramnyi nang asi ato ebmou, “Sunci a mabwe nermabwe asi bisik sengminingna mem. A mabwe nermabwe ara Ni dam ur yanung. Ato mabwe nermabwe kanya boramingnyi nang asi Er Imtamnyi bira ninyi leboka kalingna Weik Sienyi kurur amwetam iya kubkwaming.

¹⁷Niryi sunsi dib kobdob ati ebkwinsin, unanyi biryi mitik mabwe nermabwe aryi sun naiyabwe sun kwinyabwe boukwe dam kuboka sun uram kekeraming to kanya kum boramingiryi, ‘Er Imtamnyi bira ninyi leboka kalingna Weik Sienyi kurur amwetam kuna ni li,’ tenebdinyi bira Er amwetam kunanyi kum kubkwande,” ebmou.

¹⁸Yahudi yala nang sienyi tentok aryi Er Yesus bisi asibdenmou, “Nai, Er Imtamnyi Uram eteresurumnyi, Kanda kanya teleb bobumnyi kurum ati, niryi una kubdobnyi uca, iya kam kun dinyi dobdobtinyi do?” eboka asibdenmou.

¹⁹Uca, Er Yesus biryi ato ebmou, “Unatoa ati kanci Nisi, ‘Kanya teleb bobumnyi,’ ebmanirim do? Ninyi kunub ara iya teleb nang ton kum kunub. Erda Er Imtamnyi tentok asi iya telebnyi kurur.

²⁰Kanda ato eboka kerek sekdeibmasou dinyi ara bingdumca, ‘Sal ab ner ab ukula yordana mem. Ninyi ona mem. Yuk nang dinyi asi ukula dona mem. Yuk nang urasin dam asi tola uram ena mem. Sun naiyabwe sun kwinyabwe boukwe kiboka sun uram kunubdarur,’ ebsou dinyi ara sirya bingdumca,” ebmou. (Keluaran 20:12-16; Ulangan 5:16-20)

²¹Ura, Yahudi yala nang sienyi biryi ato ebmou, “A ebmarim dinyi ara ni kam kuranse uca, kunubde yanganun ani, uku talak ababyi tuba kununun,” ebmou.

²²Anyi ebmou uram kekebmou ura, Er Yesus biryi anyi bisi ato ebmou, “Kanda, ‘Nira a nirya kununun,’ ebmarim bok, tentok dinyi ara kum kunurum. Ara, kanda aminda imtam ai dam aryi iya kubkwande dinyi dobdobkwandim ati kan talerum bona ara nirya yuk nang asi co bok dekminyi ura, utotoa kum nang ati bokeibminyi ura, Ni dam yandoka Ni milibnurum,” ebmou

²³Ura, anyi biryi Er Yesus a ebmou uram kekebmou ura, er bona mitik kum taleramwe deyok aryi, er kanya dam ara mambul mitik kum kubmou ura, “Se nai kobe se, ni bona talya takwan,” tenebmou.

²⁴Ato tenebmou asi, Er Yesus biryi bikmou ura, anyi bisi dibdenmou ci, ato ebmou. “Bona ilinto talerandinyi biryi Er Imtamnyi bira ninyi leboka kalingna Weik Sienyi kurur ai wengbana ara ikin mitik kum kubkwande.

²⁵Weik bisam si unta ara yumci um bisik wengbana ara ikin kubte. Bok, bona ilinto talerandinyi biryi Er Imtamnyi bira ninyi leboka kalingna Weik Sienyi kurur dam amwetam wengbana ara iya ikin mitik kum kubkwande,” ebmou.

²⁶Ba, Er Yesus biryi ato ebmou kekebmai nang aryi ato ebmai, “Ato ebmar ura, unanyi bisi lemna dinyi dobdobkwande do? Ura, ninyi tentok ababyi lemna dinyi ton kum dobdobkwande,” ebmai.

²⁷Asi Er Yesus biryi sunsi ato ebmou, “Sun ninyi aryi, ‘A dinyi ara ukubman kum,’ tenerandum dinyi ara Er Imtamnyi bira malyi ukubmanto dinyi kurur,” ebmou. [7]

²⁸Er Yesus miliramunyi si Petrus biryi Er Yesus bisi ato ebmou, “Nai, nunda Kansi iya milikunub ci, nun dinyi nirya takloboka nun kunub dinyi asi dibdesurum!” ebmou.

