Read Futuna-Aniwa Lukas 20 Bible Online

Lukas 20 - Futuna-Aniwa bible

Lukas 20

¹Uki tentok tum aryi Bait Allah ai ara Er Imtamnyi biti ninyi dama deirin ai dam aryi Er Yesus biryi ninyi ilinto asi Teleb Uram eterenmou. Ba, Er Imtamnyi kan ninyi kan noutam kuboka antanirdeirin deyok nang ab, Musa kerek sengna etereramnyi nang ab, sun Yahudi nang sien nang ab aryi, “Er Yesus bisi uram ebenebkwayeb,” tenen Er Yesus eterenmoua dam yanmai.

²Yanmai ura, sunci ato eboka asibmai, “Kanda, akai dam dengdanung nang asi yakdonoka akai dam etereboka kimnandum, ara unanyi biryi ebkou ati kurum do? Tonda unanyi biryi ato kurandum eboka karebkou ba, ukurum do?” eboka asibmai.

³Uca, Er Yesus biryi sunsi ato eboka uram dekeibmou, “Nibabyi asirdena tentok asibdenkwinsin ara sunci uram dengna dekeibkwanindarur!” ebmou.

⁴Ura, ato eboka asibmou, “Yohanes biryi ninyi me dongoramwe ara unanyi mikib aryi me dongoramwe do? Er Imtamnyi mikib aryi do, ninyi mikib aryi do?” eboka asibmou.

⁵Ato eboka asibdenmou ba, sun mamun aryi ato ebdongobdanin yibinmai, “Nunci, ‘Erda, Er Imtamnyi mikib aryi ninyi me dongoramwe,’ ebibyi ura, Erci ato ebkwamasir, ‘Ura, sun unatoa ati er eramwe uram ara dib kum tenendarur do?’ ebsicei.

⁶Ba, nunci, ‘Erda tukwetamnyi mikib aryi ninyi me dongoramwe,’ ebibyi ura, ninyi nirya ara, ‘Yohanes bira Er Imtamnyi biryi uram ebdeibmaca bobananyi kurur,’ tenenung ati, ‘Er Imtamnyi si asi co kwemtangninto ebmang,’ tenen keil aryi molokoka obsingnyei,” ebdanmai.

⁷Ato ebdanmai ura, Er Yesus bisi ato ebmai, “Yohanes biryi a me dongoramwe mikib ara dantamnyi mikib aryi me dongoramwe ena ara nun kum bingnub,” ebmai.

⁸Ura, Er Yesus bibabyi sunsi ato ebmou, “Ato ebmarum ura, Nibabyi sun dam asi, ‘Nira anyi mikib aryi anda dinyi ukunun,’ kum ebkwamasin,” ebmou.

⁹Sun Yahudi nang sien nang asi sirya ebmou ura, a kemdeirina aryi doboka ninyi ilinto ati eterebmou. “Ninyi tentok aryi anggur wa iboka koubloboka abturyi, ‘Ninyi atei bindoka kubkwan ara uki weik kubkwan,’ tenebte ura, anggur wa in nang asi, ‘Ni anggur wa kalikoka wa iranindarur!’ eboka dam kum atei bite.

¹⁰Ani, ‘Sirya eng obde ba, dakoka dengnaming talak kubmar,’ tenebte ura, er wa irmilinanyi bokeiboka ato ebdeibte. ‘Anggur wa inung nang asi biminyi ura, anggur du dakoka dekamingnyi ura, kan ton karebkingnyi ura, sun ton kibdobkwanung,’ eboka bokeibte. Ba, anyi banmote ani, anggur wa in nang dam biute ura, anggur wa in nang aryi wa irmilinanyi bisi kulanmating ani, ‘Ur dem bindobkwandum,’ eboka bokdonokting.

¹¹Anyi ukublobting ba, yanante ura, sun nai biryi ton kwalina ara yuknyi ton bokdeibte bok, anyi bibabyi ato kuboka kulablobting ci, kerenmating ani, ‘Ur dem bindobkwanduma,’ eboka bokeibting.

