Read Futuna-Aniwa Lukas 19 Bible Online

Lukas 19 - Futuna-Aniwa bible

Lukas 19

¹Er Yesus bira yuk atei banmou ci, Yerikho atei dam banmou.

²Uca, akatei dam ara, “Roma weik sienyi biti pajak dengna karebdarur,” eboka moloramnyi nang sun sienyi si Zakheus bira bona ilinto taleramunyi kuramwe.

³Ura, anyi biryi, “Yesus enung ara dan tonyi biti enung do? Er Yesus bisi ni asing ton eibtinyi,” tenen ingkiringmou bok, er nong bumang aryi ninyi ilinto libmai ba, eibman kum kubmou.

⁴Ura, cungbindoka ninyi bisibkaboknin banmou ani, “Er Yesus eibtinyi,” tenen yibinmanto bisik asi, co kwarang dub weleboka bukmou.

⁵Ba, Yesus bira banmou ani, adikum binmou ura, Zakheus bukmou co dub dibweleboka ato ebmou, “‘Zakheus olong yuryarum! Arub ara Nira kan ai yankwaman,’ tenebman,” ebmou.

⁶Ura, olong yuryandoka kanya kilkil asa aryi Er Yesus inibdobmou ci, er ai binmarei.

⁷Ato kubmou asi, ninyi nirya aryi asing eibmai ura, sun kanya dam yu wekmou ba, ato ebmai, “Yesus bira malyi kun dinyi kurutnyi ai asi wekmar a,” ebmai.

⁸Ato ebmai bok, Zakheus biryi Er Yesus ab Er milibmai nang ab asi du dongobmou ba, yibde bukmai ura, tikoka aburyi, Er Yesus bisi ato ebmou. “Nai Kan dam uram ton ebkun ati kekenurum! Ni talenun bona ara dinatam meici kukoka ni dama Er Imtamnyi biti deirininto kuboka utotoa kum nang ati bokeibkwaman. Ba, yuk nang dinyi asi tola eboka ukula doanyi dinyi ara sun dam nang ati liki dumbaryi tabakdongoboka tamubkarebkwan,” ebmou.

⁹Ba, Er Yesus biryi ersi dinmou ci ato ebmou, “Anyi bibabyi Abraham mi Er Imtamnyi biryi wiamunyi deibdoba kurur deyok aryi, ingkirikde yanman. Ba, er malyi kurur dinyi takloboka Er Imtamnyi tam urasin dangubokmar deyok aryi, arub tum aryi akai umbura dam sun ai ninyi nirya lebdeibman.

¹⁰Ni Ninyi Dasinyi yase ara, ‘Wanikamingnyi nang asi ingkirikoka lebdeibtinyi,’ tenen yase,” ebmou.

¹¹Er Yesus bira Yerusalem atei dam-dam kibnin banmou deyok aryi, ninyi aryi, “Er Imtamnyi bira Weik Sienyi kurur ci, ninyi ilinto Er amwetam kun nang kibkwande talak lak kibkwamar,” tenebmai. Ati, Erci Zakheus ai dam ukubmou dinyi ab Er biramnyi deyok ati, “Nira ninyi lemna Weik Sienyi kunun,” ebdanmou deyok ab ati kekenmai nang asi Erci yuk kemdeirina ton ebmurubmou.

¹²Ara, Erci ato ebmou, “Weik sienyi erebdeibmantonyi tentok aryi er atei aryi, ‘Dam kum atei asi bini ba, weik sienyi tikeibkwaning,’ tenen ati bite.

¹³Dam kum atei bana kabul talak aryi, er wa irmilin nang ninyi takubaryi naboka mil dangnande keil uang karebturyi ato ebte. ‘Ni binanyi talak ara a mil dangding keil uang akiryi dekoka yubwa kimnanindarur!’ ebte ura, ninyi tentok-tentok mil dangding keil uang tentok-tentok ara dengna weiktoto dinyi asi karebnin yibite ura, erda yuk atei bite.

¹⁴Ato kubte bok, er mining atei nang yuk nang aryi, ‘Anyi bisi weik sienyi kimna ara nun li,’ tenebting ura, bisik noutam banmote talak aryi ersi weik sienyi tikeibwamating atei nang asi ninyi bokeiboka, ‘Anyi bira nun mutuk talen weik sienyi tingdeirina ara nun li,’ erbinkwamating nang bokeibting.

¹⁵Bok, anyi bisi sirya weik sienyi tikeibting ura, er mutuk tubto tamuryate. Sirya tamuryate ura, ato tenebte, ‘Ni mil dangding keil uang karebinanse nang sun yuk-yuk ara unabaryi dektabakdeibnei do?’ tenebte ura, ‘A nang asi naboka yandarur!’ eboka ninyi bokeibte.

