Read Futuna-Aniwa Lukas 7 Bible Online

Lukas 7 - Futuna-Aniwa bible

Lukas 7

¹Er Yesus biryi ninyi urasin dam aryi uram enmou ani, sirya ebmou ura, Kapernaum atei dam wengbinmou.

²Akatei dam ara Roma nang yin doun nang seratus baryi arungnamwe sienyi tentok kuramwe. Anyi bira er ai wa irmiliramunyi bisi boukwe kimnamwe bok, a wa irmilinanyi bira u yiramwe ba, dibmanto kunmou.

³Ba, a yin doun nang sienyi biryi Er Yesus yanmar ena kekebmou ura, erci akatei Yahudi nang sien nang ninyi mikbaryi asi, “‘Yesus ni atei yandoka, ni wa irmilinanyi u yirur asi kweteryarur,’ eboka molobmar erbindarur!” eboka bokeibmou.

⁴Ato eboka bokeibmou ba, Er Yesus bisi yanmai ura, sunci Ersi olom-olom eboka molobmai, “‘Anyi bira iya teleb kanya bobwe ati, Kanci anyi molobmar to kunubkwamarim ara kikiman,’ tenebmab.

⁵Anyi bira Yahudinyi kuma bok, Erci nun atei nang boukwe kiboka milisurur. Erci nun Musa Uram eteren ai doramoubwe ura, mitik kum milibsou ba, dobdoboubwe ati ebmab,” ebmai.

⁶Ura, Er Yesus sun ab tonkwa binmai. Barabyi ani, Er Yesus a yin doun nang sienyi ai damtoto wengbau ura, anyi biryi er kwityabwe asi uram ebdeibmou. “Yesus Kan mambul kanya boyangan kum, ‘Nira Romanyi kunun deyok aryi, Kansi du dongona ara kikiman kum,’ tenebdanman ati, ni nong aryi Kan dam kum yankwaman. Ati, Nai Kanci uram bum tentok ebminyi aryok ni wa irmilinanyi u yirur ara lobdobkwamar ebmar erbindarur!” ebdeibmou.

⁷

⁸Ato ebdeibmou cok, anyi er dib tenen dinyi lak kibdanmou ci, ato ebdeibmou, “Ni nong ara yuk nang amwetam bunanyi kunun. Ba, ni amwetam ara mar boban nang kunung. Niryi ni amwetam kunung nang asi ninyi tentok, ‘Birum!’ ebtinyi ura, kunuboka binkwamote ba, yuknyi bisi ara, ‘Yarum!’ ebtinyi ura, yankwamote. Tonda, ni wa irmilinanyi bisi, ‘A wa asi ibdum!’ ebtinyi ura, erci kunuboka ibkwamote,” ebdeibmou. Ara, anyi biryi, “Er Yesus bira Iya Erebdobnyi biryi uram dem ebci aryok ni wa irmilinanyi u yirur dinyi ara bindobkwamar,” tenebmou deyok aryi, ato ebmou.

⁹Asi, Er Yesus biryi anyi ebdeibmou uram kekebmou ura, “Naie,” tenebmou cok, Er Yesus milibmai nang wekmai tam urasin dangubokmou ura, ato ebmou, “Niryi sunsi diboka ebkwinsin. Israel yala nang yoka ara, ‘Aminda ara Kristus Ninyi Lemnanyi yankwande,’ ena kekeramnyi nang ara Ni enun uram asi diba tenenun nang ton kum eirinun. Bok, arub aryi yuk atei Romanyi bira ato dinyi ton kekerdena kumnyi biryi, ‘Ni en uram asi diba kunubkwamar,’ tenebmar dinyi eibman,” ebmou.

¹⁰Ba, yin doun sienyi er kwityabwe ai tamuboka baramnyi uca, a wa irmilinanyi bira er u yiramwe dinyi sirya lobdobmou ba, kib bukmou asi asing bindoka eibmai.

