Read Futuna-Aniwa Lukas 4 Bible Online

Lukas 4 - Futuna-Aniwa bible

Lukas 4

¹Yohanes biryi Er Yesus bisi me sirya dongobmou ba, me Yordan kwan dam aryi anaboka bisik dam banmou bok, Er Imtamnyi Kanya Roh Kudus aryi Er Yesus bisi langkarikeiboka ninyi kun kum mutuk tam inibobinmou.

²Ura, Er Yesus bira ninyi kun kum mutuk bindoka kuramwe ura, isa sienyi Iblis biryi tuba dumyangaramwe. Ani, Er Yesus uki empat puluh baryi sirya mabmou ura, a bindoka kuramwe talak ara kwaning iya ton kum yiramwe deyok aryi, kwaning atanmou.

³Asi, isa sienyi Iblis biryi Er Yesus bisi tubto dumderyanmou ci, ato ebmou. “Kanda, dib Er Imtamnyi Mi kuraminyi ura, anda keil asi arukminyi ba, roti kwaning daici ura, yibdobdum!” ebmou.

⁴Uca, Er Yesus biryi, “Er Imtamnyi biryi minob erdeiriramwe uram umbura aryi ato kerek sekeibwe, ‘Ninyi kam kunung ara kwaning aryok kam kum kunung,’ ebwe. (Ulangan 8:3) Ati, Niryi kan ebmarim to kunuboka kum kiknibkwaman,” eboka uram dekeibmou.

⁵Ato ebmou ura, isa sienyi Iblis biryi Er Yesus bisi iniboboka imtam ereboka bukamwe mutuk dub asi bowelebinmou. Bowelebinmou ura, asing kublabum ena aryi isa sienyi Iblis biryi im dangna tukwe dangna weik sien nang kalingna mutuk nirya Er Yesus urasin dam lak kibdeibmou.

⁶Ura, isa sienyi Iblis biryi Er Yesus bisi ato ebmou, “Er Imtamnyi biryi im dangna tukwe dangna kurur dinyi nirya asi ni taruk dam karebnou. Ba, niryi unanyi bisi teleb tenebninyi bira anyi bisi a mutuk talen mikib karebkwan. Ati, niryi Kansi a dinyi nirya karebkitinyi.

⁷Ati, Yesus Kanci kanya luknubdongoboka nisi si weik ebniminyi ura, a dinyi nirya ara Kan dinyi kibkwankir,” ebmou.

⁸Ato ebmou bok, Er Yesus biryi isa sienyi bisi ato ebmou, “Er Imtamnyi biryi minob erdeiriramwe uram umbura aryi ato kerek sekdeibwe, ‘Sunci Er Imtamnyi bisi kanya luknubdongoboka Ersi si weik ebkwandarur,’ ebwe ba, tonda, ‘Er kikwe si weik erebdeibkwandarur,’ ebwe. (Ulangan 6:13) Ati, Niryi kan ebmarim to kum kunuboka kan si asi kum erebkwamakin,” eboka uram dekeibmou.

⁹Ura, isa sienyi Iblis biryi Er Yesus tubto iniboboka Yerusalem atei dam bobinmou. Bobinmou ura, Bait Allah ai kwising kurkurya dub tingbinmarei. Ura, isa sienyi Iblis biryi Er Yesus bisi ato ebmou, “Kanda, dib Er Imtamnyi Mi kuraminyi ura, akiryi tukwe ai sangkurukokdum!

¹⁰Kan deyok ati Er Imtamnyi biryi minob erdeiriramwe uram umbura aryi ato kerek sekdeibwe, ‘Er Imtamnyi biryi Er Uram eryuryangan nang asi arukci ba, yandoka kalikwanking.

¹¹Ba, sunci taruk aryi yangabdeibmangnyi deici asi lamdongbinkwandim. Ba, Kan yan ara dilaka ton kum sakwankir.’ (Mazmur 91:11-12) Ato eboka sekdeibwe ati, ur sangkurukokdum!” ebmou.