¹⁶Ba, sirya naboka yating ura, yumanyi biryi yandoka ato ebte, ‘Nai kan mil dangding keil uang tentok karebinamumwe dinyi aryi takubaryi dektabakdeibkise,’ ebte.

¹⁷Ura, er nai biryi anyi bisi ato ebte, ‘Se kan ukubumwe to ara iya teleb to kubumwe ati, kanda ni wa irmilinanyi teleb kurum. Kanda iya mitik to bona ababyi kanya deiboka busul kurum deyok aryi, kanda weik atei asi takubaryi talebdum!’ ebte.

¹⁸Ura, ton yuknyi yandoka ato ebte, ‘Nai kan mil dangding keil uang ara amubaryi dektabakdeibkise,’ ebte

¹⁹Ura, er nai biryi anyi bisi ato ebte, ‘Ba, kanda weik atei asi amubaryi talebdum!’ ebte. Ura, yuk wa irmilin nang ababyi ato eboka sun wa iranting ci, doranting to kuboka karebte.

²⁰Ani, sirya kobdob wa irmilinanyi yaturyi ato ebte, ‘Nai kanda yu kanya akwe borum deyok aryi, kanci kum deiamin cok, talyi tam dororum. Ba, tonda kanci kum koubdamin cok, talyi tam kwinirum ni ilil kunurur. Ati, nai kan mil dangding keil uang ara wisin kilina aryi kiboka deibkise ani, boyanankin ake,’ ebte.

²¹

²²Ura, er nai biryi anyi bisi ato ebte, ‘Se yu kasak biribdob wa irmilinanyi, kanda ni yunyi kunun ci, ni kum deibdanyi dinyi asi doronun. Ba, tonda ni kum kouanyi dinyi asi kwininun ara sirya bingnurum cok, niryi wa kareankise dinyi ara diboka kum irum. Ati, niryi kansi wenebkwinkin ara kan biramnyi uram ebmarim to kuboka wenebkwamakin.

²³Ato kunun bingnurum cok asi, unatoa ati ni mil dangding keil uang ara co bok deirirban ai umbura kum deirirbinamoumwe do? Ba, a deirirbinantum uca, ni tamuryatinyi ura, ni damnyi tabangdongon dinyi ab dobdantinyi,’ ebte.

²⁴Ura, weik sienyi er dam tikmating nang asi ato ebte, ‘Tentok mil dangding keil uang ara dobtaleboka takubaryi mil dangding keil uang dobdobunyi bisi tabakeibdarur!’ ebte.

²⁵Ato ebte bok, sunci weik sienyi bisi ato ebting, ‘Nai, anyi bira mil dangding keil uang takubaryi sirya dobdobwe ati, kum tabakdongobkwayeb,’ ebting.

²⁶Uca, a weik sienyi biryi ato ebte, ‘Niryi sunsi ebkwinsin, unanyi biryi busul kuboka ton deiriroranci ura, anyi bisi tabakdongobkwanun. Bok, unanyi biryi ton kum deiriroranci ura, er dinyi ara er taruk dam aryi dobdobkwanun.

²⁷Bok, Nisi, “Anyi bira weik sienyi kimna ara nun li,” tenenunung nang ara nirya ni dam boyandoka ni urasin dam akiryi obdarur!’ ebte,” eboka Er Yesus biryi kebdei eterebmou.

²⁸Er Yesus biryi a nirya sirya ebmou ura, Yerusalem banmai ci, Erda minob menengbanmou.

²⁹Welebanmai ani, mutuk kon si Zaitun dub doramnyi atei Betfage ab atei Betania ab dam bai ura, Er Yesus biryi Er milirandei nang bitinyi asi ato eboka bokeibmou, “Sun urasin deiboka binkwamarurum atei osi birurum. Akatei dam wengbarurum ci, dirurumnyi uca, bisam keledai ukuryok kabunyi nebmaci bok, ninyi ton burdena kum kubmangnyi asi birikdeibmang. Asi loboka bobdurumnyi ura, a boyarurum!

³⁰

³¹Loboka boyangarurumnyi ba, akatei nang aryi sunsi, ‘Sun unatoa ati a bisam keledai lobdongoboka bobanmarurum do?’ eboka ton asibdesingnyi ura, ato ebkwandururum, ‘Nun nai biryi ebmar ati boryanmanim,’ ebkwandururum,” eboka bokeibmou.

³²Ura, a bitinyi nang binmarei ani, utotoa nirya Er Yesus biryi sirya ebmou to akwe kubmarei.

³³Ura, bindoka a bisam keledai lordongorei talak ara sun a bisam keledai dam nang aryi ato eboka asibdenmai, “Sunda unatoa ati a bisam keledai lonmarurum do?” eboka asibdenmai.