¹²Ura, ton o kwalina ara tubto ton yuknyi bokeibte bok, anyi bibabyi bitinyi nang ukubmating to kulanmating ani, dilaka ara daling bi orande to kubte ura, baitam dobkwetebting.

¹³Ura, sun nai anggur wa damnyi biryi ato ebte, ‘Ato akwe kunung ati, una kubnyi uca, sun kanya teleb kubkwande do?’ ebte. ‘Ura, ni mi nong kobdob boukwe kununyi bisi bokdeibnyi ba, sun ilil aryi kum obkwaming,’ ebte ura, er mi nong asi bokdeibte.

¹⁴Ura, a mi banmote ani, anggur wa in nang dam bite ba, eibting ura, ato eboka uram sisikting, ‘A wa ara a mi er dinyi kibkwandanyi yanmar ati, a mi obkaboka alabdobkwayeb ba, a wa ara nun dinyi kibkwansir,’ eboka uram sisikting.

¹⁵Ura, sunci a mi asi anggur wa in dam akiryi tomobtaleboka baitam donokting ci, kulaboka obting. Ba, sun nai anggur wa damnyi bira una kubkwamote do?

¹⁶Sun nai er nong yate ura, anggur wa in nang nirya obukturyi, anggur wa ina ara yuk nang asi kisibdeibte,” eboka Er Yesus biryi kebdeibmou. Ba, Er Yesus enmou uram kekenmai nang aryi ato ebmai, “Ato kuna mem!” ebmai.

¹⁷Ato ebmai bok, Er Yesus biryi sunsi dibdenmou ci, ato ebmou, “Ato ebmarum ura, Mazmur kerek sengna umbura dam kerek sekdeibwe to ara una kuboka kunubkwande do? Ai don nang aryi bai donokamnyi keil asi Er Imtamnyi biryi ai yuma nunungdein keil kibdeibwe.

¹⁸Bok, unanyi biryi a keil deici asi sakoka maryurbici ura, kalibukwande ba, unanyi bisi a keil aryi siklibci ura, nyaboka oubkwande,” ebmou. Unanyi biryi a keil asi, “Ni li,” ebdinyi bira mambul doranci bok, nunungdein keil kibdeibunyi biryi wenebkwande.

¹⁹Ura, Musa kerek sengna etereramnyi nang ab, Er Imtamnyi kan ninyi kan noutam kuboka antanirdeirin deyok nang ab aryi, “Er Yesus biryi enmar uram ara nunti enmasir,” tenebmai. Ura, a talak aryok, “Er Yesus taleboka obtibyi,” tenen bisik ingkirikmai bok, ninyi ilinto kunmai deyok aryi, sun ilil kubmou ura, takmai.

²⁰Musa kerek sengna etereramnyi nang ab, Er Imtamnyi kan ninyi kan noutam kuboka antanirdeirin deyok nang ab aryi, Er Yesus bisi dirnililiramnyi. Dirniliramiryi sunci ato tenebmai, “Er Yesus biryi ukubkwamar dinyi ab Erci ebkwamar uram ab asi eiboka bikwayeb. Sirya bikibyi ura, weik atei Erebdobnyi Kaisar amwetam bunanyi dam bobinkwayeb. Ba, erci Er Yesus malyi kun dinyi liliboka abdiryi, weneboka obkwande,” tenebmai ura, ninyi bokdonokmai. Ba, a nang ara sun kanya tam ara yu kanya bobmai cok, Er Yesus urasin dam ati teleb-teleb kibmai ci, asirbinmai.

²¹Ura, yu kanya bon nang aryi Er Yesus bisi bindoka uram ebenebmai ci, ato eboka asibdenmai, “Nun eteresurumnyi, Kan erum uram ab Kan eteresurum eterena ab ara ninyi urasin kum meimdum ci, Er Imtamnyi bisik ara diboka etererum bingkunub.