¹²Uca, Er Yesus biryi isa sienyi bisi ato ebmou, “Er Imtamnyi biryi minob erdeiramwe uram umbura aryi, ‘Kanci, kan Nai Imtamnyi bisi, “Malyi ukubdenmanyi ababyi,” tenena mem,’ en uram a kurur! (Ulangan 6:16) Ati, Niryi kan ebmarim to kunuboka kum sangkurukwaman,” eboka Er Yesus biryi isa sienyi bisi ato uram dekeibmou.

¹³Ba, isa sienyi Iblis biryi a nirya sirya ukubdenmou ura, erci Er Yesus takloboka bindobmou ci, “Uki teleb da kubkwandarya,” tenen ati kalike kuramwe.

¹⁴Isa sienyi Iblis biryi sirya dubdenmou ura, Er Imtamnyi Kanya Roh Kudus mikib milibmou ba, Er Yesus tubto tamuboka Galilea mutuk yandoka kunmou. Ba, Er Yesus biti a mutuk me um kuramnyi nang nirya ebdanin yibinmai.

¹⁵A talak aryi, Er Yesus biryi Musa Uram eteren ai wengbindoka ani, Er Imtamnyi Uram eterebde yibaramwe. Ati, ninyi nirya aryi Ersi kisal dangnamnyi.

¹⁶Yuk atei sirya eterebmou ura, Er Yesus Er neamwe atei si Nazaret dam binmou ura, Erci tub ukuramwe to aryi sun Yahudi yala nang wa in kum uki tum si Sabat tum berekmou ura, Musa Uram eteren ai wengbinmou.

¹⁷Wengbinmou ura, Erci, “Er Imtamnyi Uram nukwan,” tenen tikokmou uca, akai wa inanyi biryi Er Imtamnyi Uram asi, Er Imtamnyi Uram ebdeibmaca bobaramunyi Yesaya biryi kerek sekamwe uram asi deiamnyi aryi Er Yesus bisi dobkarebmou. Ba, Erci a kerek sengna tengebmou ura, ato eboka sekamwe deyok asi asing eibmou ci, nukmou,

¹⁸“Er Imtamnyi Kanya Roh Kudus Ni dam kurur ci, Erci Nisi, ‘Sun bona bon kum nang ara sun biramnyi aryi sisikoka utotoa ukubdobman kum aryi, “Er Imtamnyi biryi milibsute,” teneboka dibde buramnyi nang ati Teleb Uram eterebdur,’ tenen ati tikeibnou.

¹⁹Erci, ‘Yu sienyi biryi boboka tabwe deamwe nang asi tabwe lobdeibdum,’ eboka Erci Nisi bokwetebnou. Tonda, ‘Asing kuna nang ara malyi kun dinyi ab teleb kun dinyi ab teneirdena kum uca, talyi kunurongna nang asi asing elengdeirininto uram ati erbirum,’ ebnou. Tonda, ‘Mambul asa boboka wa in nang asi kanya leng-leng en uram erbirum,’ ebnou. Tonda, ‘Ukuryok ara Er Imtamnyi biryi Er Uram keken nang asi yu sienyi mikib amwetam kun nang ati sirya lebmasir uki tum berekmar ebmar erbirum!’ eboka bokwetebnou,” eboka kerek sekamwe asi nukmou. (Yesaya 61:1-2)

²⁰Ura, Er Yesus biryi a kerek sengna tubto akubtaleboka akai wa inanyi bisi tamubkarebmou ura, burongbinmou.

²¹Ba, Er Imtamnyi Uram keken ai wekmai ninyi nirya aryi Er Yesus bisi dinmai asi, Erci uram doboka sunsi ato ebmou. “A yakna kerek sekwe to ara arub tum aryi kekerabdau talak aryi kunubmar,” ebmou.