¹¹Wa irmilinanyi sirya kwetebmou ura, Er Yesus anaboka Galilea mutuk atei si Nain binmou. Akatei banmou ura, Er miliramnyi nang ab ton yuk nang ababyi ninyi ilinto Ersi milibmai ci, binmai.

¹²Banmai ani, Er Yesus akatei wengban lika bublan dam tingbau uca, atei tam aryi kuboka ninyi dibmou tukwe asi co malouwa caboka baitam bobindoka tukwe ungbanmai asi asing eibmou. A boyanganmainyi bira sulyi ner er mi tentok a kunum deibdamwe bok asi, dibmou ba, tukwe dongobkwamai ati boyanganmai. Ba, akatei nang ababyi ninyi ilinto aryi a sulyi ner ati bobmilibmai.

¹³Asi, Er Yesus biryi a sulyi ner asi diramwe uca, a ner boukwe aryi Er boukwe sangkuruk-sangkuruk ebmou ba, a ner asi, “Kan engena mem!” ebmou.

¹⁴Ato ebmou ura, Er Yesus biryi co malouwa caboka boyanganmaia dam tingbinmou. Ba, co malouwa bobmai nang ara tiklobmai ura, a co malouwa asi bol libdenmou ci, Erci ato ebmou, “A kam mi, Niryi kansi, ‘Bukokdum,’ ebmakin!” ebmou.

¹⁵Ura, a mi bukalaboka buryibinmou ci, uram ebkalibmou. Ura, Er Yesus biryi Er kwin bisi tamubkarebmou.

¹⁶Ba, a mi co malouwa caboka boyanganmai ati milibmai nang nirya ara ilil kubmou ba, sunci ato ebmai, “Nun kankan dam aryi Er Imtamnyi Uram ebdeibmaca bobananyi weiknyi tentok yanmar. Ba, Er Imtamnyi biryi Er Uram keken nang ati, lebkwan tenen diryuryanmar!” eboka Er Imtamnyi bisi si weik erebmai.

¹⁷Ura, Er Yesus biryi a kubmou deyok ati, Yahudi yala nang kuramnyi mutuk atei nirya ebdanin yibinmai.

¹⁸Yohanes ninyi me dongoramunyi bira ninyi wenen ai umbura dongoamnyi bok, Er Yesus kuramwe dinyi nirya Yohanes er miliramnyi nang aryi er dam nukmai asi kekebmou.

¹⁹Kekebmou ura, Yohanes biryi er milirandei nang ninyi bitinyi nabmou ci, “Er Yesus bisi birurumnyi ura, ato eboka asibdenkwandururum! ‘Kanda, aminda yankwandanyi eboka dibde bukunubnyi a kunum yaumwe do? Kum aminda yuknyi ton do yankwandanyi bisi dibde bukwanub do?’ eboka asirderbirurum!” ebmou ura, bokdonokmou.

²⁰Ba, a bitinyi nang aryi Er Yesus dam binmarei ura, sunci ato ebmarei, “Nunda Yohanes ninyi me dongonanyi biryi, Kansi asirderbirurum eboka bokdonokmasir ati yanmanim. Ara, ato ebmar, ‘Kanda, aminda yankwandanyi eboka dibde bukunubnyi a kunum yaumwe do? Kum, yuknyi aminda ton do yankwandanyi bisi dibde bukwanub do?’ eboka asibmakir,” ebmarei.

²¹A talak ara Er Yesus bira u yiramwe nang ninyi ilinto kwetenmou ba, mambul kanya boramnyi nang ara kanya leng-leng erdeirinmou ba, isa kanya wengnamwe nang ara yangdonongmou. Ba, asing kuramwe nang ninyi ilinto asi asing kerket dinyi karenmou ba, lak einmai bok, a bitinyi nang bindoka asibmarei.

