Read Futuna-Aniwa Lukas 2 Bible Online

Lukas 2 - Futuna-Aniwa bible

Lukas 2

¹Er Yesus deibkwabmou talak aryi Roma weik sienyi Kaisar Agustus biryi er kalingnamwe mutuk nang nirya asi, “Si dongoryandarur!” eboka uram dobkwetebmou.

²A ninyi si kerek sengna ara Kaisar amwetam bunanyi si Kirenius bira Siria mutuk Erebdobnyi kuramwe talak aryi yuma kobdob kerek sekalibmai.

³Ba, ninyi nirya bindoka sun atei yuk-yuk si dongordarbinmai.

⁴Ato aryi neiktoto, Yusuf bibabyi Galilea mutuk atei Nazaret aryi kuboka Yudea mutuk, atei si Betlehem minob weik sienyi si Daud kuramwe atei binmou. Yusuf bira weik sienyi Daud deibdoba yalanyi kuramwe deyok aryi, Betlehem atei dam sun si dongordarbinmarei ci, welebinmarei.

⁵Yusuf erti taknubdeiamnyi ner si Maria bira mi mundu bobmou cok, “Tonkwa si dongobkwanim,” tenen welebinmarei.

⁶Akatei dam ara ninyi ilinto yanmai ci, akatei doramnyi ai nirya libmai deyok aryi, bisam dei ai mabmarei. Ura, Maria mi deirin uki tum sirya kubmou. Ba, Maria biryi ko mi ara sal deibmou ura, kaluna aryi akuboka domba yina deirin co sangkol umbura asi mabdeibmou.

⁷

⁸Er Yesus deibmou tum lukunda aryi domba kalingna nang ara domba mol kwamna dam mutuk kalikde kunmai.

⁹Bok, asing kublabum ena aryi Er Imtamnyi Uram eryuryangananyi sun dam tingyanmou. Ura, imtam aryi kuboka sinarya sun dam milil arabkarebmou ba, sun kanya ilil mitik kum kubmou.

¹⁰Ato kubmou bok, Er Imtamnyi Uram eryuryangananyi biryi sunsi ato ebmou, “Sun ilil kusina mem! Nira sun ninyi nirya ati sun kanya kilkil kusin uram sun dam eryuryanmasin.

¹¹Arub tum ara sun Lemsina Weik Sienyi Kristus sun Du, Daud atei si Betlehem deibmar. Ara, ato kuboka deibmar asi asing eibkwamarum.

¹²Sunci, ‘A Mi alok dib nun Lemsina Sienyi kurur,’ tenen bikwandum ara sunci Betlehem atei bindoka, a Mi alok ara kain aryi akuboka domba yina deirin co sangkol umbura mabdeibmaci asi asing eibkwamarum,” ebmou.

¹³A sirya ebmou ura, asing kublabum ena aryi Er Imtamnyi yin doun nang ilinto yuryanmai ba, Er Imtamnyi Uram eryuryangananyi minob yanmounyi ab tonkwa antaniboka lak kibdanmai ci, Er Imtamnyi bisi kisal dakoka si weik erebmai.

¹⁴Ara, ato kuboka ebmai, “Er Imtamnyi erebdob ai kurutnyi bisi si weik erebkwayeb. Tukwetam nang asi Erci teleb tenebci nang ati antanin dinyi karerur,” eboka mot sebmai.

¹⁵Er Imtamnyi yin doun nang aryi domba kalingna nang takloboka imtam sirya tamuboka welebindobmai. Ura, domba kalingna nang sun mamun aryi ato ebdanmai, “Ni kwityabwe, Er Imtamnyi biryi Betlehem atei dam kunubmar dinyi nun dam ebmar asi dirbinkub ati anabkwayeb,” ebdanmai.

¹⁶Ura, domba kalingna nang ola anaboka dirbinmai. Barabyi ani, deiboka bukmarei ai bindoka diramnyi uca, Yusuf ab Maria ab a Mi alok ara domba yina deirin co sangkol umbura maibdeibmarei asi asing eibmai.

¹⁷Er Yesus alok sirya bindoka eibmai ura, domba kalingna nang asi Er Imtamnyi biryi a Mi deyok ati sun dam ebmou to asi Yusuf ab Maria ab yuk nang ababyi asi nukmai.

¹⁸Ba, domba kalingna nang aryi nukmai dinyi kekebmai nang nirya ara sun ilil kubmou ba, “Naie,” tenebmai.

¹⁹Bok, Maria bira a kubmou dinyi nirya ara kanya tam boboka kanya teneiramwe.

²⁰Bisam domba kalingna nang ara sirya bindoka dibdenmai ci, tubto tamuboka sun tub kuramnyi mutuk dam tamurbinmai. Banmai ura, sun kanya kilkil aryi Er Imtamnyi si weik eren mot sebnin, Er Imtamnyi bisi kibnin binmai. Ara, Er Imtamnyi Uram eryuryangananyi biryi sun dam ebmou ba, kekebmai to nirya kunubmou asi, asing eibmai deyok aryi, sun kanya karyi asa tamurbinmai.