²²Ba, Er Yesus biryi eterenmou ba, kekebmai nang aryi, Er Yesus biryi eterenmou ci, enmou uram namin ati, “Nai kobe, anyi bira dibnyi,” tenebmai. Ura, “Se, anyi bira Yusuf mi kuma do? Yusuf mi obura, teleb to eterenmasir to kum kunmote, ato kubmar dinyi ara ilil weik dinyi kubmar,” ebmai.

²³Ato tenebmai ci, ebmai ati, Er Yesus biryi sunsi, “Sunci, Nisi a kemdeirin uram ebkwamanurum ca, ‘Se, ninyi kwetenanyi, Kapernaum atei dam aryi kubmarim ba, kekenmakib to asi, Kan atei Nazaret nang dam ababyi yandoka ukubderum!’ ebkwamanurum,” ebmou.

²⁴Ato ebmou cok, tubto Er Yesus biryi ton ato ebmou, “Niryi sunsi diboka ebkwinsin ara Er Imtamnyi Uram ebdeibmaci to lak etereramnyi nang asi, ninyi tentok ababyi er mining atei nang aryi teleb teneboka boukwe ton kum kimnung.

²⁵Ba, ton ebkwinsin dinyi ara dib kobdob kunubmou dinyi asi ebkwinsin. Ara, minob nabi Elia kuramwe talak aryi, Israel mutuk ara sulyi nerabwe ilinto kuramnyi. Ba, Er Imtamnyi biryi im bublan tirikdongoamwe talak ara kwalina winiryi kuboka wala nabaryi mo kum cemnamwe. Ba, a mutuk meduman nirya kwaning atana li doamwe.

²⁶Bok, Elia bira er atei Israel sulyi nerabwe mer asi tentok ner dam kum bokdonokamwe, erda yuk mutuk Sidon mutuk atei si Sarfat sulyi ner tentok dam asi bokdonokamwe.

²⁷Ba, tonda minob nabi Elisa kuramwe talak ara Israel mutuk susa taleramwe nang ilinto kuramnyi. Bok, a nang asi ninyi tentok ababyi ton kum akabsakdobmou, erda Siria mutuknyi si Naaman bisi er susa taleamwe dinyi akabsakmou. A neik kuboka Ni Er Imtamnyi biryi Bokwetebnounyi bibabyi mining atei nang akikwe kum diblilibsunun erda, yuk atei nang ababyi dibliliboka milibkwanun,” ebmou.

²⁸Ba, Musa Uram eteren ai buluboka wekmai ci, kekenmai nang aryi Er Yesus biryi kikliboka ebkarebmou deyok aryi, sun kanya ara, “Nun atei nang ara ton kum diblilibkwansir ati ebmar,” tenebmai ura, sun nirya yu kubmou.

²⁹Ba, sunci tikoka Er Yesus bisi, doramnyi akatei kot dam, “Dongdongorbinkwayeb,” tenen taruk taleboka bobinmai.

³⁰Ato kuboka bobanmai bok, Er Yesus biryi sun kankan olobkaboka bindobmou.

³¹Er Yesus Galilea mutuk atei si Kapernaum bindoka kunmou. Ura, sun Yahudi yala nang wa in kum uki tum si Sabat tum berekne ura, Er Imtamnyi Uram keken ai wengbindoka akatei nang asi Er Imtamnyi Uram etereramwe.

³²Ba, Er Yesus etereramwe uram kekeramnyi ara mikib weik deyok aryi, sunci, “Nai kobe, Anyi bira Er Imtamnyi Uram diboka liliboka bikwe aryi etereransir,” tenebmai.

³³Akai Musa Uram eteren ai umbura ara isa kanya wekamunyi tentok wengyanmou aryi Er Yesus bisi uram weikanun iboka uram dobmou ci ato ebmou.