²²Ura, Er Yesus biryi a bitinyi nang asi ebmou, “Birurumnyi ura, sun asing aryi eibmarurum to ab kekebmarurum to ab Yohanes bisi bindoka ebdururum! Asing kurur nang ara elengdeirinman ba, asing einmang. Ba, yan denerur nang ara niningdeirinman ba, tikoka yibaronmang. Ba, susa talerur nang ara akarsangdonmar ba, amol kiningdur nang ara amol kungdeirinman ba, ninyi uram kekenmang. Ba, din nang ara kam burdeirinman ba, sun dam nang aryi sisikoka utotoa ukubman kum aryi, ‘Er Imtamnyi biryi lebsute,’ teneboka dibde buraming nang ati Teleb Uram eterenman ci, ‘Nira sun Lebkwansinanyi sirya yase,’ enman. Asi, sun asing eibmarurum to ab kekebmarurum to ab Yohanes dam bindoka ebkwandurum!

²³Sun yuk nang aryi Nisi dirderaning uca, Ninyi Lemnanyi yaci ura, ato kubkwansir tenenung to kum bok, sunda, ‘Se,’ teneboka Nisi, ‘Ni li,’ tenenina kum nang ara Er Imtamnyi biryi kisal dangsurur,” ebmou.

²⁴Ura, Yohanes bokdonokmou nang sirya tamuboka binmarei ura, Er Yesus biryi ninyi ilinto asi Yohanes deyok ati uram ebkalibmou. “Sun ninyi kun kum mutuk ara unatoa ati binkwamandaute do? Yohanes bira kumwe donmaci uca, mutuk otong asi co sungsunga lulungnande atonyi kum kurur.

²⁵Yohanes ongon aling diboka liliboka ongobmaci asi eibtibyi tenen dirbinkwamandaute do? Erda ongon aling diboka liliboka ongororutnyi kum kurur. Ongon aling diboka liliboka ongoraming nang ara weik sien nang kuraming ai dam kuboka teleb-teleb dinyi akwe yibde kuraming.

²⁶Sun unatoa ati dirbinkwamandaute do? ‘Er Imtamnyi Uram ebdeibmaca bobananyi bisi eibtibyi,’ tenen ati binkwamandaute do? A tenebmamunyi ura, diba. Niryi sunsi ebkwinsin ara anyi bira Er Imtamnyi Uram ebdeibmaca bobananyi iya bikdobnyi kurur.

²⁷Ati, Yohanes er deyok ara minob uca Er Imtamnyi biryi Er uram ebdeibmaca bobaramunyi si Maleakhi deici ebdeiamwe ba, sirya kerek sekeibwe ara ato, ‘Dirandarur, Ni Imtamnyi biryi ninyi tentok Ni uram er deici ebdeibnyi ba, ebmurubkwandanyi bokdonokwan. Ba, anyi biryi ninyi Lebkwandanyi biti bisik yabde menekwande,’ eboka kerek sekdeibwe,” ebmou. (Maleakhi 3:1)

²⁸Er Yesus biryi ato ebmou cok, ton ato ebmou, “Niryi sunsi ebkwinsin, ninyi nirya ara Yohanes deici tam kuboka erebdob nang ton kum kundarur. Erda unanyi biryi Er Imtamnyi bira ninyi leboka kalingna Weik Sienyi kurur amwetam kun nang kankan aryi luknubdongo kurandinyi bira Yohanes amwetam kibkweteboka Erebdobnyi kurandiryi,” ebmou.

²⁹Ba, Er Yesus biryi a enmou ba, kekenmai nang kankan ara, “Roma weik sienyi Kaisar biti pajak dengna karebdarur,” en nang ababyi wekmai ci, kekenmai aryi, Er Imtamnyi bira diba eboka sun tenen dinyi lak ebmai. Ara, Yohanes bisi me dongobsurum eboka bobinmai ba, me sirya dongobmou deyok aryi, ato ebmai.