²⁹Ura, Er Yesus biryi sunsi ato ebmou, “Niryi sunsi diboka ati ebkwinsin, unanyi biryi, ‘Er Imtamnyi bira Weik Sienyi kurur, sunci Er amwetam kun nang kibdarur,’ eboka yuk nang asi Teleb Uram eterebde bana ati, er kuranci ai kum, er ner kum, er duweityabwe kum, er nong ninyi kum, er mabwe nermabwe kum, takloboka yibaranci ura, takloboka yibaranci dinyi unumna ara a talak ababyi dobdobkwande. Ba, iya weikto dengna ara aminda berekwande uki tum ara iya kam kun dinyi dobdobkwande,” ebmou.

³⁰

³¹Uki tentok tum aryi, Er Yesus ab Er miliramnyi nang ab Yerusalem atei banmai. Banmai ci, bisik noutam aryi Er Yesus biryi ninyi ilinto kankan aryi Er miliramnyi nang amolbaryi asi yuk nabmou. Nabmou ba, Er dam binmai ura, Er Yesus biryi ato ebmou. “Yerusalem atei bibyi ura, otam aryi Er Imtamnyi Uram ebdeibmaci to lak etereramnyi nang aryi kerek sekdeiamnyi to kunubkwamanir.

³²Ara ato kerek sekamnyi, ‘Er Imtamnyi biryi Bokwetebkwandanyi bira mambul doboka dibmaci ani, kam bukokwande,’ eboka kerek sekamnyi to kunubkwamanir. Ati, Niryi sunsi diboka ebkwinsin, Nisi Er Imtamnyi Uram kum bingnung nang ara sun Yahudi yala nang kuma asi dobkarebkwamaning. Ba, Nisi ina ngilikoka, durukoka, si maka tulubdeiboka, kulab-kulab eboka obkwamaning. Ba, dibmanyi ani, uki winiryi tum ara kam bukokwan,” ebmou.

³³

³⁴Ato ebmou ba, Er miliramnyi nang aryi Er Yesus enmou uram deyok ara ato ati ebmar tenena iya mitika ton kum tenebmai. Er Yesus ebmou uram ara sun dam lak kum kibmou. Ba, sunci “Ninyi Lemsinanyi bira dibman kumnyi,” tenen deyok aryi, Er Yesus ebmou uram ara, “Ato ati ebmar,” ton kum tenebmai.

³⁵Uki tentok tum aryi Er Yesus bira atei Yerikho wengbingkou ci, damtoto bau ura, diramwe uca, bisik iririkna dam asi asing kuamunyi tentok bukoka utotoa moloramunyi bukmou asi eibmou.

³⁶Anyi biryi kekeramwe uca, bisik ai ara ninyi ilinto yibanmai bikmou ura, ato ebmou, “Ara, una kunmarum do?” eboka asibdenmou.

³⁷Uca, yuk ninyi aryi ato ebmai, “Ara, Er Yesus Nazaret ateinyi yibanmar,” ebmai.

³⁸Ura, anyi biryi uram doboka ato ebmou, “Se Yesus, ninyi lemna Weik Sienyi Daud deibdobanyi, Kanci nisi boukwe kibdobnurum!” eboka uram dobmou.

³⁹Asi, yuma menekoka banmai nang aryi anyi bisi, “Kilikokwandura,” tenen erekdobmai bok, ukura weikto nun ngwelek-ngwelek eboka uram dobmou, “Se Yesus, Daud deibdobanyi, Kanci nisi boukwe kibdobnurum!” eboka uram dobmou.

⁴⁰Ura, Er Yesus tiklobmou ci, yuk nang asi, “Anyi Ni dam boyandarur!” ebmou. Ba, Er dam bordeiriryanmai ura, anyi bisi Erci ato eboka asibdenmou.

⁴¹“Kan tenebmarim ara Niryi kansi una kubnute tenebmarim do?” eboka asibdenmou. Uca, anyi biryi, “Nai, Kanci ni asing asi elekdeibnutum, tenebdobman,” ebmou.

⁴²Ura, Er Yesus biryi anyi bisi, “Ukuryok akiryi asing elekoka dibderum. Kan biramnyi biryi Nisi, ‘Diba Erda Er Imtamnyi biryi Bokwetebunyi kurur ati, kwetebkwamanir,’ tenebmarim deyok aryi, Niryi kansi sirya lobdeibmakin,” ebmou.

⁴³Ba, Er Yesus biryi ato erdongo akiryok anyi biryi utotoa nirya asing eibkalibmou. Ura, Er Imtamnyi bisi si weik eboka Er Yesus dam miliryanmou. Ba, ninyi nirya ara ato kubmou dinyi asi asing eibmai ura, Er Imtamnyi bisi si weik eboka mot sebmai.