³⁴“Se, Yesus Nazaret ateinyi, Kanda atam ara nunsi una kubkwamasirim ati yanganmarim do? Kanda nunsi, ‘Obkaboktinyi,’ tenen yanganmarim do? Kanda unanyi tenena ara ni sirya bingkunun. Kanda Iya Telebnyi, Er Imtamnyi biryi minob wiankounyi kurum ara ni sirya bingkunun,” eboka uram dobmou.

³⁵Bok, Er Yesus biryi a isa kanya asi ato eboka erekmou, “Ei, kan uram ena mem! Kilikokdum. Kilikokminyi ura, anyi umbura aryi anabkaboka bindobdum,” eboka erekdobmou. Ba, anyi bisi a isa kanya aryi ninyi ilinto wekmaia kankan asi tomoubloboka bindobmou bok, anyi bira u ton yirdena kum kubmou.

³⁶Ba, akai umbura wekmai ninyi nirya ara ilil aryi kweteblobmai cok, sun mamun ebdongobdanin yibinmai. “Nai kobe, Anyi biryi ebmar uram ara bikdob uram nun aryi isa kanya asi, ‘Bindobdum!’ ebmar. Ba, a talak aryok isa kanya mer anyi umbura wekyi ara anabkaboka binsekdaming,” ebdanmai.

³⁷Ura, Er Yesus biryi ato kubmou deyok ati, a mutuk meduman nirya ebdanin yibinmai.

³⁸Er Yesus biryi u yiramwe nang kwetebmou ci, isa kanya yakdonokmou ura, Musa Uram eteren ai aryi anaboka Ersi miliramunyi si Simon Petrus ai wengbinmou. Wengbinmou ura, akai wekmai nang aryi, Er Yesus bisi, “Simon er yamalner uk aruma dorur,” ebmai.

³⁹Ba, Er Yesus biryi a ner mabmoua dam tingbindoka, a yiramwe uk aruma asi yakdonokmou ba, kum dandobmou. Sirya kum dandobmou ura, bukalaboka sunsi du dongobmou.

⁴⁰Taruk louboka bun tum si Sabat tum berekmou ani, kiting wengdorbiu ura, ninyi nirya aryi sun ai ninyi, yuk-yuk yun yiramwe to, Er Yesus dam boyanmai. Boyanmai ura, Er Yesus biryi sun yun yiramwe nang yuk-yuk asi, Er taruk deibdongoboka kwetebmou.

⁴¹Kwetebmou ci, ton isa kanya yubwa ninyi umbura wengdaramnyi asi yakdonokmou. Ba, isa kanya mer ngolok-ngolok eboka uram weikanun iboka, “Kanda Er Imtamnyi Mi kurum!” ebmai. Bok, Er Yesus biryi mikib asa aryi isa kanya mer asi, “Sun uram ena mem!” eboka erekdobmou. Ara, “Er Imtamnyi biryi Er Yesus bira ninyi lemna Weik Sienyi kibkwande,” eramwe sirya bingnamnyi deyok aryi, ato ebmou.

⁴²Mabmai ani, berekmou ura, Er Yesus bira anaboka ninyi kun kum dikum bindobmou ci, Er Imtamnyi bisi molonmou bok, atei Kapernaum nang ninyi ilinto aryi Ersi ingkirikde binmai. Ani, Ersi sirya eibmai ura, sunci, “Yuk atei baroriryi takloboka bindobsicei,” tenen, “Yuk atei ban kum,” eboka talebdongobmai.

⁴³Bok, Er Yesus biryi sunsi ato ebmou, “Er Imtamnyi biryi Nisi bokwetebnou ba, yase ara, ‘Niryi yuk atei-yuk atei ababyi, “Er Imtamnyi bira leboka kalingna Weik Sienyi kurur,” eboka Teleb Uram eterebkwan,’ tenen ati, yase,” ebmou.

⁴⁴Ura, Erci Yudea mutuk asi Musa Uram eteren ai wengbindoka Teleb Uram eterebde yibaramwe.