³⁰Bok, Farisi nang ab Musa kerek sengna etereramnyi nang ab ara Er Imtamnyi biryi sunti teneibmou dinyi ara kum bikmai deyok aryi, sunda, “Yohanes biryi me dongosina nun li,” tenebmai.

³¹Er Yesus biryi uram ton ebmou ara, “Niryi una dinyi aryi a talak kundarur nang sunti kikliboka lilibdeibsitinyi do? Tonda una dinyi asi sunda ato nang ebsitinyi do?

³²A nang sunti kiklin dinyi ara mitik mabwe aryi dengna ai dam arikal donmangiryi bukoka uram dordaraming to kundarur, ‘ “Nunda sunbabyi mot sebmilibdobkwansindarur,” tenen ati mot semab bok, sunda mot kum sebmilibdobmasurum,’ erdaraming to kundarur nang. Ba, ton erdaraming to ara, ‘ “Nunda sunbabyi ninyi dibmangnyi ba, urumna eboka engeraming to boukwe eiboka engebkwandarur,” tenen ninyi boukwe eimni tanyi enmab bok, sunbabyi kum engenmarum,’ ebde dordaraming to kundarur nang.

³³Ato kuboka Yohanes ninyi me dongonanyi a yandoka kuramwe talak ara kum miliransou ci, roti kwaning ab co anggur du yung ab kum yiramwe deyok aryi, sunci, ‘Anyi bira isa kanya wekunyi,’ erandau.

³⁴Ani, ukuryok ara Ni Ninyi Dasinyi yandoka kunun ci, sunci, ‘Yesus bira nun kunmabto milibkwasir,’ tenerandum bok, Niryi sunsi kum miliransinci, Niryi kwaning ab me yinmanyi ura, sunci Nisi ato enindarur, ‘Dibdendarur e! Anyi bira kwaning yin louranyi ab walina talen me yin biryi, “Roma weik sienyi Kaisar biti pajak dengna karebdarur,” en nang ab malyi kun dinyi kunung nang ab sun kwit kibdoburyi tonkwa kunung,’ enindarur.

³⁵Bok, Er Imtamnyi bingna yangan bisik lak kimnande ara Er Imtamnyi bingna dinyi bikoka kunuraming nang sun biriman aryi lak kimdeirande,” ebmou.

³⁶Uki tentok tum ara Musa kerek sengna dirniliramunyi nang Farisinyi si Simon biryi Er Yesus bisi, “Ni ai yina tonkwa yibkwanim,” eboka nabmou. Ba, Er Yesus biryi anyi ai yanmou ura, tonkwa bukoka yina yinmai.

³⁷Akatei ara malyi kun dinyi ilinto kuramwe ani, taklobmou ner tentok kuramwe. A ner aryi kekenmou uca, “Er Yesus bira Farisinyi ai yanmar ba, yina tonkwa yibmaring,” ebmai asi kekebmou. Ura, a ner aryi mitik to keil moyok asi tong teleb co yung kibdeiamwe doubdobmou ura, akai wengbinmou.

³⁸Akai wengbinmou ura, engenmou cok, Er Yesus bukoka yan donokmoua dam tingbinmou ura, Er Yesus yan asi asimaka aryi tubdeiboka a ner er otong aryi kilibmou. Ura, Er Yesus yan asi uw kunkunubdobmou ci, mitik to keil moyok tong teleb co yung kibdeimwe ara bublan tirikna dam bulakaboka Er Yesus yan deici asi lubdeibmou.

³⁹Ba, a ner aryi kunmou to ara Er Yesus, “Ni ab tonkwa yibkwanim,” eboka nabmounyi biryi eibmou ura, er kanya tam aryi ato tenebmou, “Se nai kobe, anyi bira Er Imtamnyi Uram ebdeibmaca bobananyi kuraunte ura, a yandoka kunmanir ner ara, ‘Dan to ner aryi kunmanir do? Tonda a ner ara una kurur ner aryi kunmanir do?’ tenebmote. A ner aryi malyi kun dinyi kurur ara bingdur cok, ‘Ni li,’ kum ebmar ati, anyi bira Er Imtamnyi biryi uram ebdeibmaca bobananyi kum kurur,” tenebmou.