²¹Er Yesus deibmou talak kunmai ani, uki inbaryi tum berekmou ura, Er Imtamnyi biryi minob Musa bisi, “Sunci sal mabwe deibmunyi ura, uki inbaryi tum ara a mi den bama sekwandarur,” eamwe to kuboka Er Yesus den bama sekmai. Sekmai ura, Er si ara, “Yesus,” eboka dobmai. A si ara Er Imtamnyi Uram eryuryangananyi biryi Er kwin mundu bona kum kubmou talak aryi ebkareamwe si asi dobmai.

²²Musa kerek sengna aryi, “Mi deibde ba, sirya deibci ura, ato kubkwandarur,” eboka kerek sekeiamwe to aryi a uki tum sirya kubmou. Ura, a mi boboka atei Yerusalem dam bobindoka Er Imtamnyi taruk dam deibkarebmarei.

²³Ara, Er Imtamnyi biryi Musa kerek sengna umbura aryi, “Ko mabwe deibmunyi nirya ara Er Imtamnyi biti deibkarebdarur,” eamwe ba, ato kuramnyi. (Keluaran 13:2, 12, 15)

²⁴Tonda, Er Imtamnyi biryi Musa kerek sengna umbura aryi ato eboka kerek sekdeiamwe, “Sunci maka si tekukur yim ton ner ton boyankwandarur! A maka kum kubci ura, emnanyi kubul asi bitinyi boyamunyi ba, Er Imtamnyi kan ninyi kan noutam kuboka antanirdeirin nang aryi uk dabkwanung,” ebdeiamwe to kunuboka bobinmarei. (Imamat 12:8) Minob uca, Er Imtamnyi biryi Er Uram keken nang asi, “Aminda sun Lebkwansir Sienyi karebkwansin,” eramwe uram kunubmou.

²⁵A talak aryi ninyi tentok si Simeon, atei si Yerusalem dam kuramwe. Erda teleb kanya akwe boboka Er Imtamnyi Uram kekeramwe to tuba-tuba kunuramwe. Tonda, Er Imtamnyi biryi Israel yala nang asi, “Kristus ninyi leboka kalingna Weik Sienyi bokwetebkwansin,” ebdeiamwe talak ati dibde buramwe.

²⁶Ba, Er Imtamnyi Kanya Roh Kudus er dam iya kuramuryi, “Minob kum dibkwandim!” Er Imtamnyi biryi, “‘Kristus ninyi leboka kalikwande Weik Sienyi,’ eboka tikeibunyi karebsici ba, asing eibmin cok, dibkwandim,” eamwe.

²⁷Ba, dibde buramwe ani, uki tentok tum aryi Er Imtamnyi Kanya Roh Kudus aryi iniboboka, Bait Allah ai ara Er Imtamnyi biti ninyi dama deirin ai bowengbinmou. Asi, Er Yesus mitik talak uca, Yusuf ab Maria ab aryi, Er Imtamnyi biti ninyi dama deirin ai bowengbinmarei. Ara, minob uca Er Imtamnyi biryi, “Ko mi deibmunyi ura, Ni ai dam boyandoka Nisi sun mabwe dama dengyangankwandarur,” eboka Musa deici ebdeiamwe ba, kerek sekeiamwe to kunuboka bobinmarei.

²⁸Bobinmarei ura, Simeon biryi a Mi alok doboka iribdobmou ci, Er Imtamnyi si weik eren mot sebmou.

²⁹“Ukuryok ara Nai Imtamnyi Kan eamumwe to sirya kunubde ba, ni asing kobdob aryi Kanci Lemna Sienyi sirya karebsirima eibman deyok aryi, ni Kan wa irmilikinanyi teleb aryi ur da dibnun.

³⁰

³¹Kanci, im dangna tukwe dangna nang urasin dam aryi Kristus ninyi leboka kalingna Weik Sienyi eboka kiknibdeibumnyi bira kiting sinarya aryi berekmari ba, bisik eiraming. Erda atonyi karebmasirim deyok aryi, Yahudi yala nang kuma aryi Kan dam yangan bisik bikwaming.

³²Ba, Kristus ninyi lemna Weik Sienyi karebmasirim deyok aryi, Kan Uram keken nang Israel yala nang si asi erebdeibkwaming,” eboka mot sebmou.

³³Asi, A Mi Er nai Er kwin aryi Simeon ebmou uram kekebmarei ura, sun ilil kubmou ba, “Naie,” tenebmarei.

³⁴Ura, Simeon biryi sunsi kisal dangmou ci, A Mi Er kwin Maria bisi ato ebmou, “‘A Mi aryi Israel yala nang ilinto asi ton yubwa ara obci ura, ton yubwa ara lebdeibkwande,’ tenen Er Imtamnyi biryi wibdeibwe. Er Imtamnyi biryi a Mi ara sisa atonyi deibwe bok, ninyi ilinto aryi Er Uram asi dib tenena kum uca, yan yanibkwaming.