³⁴Uca, a bitinyi nang aryi ato ebmarei, “Nun Nai nun Eteresurutnyi biryi ebmar ati, boryanmanim,” ebmarei.

³⁵Ura, a bisam keledai boboka Er Yesus dam bobinmarei ba, a bisam keledai deici asi Er miliramnyi nang sun ongon aling aryi kwiriboka yangabdeibmai. Ura, Er Yesus tomobwelebmai ba, a bisam keledai deici burbinmou.

³⁶A sirya ukubdeibmai ba, Er Yesus bira a bisam keledai deici bukoka banmou ura, Er miliramnyi nang sun ongoramnyi aling kwiriboka bisik ai deibde binmai.

³⁷Banmai ani, Yerusalem atei dam wengyurbinkou ci, mutuk Zaitun yim deici aryi yurbau. Ura, Er Yesus biryi ilil tenen dinyi kikniramwe ba, Er miliramnyi nang nirya sun asing eiriramnyi deyok aryi, Ersi noutam dongobmaci, uram weikto aryi Er Imtamnyi bisi kisal dakoka si weik erebmai.

³⁸Ara ato eboka Er Yesus yanganmou ati ebmai, “Anyi bira Er Imtamnyi biryi iya weik sienyi eboka kisal dakwe ba, Er Imtamnyi si deici aryi yanganmar. Ba, Erci Er Imtamnyi ab nun ninyi ab antanirdeiryasou ati, Er Iya Erebdobnyi Imtamnyi bisi si weik eboka kibdobkwayeb,” ebmai.

³⁹Ba, ninyi ilinto banmai kankan ara sun Farisi nang Musa kerek sengna dirniliramnyi nang ara ninyi mikbaryi yukmai nang aryi Er Yesus bisi ato ebmai, “Ninyi eterenanyi, Kanci kan milikunung nang asi, ‘Kilikdarur,’ eboka erekdobdum se!” ebmai.

⁴⁰Uca, Er Yesus biryi sunsi, “Niryi sunsi ebkwinsin, Ni miliraning nang aryi kilikokingnyi ura, anda kurur keil aryi uram doboka Nisi si weik ebkwamaning,” ebmou.

⁴¹Banmai ani, Yerusalem atei dam kobdob wengbinkou ura, Er Yesus biryi akatei dibdenmou ci engebokmou.

⁴²Ura ato ebmou, “Sun Yerusalem atei kurandum nang ababyi, ‘A yanganmaranyi bira Er Imtamnyi biryi Bokwetebunyi bisi nun dam yandoka kurur ara nunti antanirdeiryasou ci, arub ara Yerusalem atei dam wengyanganmar,’ tenena teleb! Bok, ukuryok ato teneboka sun asing eibmanto ai ara a dinyi ara inibdeibsou.

⁴³Er Imtamnyi biryi bokwetebnou ba, sunti lemdeiryasise bok, kum bingdarur deyok aryi, aminda berekwande tum ara sun mar ordana nang yandoka sun atei dam ara lika kuna aknabdongobkwansing. Ba, sun akatei kundandarur nang ara onmasingiryi, akatei dam keil aryi dukdandoka dordanung ai ara keil tentok ababyi tablakdeiamingnyi tok iya ton kum kubkwande,” ebmou.

⁴⁴

⁴⁵Er Yesus banmou ani, Yerusalem atei dam binmou ura, Bait Allah ai ara Er Imtamnyi biti ninyi dama deirin ai dam wengbindoka dengdan ai dam kiamiryi dengdaramnyi asi a ninyi nirya yakdonokmou.

⁴⁶Ura, dengdaramnyi nang asi ato ebmou, “Er Imtamnyi biryi Er uram ebdeibmaca bobaramunyi si Yesaya deici asi eibdeiamwe ba, kerek sekdeiamwe, ‘Ni ai dam ara Nisi molon ai.’ (Yesaya 56:7) Ato ebdeiamwe dinyi ara ton kum nungdendarur ci, akai ara sun tola eboka ukula dordana ai kibdau do? Akai ara sun dengdan ai kuma,” eboka erekdobmou.

⁴⁷Er Yesus bira uki berengnamwe nirya tuba-tuba Bait Allah ai dam wengbindoka Er Imtamnyi Uram etereramwe. Ba, Er Imtamnyi kan ninyi kan noutam kuboka antanirdeirin deyok nang ab, Musa kerek sengna etereramnyi nang ab, sun Yahudi yala nang aryi dub nang teneramnyi nang ab ara Er Yesus bisi, “Obkaboktibyi,” tenen bisik ingkiringnamnyi.

⁴⁸Bok, ninyi ilinto ara Ersi kanya deiboka Er etereramwe uram kekeramnyi deyok aryi, “Ato kuboka taleboka obkwayeb,” tenen dinyi ara ton kum bingnamnyi.