⁴⁰Asi, Er Yesus biryi anyi bisi ato ebmou, “Simon, Niryi kansi uram ton ebkwankin,” ebmou. Uca, Simon biryi, “Yo, ni Nai ninyi eterenanyi ur ebdum,” ebmou.

⁴¹Ato ebmou ura, Er Yesus biryi ato ebmou, “Ninyi bitinyi aryi ninyi tentoknyi co bok asi moloboka bobloantiring. tonyi bira yubwa-yubwa amubaryi bobloante ba, tonyi bira sirik amubaryi bobloante.

⁴²Ba, sunci a bobloantiring co bok ara dekdeibman kum aryi tuba bobloanting ura, a co bok damnyi biryi, ‘Malyi, dengdening kum, ur taklobokdururum!’ eboka sun bobloantiring dinyi luba kibte. Ba, a bitinyi nang ara unanyi biryi co bok damnyi bisi, ‘Ni nai,’ tenebte do?” eboka asibdenmou.

⁴³Uca, Simon biryi, “Ni tenebman ara, ‘Co bok yubwa-yubwa amubaryi bobloantunyi biryi, “Ni nai teleb,” tenebkwamote,’” ebmou. Ba, Er Yesus biryi, “Kan tenebmarim to ara diba,” ebmou.

⁴⁴A sirya ebmou ura, Er Yesus biryi a ner tam urasin danguronguryok, Simon bisi, “A ner kubmar dinyi ara eibmarim do? Ni kan ai yanman ura, nun atei nang kunub to kanci Ni yan ilingna me ton kum ilikdeibmanirim. Bok, a ner ara er asimaka aryi Ni yan me ilikeiboka er otong aryi kilibmanir.

⁴⁵Ba tonda, kanda nun atei nang kunub to, Ni katum ababyi uw ton kum kunkunubmanirim bok, erda ton tanglona kum uca, yuma wengyanmou aryi Ni yan asi uw kunkununmanir.

⁴⁶Tonda, kanda nun atei nang kunub to, malyi tenen co yung ababyi ton Ni kisok dub ton kum dikeibmanirim bok, a ner ara erci Ni yan asi tong teleb co yung dikeibmanir.

⁴⁷A deyok aryi, Niryi kansi ebkwinkin, a ner ara er malyi kun dinyi ilinto kurur dinyi sirya kilibman ba, a ner aryi Nisi mitik kum boukwe kibmanir. Bok, yuk nang ara sun malyi kun dinyi ababyi mitikanun kiliran ba, sunci Nisi mitikanun boukwe kimdaning,” ebmou.

⁴⁸Ato ebmou ura, a ner asi, “Kan malyi kurum dinyi sirya kilibmakin,” ebmou.

⁴⁹Ba, Er Yesus ab tonkwa bukoka yinmai nang aryi, ato tenebmai, “Se anyi bira unanyi bitonyi biryi a ner asi, ‘Niryi kan malyi kun dinyi kilibmakin,’ ebmar do? Nun tukwetam nang ara ninyi malyi kun dinyi kilibmanto nang ara ton kum kunub. Erda, ninyi malyi kun dinyi kilisurutnyi bira Er Imtamnyi tentok asi ato ebmar,” tenebmai.

⁵⁰Bok, Er Yesus biryi a ner asi, “Kanci, Nisi, ‘Diba Er Imtamnyi bokwetebunyi kurur aryi ni malyi kun dinyi sirya kilibmanir,’ tenebmarim deyok aryi, lebmakin ati, kilkil kanya boboka teleb akwe bindobkwamarim,” ebmou.