³⁵Ani, ato kubci ba, sun teneramingnyi kanya lak ebkwaming. Ba, Maria kan kanya asi ya urub lungnande to kubkwankir,” ebmou.

³⁶Ba, a talak aryok akai dam ara ner tentok si Hana kunmou. A ner ara Er Imtamnyi Uram ebdeibmaca boban ner kuramwe. Erda Asyer deibdobanyi si Fanuel nebnyi kuramwe. A ner ara iya sirya wise danamwe. Ninyi doamwe ara er akenyi ab kunmarei talak ara kwalina tabaryok kubmarei cok, er akenyi diamwe.

³⁷Ba, sulyi ner kuramwe talak ara er kwalina delapan puluh empat baryi kwaliamwe. Erda Bait Allah ai ara ton tanglona kum kuramwe, tuba-tuba kitingtam lukunda Er Imtamnyi bisi si weik erbaramuryi kwaning si teboka molorbaramwe.

³⁸Ba, a uki tum ababyi akai dam yandoka Er Imtamnyi bisi si weik enmou ci, a Mi deyok ati, “Yerusalem atei nang ab Israel yala nang nirya ab aryi, Er Imtamnyi biryi, ‘Ninyi Lebkwansir Weik Sienyi karebkwansin,’ eamwe uki tum ara una talak kunubkwande do?” tenen dibde buramnyi nang ati ebkarebmou.

³⁹Yusuf ab Maria ab aryi Er Imtamnyi biryi Musa kerek sengna umbura aryi ebdeiamwe uram nirya kunubmarei ura, sun kurandei atei Galilea mutuk atei si Nazaret tamuboka binmarei

⁴⁰A Mi ara nong nebdongobnin kanya kibtabaknin binmou ura, bingna dinyi ababyi langkarikmou. Ba, Er Imtamnyi biryi Ersi boukwe kiboka kisal dangnamwe.

⁴¹Kwalina o kwali o kwali baramnya nirya ara sun Yahudi yala nang weik kwalina uki tum si Paskah kubne ura, Er Yesus Er nai Er kwin ara atei Yerusalem dam barandei.

⁴²Weik kwalina uki tum kubne ura, a tub barandei to aryi Er Yesus kwalina amolbaryi kubmou ura, Er nai Er kwin ab tonkwa Yerusalem atei dam binmai.

⁴³Kwalina uki sirya kum danmou ura, Er nai Er kwin ara anaboka sun atei baronmarei ura, Er Yesus bira sun kum bikmarei bok, Yerusalem atei dam tuba kuronmou.

⁴⁴Er nai Er kwin aryi, “Tonkwa baronmab nang kankan banmar,” tenebmarei. Uca, a uki tum berekmou nirya tonkwa kum banmai ura, sun ai ninyi ab sun ninyi bun ab nirya asi asibdenin yibinmarei.

⁴⁵Ingkiringmarei ani, Er Yesus kum eibmarei ura, Yerusalem atei tam tubto tamuboka ingkiringbinmarei.

⁴⁶Uki winiryi tum aryi Er Yesus bira Bait Allah ai ara Er Imtamnyi biti ninyi dama deirin ai kunmou asi eibmarei. Er Yesus bira Er Imtamnyi Uram bikdob bingnamnyi nang kankan asi bukmou ci, sun enmai uram kekebne ura, sunsi asibde-asibde kimou.

⁴⁷Ba, akai dam buluboka wekmai ci, kekenmai nang aryi, Er Yesus bingna dinyi ab Erci uram dengdeirinmou dinyi asi kekenmai nang aryi, “A mi Er kwalina ara ukuryok amolbaryi asi bingna dinyi nirya bingdur aryok se nai e,” tenenmai.

⁴⁸Ba, Er nai Er kwin aryi eibmarei ura, sun kanya aryi, “Se Nai kobe, akai dam kunmo asi ingkiringnunum,” tenebmarei. Ura, Er kwin biryi Ersi, “A mi, a ukubmarim to ara unatoa ati kubmarim do? Nun Kan nai Kan kwin mambul kanya boboka ingkiringdonmakununum,” ebmou.

⁴⁹Asi Er Yesus biryi sunsi ato ebmou, “Sun unatoa ati Nisi ingkiringnururum do? Ni Nai kobdoba ai dam kunkwamanuna ara sun kum bingnururum darib?” ebmou.

⁵⁰Bok, sunci Er Yesus ebmou uram ara, “Ato ati ebmasir,” kum tenebmarei.

⁵¹Ura, Er Yesus ab Er nai Er kwin ab tonkwa anabdobmai ci, Nazaret atei bindobmai. A bindoka kuramnyi ura, sun uram ebne tok, kekeboka kunuramwe. Ba, Er kwin bira a talak kuramwe dinyi nirya ara kanya tam akwe boramwe.

⁵²Ba, Er Yesus bira nong nebdongobnin, kanya kibdongobnin bingna dinyi biktabaknin baramwe ura, Er Imtamnyi babyi ninyi babyi boukwe kiboka kisal dangnamnyi.