²²Ati, nunci Kansi asibdenkwankib. Musa kerek sengna umbura ara ton kubwe do? Roma weik sienyi biti dengnaming dinyi ara nun Yahudi yala nang ababyi ur dengkwanub do mem do?” eboka asibmai.

²³Ato eboka asibmai bok, Er Yesus bira sun bobmai ci, uram erbenenmai kanya ara bikokmou ura, sunsi ato ebmou.

²⁴“Sunci keil uang tentok ton Nisi amubdendarur, a keil uang deici ara ninyi urasin ara unanyi bukwe do? Ba, kerek sengna ara unanyi taruk aryi deibwe do?” eboka asibdenmou. Uca sunci ato ebmai, “A keil uang dub bukunyi ab kerek sekunyi ab ara Roma atei weik sienyi Kaisar,” ebmai.

²⁵Ura, Er Yesus biryi sunsi ato ebmou, “Ato kubwe asi asing eibmarum ura, kanya luknubdongoboka sun ebmangnyi to kuboka, Kaisar biti karebman dinyi sun taruk dam kubmaci ura, Kaisar biti karebdarur! Ba, Er Imtamnyi biti sun kanya dam aryi luknubdongoboka Er ai dam deirirbinmanto dinyi ab, Ersi dib tenen dinyi ab aryi Ersi karebkwayeb tenebmamunyi ura, Er Imtamnyi biti karebkwandarur!” ebmou. [8]

²⁶Ba, sunci tamuboka yuk asirdena aryi tabakdongoboka asibdenman kum kubmou. Ba, Er Yesus biryi uram dekeibmou dinyi aryi sun kanya, “Nai kobe nun ilil, nun talya asinmabuburyi,” tenebmai ura, kilikokmai.

²⁷Musa kerek sengna etereramnyi nang ab Er Imtamnyi biti ninyi dama deirin ai wa in sien nang ab aryi bokdonokmai nang sirya baroi ura, tubto Saduki nang Er Yesus dam yanmai. Saduki nang ara, “Din nang kam kum bukwaming,” eramnyi nang. A nang aryi ato tenebmai, “Nunci asibdebyi ura, uram dengna ara tamubkarebman kum kubkwamar ca,” tenebmai ura, Er Yesus dam yanmai ci, ato eboka asibdenmai.

²⁸“Ninyi eterenanyi, Musa kerek sengna deici aryi nunsi ato kubdarur ebdeibsou. ‘Ninyi tentok aryi er ner doanci uca, mi ton kum deibdandiryok dibci ura, anyi er weit ton kuranci ura, a ner ara er weit youak dakwandur. Ba, mi deibci ura, er du yok unumna dibdeibkwandur.’

²⁹Sun duweityabwe asi ninyi tabaryi kuramingiryi, dunyi ner doanci ani, mi ton kum deibdandiryok, dibci ura, a ner ara weitnyi youak dakwandur.

³⁰

³¹Ba, tubto weitnyi bibabyi mi ton kum deibdandiryok, dibci ura, sun weityabwe silib tabaryi nang nirya neik ner akwe dobde baramingnyi bok, mi ton deirona kum kuramingnyi bok, sun nirya diramingnyi ani, a ner ababyi dibkwandur.

³²

³³Ati, nunci Kansi asibdenkwinkib ara a tentok ner atikwe ninyi tabaryi nirya dorderamingnyi ani, mi ton deirirona kum kubdamingiryok, diaminyi ura, aminda din nang kam bukokwaming tum ara unanyi bisi er ner kibdeibkwande do?” eboka asibmai.

³⁴Uca, Er Yesus biryi sun Saduki nang asi ato ebmou, “Sun tukwetam nang ara ner kaibdeibdandoka dordarandum bok, diamingnyi asi kam burdeina kiknibci ba, aminda kam bukeibkwande nang kubkwaming mutuk ara ner kaibdeibdandoka dordana kum kubkwaming.

³⁵

³⁶Ato kubkwaming nang ara sunda nirya kam bukeianci deyok aryi, Er Imtamnyi Uram imtam aryi eryuryangan nang kuraming to kuboka Er Imtamnyi mabwe nermabwe kubkwaming. Ba, aminda ara dina ababyi kum kubkwaming.

³⁷Er Imtamnyi urasintam ara ninyi nirya ara kam kun dinyi akwe kurur deyok aryi, ninyi din nang kam bukeibwande deyok ati minob Musa bisi Er Imtamnyi biryi tiling co deici uk angmoua kankan aryi ato eamwe. ‘Ni Imtamnyi bira Abraham er Nai kunun, Ishak er Nai kunun, ton Yakub er Nai kunun ati, Ni Imtamnyi bira din nang sun Nai kuma. Erda kam kun nang sun Nai kunun,’ ebdeiamwe ba, kerek sekdeiamwe,” ebmou.

³⁸

³⁹Er Yesus biryi Saduki nang asi ato ebmou ba, sun Musa kerek sengna etereramnyi nang mikbaryi aryi kekebmai ura, ato ebmai, “Ninyi eterenanyi, Kan ebmarim to ara iya dib kobdob ati ebmarim,” ebmai. Sunci ato ebmai ara sunda ninyi din nang ara aminda kam bukokwaming eramnyi deyok aryi ebmai.

⁴⁰Ura, sun Er Yesus bisi asiryanganmai nang aryi Er Yesus bisi tubto yuk-yuk asirdena aryi asibdenman kum kubmou ba, ato ebmai.

⁴¹Ura, Er Yesus bira eitam Erebdobnyi kuramuryok Daud deibdobanyi kibdanmou bok, ninyi aryi, “Daud deibdobanyi,” eramnyi deyok aryi, Ersi asiryanganmai nang asi ato ebmou. “Ninyi aryi Er Imtamnyi biryi ninyi lemna Weik Sienyi eboka bokwetebnounyi bisi unanyi tenenunung ci, ‘Erda Daud deibdobanyi,’ enunung do?

⁴²Ara, ato deyok ati ebman. Daud biryi Mazmur kerek sengna umbura dam aryi ato eboka kerek sekdeibwe, ‘Er Imtamnyi biryi ni Nai Arungdeirisurutnyi bisi, “Ni siriktam buryarum.

⁴³Ba, Niryi Kan mar ikin nang asi muna kibdongobniryi, Kanci yanisitabkwandim nang kibdeibkwan,” eamwe.’ (Mazmur 110:1) Daud biryi a dinyi kekeboka kerek sekamwe.

⁴⁴Ati, Daud biryi Ni ninyi lemna Weik Sienyi bisi, ‘Ni Nai Arungdeirisurutnyi,’ ebmanou bok, unatoa ati Daud deibdobanyi enunung do?” eboka asibdenmou. Er Yesus biryi ebmou ara ninyi lemna Weik Sienyi bira Daud deibdobanyi bok, Erda Iya Erebdobnyi kuramwe ati ebmou.

⁴⁵Ninyi ilinto kekenmai talak aryi Er Yesus biryi Er miliramnyi nang asi ato ebmou.

⁴⁶“Sunda Musa kerek sengna etereraming nang aryi wingdan kanya bonung ci, kuraming to dinyi ara kalikdandobkwandarur! Ara, cang acu murun ongon aling obingnyi ura, bisik ai yibarkiringnaming to ab, ‘Dengdan ai dam bukmangnyi nang aryi erebdeibsiting,’ tenen yibarkiringnaming to ab, Musa Uram eteren ai wengbindoka teleb ai erebdob sokon burbaraming ab, kwalina yin tum asi erebdob sokon burkiringdaming to ab ara kalikdandobkwandarur!

⁴⁷A nang sunda sulyi nerabwe asi tola eboka sun ai ukula doronung. Ba, ato kuboka malyi kun dinyi biksingyei tenebingnyi ura, Er Imtamnyi bisi molon dinyi ara cang weikto moloraming. Ato kuboka wingdan kanya bonung deyok aryi, aminda ara tukwetam wenebkwande tum ara sunda weiktoto wenebkwande,” ebmou.